[129] Evaṁ vutte aññataro bhikkhu bhagavantaṁ etadavoca
katamaṁ nu kho bhante jarāmaraṇaṁ kassa ca panidaṁ jarāmaraṇanti.
No kallo pañhoti bhagavā avoca katamaṁ jarāmaraṇaṁ kassa ca
panidaṁ jarāmaraṇanti iti vā bhikkhu yo vadeyya aññaṁ jarāmaraṇaṁ
aññassa ca panidaṁ jarāmaraṇanti iti vā bhikkhu yo vadeyya
ubhayametaṁ ekatthaṁ byañjanameva nānaṁ. Taṁ jīvaṁ taṁ sarīranti vā
bhikkhu diṭṭhiyā sati brahmacariyavāso na hoti aññaṁ jīvaṁ aññaṁ
sarīranti vā bhikkhu diṭṭhiyā sati brahmacariyavāso na hoti.
Ete te bhikkhu ubho ante anupagamma majjhena tathāgato dhammaṁ
deseti jātipaccayā jarāmaraṇanti.

[130] Katamā nu kho bhante jāti kassa ca panāyaṁ jātīti.
No kallo pañhoti bhagavā avoca katamā jāti kassa ca
panāyaṁ jātīti iti vā bhikkhu yo vadeyya aññā jāti aññassa
ca panāyaṁ jātīti iti vā bhikkhu yo vadeyya ubhayametaṁ ekatthaṁ
byañjanameva nānaṁ. Taṁ jīvaṁ taṁ sarīranti vā bhikkhu diṭṭhiyā sati
brahmacariyavāso na hoti aññaṁ jīvaṁ aññaṁ sarīranti vā bhikkhu
diṭṭhiyā sati brahmacariyavāso na hoti. Ete te bhikkhu ubho
ante anupagamma majjhena tathāgato dhammaṁ deseti bhavapaccayā
jātīti.

[131] Katamo nu kho bhante bhavo kassa ca panāyaṁ bhavoti.
No kallo pañhoti bhagavā avoca katamo bhavo kassa ca
panāyaṁ bhavoti iti vā bhikkhu yo vadeyya añño bhavo aññassa
ca panāyaṁ bhavoti iti vā bhikkhu yo vadeyya ubhayametaṁ ekatthaṁ
byañjanameva nānaṁ. Taṁ jīvaṁ taṁ sarīranti vā bhikkhu diṭṭhiyā sati
brahmacariyavāso na hoti aññaṁ jīvaṁ aññaṁ sarīranti vā bhikkhu
diṭṭhiyā sati brahmacariyavāso na hoti. Ete te bhikkhu ubho
ante anupagamma majjhena tathāgato dhammaṁ deseti upādānapaccayā
bhavoti .pe. Taṇhāpaccayā upādānanti ... Vedanāpaccayā
Taṇhāti ... Phassapaccayā vedanāti ... Saḷāyatanapaccayā
phassoti ... Nāmarūpapaccayā saḷāyatananti ... Viññāṇapaccayā
nāmarūpanti ... Saṅkhārapaccayā viññāṇanti.

[132] Katame nu kho bhante saṅkhārā kassa ca panime
saṅkhārāti. No kallo pañhoti bhagavā avoca katame saṅkhārā
kassa ca panime saṅkhārāti iti vā bhikkhu yo vadeyya aññe
saṅkhārā aññassa ca panime saṅkhārāti iti vā bhikkhu yo
vadeyya ubhayametaṁ ekatthaṁ byañjanameva nānaṁ. Taṁ jīvaṁ taṁ
sarīranti vā bhikkhu diṭṭhiyā sati brahmacariyavāso na hoti aññaṁ
jīvaṁ aññaṁ sarīranti vā bhikkhu diṭṭhiyā sati brahmacariyavāso na
hoti. Ete te bhikkhu ubho ante anupagamma majjhena tathāgato
dhammaṁ deseti avijjāpaccayā saṅkhārāti.

