[519] Atha kho āyasmā ānando dakkhiṇāgirismiṁ yathābhirantaṁ
cārikaṁ caritvā yena rājagahaṁ veḷuvanaṁ kalandakanivāpaṁ 1 yenāyasmā
mahākassapo tenupasaṅkami upasaṅkamitvā āyasmantaṁ mahākassapaṁ
abhivādetvā ekamantaṁ nisīdi. Ekamantaṁ nisinnaṁ kho āyasmantaṁ
ānandaṁ āyasmā mahākassapo etadavoca kati nu kho āvuso
ānanda atthavase paṭicca bhagavatā kulesu tikabhojanaṁ paññattanti.

[520] Tayo kho bhante kassapa atthavase paṭicca bhagavatā
kulesu tikabhojanaṁ paññattaṁ dummaṅkūnaṁ puggalānaṁ niggahāya pesalānaṁ
bhikkhūnaṁ phāsuvihārāya mā pāpicchā pakkhaṁ nissāya saṅghaṁ bhindeyyuṁ
kulānudayatāya ca ime kho bhante kassapa tayo atthavase paṭicca
bhagavatā kulesu tikabhojanaṁ paññattanti.

[521] Atha kiñcarahi tvaṁ āvuso ānanda imehi [2]- bhikkhūhi
indriyesu aguttadvārehi bhojane amattaññūhi jāgariyaṁ ananuyuttehi
saddhiṁ cārikaṁ carasi sassaghātaṁ maññe carasi kulappaghātaṁ 3 maññe
carasi olujjati kho te āvuso ānanda parisā palujjanti
1 Ma. Yu. kalandakanivāpo. 2 Ma. Yu. navehi. 3 Ma. kulūpaghātaṁ. Yu. kulupaghātaṁ.
evamuparipi.
Kho te āvuso ānanda navappāyā na vāyaṁ kumārako
mattamaññāsīti. Api me bhante kassapa sirasmiṁ palitāni jātāni
atha ca pana mayaṁ ajjāpi āyasmato mahākassapassa kumārakavādā
na muccāmāti. Tathā hi pana tvaṁ āvuso ānanda imehi navehi
bhikkhūhi indriyesu aguttadvārehi bhojane amattaññūhi jāgariyaṁ
ananuyuttehi saddhiṁ cārikaṁ carasi sassaghātaṁ maññe carasi kulappaghātaṁ
maññe carasi olujjati kho te āvuso ānanda parisā palujjanti
kho te āvuso navappāyā na vāyaṁ kumārako mattamaññāsīti.

[522] Assosi kho thullanandā bhikkhunī ayyena kira mahākassapena
ayyo ānando vedehamuni kumārakavādena apasāditoti.
Atha kho thullanandā bhikkhunī anattamanā anattamanavācaṁ nicchāresi
kiṁ pana ayyo mahākassapo aññatitthiyapubbo samāno ayyaṁ
ānandaṁ vedehamuniṁ kumārakavādena apasādetabbaṁ maññatīti.
Assosi kho āyasmā mahākassapo thullanandāya bhikkhuniyā imaṁ
vācaṁ bhāsamānāya.

[523] Atha kho āyasmā mahākassapo āyasmantaṁ ānandaṁ
etadavoca tagghāvuso ānanda thullanandāya bhikkhuniyā sahasā
appaṭisaṅkhā vācā bhāsitā yatohaṁ āvuso kesamassuṁ ohāretvā
kāsāyāni vatthāni acchādetvā agārasmā anagāriyaṁ pabbajito
nābhijānāmi aññaṁ satthāraṁ uddisitā 1 aññatra tena bhagavatā
1 Yu. uddisituṁ.
Arahatā sammāsambuddhena. Pubbe me āvuso āgārikabhūtassa
sato etadahosi sambādho gharāvāso rajāpatho ajjhokāso
pabbajjā nayidaṁ sukaraṁ agāraṁ ajjhāvasatā ekantaparipuṇṇaṁ
ekantaparisuddhaṁ saṅkhalikhitaṁ brahmacariyaṁ carituṁ yannūnāhaṁ kesamassuṁ
ohāretvā kāsāyāni vatthāni acchādetvā agārasmā anagāriyaṁ
pabbajeyyanti. So khvāhaṁ āvuso aparena samayena paṭapilotikānaṁ
saṅghāṭiṁ karitvā 1 ye loke arahanto te uddissa kesamassuṁ
ohāretvā kāsāyāni vatthāni acchādetvā agārasmā anagāriyaṁ
pabbajiṁ so evaṁ pabbajito samāno addhānamaggaṁ paṭipanno
addasaṁ bhagavantaṁ antarā ca rājagahaṁ antarā ca nāḷandaṁ
bahuputtacetiye nisinnaṁ disvāna me etadahosi satthārañca vatāhaṁ
passeyyaṁ bhagavantameva passeyyaṁ sugatañca vatāhaṁ passeyyaṁ
bhagavantameva passeyyaṁ sammāsambuddhañca vatāhaṁ passeyyaṁ bhagavantameva
passeyyanti. So khvāhaṁ āvuso tattheva bhagavato pādesu
sirasā nipatitvā bhagavantaṁ etadavocaṁ satthā me bhante bhagavā
sāvakohamasmi satthā me bhante bhagavā sāvakohamasmīti.

