[460] Anādariyaṁ paṭicca harite uccāraṁ vā passāvaṁ vā
kheḷaṁ vā karonto ekaṁ āpattiṁ āpajjati dukkaṭaṁ.

[461] Anādariyaṁ paṭicca udake uccāraṁ vā passāvaṁ vā
kheḷaṁ vā karonto kati āpattiyo āpajjati. Anādariyaṁ
paṭicca udake uccāraṁ vā passāvaṁ vā kheḷaṁ vā karonto
ekaṁ āpattiṁ āpajjati dukkaṭaṁ anādariyaṁ paṭicca udake
uccāraṁ vā passāvaṁ vā kheḷaṁ vā karonto imaṁ ekaṁ āpattiṁ
āpajjati.
Sattamo vaggo 1 .
Pañcasattati sekhiyā niṭṭhitā.
Katāpattivāraṁ niṭṭhitaṁ dutiyaṁ.

[462] Methunaṁ dhammaṁ paṭisevantassa āpattiyo catunnaṁ vipattīnaṁ
kati vipattiyo bhajanti. Methunaṁ dhammaṁ paṭisevantassa āpattiyo
catunnaṁ vipattīnaṁ dve vipattiyo bhajanti siyā sīlavipattiṁ siyā
ācāravipattiṁ .pe. Anādariyaṁ paṭicca udake uccāraṁ vā passāvaṁ
vā kheḷaṁ vā karontassa āpatti catunnaṁ vipattīnaṁ kati vipattiyo
bhajati. Anādariyaṁ paṭicca udake uccāraṁ vā passāvaṁ vā
1 Ma. Yu. pādakavaggo sattamo.
Kheḷaṁ vā karontassa āpatti catunnaṁ vipattīnaṁ ekaṁ vipattiṁ
bhajati ācāravipattiṁ.
Vipattivāraṁ niṭṭhitaṁ tatiyaṁ.

[463] Methunaṁ dhammaṁ paṭisevantassa āpattiyo sattannaṁ āpattikkhandhānaṁ
katīhi āpattikkhandhehi saṅgahitā. Methunaṁ dhammaṁ paṭisevantassa
āpattiyo sattannaṁ āpattikkhandhānaṁ tīhi āpattikkhandhehi saṅgahitā
siyā pārājikāpattikkhandhena siyā thullaccayāpattikkhandhena siyā
dukkaṭāpattikkhandhena .pe. Anādariyaṁ paṭicca udake uccāraṁ vā
passāvaṁ vā kheḷaṁ vā karontassa āpatti sattannaṁ āpattikkhandhānaṁ
katīhi āpattikkhandhehi saṅgahitā. Anādariyaṁ paṭicca udake
uccāraṁ vā passāvaṁ vā kheḷaṁ vā karontassa āpatti sattannaṁ
āpattikkhandhānaṁ ekena āpattikkhandhena saṅgahitā dukkaṭāpattikkhandhena.
Saṅgahitavāraṁ niṭṭhitaṁ catutthaṁ.

[464] Methunaṁ dhammaṁ paṭisevantassa āpattiyo channaṁ āpattisamuṭṭhānānaṁ
katīhi samuṭṭhānehi samuṭṭhahanti 1 . Methunaṁ dhammaṁ
paṭisevantassa āpattiyo channaṁ āpattisamuṭṭhānānaṁ ekena
samuṭṭhānena samuṭṭhahanti kāyato ca cittato ca samuṭṭhahanti na
vācato .pe. Anādarayaṁ paṭicca udake uccāraṁ vā passāvaṁ
vā kheḷaṁ vā karontassa āpatti channaṁ āpattisamuṭṭhānānaṁ
1 Ma. Yu. sabbattha samuṭṭhantīti dissati.
Katīhi samuṭṭhānehi samuṭṭhāti. Anādariyaṁ paṭicca udake uccāraṁ vā
passāvaṁ vā kheḷaṁ vā karontassa āpatti channaṁ āpattisamuṭṭhānānaṁ
ekena samuṭṭhānena samuṭṭhāti kāyato ca cittato ca samuṭṭhāti
na vācato.
Samuṭṭhānavāraṁ niṭṭhitaṁ pañcamaṁ.

