[1140] Kaṭhinassa kati mūlāni kati vatthūni kati bhūmiyo. Kaṭhinassa
ekaṁ mūlaṁ saṅgho. Tīṇi vatthūni saṅghāṭi uttarāsaṅgo antaravāsako.
Cha bhūmiyo khomaṁ kappāsikaṁ koseyyaṁ kambalaṁ sāṇaṁ bhaṅgaṁ.

[1141] Kaṭhinassa ko ādi kiṁ majjhe kiṁ pariyosānaṁ.
Kaṭhinassa pubbakaraṇaṁ ādi kiriyā majjhe atthāro pariyosānaṁ.

[1142] Katīhaṅgehi samannāgato puggalo abhabbo kaṭhinaṁ
attharituṁ katīhaṅgehi samannāgato puggalo bhabbo kaṭhinaṁ attharituṁ.
Aṭṭhahaṅgehi samannāgato puggalo abhabbo kaṭhinaṁ attharituṁ.
Aṭṭhahaṅgehi samannāgato puggalo bhabbo kaṭhinaṁ attharituṁ
katamehi aṭṭhahaṅgehi samannāgato puggalo abhabbo kaṭhinaṁ attharituṁ.
Pubbakaraṇaṁ na jānāti paccuddhāraṁ na jānāti adhiṭṭhānaṁ na
jānāti atthāraṁ na jānāti mātikaṁ na jānāti palibodhaṁ
na jānāti uddhāraṁ na jānāti ānisaṁsaṁ na jānāti. Imehi
aṭṭhahaṅgehi samannāgato puggalo abhabbo kaṭhinaṁ attharituṁ.
Katamehi aṭṭhahaṅgehi samannāgato puggalo bhabbo kaṭhinaṁ attharituṁ.
Pubbakaraṇaṁ jānāti paccuddhāraṁ jānāti adhiṭṭhānaṁ jānāti
atthāraṁ jānāti mātikaṁ jānāti palibodhaṁ jānāti uddhāraṁ
jānāti ānisaṁsaṁ jānāti. Imehi aṭṭhahaṅgehi samannāgato
puggalo bhabbo kaṭhinaṁ attharituṁ.

[1143] Katīnaṁ puggalānaṁ kaṭhinatthārā na rūhanti katīnaṁ
puggalānaṁ kaṭhinatthārā rūhanti. Tiṇṇaṁ puggalānaṁ kaṭhinatthārā
na rūhanti tiṇṇaṁ puggalānaṁ kaṭhinatthārā rūhanti. Katamesaṁ
tiṇṇaṁ puggalānaṁ kaṭhinatthārā na rūhanti. Nissīmaṭṭho anumodati
anumodanto na vācaṁ bhindati vācaṁ bhindanto na paraṁ viññāpeti.
Imesaṁ tiṇṇaṁ puggalānaṁ kaṭhinatthārā na rūhanti. Katamesaṁ
tiṇṇaṁ puggalānaṁ kaṭhinatthārā rūhanti. Sīmaṭṭho anumodati
anumodanto vācaṁ bhindati vācaṁ bhindanto paraṁ viññāpeti.
Imesaṁ tiṇṇaṁ puggalānaṁ kaṭhinatthārā rūhanti.

[1144] Kati kaṭhinatthārā na rūhanti kati kaṭhinatthārā
rūhanti. Tayo kaṭhinatthārā na rūhanti tayo kaṭhinatthārā
rūhanti. Katame tayo kaṭhinatthārā na rūhanti. Vatthuvipannañceva
hoti kālavipannañca karaṇavipannañca. Ime tayo kaṭhinatthārā
na rūhanti. Katame tayo kaṭhinatthārā rūhanti. Vatthusampannañceva
hoti kālasampannañca karaṇasampannañca. Ime tayo kaṭhinatthārā
rūhanti.

