[833] Ekamantaṁ nisinne kho nagaravindeyyake brāhmaṇagahapatike
bhagavā etadavoca sace vo gahapatayo aññatitthiyā paribbājakā
evaṁ puccheyyuṁ kathaṁrūpā 1 gahapatayo samaṇabrāhmaṇā na
sakkātabbā na garukātabbā na mānetabbā na pūjetabbāti evaṁ
puṭṭhā tumhe gahapatayo tesaṁ aññatitthiyānaṁ paribbājakānaṁ evaṁ
byākareyyātha ye te samaṇabrāhmaṇā cakkhuviññeyyesu rūpesu
avītarāgā avītadosā avītamohā ajjhattaṁ avūpasantacittā samavisamaṁ
caranti kāyena vācāya manasā evarūpā samaṇabrāhmaṇā na sakkātabbā
na garukātabbā na mānetabbā na pūjetabbā taṁ kissa
hetu mayampi hi cakkhuviññeyyesu rūpesu avītarāgā avītadosā
avītamohā ajjhattaṁ avūpasantacittā samavisamaṁ carāma kāyena
vācāya manasā tesanno samacariyampi hetaṁ uttariṁ apassataṁ
tasmā te bhonto samaṇabrāhmaṇā na sakkātabbā na garukātabbā
na mānetabbā na pūjetabbā. Ye te samaṇabrāhmaṇā
sotaviññeyyesu saddesu ... Ghānaviññeyyesu gandhesu ... Jivhā-
viññeyyesu rasesu ... Kāyaviññeyyesu phoṭṭhabbesu ... Mano-
viññeyyesu dhammesu avītarāgā avītadosā avītamohā ajjhattaṁ
avūpasantacittā samavisamaṁ caranti kāyena vācāya manasā evarūpā
samaṇabrāhmaṇā na sakkātabbā na garukātabbā na mānetabbā
na pūjetabbā taṁ kissa hetu mayampi hi manoviññeyyesu
1 Po. Ma. sabbattha kathaṁbhūtāti dissati.
Dhammesu avītarāgā avītadosā avītamohā ajjhattaṁ avūpasantacittā
samavisamaṁ carāma kāyena vācāya manasā tesanno samacariyampi
hetaṁ uttariṁ apassataṁ tasmā te bhonto samaṇabrāhmaṇā na
sakkātabbā na garukātabbā na mānetabbā na pūjetabbāti.
Evaṁ puṭṭhā tumhe gahapatayo tesaṁ aññatitthiyānaṁ paribbājakānaṁ
evaṁ byākareyyātha.

[834] Sace pana vo gahapatayo aññatitthiyā paribbājakā
evaṁ puccheyyuṁ kathaṁrūpā gahapatayo samaṇabrāhmaṇā sakkātabbā
garukātabbā mānetabbā pūjetabbāti evaṁ puṭṭhā tumhe gahapatayo
tesaṁ aññatitthiyānaṁ paribbājakānaṁ evaṁ byākareyyātha ye te
samaṇabrāhmaṇā cakkhuviññeyyesu rūpesu vītarāgā vītadosā vītamohā
ajjhattaṁ vūpasantacittā samacariyaṁ caranti kāyena vācāya manasā
evarūpā samaṇabrāhmaṇā sakkātabbā garukātabbā mānetabbā
pūjetabbā taṁ kissa hetu mayampi hi cakkhuviññeyyesu rūpesu
avītarāgā avītadosā avītamohā ajjhattaṁ avūpasantacittā
samavisamaṁ carāma kāyena vācāya manasā tesanno samacariyampi hetaṁ
uttariṁ passataṁ tasmā te bhonto samaṇabrāhmaṇā sakkātabbā
garukātabbā mānetabbā pūjetabbā. Ye te samaṇabrāhmaṇā
sotaviññeyyesu saddesu ... Ghānaviññeyyesu gandhesu ... Jivhā-
viññeyyesu rasesu ... Kāyaviññeyyesu phoṭṭhabbesu ... Manoviññeyyesu
Dhammesu vītarāgā vītadosā vītamohā ajjhattaṁ vūpasantacittā
samacariyaṁ caranti kāyena vācāya manasā evarūpā samaṇabrāhmaṇā
sakkātabbā garukātabbā mānetabbā pūjetabbā taṁ
kissa hetu mayampi hi manoviññeyyesu dhammesu avītarāgā avītadosā
avītamohā ajjhattaṁ avūpasantacittā samavisamaṁ carāma kāyena
vācāya manasā tesanno samacariyampi hetaṁ uttariṁ passataṁ tasmā
te bhonto samaṇabrāhmaṇā sakkātabbā garukātabbā mānetabbā
pūjetabbāti. Evaṁ puṭṭhā tumhe gahapatayo tesaṁ aññatitthiyānaṁ
paribbājakānaṁ evaṁ byākareyyātha.

