[470] Yantena bhagavatā jānatā passatā arahatā sammāsambuddhena
adinnaṁ ādiyanapaccayā pārājikaṁ kattha paññattanti.
Rājagahe paññattaṁ. Kaṁ ārabbhāti. Dhaniyaṁ kumbhakāraputtaṁ
ārabbha. Kismiṁ vatthusminti. Dhaniyo kumbhakāraputto rañño dārūni
adinnaṁ ādiyi tasmiṁ vatthusmiṁ. Ekā paññatti ekā
anuppaññatti. Channaṁ āpattisamuṭṭhānānaṁ tīhi samuṭṭhānehi
samuṭṭhāti siyā kāyato ca cittato ca samuṭṭhāti na vācato
siyā vācato ca cittato ca samuṭṭhāti na kāyato siyā
kāyato ca vācato ca cittato ca samuṭṭhāti.

[471] Sañcicca manussaviggahaṁ jīvitā voropanapaccayā
Pārājikaṁ kattha paññattanti. Vesāliyā paññattaṁ. Kaṁ ārabbhāti.
Sambahule bhikkhū ārabbha. Kismiṁ vatthusminti. Sambahulā bhikkhū
aññamaññaṁ jīvitā voropesuṁ tasmiṁ vatthusmiṁ. Ekā paññatti
ekā anuppaññatti. Channaṁ āpattisamuṭṭhānānaṁ tīhi
samuṭṭhānehi samuṭṭhāti siyā kāyato ca cittato ca samuṭṭhāti
na vācato siyā vācato ca cittato ca samuṭṭhāti na kāyato
siyā kāyato ca vācato ca cittato ca samuṭṭhāti.

[472] Asantaṁ abhūtaṁ uttarimanussadhammaṁ ullapanapaccayā pārājikaṁ
kattha paññattanti. Vesāliyā paññattaṁ. Kaṁ ārabbhāti. Vaggumudātīriye
bhikkhū ārabbha. Kismiṁ vatthusminti. Vaggumudātīriyā bhikkhū
gihīnaṁ aññamaññassa uttarimanussadhammassa vaṇṇaṁ bhāsiṁsu 1 tasmiṁ
vatthusmiṁ. Ekā paññatti ekā anuppaññatti. Channaṁ āpattisamuṭṭhānānaṁ
tīhi samuṭṭhānehi samuṭṭhāti siyā kāyato ca cittato
ca samuṭṭhāti na vācato siyā vācato ca cittato ca samuṭṭhāti
na kāyato siyā kāyato ca vācato ca cittato ca samuṭṭhāti.

[473] Yantena bhagavatā jānatā passatā arahatā sammāsambuddhena
upakkamitvā asuciṁ mocanapaccayā saṅghādiseso kattha
paññatto. Kaṁ ārabbha. Kismiṁ vatthusmiṁ .pe. Kenābhaṭanti.
Yantena bhagavatā jānatā passatā arahatā sammāsambuddhena upakkamitvā
asuciṁ mocanapaccayā saṅghādiseso kattha paññattoti.
1 Po. vaṇṇayiṁsu.
Sāvatthiyā paññatto. Kaṁ ārabbhāti. Āyasmantaṁ seyyasakaṁ
ārabbha. Kismiṁ vatthusminti. Āyasmā seyyasako upakkamitvā
asuciṁ mocesi tasmiṁ vatthusmiṁ. Atthi tattha paññatti anuppaññatti
anuppannapaññattīti. Ekā paññatti ekā anuppaññatti
anuppannapaññatti tasmiṁ natthi. Sabbattha paññatti padesapaññattīti.
Sabbattha paññatti. Sādhāraṇapaññatti asādhāraṇapaññattīti.
Asādhāraṇapaññatti. Ekato paññatti ubhato paññattīti.
Ekato paññatti. Pañcannaṁ pātimokkhuddesānaṁ katthogadhaṁ
kattha pariyāpannanti. Nidānogadhaṁ nidānapariyāpannaṁ. Katamena
uddesena uddesaṁ āgacchatīti. Tatiyena uddesena uddesaṁ
āgacchati. Catunnaṁ vipattīnaṁ katamā vipattīti. Sīlavipatti.
Sattannaṁ āpattikkhandhānaṁ katamo āpattikkhandhoti.
Saṅghādisesāpattikkhandho. Channaṁ āpattisamuṭṭhānānaṁ katīhi samuṭṭhānehi
samuṭṭhāti. Ekena samuṭṭhānena samuṭṭhāti kāyato ca cittato ca
samuṭṭhāti na vācato .pe. Kenābhaṭanti. Paramparābhaṭaṁ.
Upāli dāsako ceva soṇako siggavo tathā
moggalīputtena pañcamā ete jambusirivhaye.
Tato mahindo iṭṭiyo uttiyo ceva sambalo
.pe.
Ete nāgā mahāpaññā vinayaññū maggakovidā
Vinayaṁ dīpe pakāsesuṁ piṭakaṁ tambapaṇṇiyāti.

