[733] Tasmātiha te gahapati evaṁ sikkhitabbaṁ na rūpaṁ
upādiyissāmi na ca me rūpanissitaṁ viññāṇaṁ bhavissatīti evañhi
te gahapati sikkhitabbaṁ. Tasmātiha te gahapati evaṁ sikkhitabbaṁ na
vedanaṁ upādiyissāmi ... Na saññaṁ upādiyissāmi ... Na saṅkhāre
upādiyissāmi ... Na viññāṇaṁ upādiyissāmi na ca me viññāṇanissitaṁ
viññāṇaṁ bhavissatīti evañhi te gahapati sikkhitabbaṁ.

[734] Tasmātiha te gahapati evaṁ sikkhitabbaṁ na ākāsānañcāyatanaṁ
Upādiyissāmi na ca me ākāsānañcāyatananissitaṁ
viññāṇaṁ bhavissatīti evañhi te gahapati sikkhitabbaṁ. Tasmātiha te
gahapati evaṁ sikkhitabbaṁ na viññāṇañcāyatanaṁ upādiyissāmi ...
Na ākiñcaññāyatanaṁ upādiyissāmi ... Na nevasaññānāsaññāyatanaṁ
upādiyissāmi na ca me nevasaññānāsaññāyatananissitaṁ viññāṇaṁ
bhavissatīti evañhi te gahapati sikkhitabbaṁ.

[735] Tasmātiha te gahapati evaṁ sikkhitabbaṁ na idhalokaṁ
upādiyissāmi na ca me idhalokanissitaṁ viññāṇaṁ bhavissatīti
evañhi te gahapati sikkhitabbaṁ. Tasmātiha te gahapati evaṁ
sikkhitabbaṁ na paralokaṁ upādiyissāmi na ca me paralokanissitaṁ
viññāṇaṁ bhavissatīti evañhi te gahapati sikkhitabbaṁ.

[736] Tasmātiha te gahapati evaṁ sikkhitabbaṁ yampi 1 me diṭṭhaṁ
sutaṁ mutaṁ viññātaṁ [2]- pariyesitaṁ anuvicaritaṁ 3 manasā tampi na
upādiyissāmi na ca me tannissitaṁ viññāṇaṁ bhavissatīti
evañhi te gahapati sikkhitabbanti.

[737] Evaṁ vutte anāthapiṇḍiko gahapati parodi assūni
pavattesi. Atha kho āyasmā ānando anāthapiṇḍikaṁ gahapatiṁ
etadavoca oleyyāsi 4 kho tvaṁ gahapati saṁsīdi 5 kho tvaṁ gahapatīti.
Nāhaṁ bhante ānanda oleyyāmi 6 na [7]- saṁsīdāmi apica me dīgharattaṁ
satthā payirupāsito manobhāvanīyā ca bhikkhū na [8]- me evarūpī
1 Yu. yampidaṁ. 2-3 Ma. etthantare pattaṁ anucaritanti dissanti.
4 Po. Ma. Yu. oliyasi. 5 Ma. saṁsīdasi. 6 Ma. oliyāmi.
7 Ma. etthantare pisaddo atthi. 8 Ma. casaddo atthi.
Dhammikathā sutapubbāti. Na kho gahapati gihīnaṁ odātavasanānaṁ
evarūpī dhammikathā paṭibhāti pabbajitānaṁ [1]- gahapati evarūpī dhammikathā
paṭibhātīti. Tenahi bhante sārīputta gihīnaṁpi odātavasanānaṁ evarūpī
dhammikathā paṭibhātu santi hi bhante kulaputtā apparajakkhajātikā
assavanatā dhammassa parihāyanti bhavissanti dhammassa aññātāroti.
Atha kho āyasmā ca sārīputto āyasmā ca ānando anāthapiṇḍikaṁ
gahapatiṁ iminā ovādena ovaditvā uṭṭhāyāsanā pakkamiṁsu.

[738] Atha kho anāthapiṇḍiko gahapati acirapakkante āyasmante
ca sārīputte āyasmante ca ānande [2]- kālamakāsi tusitaṁ kāyaṁ
upapajjīti. Atha kho anāthapiṇḍiko devaputto abhikkantāya
rattiyā abhikkantavaṇṇo kevalakappa jetavanaṁ obhāsetvā yena
bhagavā tenupasaṅkami upasaṅkamitvā bhagavantaṁ abhivādetvā ekamantaṁ
aṭṭhāsi. Ekamantaṁ ṭhito kho anāthapiṇḍiko devaputto bhagavantaṁ
gāthāhi ajjhabhāsi
idaṁ hitaṁ jetavanaṁ isisaṅghanisevitaṁ
āvutthaṁ dhammarājena pītisañjananaṁ mama
kammaṁ vijjā ca dhammā 3 ca sīlaṁ jīvitamuttamaṁ
etena maccā sujjhanti na gottena na dhanena vā
tasmā hi paṇḍito poso sampassaṁ atthamattano
yoniso vicine dhammaṁ evaṁ tattha visujjhati
1 Ma. Yu. khosaddo atthi. 2 Yu. kāyassa bhedā parammaraṇā tusitaṁ kāyaṁ upapajjīti.
3 Po. Ma. Yu. dhammo.
Sārīputtova paññāya sīlena upasamena ca
yo hi 1 pāragato bhikkhu etāvaparamo siyāti.
Idamavoca anāthapiṇḍiko devaputto. Samanuñño satthā ahosi.
Atha kho anāthapiṇḍiko devaputto samanuñño me satthāti
bhagavantaṁ abhivādetvā padakkhiṇaṁ katvā tatthevantaradhāyi.