[835] Sace 1 te gahapatayo aññatitthiyā paribbājakā evaṁ
puccheyyuṁ ke panāyasmantānaṁ ākārā ke anvayā yena tumhe
āyasmanto evaṁ vadetha addhā te āyasmanto vītarāgā vā
rāgavinayāya vā paṭipannā vītadosā vā dosavinayāya vā paṭipannā
vītamohā vā mohavinayāya vā paṭipannāti evaṁ puṭṭhā tumhe
gahapatayo tesaṁ aññatitthiyānaṁ paribbājakānaṁ evaṁ byākareyyātha
tathā hi te āyasmanto araññavanapatthāni pantāni senāsanāni
paṭisevanti natthi kho pana tattha tathārūpā cakkhuviññeyyā rūpā
ye disvā disvā abhirameyyuṁ natthi kho pana tattha tathārūpā
sotaviññeyyā saddā ye sutvā sutvā abhirameyyuṁ natthi kho
pana tattha tathārūpā ghānaviññeyyā gandhā ye ghāyitvā ghāyitvā
1 Po. sace vo. Ma. sace pana vo.
Abhirameyyuṁ natthi kho pana tattha tathārūpā jivhāviññeyyā rasā
ye sāyitvā sāyitvā abhirameyyuṁ natthi kho pana tattha tathārūpā
kāyaviññeyyā phoṭṭhabbā ye phusitvā phusitvā abhirameyyuṁ ime
kho no āvuso ākārā ime anvayā yena mayaṁ āyasmante
evaṁ vadema addhā te āyasmanto vītarāgā vā rāgavinayāya
vā paṭipannā vītadosā vā dosavinayāya vā paṭipannā vītamohā
vā mohavinayāya vā paṭipannāti. Evaṁ puṭṭhā tumhe gahapatayo
tesaṁ aññatitthiyānaṁ paribbājakānaṁ evaṁ byākareyyāthāti.

[836] Evaṁ vutte nagaravindeyyakā brāhmaṇagahapatikā bhagavantaṁ
etadavocuṁ abhikkantaṁ bho gotama abhikkantaṁ bho gotama seyyathāpi
bho gotama nikkujjitaṁ vā ukkujjeyya paṭicchannaṁ vā vivareyya
mūḷhassa vā maggaṁ ācikkheyya andhakāre vā telapajjotaṁ dhāreyya
cakkhumanto rūpāni dakkhantīti evameva bhotā gotamena anekapariyāyena
dhammo pakāsito ete mayaṁ bhavantaṁ gotamaṁ saraṇaṁ gacchāma
dhammañca bhikkhusaṅghañca upāsake no bhavaṁ gotamo dhāretu
ajjatagge pāṇupete saraṇaṅgateti.
Nagaravindeyyasuttaṁ niṭṭhitaṁ aṭṭhamaṁ.
----------
Piṇḍapātapārisuddhisuttaṁ

[837] Evamme sutaṁ ekaṁ samayaṁ bhagavā rājagahe viharati
veḷuvane kalandakanivāpe. Atha kho āyasmā sārīputto sāyaṇhasamayaṁ
paṭisallānā vuṭṭhito yena bhagavā tenupasaṅkami upasaṅkamitvā
bhagavantaṁ abhivādetvā ekamantaṁ nisīdi. Ekamantaṁ nisinnaṁ kho
āyasmantaṁ sārīputtaṁ bhagavā etadavoca vippasannāni kho te
sārīputta indriyāni parisuddho chavivaṇṇo pariyodāto katamena [1]-
tvaṁ sārīputta vihārena etarahi bahulaṁ viharasīti. Suññatāvihārena
kho ahaṁ bhante etarahi bahulaṁ viharāmīti.

[838] Sādhu sādhu sārīputta mahāpurisavihārena kira tvaṁ
sārīputta etarahi bahulaṁ viharasi mahāpurisavihāro hesa sārīputta
yadidaṁ suññatā. Tasmātiha sārīputta bhikkhu sace ākaṅkheyya
suññatāvihārena [2]- bahulaṁ vihareyyanti tena sārīputta bhikkhunā iti
paṭisañcikkhitabbaṁ yena cāhaṁ maggena gāmaṁ piṇḍāya pāvisiṁ
yasmiñca padese piṇḍāya acariṁ yena ca maggena gāmato piṇḍāya
paṭikkamiṁ atthi nu kho me tattha cakkhuviññeyyesu rūpesu chando
vā rāgo vā doso vā moho vā paṭighaṁ vāpi cetasoti.
Sace sārīputta bhikkhu paccavekkhamāno evaṁ jānāti yena cāhaṁ
maggena gāmaṁ piṇḍāya pāvisiṁ yasmiñca padese piṇḍāya acariṁ
1 Ma. etthantare khosaddo atthi. 2 Yu. etthantare etarahi iti dissati.
Yena ca maggena gāmato piṇḍāya paṭikkamiṁ atthi me tattha
cakkhuviññeyyesu rūpesu chando vā rāgo vā doso vā moho
vā paṭighaṁ vāpi cetasoti tena sārīputta bhikkhunā tesaṁyeva
pāpakānaṁ akusalānaṁ dhammānaṁ pahānāya vāyamitabbaṁ. Sace pana
sārīputta bhikkhu paccavekkhamāno evaṁ jānāti yena cāhaṁ maggena
gāmaṁ piṇḍāya pāvisiṁ yasmiñca padese piṇḍāya acariṁ yena ca
maggena gāmato piṇḍāya paṭikkamiṁ natthi me tattha cakkhuviññeyyesu
rūpesu chando vā rāgo vā doso vā moho vā paṭighaṁ
vāpi cetasoti tena sārīputta bhikkhunā teneva pītipāmujjena 1
vihātabbaṁ ahorattānusikkhinā kusalesu dhammesu.

