[23] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpāya tiracchānavijjāya micchājīvena jīvikaṁ
kappenti. Seyyathīdaṁ. Suvuṭṭhikā bhavissati. Dubbuṭṭhikā bhavissati.
Subhikkhaṁ bhavissati. Dubbhikkhaṁ bhavissati. Khemaṁ bhavissati.
Bhayaṁ bhavissati. Rogo bhavissati. Ārogyaṁ bhavissati. Muddā
gaṇanā saṁkhānaṁ kāveyyaṁ lokāyataṁ iti vā. Iti evarūpāya
tiracchānavijjāya micchājīvā paṭivirato samaṇo gotamoti. Iti
vā hi bhikkhave puthujjano tathāgatassa vaṇṇaṁ vadamāno vadeyya.

[24] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpāya tiracchānavijjāya micchājīvena
jīvikaṁ kappenti. Seyyathīdaṁ. Āvāhanaṁ vivāhanaṁ saṁvadanaṁ vivadanaṁ
1 evaṁvipākāti pāṭhena bhavitabbaṁ.
Saṅkiraṇaṁ vikiraṇaṁ subhagakaraṇaṁ dubbhagakaraṇaṁ viruddhagabbhakaraṇaṁ jivhānibandhanaṁ
hanusaṁhananaṁ hatthābhijappanaṁ kaṇṇajappanaṁ ādāsapaṇhaṁ
kumārīpaṇhaṁ devapaṇhaṁ ādiccupaṭṭhānaṁ mahatupaṭṭhānaṁ abbhujjalanaṁ
sirīvhāyanaṁ iti vā. Iti evarūpāya tiracchānavijjāya micchājīvā
paṭivirato samaṇo gotamoti. Iti vā hi bhikkhave puthujjano
tathāgatassa vaṇṇaṁ vadamāno vadeyya.

[25] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpāya tiracchānavijjāya micchājīvena
jīvikaṁ kappenti. Seyyathīdaṁ. Santikammaṁ paṇidhikammaṁ bhūttikammaṁ 1
bhūrikammaṁ vassakammaṁ vossakammaṁ vatthukammaṁ vatthuparikaraṇaṁ ācamanaṁ
nahāpanaṁ jūhanaṁ vamanaṁ virecanaṁ uddhavirecanaṁ adhovirecanaṁ sīsavirecanaṁ
kaṇṇatelaṁ nettappānaṁ natthukammaṁ añjanaṁ paccañjanaṁ sālākiyaṁ
sallakattiyaṁ dārakatikicchā mūlabhesajjānaṁ anuppadānaṁ osadhīnaṁ
paṭimokkho iti vā. Iti evarūpāya tiracchānavijjāya micchājīvā
paṭivirato samaṇo gotamoti. Iti vā hi bhikkhave puthujjano
tathāgatassa vaṇṇaṁ vadamāno vadeyya. Idaṁ kho taṁ bhikkhave
appamattakaṁ oramattakaṁ sīlamattakaṁ yena puthujjano tathāgatassa
vaṇṇaṁ vadamāno vadeyya.
Mahāsīlaṁ niṭṭhitaṁ.
1 Sī. Yu. bhūttikammanti idaṁ natthi.

[26] Atthi bhikkhave aññe va dhammā gambhīrā duddasā duranubodhā
santā paṇītā atakkāvacarā nipuṇā paṇḍitavedanīyā ye tathāgato
sayaṁ abhiññā sacchikatvā pavedeti yehi tathāgatassa yathābhuccaṁ
vaṇṇaṁ sammā vadamānā vadeyyuṁ. Katame ca te bhikkhave dhammā
gambhīrā duddasā duranubodhā santā paṇītā atakkāvacarā nipuṇā
paṇḍitavedanīyā ye tathāgato sayaṁ abhiññā sacchikatvā pavedeti
yehi tathāgatassa yathābhuccaṁ vaṇṇaṁ sammā vadamānā vadeyyuṁ.

[27] Santi bhikkhave eke samaṇabrāhmaṇā pubbantakappikā
pubbantānudiṭṭhino pubbantaṁ ārabbha anekavihitāni adhimuttipadāni
abhivadanti aṭṭhārasahi vatthūhi. Te ca bhonto samaṇabrāhmaṇā
kimāgamma kimārabbha pubbantakappikā pubbantānudiṭṭhino pubbantaṁ
ārabbha anekavihitāni adhimuttipadāni abhivadanti aṭṭhārasahi vatthūhi.
