[399] Sāvatthiyaṁ viharati ... Tatra kho bhagavā ... Dhātusova
bhikkhave sattā saṁsandanti samenti micchādiṭṭhikā micchādiṭṭhikehi
saddhiṁ saṁsandanti samenti micchāsaṅkappā ... Micchāvācā ...
Micchākammantā ... Micchāājīvā ... Micchāvāyāmā ...
Micchāsatino ... Micchāsamādhino micchāsamādhīhi saddhiṁ saṁsandanti samenti.

[400] Sammādiṭṭhikā sammādiṭṭhikehi saddhiṁ saṁsandanti samenti
sammāsaṅkappā ... Sammāvācā ... Sammākammantā ... Sammā-
ājīvā ... Sammāvāyāmā ... Sammāsatino ... Sammāsamādhino
sammāsamādhīhi saddhiṁ saṁsandanti samentīti. Chaṭṭhaṁ.

[401] Sāvatthiyaṁ viharati ... Tatra kho bhagavā ... Dhātusova
bhikkhave sattā saṁsandanti samenti micchādiṭṭhikā micchādiṭṭhikehi
saddhiṁ saṁsandanti samenti micchāsaṅkappā ... Micchāvācā ...
Micchākammantā ... Micchāājīvā ... Micchāvāyāmā ...
Micchāsatino ...
Micchāsamādhino micchāsamādhīhi saddhiṁ saṁsandanti samenti micchāñāṇino
micchāñāṇīhi saddhiṁ saṁsandanti samenti micchāvimuttino
micchāvimuttīhi saddhiṁ saṁsandanti samenti.

[402] Sammādiṭṭhikā sammādiṭṭhikehi saddhiṁ saṁsandanti samenti
sammāsaṅkappā ... Sammāvācā ... Sammākammantā ... Sammā-
ājīvā ... Sammāvāyāmā ... Sammāsatino ... Sammāsamādhino ...
Sammāñāṇino sammāñāṇīhi saddhiṁ saṁsandanti samenti sammāvimuttino
sammāvimuttīhi saddhiṁ saṁsandanti samentīti. Sattamaṁ. [sabbattha
atītānāgatapaccuppannaṁ kātabbaṁ].
Sattannaṁ suttantānaṁ uddānaṁ
asamāhitañca 1 dussīlaṁ 2 pañcasikkhāpadāni ca
sattakammapathā vuttā dasakammapathena ca
chaṭṭhaṁ aṭṭhaṅgiko vutto dasahi aṅgehi 3 ca 4 sattamaṁ.
Dasakammapathavaggo tatiyo.
-------------
1 Ma. Yu. casaddo natthi. 2 Yu. dussīlyaṁ. 3 Ma. Yu. dasaṅgena. 4 Po. pana.
Catutthavaggo catuttho

[403] Ekaṁ samayaṁ bhagavā sāvatthiyaṁ viharati jetavane
anāthapiṇḍikassa ārāme. Catasso imā bhikkhave dhātuyo.
Katamā catasso. Paṭhavīdhātu āpodhātu tejodhātu vāyodhātu.
Imā kho bhikkhave catasso dhātuyoti. Paṭhamaṁ.

[404] Pubbeva me bhikkhave sambodhā anabhisambuddhassa
bodhisattasseva sato etadahosi ko nu kho paṭhavīdhātuyā assādo
ko ādīnavo kiṁ nissaraṇaṁ ko āpodhātuyā assādo ko
ādīnavo kiṁ nissaraṇaṁ ko tejodhātuyā assādo ko ādīnavo
kiṁ nissaraṇaṁ ko vāyodhātuyā assādo ko ādīnavo kiṁ
nissaraṇanti. Tassa mayhaṁ bhikkhave etadahosi yaṁ kho paṭhavīdhātuṁ
paṭicca uppajjati sukhaṁ somanassaṁ ayaṁ paṭhavīdhātuyā assādo yaṁ
paṭhavīdhātu 1 aniccā dukkhā vipariṇāmadhammā ayaṁ paṭhavīdhātuyā ādīnavo
yo 2 paṭhavīdhātuyā chandarāgavinayo chandarāgappahānaṁ idaṁ paṭhavīdhātuyā
nissaraṇaṁ. Yaṁ āpodhātuṁ paṭicca ... Yaṁ tejodhātuṁ paṭicca ... Yaṁ
vāyodhātuṁ paṭicca uppajjati sukhaṁ somanassaṁ ayaṁ vāyodhātuyā
assādo yaṁ vāyodhātu aniccā dukkhā vipariṇāmadhammā ayaṁ
vāyodhātuyā ādīnavo yo 2 vāyodhātuyā chandarāgavinayo
chandarāgappahānaṁ idaṁ vāyodhātuyā nissaraṇaṁ 3 .
1 Yu. paṭhavīdhātuyā. evamuparipi. 2 Yu. yaṁ. 3 Po. itisaddo dissati.

[405] Yāvakīvañcāhaṁ bhikkhave imāsaṁ catunnaṁ dhātūnaṁ evaṁ
assādañca assādato ādīnavañca ādīnavato nissaraṇañca nissaraṇato
yathābhūtaṁ nābbhaññāsiṁ neva tāvāhaṁ bhikkhave sadevake loke
samārake sabrahmake sassamaṇabrāhmaṇiyā pajāya sadevamanussāya
anuttaraṁ sammāsambodhiṁ abhisambuddho 1 paccaññāsiṁ. Yato ca khvāhaṁ
bhikkhave imāsaṁ catunnaṁ dhātūnaṁ evaṁ assādañca assādato
ādīnavañca ādīnavato nissaraṇañca nissaraṇato yathābhūtaṁ abbhaññāsiṁ
athāhaṁ bhikkhave sadevake loke samārake sabrahmake
sassamaṇabrāhmaṇiyā pajāya sadevamanussāya anuttaraṁ sammāsambodhiṁ
abhisambuddho 2 paccaññāsiṁ. Ñāṇañca pana me dassanaṁ udapādi
akuppā me vimutti 3 ayamantimā jāti natthidāni punabbhavoti. Dutiyaṁ.

