[377] Hetuṁ bhāvanāyapahātabbaṁ dhammaṁ paṭicca hetu
bhāvanāyapahātabbo dhammo uppajjati hetupaccayā: tīṇi. Nahetuṁ
bhāvanāyapahātabbaṁ dhammaṁ paṭicca nahetu bhāvanāyapahātabbo dhammo
uppajjati hetupaccayā: tīṇi. Hetuṁ bhāvanāyapahātabbañca nahetuṁ
bhāvanāyapahātabbañca dhammaṁ paṭicca hetu bhāvanāyapahātabbo dhammo
uppajjati hetupaccayā: tīṇi.

[378] Hetuyā nava ārammaṇe nava avigate nava.

[379] Nahetuṁ bhāvanāyapahātabbaṁ dhammaṁ paṭicca hetu
bhāvanāyapahātabbo dhammo uppajjati nahetupaccayā:.

[380] Nahetuyā ekaṁ nādhipatiyā nava napurejāte nava
napacchājāte nava nāasevane nava nakamme tīṇi navipāke
nava navippayutte nava.

[381] Hetupaccayā nādhipatiyā nava.

[382] Nahetupaccayā ārammaṇe ekaṁ.
Sahajātavāropi paccayavāropi nissayavāropi saṁsaṭṭhavāropi
sampayuttavāropi paṭiccavārasadisā evaṁ vitthāretabbā.
Pañhāvāro

[383] Hetu bhāvanāyapahātabbo dhammo hetussa bhāvanāyapahātabbassa
dhammassa hetupaccayena paccayo: tīṇi.

[384] Hetu bhāvanāyapahātabbo dhammo hetussa bhāvanāyapahātabbassa
dhammassa ārammaṇapaccayena paccayo:.

[385] Hetuyā tīṇi ārammaṇe nava adhipatiyā nava
anantare nava samanantare nava sahajāte nava aññamaññe
nava nissaye nava upanissaye nava āsevane nava kamme
tīṇi āhāre tīṇi indriye tīṇi avigate nava.

[386] Hetu bhāvanāyapahātabbo dhammo hetussa bhāvanāyapahātabbassa
dhammassa ārammaṇapaccayena paccayo: sahajātapaccayena
paccayo: upanissayapaccayena paccayo:.