Santi bhikkhave eke samaṇabrāhmaṇā sassatavādā sassataṁ attānañca
lokañca paññapenti 1 catūhi vatthūhi. Te ca bhonto samaṇabrāhmaṇā
kimāgamma kimārabbha sassatavādā sassataṁ attānañca lokañca
paññapenti catūhi vatthūhi. Idha bhikkhave ekacco samaṇo
vā brāhmaṇo vā ātappamanvāya padhānamanvāya anuyogamanvāya
appamādamanvāya sammāmanasikāramanvāya tathārūpaṁ cetosamādhiṁ
phusati yathā samāhite citte (2 parisuddhe pariyodāte anaṅgaṇe
1 paññāpenti. 2 Sī. parisuddhetyādīni natthi.
Vigatūpakkilese) anekavihitaṁ pubbenivāsaṁ anussarati. Seyyathīdaṁ.
Ekampi jātiṁ dvepi jātiyo tissopi jātiyo catassopi jātiyo
pañcapi jātiyo dasapi jātiyo vīsampi 1 jātiyo tiṁsampi 2 jātiyo
cattāḷīsampi 3 jātiyo paññāsampi jātiyo jātisatampi jātisahassampi
jātisatasahassampi anekānipi jātisatāni anekānipi jātisahassāni
anekānipi jātisatasahassāni. Amutrāsiṁ evaṁnāmo
evaṁgotto evaṁvaṇṇo evamāhāro evaṁsukhadukkhapaṭisaṁvedī evamāyupariyanto
so tato cuto amutra udapādiṁ 4 tatrāpāsiṁ evaṁnāmo
evaṁgotto evaṁvaṇṇo evamāhāro evaṁsukhadukkhapaṭisaṁvedī
evamāyupariyanto so tato cuto idhūpapannoti. Iti sākāraṁ
sauddesaṁ anekavihitaṁ pubbenivāsaṁ anussarati. So evamāha
sassato attā ca loko ca vañjho kūṭaṭṭho esikaṭṭhāyī ṭhito 5
te ca sattā sandhāvanti saṁsaranti cavanti upapajjanti atthitveva
sassatisamaṁ. Taṁ kissa hetu. Ahaṁ hi ātappamanvāya padhānamanvāya
anuyogamanvāya appamādamanvāya sammāmanasikāramanvāya tathārūpaṁ
cetosamādhiṁ phusāmi yathā samāhite citte anekavihitaṁ pubbenivāsaṁ
anussarāmi. Seyyathīdaṁ. Ekampi jātiṁ dvepi jātiyo
tissopi jātiyo catassopi jātiyo pañcapi jātiyo dasapi jātiyo
1 vīsatimpi. 2 Yu. tīsampi. 3 cattārīsampi. 4 uppādiṁ.
5 ekaṭṭhāyiṭṭhito.
Vīsampi jātiyo tiṁsampi jātiyo cattāḷīsampi jātiyo paññāsampi
jātiyo jātisatampi jātisahassampi jātisatasahassampi anekānipi
jātisatāni anekānipi jātisahassāni anekānipi jātisatasahassāni.
Amutrāsiṁ evaṁnāmo evaṁgotto evaṁvaṇṇo evamāhāro
evaṁsukhadukkhapaṭisaṁvedī evamāyupariyanto so tato cuto amutra udapādiṁ
tatrāpāsiṁ evaṁnāmo evaṁgotto evaṁvaṇṇo evamāhāro
evaṁsukhadukkhapaṭisaṁvedī evamāyupariyanto so tato cuto idhūpapannoti.
Iti sākāraṁ sauddesaṁ anekavihitaṁ pubbenivāsaṁ anussarāmi.
Imināmahaṁ etaṁ jānāmi yathā sassato attā ca loko ca vañjho
kūṭaṭṭho esikaṭṭhāyī ṭhito te ca sattā sandhāvanti saṁsaranti
cavanti upapajjanti atthitveva sassatisamanti. Idaṁ bhikkhave paṭhamaṁ
ṭhānaṁ yaṁ āgamma yaṁ ārabbha eke samaṇabrāhmaṇā sassatavādā
sassataṁ attānañca lokañca paññapenti.

