[743] Seyyathāpi āvuso sārīputta [1]- puriso tiṇhena sikharena
sīsaṁ 2 abhimattheyya evameva kho me āvuso sārīputta adhimattā
vātā muddhānaṁ 3 ohananti 4 na me āvuso sārīputta khamanīyaṁ na
yāpanīyaṁ bāḷhā me dukkhā vedanā abhikkamanti no paṭikkamanti
abhikkamo sānaṁ paññāyati no paṭikkamoti.

[744] Seyyathāpi āvuso sārīputta balavā puriso daḷhena
varattakkhaṇḍena sīse sīsaveṭṭhanaṁ dadeyya evameva kho me āvuso
sārīputta adhimattā vātā sīsaṁ parikantanti na me āvuso
sārīputta khamanīyaṁ na yāpanīyaṁ bāḷhā me dukkhā vedanā
abhikkamanti no paṭikkamanti abhikkamo sānaṁ paññāyati no
paṭikkamoti.

[745] Seyyathāpi āvuso sārīputta dakkho goghātako vā
goghātakantevāsī vā tiṇhena govikantanena kucchiṁ parikanteyya
evameva kho me āvuso sārīputta adhimattā vātā kucchiṁ
parikantanti na me āvuso sārīputta khamanīyaṁ na yāpanīyaṁ bāḷhā
me dukkhā vedanā abhikkamanti no paṭikkamanti abhikkamo sānaṁ
paññāyati no paṭikkamoti.

[746] Seyyathāpi āvuso sārīputta dve balavanto purisā
dubbalataraṁ purisaṁ nānābāhāsu gahetvā aṅgārakāsuyā
santāpeyyuṁ samparitāpeyyuṁ evameva kho me āvuso sārīputta
1 Po. Ma. etthantare balavāti dissati. 2-3 Ma. muddhani. 4 Ma. ūhananti.
Adhimattā kāyasmiṁ ḍāho na me āvuso sārīputta khamanīyaṁ na
yāpanīyaṁ bāḷhā me dukkhā vedanā abhikkamanti no paṭikkamanti
abhikkamo sānaṁ paññāyati no paṭikkamo satthaṁ āvuso sārīputta
āharissāmi nāvakaṅkhāmi jīvitanti.

[747] Māyasmā channo satthaṁ āharesi yāpetāyasmā channo
yāpentaṁ mayaṁ āyasmantaṁ channaṁ icchāma sace āyasmato channassa
natthi sappāyāni bhojanāni ahaṁ āyasmato channassa sappāyāni
bhojanāni pariyesissāmi sace āyasmato channassa natthi sappāyāni
bhesajjāni ahaṁ āyasmato channassa sappāyāni bhesajjāni
pariyesissāmi sace āyasmato channassa natthi paṭirūpo upaṭṭhāko 1
ahaṁ āyasmantaṁ channaṁ upaṭṭhahissāmi māyasmā channo satthaṁ
āharesi yāpetāyasmā channo yāpentaṁ mayaṁ āyasmantaṁ channaṁ
icchāmāti.

[748] Napi me āvuso sārīputta natthi sappāyāni bhojanāni
napi me natthi sappāyāni bhesajjāni napi me natthi paṭirūpo 2
upaṭṭhāko apicāvuso sārīputta pariciṇṇo [3]- satthā dīgharattaṁ
manāpeneva no amanāpena etaṁ hi āvuso sārīputta sāvakassa
paṭirūpaṁ yaṁ satthāraṁ paricareyya manāpeneva no amanāpena anupavajjaṁ
channo bhikkhu satthaṁ āharissatīti evametaṁ āvuso sārīputta
dhārehīti. Puccheyyāma mayaṁ āyasmantaṁ channaṁ kiñcideva desaṁ sace
1-2 Ma. paṭirūpā upaṭṭhākā. 3 Ma. Yu. mesaddo atthi.
Āyasmā channo okāsaṁ karoti pañhassa veyyākaraṇāyāti.
Pucchāvuso sārīputta sutvā vedissāmīti.