[474] Mātugāmena saddhiṁ kāyasaṁsaggaṁ samāpajjanapaccayā
saṅghādiseso kattha paññattoti. Sāvatthiyā paññatto. Kaṁ
ārabbhāti. Āyasmantaṁ udāyiṁ ārabbha. Kismiṁ vatthusminti.
Āyasmā udāyi mātugāmena saddhiṁ kāyasaṁsaggaṁ samāpajji tasmiṁ
vatthusmiṁ. Ekā paññatti. Channaṁ āpattisamuṭṭhānānaṁ ekena
samuṭṭhānena samuṭṭhāti kāyato ca cittato ca samuṭṭhāti na vācato.

[475] Mātugāmaṁ duṭṭhullāhi vācāhi obhāsanapaccayā
saṅghādiseso kattha paññattoti. Sāvatthiyā paññatto. Kaṁ
ārabbhāti. Āyasmantaṁ udāyiṁ ārabbha. Kismiṁ vatthusminti.
Āyasmā udāyi mātugāmaṁ duṭṭhullāhi vācāhi obhāsi tasmiṁ
vatthusmiṁ. Ekā paññatti. Channaṁ āpattisamuṭṭhānānaṁ tīhi
samuṭṭhānehi samuṭṭhāti siyā kāyato ca cittato ca samuṭṭhāti
na vācato siyā vācato ca cittato ca samuṭṭhāti na kāyato
siyā kāyato ca vācato ca cittato ca samuṭṭhāti.

[476] Mātugāmassa santike attakāmapāricariyāya vaṇṇaṁ
bhāsanapaccayā saṅghādiseso kattha paññattoti. Sāvatthiyā paññatto.
Kaṁ ārabbhāti. Āyasmantaṁ udāyiṁ ārabbha. Kismiṁ
vatthusminti. Āyasmā udāyi mātugāmassa santike attakāmapāricariyāya
vaṇṇaṁ abhāsi tasmiṁ vatthusmiṁ. Ekā paññatti.
Channaṁ āpattisamuṭṭhānānaṁ tīhi samuṭṭhānehi samuṭṭhāti.

[477] Sañcarittaṁ samāpajjanapaccayā saṅghādiseso kattha paññattoti.
Sāvatthiyā paññatto. Kaṁ ārabbhāti. Āyasmantaṁ
udāyiṁ ārabbha. Kismiṁ vatthusminti. Āyasmā udāyi sañcarittaṁ
samāpajji tasmiṁ vatthusmiṁ. Ekā paññatti ekā anuppaññatti.
Channaṁ āpattisamuṭṭhānānaṁ chahi samuṭṭhānehi samuṭṭhāti
siyā kāyato samuṭṭhāti na vācato na cittato siyā vācato
samuṭṭhāti na kāyato na cittato siyā kāyato ca vācato
ca samuṭṭhāti na cittato siyā kāyato ca cittato ca
samuṭṭhāti na vācato siyā vācato ca cittato ca samuṭṭhāti
na kāyato siyā kāyato ca vācato ca cittato ca samuṭṭhāti.

[478] Saññācikāya kuṭiṁ kārāpanapaccayā saṅghādiseso kattha
paññattoti. Āḷaviyā paññatto. Kaṁ ārabbhāti. Āḷavike
bhikkhū ārabbha. Kismiṁ vatthusminti. Āḷavikā bhikkhū saññācikāya
kuṭiṁ kārāpesuṁ tasmiṁ vatthusmiṁ. Ekā paññatti. Channaṁ
āpattisamuṭṭhānānaṁ chahi samuṭṭhānehi samuṭṭhāti.

[479] Mahallakaṁ vihāraṁ kārāpanapaccayā saṅghādiseso kattha
paññattoti. Kosambiyā paññatto. Kaṁ ārabbhāti. Āyasmantaṁ
channaṁ ārabbha. Kismiṁ vatthusminti. Āyasmā channo vihāravatthuṁ
sodhento aññataraṁ cetiyarukkhaṁ chedāpesi tasmiṁ vatthusmiṁ.
Ekā paññatti. Channaṁ āpattisamuṭṭhānānaṁ chahi samuṭṭhānehi
samuṭṭhāti.