[28] Dutiye ca bhonto samaṇabrāhmaṇā kimāgamma kimārabbha
sassatavādā sassataṁ attānañca lokañca paññapenti. Idha
bhikkhave ekacco samaṇo vā brāhmaṇo vā ātappamanvāya
padhānamanvāya anuyogamanvāya appamādamanvāya sammāmanasikāramanvāya
tathārūpaṁ cetosamādhiṁ phusati yathā samāhite citte anekavihitaṁ
pubbenivāsaṁ anussarati. Seyyathīdaṁ. Ekampi saṁvaṭṭavivaṭṭaṁ dvepi
saṁvaṭṭavivaṭṭāni tīṇipi saṁvaṭṭavivaṭṭāni cattāripi saṁvaṭṭavivaṭṭāni
Pañcapi saṁvaṭṭavivaṭṭāni dasapi saṁvaṭṭavivaṭṭāni. Amutrāsiṁ evaṁnāmo
evaṁgotto evaṁvaṇṇo evamāhāro evaṁsukhadukkhapaṭisaṁvedī evamāyupariyanto
so tato cuto amutra udapādiṁ tatrāpāsiṁ evaṁnāmo
evaṁgotto evaṁvaṇṇo evamāhāro evaṁsukhadukkhapaṭisaṁvedī evamāyupariyanto
so tato cuto idhūpapannoti. Iti sākāraṁ sauddesaṁ
anekavihitaṁ pubbenivāsaṁ anussarati. So evamāha sassato
attā ca loko ca vañjho kūṭaṭṭho esikaṭṭhāyī ṭhito te
ca sattā sandhāvanti saṁsaranti cavanti upapajjanti atthitveva
sassatisamaṁ. Taṁ kissa hetu. Ahañhi ātappamanvāya padhānamanvāya
anuyogamanvāya appamādamanvāya sammāmanasikāramanvāya tathārūpaṁ
cetosamādhiṁ phusāmi yathā samāhite citte anekavihitaṁ pubbenivāsaṁ
anussarāmi. Seyyathīdaṁ. Ekampi saṁvaṭṭavivaṭṭaṁ dvepi saṁvaṭṭavivaṭṭāni
tīṇipi saṁvaṭṭavivaṭṭāni cattāripi saṁvaṭṭavivaṭṭāni pañcapi saṁvaṭṭavivaṭṭāni
dasapi saṁvaṭṭavivaṭṭāni amutrāsiṁ evaṁnāmo evaṁgotto
evaṁvaṇṇo evamāhāro evaṁsukhadukkhapaṭisaṁvedī evamāyupariyanto so
tato cuto amutra udapādiṁ tatrāpāsiṁ evaṁnāmo evaṁgotto
evaṁvaṇṇo evamāhāro evaṁsukhadukkhapaṭisaṁvedī evamāyupariyanto so
tato cuto idhūpapannoti. Iti sākāraṁ sauddesaṁ anekavihitaṁ
pubbenivāsaṁ anussarāmi. Imināmahaṁ etaṁ jānāmi yathā sassato
attā ca loko ca vañjho kūṭaṭṭho esikaṭṭhāyī ṭhito te
Ca sattā sandhāvanti saṁsaranti cavanti upapajjanti atthitveva
sassatisamanti. Idaṁ bhikkhave dutiyaṁ ṭhānaṁ yaṁ āgamma yaṁ ārabbha
eke samaṇabrāhmaṇā sassatavādā sassataṁ attānañca lokañca
paññapenti.

[29] Tatiye ca bhonto samaṇabrāhmaṇā kimāgamma kimārabbha
sassatavādā sassataṁ attānañca lokañca paññapenti. Idha
bhikkhave ekacco samaṇo vā brāhmaṇo vā ātappamanvāya
padhānamanvāya anuyogamanvāya appamādamanvāya sammāmanasikāramanvāya
tathārūpaṁ cetosamādhiṁ phusati yathā samāhite citte anekavihitaṁ
pubbenivāsaṁ anussarati. Seyyathīdaṁ. Dasapi saṁvaṭṭavivaṭṭāni vīsampi
saṁvaṭṭavivaṭṭāni tiṁsampi saṁvaṭṭavivaṭṭāni cattāḷīsampi saṁvaṭṭavivaṭṭāni.