[749] Cakkhuṁ āvuso channa cakkhuviññāṇaṁ cakkhuviññāṇaviññātabbe
dhamme etaṁ mama esohamasmi eso me attāti
samanupassasi sotaṁ āvuso channa sotaviññāṇaṁ .pe. Ghānaṁ
āvuso channa ghānaviññāṇaṁ ... Jivhaṁ āvuso channa jivhāviññāṇaṁ ...
Kāyaṁ āvuso channa kāyaviññāṇaṁ ... Manaṁ āvuso channa
manoviññāṇaṁ manoviññāṇaviññātabbe dhamme etaṁ mama esohamasmi
eso me attāti samanupassasīti. Cakkhuṁ āvuso sārīputta
cakkhuviññāṇaṁ cakkhuviññāṇaviññātabbe dhamme netaṁ mama
nesohamasmi na meso attāti samanupassāmi sotaṁ āvuso sārīputta
sotaviññāṇaṁ ... Ghānaṁ āvuso sārīputta ghānaviññāṇaṁ ... Jivhaṁ
āvuso sārīputta jivhāviññāṇaṁ ... Kāyaṁ āvuso sārīputta
kāyaviññāṇaṁ ... Manaṁ āvuso sārīputta manoviññāṇaṁ manoviññāṇaviññātabbe
dhamme netaṁ mama nesohamasmi na meso attāti
samanupassāmīti.

[750] Cakkhusmiṁ āvuso channa cakkhuviññāṇe cakkhuviññāṇaviññātabbesu
dhammesu kiṁ disvā kiṁ abhiññāya cakkhuṁ
cakkhuviññāṇaṁ cakkhuviññāṇaviññātabbe dhamme netaṁ mama
nesohamasmi na meso attāti samanupassasi sotasmiṁ āvuso channa
Sotaviññāṇe ... Ghānasmiṁ āvuso channa ghānaviññāṇe ... Jivhāya
āvuso channa jivhāviññāṇe ... Kāyasmiṁ āvuso channa
kāyaviññāṇe ... Manasmiṁ āvuso channa manoviññāṇe manoviññāṇa-
viññātabbesu dhammesu kiṁ disvā kiṁ abhiññāya manaṁ manoviññāṇaṁ
manoviññāṇaviññātabbe dhamme netaṁ mama nesohamasmi na
meso attāti samanupassasīti. Cakkhusmiṁ āvuso sārīputta
cakkhuviññāṇe cakkhuviññāṇaviññātabbesu dhammesu nirodhaṁ disvā
nirodhaṁ abhiññāya cakkhuṁ cakkhuviññāṇaṁ cakkhuviññāṇaviññātabbe
dhamme netaṁ mama nesohamasmi na meso attāti samanupassāmi
sotasmiṁ āvuso sārīputta sotaviññāṇe ... Ghānasmiṁ āvuso
sārīputta ghānaviññāṇe ... Jivhāya āvuso sārīputta jivhāviññāṇe ...
Kāyasmiṁ āvuso sārīputta kāyaviññāṇe ... Manasmiṁ
āvuso sārīputta manoviññāṇe manoviññāṇaviññātabbesu
dhammesu nirodhaṁ disvā nirodhaṁ abhiññāya manaṁ manoviññāṇaṁ
manoviññāṇaviññātabbe dhamme netaṁ mama nesohamasmi na
meso attāti samanupassāmīti.

[751] Evaṁ vutte āyasmā mahācundo āyasmantaṁ channaṁ
etadavoca tasmātiha āvuso channa idampi tassa bhagavato
sāsanaṁ niccakappaṁ manasmiṁ 1 kātabbaṁ nissitassa calitaṁ anissitassa
1 Po. Ma. Yu. manasīti dissati.
Calitaṁ natthi calite asati passaddhi passaddhiyā sati nati na
hoti natiyā asati āgati gati na hoti āgatigatiyā asati
cutūpapāto na hoti cutūpapāte asati nevidha na huraṁ na ubhayamantarena
esevanto dukkhassāti. Atha kho āyasmā ca sārīputto
āyasmā ca mahācundo āyasmantaṁ channaṁ iminā ovādena ovaditvā
uṭṭhāyāsanā pakkamiṁsu.

[752] Atha kho āyasmā channo acirapakkante āyasmante ca
sārīputte āyasmante ca mahācunde satthaṁ āharesi. Atha kho
āyasmā sārīputto yena bhagavā tenupasaṅkami upasaṅkamitvā
bhagavantaṁ abhivādetvā ekamantaṁ nisīdi. Ekamantaṁ nisinno kho
āyasmā sārīputto bhagavantaṁ etadavoca āyasmatā bhante
channena satthaṁ āharitaṁ tassa kā gati ko abhisamparāyoti.
Nanu te sārīputta channena bhikkhunā sammukhāyeva anupavajjatā
byākatāti. Atthi bhante pubbajiraṁ nāma vajjigāmo tatthāyasmato
channassa mittakulāni suhajjakulāni upavajjakulānīti.