[465] Methunaṁ dhammaṁ paṭisevantassa āpattiyo catunnaṁ adhikaraṇānaṁ
katamaṁ adhikaraṇaṁ. Methunaṁ dhammaṁ paṭisevantassa āpattiyo catunnaṁ
adhikaraṇānaṁ āpattādhikaraṇaṁ .pe. Anādariyaṁ paṭicca udake
uccāraṁ vā passāvaṁ vā kheḷaṁ vā karontassa āpatti catunnaṁ
adhikaraṇānaṁ katamaṁ adhikaraṇaṁ. Anādariyaṁ paṭicca udake uccāraṁ
vā passāvaṁ vā kheḷaṁ vā karontassa āpatti catunnaṁ adhikaraṇānaṁ
āpattādhikaraṇaṁ.
Adhikaraṇavāraṁ niṭṭhitaṁ chaṭṭhaṁ.

[466] Methunaṁ dhammaṁ paṭisevantassa āpattiyo sattannaṁ samathānaṁ
katīhi samathehi sammanti. Methunaṁ dhammaṁ paṭisevantassa āpattiyo
sattannaṁ samathānaṁ tīhi samathehi sammanti siyā sammukhāvinayena ca
paṭiññātakaraṇena ca siyā sammukhāvinayena ca tiṇavatthārakena
ca .pe. Anādariyaṁ paṭicca udake uccāraṁ vā passāvaṁ vā
kheḷaṁ vā karontassa āpatti sattannaṁ samathānaṁ katīhi samathehi
sammati. Anādariyaṁ paṭicca udake uccāraṁ vā passāvaṁ vā
Kheḷaṁ vā karontassa āpatti sattannaṁ samathānaṁ tīhi samathehi
sammati siyā sammukhāvinayena ca paṭiññātakaraṇena ca siyā
sammukhāvinayena ca tiṇavatthārakena ca.
Samathavāraṁ niṭṭhitaṁ sattamaṁ.

[467] Methunaṁ dhammaṁ paṭisevanto kati āpattiyo āpajjati.
Methunaṁ dhammaṁ paṭisevanto tisso āpattiyo āpajjati akkhāyite
sarīre methunaṁ dhammaṁ paṭisevati āpatti pārājikassa yebhuyyena
khāyite sarīre methunaṁ dhammaṁ paṭisevati āpatti thullaccayassa
vivaṭakate 1 mukhe acchupantaṁ aṅgajātaṁ paveseti āpatti dukkaṭassa
methunaṁ dhammaṁ paṭisevanto imā tisso āpattiyo āpajjati.
Tā āpattiyo catunnaṁ vipattīnaṁ kati vipattiyo bhajanti. Sattannaṁ
āpattikkhandhānaṁ katīhi āpattikkhandhehi saṅgahitā. Channaṁ āpattisamuṭṭhānānaṁ
katīhi samuṭṭhānehi samuṭṭhahanti. Catunnaṁ adhikaraṇānaṁ
katamaṁ adhikaraṇaṁ. Sattannaṁ samathānaṁ katīhi samathehi sammanti.
Tā āpattiyo catunnaṁ vipattīnaṁ dve vipattiyo bhajanti siyā
sīlavipattiṁ siyā ācāravipattiṁ. Sattannaṁ āpattikkhandhānaṁ tīhi
āpattikkhandhehi saṅgahitā siyā pārājikāpattikkhandhena siyā
thullaccayāpattikkhandhena siyā dukkaṭāpattikkhandhena. Channaṁ āpattisamuṭṭhānānaṁ
ekena samuṭṭhānena samuṭṭhahanti kāyato ca cittato
ca samuṭṭhahanti na vācato. Catunnaṁ adhikaraṇānaṁ āpattādhikaraṇaṁ.
1 Ma. vaṭṭakate. Yu. vattakate.
Sattannaṁ samathānaṁ tīhi samathehi sammanti siyā sammukhāvinayena ca
paṭiññātakaraṇena ca siyā sammukhāvinayena ca tiṇavatthārakena
ca .pe. Anādariyaṁ paṭicca udake uccāraṁ vā passāvaṁ vā
kheḷaṁ vā karonto kati āpattiyo āpajjati. Anādariyaṁ paṭicca
udake uccāraṁ vā passāvaṁ vā kheḷaṁ vā karonto ekaṁ āpattiṁ
āpajjati dukkaṭaṁ. Anādariyaṁ paṭicca udake uccāraṁ vā passāvaṁ
vā kheḷaṁ vā karonto imaṁ ekaṁ āpattiṁ āpajjati. Sā
āpatti catunnaṁ vipattīnaṁ kati vipattiyo bhajati. Sattannaṁ
āpattikkhandhānaṁ katīhi āpattikkhandhehi saṅgahitā. Channaṁ
āpattisamuṭṭhānānaṁ katīhi samuṭṭhānehi samuṭṭhāti. Catunnaṁ adhikaraṇānaṁ
katamaṁ adhikaraṇaṁ. Sattannaṁ samathānaṁ katīhi samathehi sammati.
Sā āpatti catunnaṁ vipattīnaṁ ekaṁ vipattiṁ bhajati ācāravipattiṁ.
Sattannaṁ āpattikkhandhānaṁ ekena āpattikkhandhena saṅgahitā
dukkaṭāpattikkhandhena. Channaṁ āpattisamuṭṭhānānaṁ ekena samuṭṭhānena
samuṭṭhāti kāyato ca cittato ca samuṭṭhāti na vācato.
Catunnaṁ adhikaraṇānaṁ āpattādhikaraṇaṁ. Sattannaṁ samathānaṁ tīhi
samathehi sammati siyā sammukhāvinayena ca paṭiññātakaraṇena ca
siyā sammukhāvinayena ca tiṇavatthārakena ca.
Samuccayavāraṁ niṭṭhitaṁ aṭṭhamaṁ.
Ime aṭṭha vārā sajjhāyamattena 1 likhitā.
1 Ma. Yu. sajjhāyamaggena.
Tassuddānaṁ