[406] Sāvatthiyaṁ viharati ... Tatra kho bhagavā ... Paṭhavīdhātuyāhaṁ
bhikkhave assādapariyesanaṁ acariṁ yo paṭhavīdhātuyā assādo
tadajjhagamaṁ yāvatā paṭhavīdhātuyā assādo paññāya me so
sudiṭṭho. Paṭhavīdhātuyāhaṁ bhikkhave ādīnavapariyesanaṁ acariṁ yo
paṭhavīdhātuyā ādīnavo tadajjhagamaṁ yāvatā paṭhavīdhātuyā ādīnavo
paññāya me so sudiṭṭho. Paṭhavīdhātuyāhaṁ bhikkhave nissaraṇapariyesanaṁ
acariṁ yaṁ paṭhavīdhātuyā nissaraṇaṁ tadajjhagamanaṁ yāvatā
paṭhavīdhātuyā nissaraṇaṁ paññāya me taṁ sudiṭṭhaṁ. Āpodhātuyāhaṁ
bhikkhave .pe. Tejodhātuyāhaṁ bhikkhave ... Vāyodhātuyāhaṁ bhikkhave
1-2 Po. Ma. Yu. abhisambuddhoti. evamuparipi. 3 Yu. cetovimutti.
Assādapariyesanaṁ acariṁ yo vāyodhātuyā assādo tadajjhagamaṁ
yāvatā vāyodhātuyā assādo paññāya me so sudiṭṭho.
Vāyodhātuyāhaṁ bhikkhave ādīnavapariyesanaṁ acariṁ yo vāyodhātuyā
ādīnavo tadajjhagamaṁ yāvatā vāyodhātuyā ādīnavo paññāya
me so sudiṭṭho. Vāyodhātuyāhaṁ bhikkhave nissaraṇapariyesanaṁ acariṁ
yaṁ vāyodhātuyā nissaraṇaṁ tadajjhagamaṁ yāvatā vāyodhātuyā nissaraṇaṁ
paññāya me taṁ sudiṭṭhaṁ.

[407] Yāvakīvañcāhaṁ bhikkhave imāsaṁ catunnaṁ dhātūnaṁ assādañca
assādato ādīnavañca ādīnavato nissaraṇañca nissaraṇato yathābhūtaṁ
na abbhaññāsiṁ neva tāvāhaṁ bhikkhave sadevake loke samārake
sabrahmake sassamaṇabrāhmaṇiyā pajāya sadevamanussāya anuttaraṁ
sammāsambodhiṁ abhisambuddho paccaññāsiṁ. Yato ca khvāhaṁ bhikkhave
imāsaṁ catunnaṁ dhātūnaṁ assādañca assādato ādīnavañca ādīnavato
nissaraṇañca nissaraṇato yathābhūtaṁ abbhaññāsiṁ athāhaṁ bhikkhave
sadevake loke samārake sabrahmake sassamaṇabrāhmaṇiyā pajāya
sadevamanussāya anuttaraṁ sammāsambodhiṁ abhisambuddho paccaññāsiṁ.
Ñāṇañca pana me dassanaṁ udapādi akuppā me vimutti ayamantimā
jāti natthidāni punabbhavoti. Tatiyaṁ.

[408] Sāvatthiyaṁ viharati ... Tatra kho bhagavā ... No cedaṁ
bhikkhave paṭhavīdhātuyā assādo abhavissa nayidaṁ sattā paṭhavīdhātuyā
Sārajjeyyuṁ. Yasmā ca kho bhikkhave atthi paṭhavīdhātuyā assādo
tasmā sattā paṭhavīdhātuyā sārajjanti. No cedaṁ bhikkhave paṭhavīdhātuyā
ādīnavo abhavissa nayidaṁ sattā paṭhavīdhātuyā nibbindeyyuṁ.
Yasmā ca kho bhikkhave atthi paṭhavīdhātuyā ādīnavo tasmā sattā
paṭhavīdhātuyā nibbindanti. No cedaṁ bhikkhave paṭhavīdhātuyā nissaraṇaṁ
abhavissa nayidaṁ sattā paṭhavīdhātuyā nissareyyuṁ. Yasmā ca kho
bhikkhave atthi paṭhavīdhātuyā nissaraṇaṁ tasmā sattā paṭhavīdhātuyā
nissaranti. No cedaṁ bhikkhave āpodhātuyā assādo abhavissa ...
No cedaṁ bhikkhave tejodhātuyā ... No cedaṁ bhikkhave vāyodhātuyā
assādo abhavissa nayidaṁ sattā vāyodhātuyā sārajjeyyuṁ. Yasmā
ca kho bhikkhave atthi vāyodhātuyā assādo tasmā sattā
vāyodhātuyā sārajjanti. No cedaṁ bhikkhave vāyodhātuyā ādīnavo
abhavissa nayidaṁ sattā vāyodhātuyā nibbindeyyuṁ. Yasmā ca kho
bhikkhave atthi vāyodhātuyā ādīnavo tasmā sattā vāyodhātuyā
nibbindanti. No cedaṁ bhikkhave vāyodhātuyā nissaraṇaṁ abhavissa
nayidaṁ sattā vāyodhātuyā nissareyyuṁ. Yasmā ca kho bhikkhave atthi
vāyodhātuyā nissaraṇaṁ tasmā sattā vāyodhātuyā nissaranti.