[524] Evaṁ vutte maṁ āvuso bhagavā etadavoca yo kho
kassapa evaṁ sabbacetaso samannāhataṁ 2 sāvakaṁ ajānaññeva vadeyya
jānāmīti apassaññeva vadeyya passāmīti muddhāpi tassa
vipateyya. Ahaṁ kho pana kassapa jānaññeva vadāmi jānāmīti
1 Ma. kāretvā. 2 Ma. sabbacetasā samanāgataṁ. Yu. sabbaṁ cetasā samanāgataṁ.
Passaññeva vadāmi passāmīti. Tasmātiha te kassapa evaṁ
sikkhitabbaṁ tibbaṁ me hirottappaṁ paccupaṭṭhitaṁ bhavissati theresu
navesu majjhimesūti evañhi te kassapa sikkhitabbaṁ. Tasmātiha
te kassapa evaṁ sikkhitabbaṁ yaṅkañci dhammaṁ suṇissāmi kusalūpasañhitaṁ
sabbantaṁ aṭṭhikatvā manasikaritvā sabbacetaso samannāharitvā
ohitasoto dhammaṁ suṇissāmīti evañhi te kassapa sikkhitabbaṁ.
Tasmātiha te kassapa evaṁ sikkhitabbaṁ sātasahagatā ca me
kāyagatāsati na vijahissatīti evañhi te kassapa sikkhitabbanti.
Atha kho maṁ āvuso bhagavā iminā ovādena ovaditvā
uṭṭhāyāsanā pakkāmi. Sattāhameva khohaṁ āvuso sāṇo 1
raṭṭhapiṇḍaṁ bhuñjiṁ atha aṭṭhamiyā aññā udapādi. Atha kho
āvuso bhagavā maggā okkamma yena aññataraṁ rukkhamūlaṁ
tenupasaṅkami. Atha khvāhaṁ āvuso paṭapilotikānaṁ saṅghāṭiṁ catugguṇaṁ
paññapetvā bhagavantaṁ etadavocaṁ idha bhante bhagavā nisīdatu yaṁ
mamassa dīgharattaṁ hitāya sukhāyāti. Nisīdi kho āvuso bhagavā
paññatte āsane. Nisajja kho maṁ āvuso bhagavā etadavoca
mudukā kho tyāyaṁ kassapa paṭapilotikānaṁ saṅghāṭīti. Paṭiggaṇhātu
me bhante bhagavā paṭapilotikānaṁ saṅghāṭiṁ anukampaṁ upādāyāti.
Dhāressasi pana me tvaṁ kassapa sāṇāni paṁsukūlāni nibbasanānīti.
Dhāressāmahaṁ bhante bhagavato sāṇāni paṁsukūlāni nibbasanānīti.
1 Ma. saraṇo.

[525] So khvāhaṁ āvuso paṭapilotikānaṁ saṅghāṭiṁ bhagavato
pādāsiṁ ahaṁ panassa bhagavato sāṇāni paṁsukūlāni nibbasanāni
paṭipajjiṁ. Yañhi taṁ āvuso sammā vadamāno vadeyya bhagavato
putto oraso mukhato jāto dhammajo dhammanimmito
dhammadāyādo paṭiggahitāni sāṇāni paṁsukūlāni nibbasanānīti mamaṁ taṁ
sammā vadamāno vadeyya bhagavato putto oraso mukhato jāto
dhammajo dhammanimmito dhammadāyādo paṭiggahitāni sāṇāni paṁsukūlāni
nibbasanānīti.

[526] Ahaṁ kho āvuso yāvadeva ākaṅkhāmi vivicceva kāmehi
vivicca akusalehi dhammehi savitakkaṁ savicāraṁ vivekajaṁ pītisukhaṁ paṭhamaṁ
jhānaṁ upasampajja viharāmi. Ahaṁ kho āvuso yāvadeva ākaṅkhāmi
.pe. [navannaṁ anupubbavihārasamāpattīnaṁ pañcannañca abhiññānaṁ
evaṁ peyyālo].

[527] Ahaṁ kho āvuso āsavānaṁ khayā anāsavaṁ cetovimuttiṁ
paññāvimuttiṁ diṭṭheva dhamme sayaṁ abhiññā sacchikatvā upasampajja
viharāmi. Sattaratanaṁ vā so āvuso nāgaṁ aḍḍhaṭṭhamaratanaṁ vā
tālapattikāya chādetabbaṁ maññeyya yo maṁ chahi abhiññāhi
chādetabbaṁ maññeyyāti. Cavittha ca pana thullanandā bhikkhunī
brahmacariyamhāti. Ekādasamaṁ.

[528] Ekaṁ samayaṁ āyasmā ca mahākassapo āyasmā ca
Sārīputto bārāṇasiyaṁ viharanti isipatane migadāye. Atha kho
āyasmā sārīputto sāyaṇhasamayaṁ paṭisallānā vuṭṭhito yenāyasmā
mahākassapo tenupasaṅkami upasaṅkamitvā āyasmatā mahākassapena
saddhiṁ sammodi sammodanīyaṁ kathaṁ sārāṇīyaṁ vītisāretvā
ekamantaṁ nisīdi.