[1145] Kaṭhinaṁ jānitabbaṁ kaṭhinatthāro jānitabbo kaṭhinassa
atthāramāso jānitabbo kaṭhinassa atthāravipatti jānitabbā
kaṭhinassa atthārasampatti jānitabbā nimittakammaṁ jānitabbaṁ
parikathā jānitabbā kukkukataṁ jānitabbaṁ sannidhi jānitabbā
Nissaggiyaṁ jānitabbaṁ.

[1146] Kaṭhinaṁ jānitabbanti tesaññeva dhammānaṁ saṅgaho
samavāyo nāmaṁ nāmakammaṁ nāmadheyyaṁ nirutti byañjanaṁ abhilāpo
yadidaṁ kaṭhinanti. Kaṭhinassa atthāramāso jānitabboti vassānassa
pacchimo māso jānitabbo. Kaṭhinassa atthāravipatti jānitabbāti
catuvīsatiyā ākārehi kaṭhinassa atthāravipatti jānitabbā. Kaṭhinassa
atthārasampatti jānitabbāti sattarasahi ākārehi kaṭhinassa atthārasampatti
jānitabbā. Nimittakammaṁ jānitabbanti nimittaṁ karoti
iminā dussena kaṭhinaṁ attharissāmīti. Parikathā jānitabbāti
parikathaṁ karoti imāya parikathāya kaṭhinadussaṁ nibbattessāmīti.
Kukkukataṁ jānitabbanti anādiyadānaṁ jānitabbaṁ. Sannidhi jānitabbāti
dve sannidhiyo jānitabbā karaṇasannidhi ca 1 nicayasannidhi ca 1 .
Nissaggiyaṁ jānitabbanti kayiramāne aruṇaṁ udriyati 2 .

[1147] Kaṭhinatthāro jānitabboti sace saṅghassa kaṭhinadussaṁ
uppannaṁ hoti saṅghena kathaṁ paṭipajjitabbaṁ atthārakena kathaṁ
paṭipajjitabbaṁ anumodakena kathaṁ paṭipajjitabbaṁ. Saṅghena ñattidutiyena
kammena kaṭhinatthārakassa bhikkhuno dātabbaṁ. Tena
kaṭhinatthārakena bhikkhunā tadaheva dhovitvā vimajjitvā vicāretvā
chinditvā sibbetvā rajitvā kappaṁ katvā kaṭhinaṁ attharitabbaṁ.
Sace saṅghāṭiyā kaṭhinaṁ attharitukāmo hoti porāṇikā saṅghāṭi
1 Ma. vā. 2 Ma. uṭṭhahati.
Paccuddharitabbā navā saṅghāṭi adhiṭṭhātabbā imāya saṅghāṭiyā
kaṭhinaṁ attharāmīti vācā bhinditabbā. Sace uttarāsaṅgena kaṭhinaṁ
attharitukāmo hoti porāṇako uttarāsaṅgo paccuddharitabbo
navo uttarāsaṅgo adhiṭṭhātabbo iminā uttarāsaṅgena kaṭhinaṁ
attharāmīti vācā bhinditabbā. Sace antaravāsakena kaṭhinaṁ
attharitukāmo hoti porāṇako antaravāsako paccuddharitabbo
navo antaravāsako adhiṭṭhātabbo iminā antaravāsakena kaṭhinaṁ
attharāmīti vācā bhinditabbā. Tena kaṭhinatthārakena bhikkhunā
saṅghaṁ upasaṅkamitvā ekaṁsaṁ uttarāsaṅgaṁ karitvā añjaliṁ paggahetvā
evamassa vacanīyo atthataṁ bhante saṅghassa kaṭhinaṁ dhammiko
kaṭhinatthāro anumodathāti. Tehi anumodakehi bhikkhūhi ekaṁsaṁ
uttarāsaṅgaṁ karitvā añjaliṁ paggahetvā evamassa vacanīyo atthataṁ
āvuso saṅghassa kaṭhinaṁ dhammiko kaṭhinatthāro anumodāmāti.
Tena kaṭhinatthārakena bhikkhunā sambahule bhikkhū upasaṅkamitvā ekaṁsaṁ
uttarāsaṅgaṁ karitvā añjaliṁ paggahetvā evamassa vacanīyā atthataṁ
bhante saṅghassa kaṭhinaṁ dhammiko kaṭhinatthāro anumodathāti.
Tehi anumodakehi bhikkhūhi ekaṁsaṁ uttarāsaṅgaṁ karitvā añjaliṁ
paggahetvā evamassa vacanīyo atthataṁ āvuso saṅghassa kaṭhinaṁ
dhammiko kaṭhinatthāro anumodāmāti. Tena kaṭhinatthārakena
bhikkhunā ekaṁ bhikkhuṁ upasaṅkamitvā ekaṁsaṁ uttarāsaṅgaṁ karitvā
Añjaliṁ paggahetvā evamassa vacanīyo atthataṁ āvuso saṅghassa
kaṭhinaṁ dhammiko kaṭhinatthāro anumodāhīti. Tena anumodakena
bhikkhunā ekaṁsaṁ uttarāsaṅgaṁ karitvā añjaliṁ paggahetvā evamassa
vacanīyo atthataṁ āvuso saṅghassa kaṭhinaṁ dhammiko kaṭhinatthāro
anumodāmīti.

