[523] Tamenaṁ bhikkhave nirayapālā evamāhaṁsu ambho purisa
kiṁ icchasīti. So evamāha pipāsitosmi bhanteti. Tamenaṁ
bhikkhave nirayapālā tattena ayosaṅkunā mukhaṁ vivaritvā ādittena
sampajjalitena sañjotibhūtena tattaṁ tambalohaṁ mukhe āsiñcanti
ādittaṁ sampajjalitaṁ sañjotibhūtaṁ. Taṁ tassa oṭṭhampi ḍayhati
mukhampi ḍayhati kaṇṭhampi ḍayhati udarampi ḍayhati antampi antaguṇampi
ādāya adhobhāgā nikkhamati. So tattha dukkhā tippā
kaṭukā vedanā vedeti na ca tāva kālaṁ karoti yāva na taṁ
pāpakammaṁ byantīhoti. Tamenaṁ bhikkhave nirayapālā puna mahāniraye
pakkhipanti.

[524] Bhūtapubbaṁ bhikkhave yamassa rañño etadahosi ye
Kira bho loke pāpakāni kammāni karonti te evarūpā vividhā
kammakāraṇā kāriyanti aho vatāhaṁ manussattaṁ labheyyaṁ tathāgato
ca loke uppajjeyya arahaṁ sammāsambuddho tañcāhaṁ bhagavantaṁ
payirupāseyyaṁ so ca me bhagavā dhammaṁ deseyya tassa cāhaṁ
bhagavato dhammaṁ ājāneyyanti. Taṁ kho panāhaṁ bhikkhave nāññassa
kassaci samaṇassa vā brāhmaṇassa vā sutvā vadāmi apica kho
yadeva me sāmaṁ ñātaṁ sāmaṁ diṭṭhaṁ sāmaṁ viditaṁ tadevāhaṁ vadāmīti.

[525] Idamavoca bhagavā idaṁ vatvāna sugato athāparaṁ
etadavoca satthā
coditā devadūtehi ye pamajjanti māṇavā
te dīgharattaṁ socanti hīnakāyūpagā narā
ye ca kho devadūtehi santo sappurisā idha
coditā nappamajjanti ariyadhamme kudācanaṁ
upādāne bhayaṁ disvā jātimaraṇasambhave
anupādā vimuccanti jātimaraṇasaṅkhaye
te khemappattā sukhino diṭṭhadhammābhinibbutā
sabbaverabhayātītā sabbadukkhaṁ upaccagunti.
Devadūtasuttaṁ niṭṭhitaṁ dasamaṁ.
Suññatavaggo tatiyo.
-------
Tassuddānaṁ
anuttaro suññatabbhūtadhammo
bakkulavīravaro mahināmo
anuruddhakilesampajjahantā
paṇḍitabhūmi devadūto.
---------
Vibhaṅgavaggo
------
bhaddekarattasuttaṁ

[526] Evamme sutaṁ ekaṁ samayaṁ bhagavā sāvatthiyaṁ viharati
jetavane anāthapiṇḍikassa ārāme. Tatra kho bhagavā bhikkhū
āmantesi bhikkhavoti. Bhadanteti te bhikkhū bhagavato paccassosuṁ.
Bhagavā etadavoca bhaddekarattassa vo bhikkhave uddesañca vibhaṅgañca
desissāmi taṁ suṇātha sādhukaṁ manasikarotha bhāsissāmīti. Evaṁ
bhanteti kho te bhikkhū bhagavato paccassosuṁ.

[527] Bhagavā etadavoca
atītaṁ nānvāgameyya nappaṭikaṅkhe anāgataṁ
yadatītampahīnantaṁ appattañca anāgataṁ
paccuppannañca yo dhammaṁ tattha tattha vipassati
asaṁhiraṁ asaṅkuppaṁ taṁ viddhā manubrūhaye
ajjeva kiccamātappaṁ ko jaññā maraṇaṁ suve
na hi no saṅgarantena mahāsenena maccunā
evaṁvihārimātāpiṁ ahorattamatanditaṁ
taṁ ve bhaddekarattoti santo ācikkhate munīti.

[528] Kathañca bhikkhave atītaṁ anvāgameti. Evaṁrūpo ahosiṁ
Atītamaddhānanti tattha nandiṁ samanvāneti evaṁvedano ahosiṁ atītamaddhānanti
tattha nandiṁ samanvāneti evaṁsañño ahosiṁ atītamaddhānanti
tattha nandiṁ samanvāneti evaṁsaṅkhāro ahosiṁ atītamaddhānanti
tattha nandiṁ samanvāneti evaṁviññāṇo ahosiṁ atītamaddhānanti
tattha nandiṁ samanvāneti. Evaṁ kho bhikkhave atītaṁ
anvāgameti.

[529] Kathañca bhikkhave atītaṁ nānvāgameti. Evaṁrūpo ahosiṁ
atītamaddhānanti tattha nandiṁ na samanvāneti evaṁvedano ahosiṁ
atītamaddhānanti tattha nandiṁ na samanvāneti evaṁsañño ahosiṁ
atītamaddhānanti tattha nandiṁ na samanvāneti evaṁsaṅkhāro ahosiṁ
atītamaddhānanti tattha nandiṁ na samanvāneti evaṁviññāṇo ahosiṁ
atītamaddhānanti tattha nandiṁ na samanvāneti. Evaṁ kho bhikkhave
atītaṁ nānvāgameti.

[530] Kathañca bhikkhave anāgataṁ paṭikaṅkhati. Evaṁrūpo siyaṁ
anāgatamaddhānanti tattha nandiṁ samanvāneti evaṁvedano siyaṁ
.pe. Evaṁsañño siyaṁ .pe. Evaṁsaṅkhāro siyaṁ .pe. Evaṁ
viññāṇo siyaṁ anāgatamaddhānanti tattha nandiṁ samanvāneti.
Evaṁ kho bhikkhave anāgataṁ paṭikaṅkhati.

[531] Kathañca bhikkhave anāgataṁ nappaṭikaṅkhati. Evaṁrūpo siyaṁ
anāgatamaddhānanti tattha nandiṁ na samanvāneti evaṁvedano siyaṁ
.pe. Evaṁsañño siyaṁ .pe. Evaṁsaṅkhāro siyaṁ .pe. Evaṁ
viññāṇo siyaṁ anāgatamaddhānanti tattha nandiṁ na samanvāneti.
Evaṁ kho bhikkhave anāgataṁ nappaṭikaṅkhati.

[532] Kathañca bhikkhave paccuppannesu dhammesu saṁhirati. Idha
bhikkhave assutavā puthujjano ariyānaṁ adassāvī ariyadhammassa akovido
ariyadhamme avinīto sappurisānaṁ adassāvī sappurisadhammassa akovido
sappurisadhamme avinīto rūpaṁ attato samanupassati rūpavantaṁ vā
attānaṁ attani vā rūpaṁ rūpasmiṁ vā attānaṁ vedanaṁ .pe.
Saññaṁ .pe. Saṅkhāre .pe. Viññāṇaṁ attato samanupassati
viññāṇavantaṁ vā attānaṁ attani vā viññāṇaṁ viññāṇasmiṁ vā
attānaṁ. Evaṁ kho bhikkhave paccuppannesu dhammesu saṁhirati.