Amutrāsiṁ evaṁnāmo evaṁgotto evaṁvaṇṇo evamāhāro
evaṁsukhadukkhapaṭisaṁvedī evamāyupariyanto so tato cuto amutra
udapādiṁ tatrāpāsiṁ evaṁnāmo evaṁgotto evaṁvaṇṇo evamāhāro
evaṁsukhadukkhapaṭisaṁvedī evamāyupariyanto so tato cuto idhūpapannoti.
Iti sākāraṁ sauddesaṁ anekavihitaṁ pubbenivāsaṁ anussarati. So
evamāha sassato attā ca loko ca vañjho kūṭaṭṭho esikaṭṭhāyī
ṭhito te ca sattā sandhāvanti saṁsaranti cavanti upapajjanti
atthitveva sassatisamaṁ. Taṁ kissa hetu. Ahañhi ātappamanvāya
padhānamanvāya anuyogamanvāya appamādamanvāya sammāmanasikāramanvāya
Tathārūpaṁ cetosamādhiṁ phusāmi yathā samāhite citte anekavihitaṁ
pubbenivāsaṁ anussarāmi. Seyyathīdaṁ. Dasapi saṁvaṭṭavivaṭṭāni
vīsampi saṁvaṭṭavivaṭṭāni tiṁsampi saṁvaṭṭavivaṭṭāni cattāḷīsampi saṁvaṭṭavivaṭṭāni.
Amutrāsiṁ evaṁnāmo evaṁgotto evaṁvaṇṇo evamāhāro
evaṁsukhadukkhapaṭisaṁvedī evamāyupariyanto so tato cuto amutra
udapādiṁ tatrāpāsiṁ evaṁnāmo evaṁgotto evaṁvaṇṇo evamāhāro
evaṁsukhadukkhapaṭisaṁvedī evamāyupariyanto so tato cuto idhūpapannoti.
Iti sākāraṁ sauddesaṁ anekavihitaṁ pubbenivāsaṁ anussarāmi.
Imināmahaṁ etaṁ jānāmi yathā sassato attā ca loko ca
vañjho kūṭaṭṭho esikaṭṭhāyī ṭhito te ca sattā sandhāvanti
saṁsaranti cavanti upapajjanti atthitveva sassatisamanti. Idaṁ
bhikkhave tatiyaṁ ṭhānaṁ yaṁ āgamma yaṁ ārabbha eke samaṇabrāhmaṇā
sassatavādā sassataṁ attānañca lokañca paññapenti.

[30] Catutthe ca bhonto samaṇabrāhmaṇā kimāgamma kimārabbha
sassatavādā sassataṁ attānañca lokañca paññapenti. Idha
bhikkhave ekacco samaṇo vā brāhmaṇo vā takkī hoti vimaṁsī 1
so takkapariyāhataṁ vimaṁsānucaritaṁ sayaṁ pāṭibhāṇaṁ evamāha sassato
attā ca loko ca vañjho kūṭaṭṭho esikaṭṭhāyī ṭhito te
ca sattā sandhāvanti saṁsaranti cavanti upapajjanti atthitveva
1 Sī. vīmaṁsī.
Sassatisamanti. Idaṁ bhikkhave catutthaṁ ṭhānaṁ yaṁ āgamma yaṁ ārabbha
eke samaṇabrāhmaṇā sassatavādā sassataṁ attānañca lokañca
paññapenti. Imehi kho te bhikkhave samaṇabrāhmaṇā sassatavādā
sassataṁ attānañca lokañca paññapenti catūhi vatthūhi. Ye hi
keci bhikkhave samaṇabrāhmaṇā sassatavādā sassataṁ attānañca
lokañca paññapenti sabbe te imeheva catūhi vatthūhi etesaṁ
vā aññatarena natthi ito bahiddhā. Tayidaṁ bhikkhave tathāgato
pajānāti ime diṭṭhiṭṭhānā evaṁgahitā evaṁparāmaṭṭhā evaṁgatikā
bhavanti evaṁabhisamparāyāti. Tañca tathāgato pajānāti tato
ca uttaritaraṁ pajānāti tañca pajānanaṁ 1 na parāmasati. Aparāmasato
cassa paccattaññeva nibbuti viditā vedanānaṁ samudayañca atthaṅgamañca
assādañca ādīnavañca nissaraṇañca yathābhūtaṁ viditvā. Anupādā
vimutto bhikkhave tathāgato. Ime kho te bhikkhave dhammā
gambhīrā duddasā duranubodhā santā paṇītā atakkāvacarā nipuṇā
paṇḍitavedanīyā ye tathāgato sayaṁ abhiññā sacchikatvā pavedeti
yehi tathāgatassa yathābhuccaṁ vaṇṇaṁ sammā vadamānā vadeyyuṁ.