[1148] Saṅgho kaṭhinaṁ attharati gaṇo kaṭhinaṁ attharati puggalo
kaṭhinaṁ attharatīti. Na saṅgho kaṭhinaṁ attharati na gaṇo kaṭhinaṁ
attharati puggalo kaṭhinaṁ attharatīti. Hañci na saṅgho kaṭhinaṁ
attharati na gaṇo kaṭhinaṁ attharati puggalo kaṭhinaṁ attharati
saṅghassa anatthataṁ hoti kaṭhinaṁ gaṇassa anatthataṁ hoti kaṭhinaṁ
puggalassa atthataṁ hoti kaṭhinaṁ. Saṅgho pātimokkhaṁ uddisati
gaṇo pātimokkhaṁ uddisati puggalo pātimokkhaṁ uddissatīti.
Na saṅgho pātimokkhaṁ uddisati na gaṇo pātimokkhaṁ uddisati
puggalo pātimokkhaṁ uddisatīti. Hañci na saṅgho pātimokkhaṁ
uddisati na gaṇo pātimokkhaṁ uddisati puggalo pātimokkhaṁ
uddisati saṅghassa anuddiṭṭhaṁ hoti pātimokkhaṁ gaṇassa anuddiṭṭhaṁ
hoti pātimokkhaṁ puggalassa uddiṭṭhaṁ hoti pātimokkhaṁ. Saṅghassa
sāmaggiyā gaṇassa sāmaggiyā puggalassa uddesā saṅghassa uddiṭṭhaṁ
hoti pātimokkhaṁ gaṇassa udadiṭṭhaṁ hoti pātimokkhaṁ puggalassa
uddiṭṭhaṁ hoti pātimokkhaṁ. Evameva na saṅgho kaṭhinaṁ attharati
Na gaṇo kaṭhinaṁ attharati puggalo kaṭhinaṁ attharati saṅghassa
anumodanāya gaṇassa anumodanāya puggalassa atthārā saṅghassa
atthataṁ hoti kaṭhinaṁ gaṇassa atthataṁ hoti kaṭhinaṁ puggalassa
atthataṁ hoti kaṭhinanti.

[1149] Pakkamanantiko kaṭhinuddhāro
vutto ādiccabandhunā
etañca tāhaṁ pucchāmi
katamo palibodho paṭhamaṁ chijjati.
Pakkamanantiko kaṭhinuddhāro
vutto ādiccabandhunā
etañca tāhaṁ vissajjissaṁ
cīvarapalibodho paṭhamaṁ chijjati
tassa saha bahisīmagamanā āvāsapalibodho chijjati.