[246] Cattāri agatigamanāni chandāgatiṁ gacchati dosāgatiṁ
gacchati mohāgatiṁ gacchati bhayāgatiṁ gacchati.

[247] Cattāro taṇhuppādā cīvarahetu vā āvuso bhikkhuno
taṇhā uppajjamānā uppajjati piṇḍapātahetu vā āvuso
bhikkhuno taṇhā uppajjamānā uppajjati senāsanahetu vā
āvuso bhikkhuno taṇhā uppajjamānā uppajjati abhibhavābhavahetu 2
vā āvuso bhikkhuno taṇhā uppajjamānā uppajjati.
1 Yu. kabaliṅkāro. 2 Ma. Yu. itibhavā ....

[248] Catasso paṭipadā dukkhāpaṭipadā dandhābhiññā
dukkhāpaṭipadā khippābhiññā sukhāpaṭipadā dandhābhiññā
sukhāpaṭipadā khippābhiññā.

[249] Aparāpi catasso paṭipadā akkhamā paṭipadā khamā
paṭipadā damā paṭipadā samā paṭipadā.

[250] Cattāri dhammapadāni anabhijjhā dhammapadaṁ abyāpādo
dhammapadaṁ sammāsati dhammapadaṁ sammāsamādhi dhammapadaṁ.

[251] Cattāri dhammasamādānāni atthāvuso dhammasamādānaṁ
paccuppannaṁ dukkhañceva āyatiñca dukkhavipākaṁ atthāvuso dhammasamādānaṁ
paccuppannaṁ dukkhañceva āyatiñca sukhavipākaṁ atthāvuso
dhammasamādānaṁ paccuppannaṁ sukhañceva āyatiñca dukkhavipākaṁ atthāvuso
dhammasamādānaṁ paccuppannaṁ sukhañceva āyatiñca sukhavipākaṁ.

[252] Cattāro dhammakkhandhā sīlakkhandho samādhikkhandho
paññākkhandho vimuttikkhandho.

[253] Cattāri balāni viriyabalaṁ satibalaṁ samādhibalaṁ paññābalaṁ.

[254] Cattāri adhiṭṭhānāni paññādhiṭṭhānaṁ saccādhiṭṭhānaṁ
cāgādhiṭṭhānaṁ upasamādhiṭṭhānaṁ.

[255] Cattāro pañhābyākaraṇā 1 ekaṁsabyākaraṇīyo pañho
paṭipucchābyākaraṇīyo pañho vibhajjabyākaraṇīyo pañho ṭhapanīyo
pañho.
1 Ma. ...byākaraṇāni. Yu. ...vyākaraṇā.