[133] Avijjāya tveva bhikkhu asesavirāganirodhā yānissa tāni 1
visūkāyitāni visevitāni vipphanditāni kānici kānici katamaṁ jarāmaraṇaṁ
kassa ca panidaṁ jarāmaraṇaṁ iti vā aññaṁ jarāmaraṇaṁ aññassa ca
panidaṁ jarāmaraṇaṁ iti vā taṁ jīvaṁ taṁ sarīraṁ iti vā aññaṁ jīvaṁ
aññaṁ sarīraṁ iti vā sabbānissa tāni 2 pahīnāni bhavanti ucchinnamūlāni
tālāvatthukatāni anabhāvaṅgatāni āyatiṁ anuppādadhammāni.

[134] Avijjāya tveva bhikkhu asesavirāganirodhā yānissa tāni
visūkāyitāni visevitāni vipphanditāni kānici kānici katamā jāti
1 Yu. yānissitāni. evamuparipi. 2 Yu. sabbānissitāni. evamuparipi.
Kassa ca panāyaṁ jāti iti vā aññā jāti aññassa ca panāyaṁ
jāti iti vā taṁ jīvaṁ taṁ sarīraṁ iti vā aññaṁ jīvaṁ aññaṁ
sarīraṁ iti vā sabbānissa tāni pahīnāni bhavanti ucchinnamūlāni
tālāvatthukatāni anabhāvaṅgatāni āyatiṁ anuppādadhammāni.

[135] Avijjāya tveva bhikkhu asesavirāganirodhā yānissa tāni
visūkāyitāni visevitāni vipphanditāni kānici kānici katamo bhavo
.pe. Katamaṁ upādānaṁ ... Katamā taṇhā ... Katamā vedanā ...
Katamo phasso ... Katamaṁ saḷāyatanaṁ ... Katamaṁ nāmarūpaṁ ... Katamaṁ
viññāṇaṁ ....

[136] Avijjāya tveva bhikkhu asesavirāganirodhā yānissa tāni
visūkāyitāni visevitāni vipphanditāni kānici kānici katame saṅkhārā
kassa ca panime saṅkhārā iti vā aññe saṅkhārā aññassa
ca panime saṅkhārā iti vā taṁ jīvaṁ taṁ sarīraṁ iti vā aññaṁ
jīvaṁ aññaṁ sarīraṁ iti vā sabbānissa tāni pahīnāni bhavanti
ucchinnamūlāni tālāvatthukatāni anabhāvaṅgatāni āyatiṁ anuppādadhammānīti.
Pañcamaṁ.

[137] Sāvatthiyaṁ viharati ... Tatra kho .pe. Avijjāpaccayā
bhikkhave saṅkhārā saṅkhārapaccayā viññāṇaṁ .pe. Evametassa
kevalassa dukkhakkhandhassa samudayo hoti.

[138] Katamaṁ jarāmaraṇaṁ kassa ca panidaṁ jarāmaraṇanti iti vā
Bhikkhave yo vadeyya aññaṁ jarāmaraṇaṁ aññassa ca panidaṁ jarāmaraṇanti
iti vā bhikkhave yo vadeyya ubhayametaṁ ekatthaṁ byañjanameva
nānaṁ. Taṁ jīvaṁ taṁ sarīranti vā bhikkhave diṭṭhiyā sati
brahmacariyavāso na hoti aññaṁ jīvaṁ aññaṁ sarīranti vā bhikkhave
diṭṭhiyā sati brahmacariyavāso na hoti. Ete te bhikkhave
ubho ante anupagamma majjhena tathāgato dhammaṁ deseti
jātipaccayā jarāmaraṇanti .pe. Katamā jāti ... Katamo bhavo ...
Katamaṁ upādānaṁ ... Katamā taṇhā ... Katamā vedanā ... Katamo
phasso ... Katamaṁ saḷāyatanaṁ ... Katamaṁ nāmarūpaṁ ... Katamaṁ viññāṇaṁ ....