Paṭhamabhāṇavāraṁ.

[31] Santi bhikkhave eke samaṇabrāhmaṇā ekaccasassatikā
ekaccāsassatikā ekaccaṁ sassataṁ ekaccaṁ asassataṁ attānañca
1 jānanaṁ.
Lokañca paññapenti catūhi vatthūhi. Te ca bhonto samaṇabrāhmaṇā
kimāgamma kimārabbha ekaccasassatikā ekaccāsassatikā
ekaccaṁ sassataṁ ekaccaṁ asassataṁ attānañca lokañca paññapenti
catūhi vatthūhi. Hoti kho so bhikkhave samayo yaṁ kadāci karahaci
dīghassa addhuno accayena ayaṁ loko saṁvaṭṭati. Saṁvaṭṭamāne
loke yebhuyyena sattā ābhassarasaṁvattanikā honti. Te tattha
honti manomayā pītibhakkhā sayampabhā antalikkhacarā subhaṭṭhāyino
ciraṁ dīghamaddhānaṁ tiṭṭhanti. Hoti kho so bhikkhave samayo yaṁ
kadāci karahaci dīghassa addhuno accayena ayaṁ loko vivaṭṭati.
Vivaṭṭamāne loke suññaṁ brahmavimānaṁ pātubhavati. Atha aññataro
satto āyukkhayā vā puññakkhayā vā ābhassarakāyā cavitvā
suññaṁ brahmavimānaṁ upapajjati. Sopi tattha hoti manomayo
pītibhakkho sayampabho antalikkhacaro subhaṭṭhāyī ciraṁ dīghamaddhānaṁ
tiṭṭhati. Tattha tassa ekassa dīgharattaṁ nivusitattā anabhirati paritassanā
uppajjati aho vata aññepi sattā itthattaṁ āgaccheyyunti.
Athaññepi sattā āyukkhayā vā puññakkhayā vā ābhassarakāyā
cavitvā brahmavimānaṁ upapajjanti tassa sattassa sahabyataṁ.
Tepi tattha honti manomayā pītibhakkhā sayampabhā antalikkhacarā
subhaṭṭhāyino ciraṁ dīghamaddhānaṁ tiṭṭhanti. Tatra bhikkhave yo so
satto paṭhamaṁ upapanno tassa evaṁ hoti ahamasmi brahmā
Mahābrahmā abhibhū anabhibhūto aññadatthudaso vasavatti issaro
kattā nimmitā 1 seṭṭho sajjitā 2 vasī pitā bhūtabhabyānaṁ mayā
ime sattā nimmitā. Taṁ kissa hetu. Mamaṁ hi pubbe
etadahosi aho vata aññepi sattā itthattaṁ āgaccheyyunti.
Iti mamaṁ ca manopaṇidhi ime ca sattā itthattaṁ āgatāti.
Yepi te sattā pacchā upapannā tesampi evaṁ hoti ayaṁ kho
bhavaṁ brahmā mahābrahmā abhibhū anabhibhūto aññadatthudaso vasavatti
issaro kattā nimmitā seṭṭho sajjitā vasī pitā bhūtabhabyānaṁ
iminā mayaṁ bhotā brahmunā nimmitā. Taṁ kissa hetu.
Imañhi mayaṁ addasāma idha paṭhamaṁ upapannaṁ mayaṁ panamhā pacchā
upapannāti. Tatra bhikkhave yo so satto paṭhamaṁ upapanno
so dīghāyukataro ca hoti vaṇṇavantataro ca mahesakkhataro ca.