[839] Puna caparaṁ sārīputta bhikkhunā iti paṭisañcikkhitabbaṁ yena
cāhaṁ maggena gāmaṁ piṇḍāya pāvisiṁ yasmiñca padese piṇḍāya
acariṁ yena ca maggena gāmato piṇḍāya paṭikkamiṁ atthi nu kho
me tattha sotaviññeyyesu saddesu ... Ghānaviññeyyesu gandhesu ...
Jivhāviññeyyesu rasesu ... Kāyaviññeyyesu phoṭṭhabbesu ...
Manoviññeyyesu dhammesu chando vā rāgo vā doso vā moho vā
paṭighaṁ vāpi cetasoti. Sace sārīputta bhikkhu paccavekkhamāno
evaṁ jānāti yena cāhaṁ maggena gāmaṁ piṇḍāya pāvisiṁ yasmiñca
padese piṇḍāya acariṁ yena ca maggena gāmato piṇḍāya paṭikkamiṁ
atthi me tattha manoviññeyyesu dhammesu chando vā rāgo vā
1 Ma. sabbattha pītipāmojjena.
Doso vā moho vā paṭighaṁ vāpi cetasoti tena sārīputta
bhikkhunā tesaṁyeva pāpakānaṁ akusalānaṁ dhammānaṁ pahānāya vāyamitabbaṁ.
Sace pana sārīputta bhikkhu paccavekkhamāno evaṁ jānāti
yena cāhaṁ maggena gāmaṁ piṇḍāya pāvisiṁ yasmiñca padese piṇḍāya
acariṁ yena ca maggena gāmato piṇḍāya paṭikkamiṁ natthi me tattha
manoviññeyyesu dhammesu chando vā rāgo vā doso vā moho
vā paṭighaṁ vāpi cetasoti tena sārīputta bhikkhunā teneva
pītipāmujjena vihātabbaṁ ahorattānusikkhinā kusalesu dhammesu.

[840] Puna caparaṁ sārīputta bhikkhunā iti paṭisañcikkhitabbaṁ
pahīnā nu kho me pañca kāmaguṇāti. Sace sārīputta bhikkhu
paccavekkhamāno evaṁ jānāti appahīnā kho me pañca kāmaguṇāti
tena sārīputta bhikkhunā pañcannaṁ kāmaguṇānaṁ pahānāya vāyamitabbaṁ.
Sace pana sārīputta bhikkhu paccavekkhamāno evaṁ jānāti pahīnā
kho me pañca kāmaguṇāti tena sārīputta bhikkhunā teneva
pītipāmujjena vihātabbaṁ ahorattānusikkhinā kusalesu dhammesu.

[841] Puna caparaṁ sārīputta bhikkhunā iti paṭisañcikkhitabbaṁ
pahīnā nu kho me pañca nīvaraṇāti. Sace sārīputta bhikkhu
paccavekkhamāno evaṁ jānāti appahīnā kho me pañca nīvaraṇāti
tena sārīputta bhikkhunā pañcannaṁ nīvaraṇānaṁ pahānāya vāyamitabbaṁ.
Sace pana sārīputta bhikkhu paccavekkhamāno evaṁ jānāti pahīnā
Kho me pañca nīvaraṇāti tena sārīputta bhikkhunā teneva
pītipāmujjena vihātabbaṁ ahorattānusikkhinā kusalesu dhammesu.

[842] Puna caparaṁ sārīputta bhikkhunā iti paṭisañcikkhitabbaṁ
pariññātā nu kho me pañcupādānakkhandhāti. Sace sārīputta
bhikkhu paccavekkhamāno evaṁ jānāti apariññātā kho me
pañcupādānakkhandhāti tena sārīputta bhikkhunā pañcannaṁ upādānakkhandhānaṁ
pariññāya vāyamitabbaṁ. Sace pana sārīputta bhikkhu
paccavekkhamāno evaṁ jānāti pariññātā kho me pañcupādānakkhandhāti
tena sārīputta bhikkhunā teneva pītipāmujjena vihātabbaṁ
ahorattānusikkhinā kusalesu dhammesu.