[739] Atha kho bhagavā tassā rattiyā accayena bhikkhū
āmantesi imaṁ bhikkhave rattiṁ aññataro devaputto abhikkantāya
rattiyā abhikkantavaṇṇo kevalakappaṁ jetavanaṁ obhāsetvā yenāhaṁ
tenupasaṅkami upasaṅkamitvā maṁ abhivādetvā ekamantaṁ aṭṭhāsi.
Ekamantaṁ ṭhito kho so devaputto maṁ imāhi gāthāhi ajjhabhāsi
idaṁ hitaṁ jetavanaṁ isasaṅghanisevitaṁ
āvutthaṁ dhammarājena pītisañjananaṁ mama
kammaṁ vijjā ca dhammā 2 ca sīlaṁ jīvitamuttamaṁ
etena maccā sujjhanti na gottena na dhanena vā
tasmā hi paṇḍito poso sampassaṁ atthamattano
yoniso vicine dhammaṁ evaṁ tattha visujjhati
sārīputtova paññāya sīlena upasamena ca
yo hi 3 pāragato bhikkhu etāvaparamo siyāti.
Idamavoca bhikkhave so devaputto samanuñño me satthāti maṁ
abhivādetvā padakkhiṇaṁ katvā tatthevantaradhāyīti.
1-3 Po. Ma. pi. 2 Po. Ma. Yu. dhammo.

[740] Evaṁ vutte āyasmā ānando bhagavantaṁ etadavoca
so hi nūna so bhante anāthapiṇḍiko devaputto bhavissati
anāthapiṇḍiko bhante gahapati āyasmante sārīputte
abhippasanno 1 ahosīti. Sādhu sādhu ānanda yāvatakaṁ kho ānanda
takkāya pattabbaṁ anuppattaṁ [2]- tayā anāthapiṇḍiko so [3]- devaputto
naññoti 4 .
Idamavoca bhagavā attamano āyasmā ānando bhagavato
bhāsitaṁ abhinandīti.
Anāthapiṇḍikovādasuttaṁ niṭṭhitaṁ paṭhamaṁ.
--------
1 Sī. Yu. aveccappasanno. 2 Po. Ma. etthantare tanti dissati.
3 Ma. Yu. etathantare ānandāti atthi. 4 Po. Ma. naññoti na dissati.
Channovādasuttaṁ

[741] Evamme sutaṁ ekaṁ samayaṁ bhagavā rājagahe viharati
veḷuvane kalandakanivāpe. Tena kho pana samayena āyasmā ca
sārīputto āyasmā ca mahācundo āyasmā ca channo gijjhakūṭe
pabbate viharanti. Tena kho pana samayena āyasmā channo
ābādhiko hoti dukkhito bāḷhagilāno.

[742] Atha kho āyasmā sārīputto sāyaṇhasamayaṁ
paṭisallānā vuṭṭhito yenāyasmā mahācundo tenupasaṅkami
upasaṅkamitvā āyasmantaṁ mahācundaṁ etadavoca āyāmāvuso cunda
yenāyasmā channo tenupasaṅkamissāma gilānapucchakāti. Evamāvusoti
kho āyasmā mahācundo āyasmato sārīputtassa paccassosi.
Atha kho āyasmā ca sārīputto āyasmā ca mahācundo
yenāyasmā channo tenupasaṅkamiṁsu upasaṅkamitvā āyasmatā channena
saddhiṁ sammodiṁsu sammodanīyaṁ kathaṁ sārāṇīyaṁ vītisāretvā ekamantaṁ
nisīdiṁsu. Ekamantaṁ nisinno kho āyasmā sārīputto āyasmantaṁ
channaṁ etadavoca kacci te āvuso channa khamanīyaṁ kacci yāpanīyaṁ
kacci dukkhā vedanā paṭikkamanti no abhikkamanti paṭikkamo sānaṁ
paññāyati no abhikkamoti. Na me āvuso sārīputta khamanīyaṁ na
yāpanīyaṁ bāḷhā me dukkhā vedanā abhikkamanti no paṭikkamanti
abhikkamo sānaṁ paññāyati no paṭikkamoti.