Ye pana te sattā pacchā upapannā te appāyukatarā ca
honti dubbaṇṇatarā ca appesakkhatarā ca. Ṭhānaṁ kho panetaṁ
bhikkhave vijjati yaṁ aññataro satto tamhā kāyā cavitvā
itthattaṁ āgacchati itthattaṁ āgato samāno agārasmā anagāriyaṁ
pabbajati agārasmā anagāriyaṁ pabbajito samāno ātappamanvāya
padhānamanvāya anuyogamanvāya appamādamanvāya sammāmanasikāramanvāya
tathārūpaṁ cetosamādhiṁ phusati yathā samāhite citte taṁ pubbenivāsaṁ
1 Sī. Yu. nimmātā. 2 Sī. Yu. sañjitā.
Anussarati tato parannānussarati. So evamāha yo kho so
bhavaṁ brahmā mahābrahmā abhibhū anabhibhūto aññadatthudaso vasavatti
issaro kattā nimmitā seṭṭho sajjitā vasī pitā bhūtabhabyānaṁ
yena mayaṁ bhotā brahmunā nimmitā so nicco dhuvo sassato
avipariṇāmadhammo sassatisamaṁ tatheva ṭhassati. Ye pana mayaṁ
ahumhā tena bhotā brahmunā nimmitā te mayaṁ aniccā addhuvā
appāyukā cavanadhammā itthattaṁ āgatāti. Idaṁ bhikkhave paṭhamaṁ
ṭhānaṁ yaṁ āgamma yaṁ ārabbha eke samaṇabrāhmaṇā ekaccasassatikā
ekaccāsassatikā ekaccaṁ sassataṁ ekaccaṁ asassataṁ attānañca
lokañca paññapenti.

[32] Dutiye ca bhonto samaṇabrāhmaṇā kimāgamma kimārabbha
ekaccasassatikā ekaccāsassatikā ekaccaṁ sassataṁ ekaccaṁ asassataṁ
attānañca lokañca paññapenti. Santi bhikkhave khiḍḍāpadosikā
nāma devā. Te ativelaṁ hassakhiḍḍāratidhammasamāpannā viharanti.
Tesaṁ ativelaṁ hassakhiḍḍāratidhammasamāpannānaṁ viharataṁ sati pamussati 1 .
Satiyā sammosā te devā tamhā kāyā cavanti. Ṭhānaṁ kho
panetaṁ bhikkhave vijjati yaṁ aññataro satto tamhā kāyā cavitvā
itthattaṁ āgacchati itthattaṁ āgato samāno agārasmā anagāriyaṁ
pabbajati agārasmā anagāriyaṁ pabbajito samāno ātappamanvāya
1 sammussati.
Padhānamanvāya anuyogamanvāya appamādamanvāya sammāmanasikāramanvāya
tathārūpaṁ cetosamādhiṁ phusati yathā samāhite citte taṁ
pubbenivāsaṁ anussarati tato paraṁ nānussarati. So evamāha
ye kho te bhonto devā na khiḍḍāpadosikā te na ativelaṁ
hassakhiḍḍāratirammasamāpannā viharanti. Tesaṁ na ativelaṁ
hassakhiḍḍāratidhammasamāpannānaṁ viharataṁ sati na pamussati. Satiyā
asammosā te devā tamhā kāyā na cavanti niccā dhuvā
sassatā avipariṇāmadhammā sassatisamaṁ tatheva ṭhassanti. Ye pana
mayaṁ ahumhā 1 khiḍḍāpadosikā te mayaṁ ativelaṁ hassakhiḍḍāratidhammasamāpannā
viharimhā 2 . Tesanno ativelaṁ hassakhiḍḍāratidhammasamāpannānaṁ
viharataṁ sati pamussati. Satiyā sammosā evaṁ mayaṁ
tamhā kāyā cutā aniccā addhuvā appāyukā cavanadhammā
itthattaṁ āgatāti. Idaṁ bhikkhave dutiyaṁ ṭhānaṁ yaṁ āgamma
yaṁ ārabbha eke samaṇabrāhmaṇā ekaccasassatikā ekaccāsassatikā
ekaccaṁ sassataṁ ekaccaṁ asassataṁ attānañca lokañca
paññapenti.