[468] Kattha paññatti katī ca vipattisaṅgahena ca
samuṭṭhānādhikaraṇā samatho ca samuccayoti.
----------

[469] Yantena bhagavatā jānatā passatā arahatā sammāsambuddhena
methunaṁ dhammaṁ paṭisevanapaccayā pārājikaṁ kattha paññattaṁ. Kaṁ
ārabbha. Kismiṁ vatthusmiṁ .pe. Kenābhaṭanti. Yantena bhagavatā
jānatā passatā arahatā sammāsambuddhena methunaṁ dhammaṁ paṭisevanapaccayā
pārājikaṁ kattha paññattanti. Vesāliyā paññattaṁ. Kaṁ
ārabbhāti. Sudinnaṁ kalandaputtaṁ ārabbha. Kismiṁ vatthusminti.
Sudinno kalandaputto purāṇadutiyikāya methunaṁ dhammaṁ paṭisevi tasmiṁ
vatthusmiṁ. Atthi tattha paññatti anuppaññatti anuppannapaññattīti.
Ekā paññatti dve anuppaññattiyo anuppannapaññatti
tasmiṁ natthi. Sabbattha paññatti padesapaññatīti. Sabbattha
paññatti. Sādhāraṇapaññatti asādhāraṇapaññattīti. Sādhāraṇapaññatti.
Ekato paññatti ubhato paññattīti. Ubhato
paññatti. Pañcannaṁ pātimokkhuddesānaṁ katthogadhaṁ kattha pariyāpannanti.
Nidānogadhaṁ nidānapariyāpannaṁ. Katamena uddesena
uddesaṁ āgacchatīti. Dutiyena uddesena uddesaṁ āgacchati. Catunnaṁ
vipattīnaṁ katamā vipattīti. Sīlavipatti. Sattannaṁ āpattikkhandhānaṁ
1 Ma. samatho samuccayena ca. Yu. samathā samuccayena ca.
Katamo āpattikkhandhoti. Pārājikāpattikkhandho. Channaṁ āpattisamuṭṭhānānaṁ
katīhi samuṭṭhānehi samuṭṭhātīti. Ekena samuṭṭhānena
samuṭṭhāti kāyato ca cittato ca samuṭṭhāti na vācato .pe.
Kenābhaṭanti. Pāramparābhaṭaṁ.
Upāli dāsako ceva soṇako siggavo tathā
moggalīputtena pañcamā ete jambusirivhaye.
Tato mahindo iṭṭiyo uttiyo ceva sambalo
.pe.
Ete nāgā mahāpaññā vinayaññū maggakovidā
vinayaṁ dīpe pakāsesuṁ piṭakaṁ tambapaṇṇiyāti.