[524] Pītisahagato dhammo pītisahagatassa dhammassa samanantarapaccayena
paccayo. Anantarapaccayasadisaṁ.

[525] Pītisahagato dhammo pītisahagatassa dhammassa
sahajātapaccayena paccayo pītisahagato eko khandho tiṇṇannaṁ
khandhānaṁ sahajātapaccayena paccayo dve khandhā dvinnaṁ khandhānaṁ
sahajātapaccayena paccayo. Paṭiccasadisaṁ. Sahajāte dasa pañhā.

[526] Pītisahagato dhammo pītisahagatassa dhammassa aññamaññapaccayena
paccayo nissayapaccayena paccayo. Dasa pañhā kātabbā.

[527] Pītisahagato dhammo pītisahagatassa dhammassa upanissayapaccayena
paccayo ārammaṇūpanissayo anantarūpanissayo pakatūpanissayo.
Pakatūpanissayo: pītisahagataṁ saddhaṁ upanissāya pītisahagatena
cittena dānaṁ deti sīlaṁ samādiyati uposathakammaṁ karoti
pītisahagataṁ jhānaṁ uppādeti vipassanaṁ ... Maggaṁ ... Samāpattiṁ uppādeti
mānaṁ jappeti diṭṭhiṁ gaṇhāti pītisahagataṁ sīlaṁ ... Sutaṁ ... Cāgaṁ ...
Paññaṁ upanissāya pītisahagatena cittena dānaṁ deti sīlaṁ samādiyati
mānaṁ jappeti diṭṭhiṁ gaṇhāti pītisahagataṁ rāgaṁ ... Mohaṁ mānaṁ diṭṭhiṁ ...
Patthanaṁ upanissāya pītisahagatena cittena dānaṁ deti sīlaṁ samādiyati
uposathakammaṁ karoti pītisahagataṁ jhānaṁ uppādeti samāpattiṁ
uppādeti pītisahagatena cittena adinnaṁ ādiyati musā bhaṇati pisuṇaṁ
bhaṇati samphaṁ palapati sandhiṁ chindati nillopaṁ harati ekāgārikaṁ karoti
paripanthe tiṭṭhati paradāraṁ gacchati gāmaghātaṁ karoti nigamaghātaṁ karoti
pītisahagatā saddhā ... Sīlaṁ sutaṁ cāgo paññā rāgo moho māno
diṭṭhi ... Patthanā pītisahagatāya saddhāya sīlassa sutassa cāgassa
paññāya rāgassa mohassa mānassa diṭṭhiyā patthanāya
upanissayapaccayena paccayo.

[528] Pītisahagato dhammo sukhasahagatassa dhammassa upanissayapaccayena
paccayo ārammaṇūpanissayo anantarūpanissayo pakatūpanissayo.
Pakatūpanissayo: pītisahagataṁ saddhaṁ upanissāya sukhasahagatena
cittena dānaṁ deti .pe. Samāpattiṁ uppādeti mānaṁ jappeti diṭṭhiṁ
gaṇhāti pītisahagataṁ sīlaṁ ... Sutaṁ cāgaṁ paññaṁ rāgaṁ mohaṁ mānaṁ diṭṭhiṁ ...
Patthanaṁ upanissāya sukhasahagatena cittena dānaṁ deti .pe. Samāpattiṁ
uppādeti sukhasahagatena cittena adinnaṁ ādiyati ... Nigamaghātaṁ karoti
pītisahagatā saddhā ... Patthanā sukhasahagatāya saddhāya patthanāya
sukhasahagatassa kāyaviññāṇassa upanissayapaccayena paccayo.

[529] Pītisahagato dhammo upekkhāsahagatassa dhammassa
upanissayapaccayena paccayo ārammaṇūpanissayo anantarūpanissayo
pakatūpanissayo. Pakatūpanissayo: pītisahagataṁ saddhaṁ upanissāya
upekkhāsahagatena cittena dānaṁ deti ... Abhiññaṁ uppādeti samāpattiṁ
uppādeti ... Diṭṭhiṁ gaṇhāti pītisahagataṁ sīlaṁ ... Patthanaṁ upanissāya
upekkhāsahagatena cittena dānaṁ deti ... Nigamaghātaṁ karoti
pītisahagatā saddhā ... Patthanā upekkhāsahagatāya saddhāya patthanāya
upanissayapaccayena paccayo.

[530] Pītisahagato dhammo pītisahagatassa ca sukhasahagatassa ca
dhammassa upanissayapaccayena paccayo ārammaṇūpanissayo
anantarūpanissayo pakatūpanissayo. Pakatūpanissayo: pītisahagataṁ saddhaṁ
upanissāya pītisahagatena ca sukhasahagatena ca cittena dānaṁ deti ...
Diṭṭhiṁ gaṇhāti pītisahagataṁ sukhasahagataṁ sīlaṁ ... Patthanaṁ upanissāya
pītisahagatena ca sukhasahagatena ca cittena dānaṁ deti ... Nigamaghātaṁ
karoti pītisahagatā saddhā ... Patthanā pītisahagatāya ca sukhasahagatāya
ca saddhāya patthanāya upanissayapaccayena paccayo.

[531] Sukhasahagato dhammo sukhasahagatassa dhammassa upanissayapaccayena
paccayo ārammaṇūpanissayo anantarūpanissayo pakatūpanissayo.
Pakatūpanissayo: sukhasahagataṁ saddhaṁ upanissāya sukhasahagatena
cittena dānaṁ deti ... Diṭṭhiṁ gaṇhāti sukhasahagataṁ sīlaṁ ... Patthanaṁ ...
Sukhasahagataṁ kāyaviññāṇaṁ upanissāya sukhasahagatena cittena dānaṁ
deti ... Nigamaghātaṁ karoti sukhasahagatā saddhā ... Patthanā ... Sukhasahagataṁ
kāyaviññāṇaṁ sukhasahagatāya saddhāya patthanāya sukhasahagatassa
kāyaviññāṇassa upanissayapaccayena paccayo.

[532] Sukhasahagato dhammo pītisahagatassa dhammassa upanissayapaccayena
paccayo ārammaṇūpanissayo anantarūpanissayo pakatūpanissayo.
Pakatūpanissayo: sukhasahagataṁ saddhaṁ upanissāya pītisahagatena
cittena dānaṁ deti ... Diṭṭhiṁ gaṇhāti sukhasahagataṁ sīlaṁ ... Patthanaṁ ...
Sukhasahagataṁ kāyaviññāṇaṁ upanissāya pītisahagatena cittena dānaṁ
deti ... Nigamaghātaṁ karoti sukhasahagatā saddhā ... Patthanā ... Sukhasahagataṁ
kāyaviññāṇaṁ pītisahagatāya saddhāya patthanāya upanissayapaccayena
paccayo.

[533] Sukhasahagato dhammo upekkhāsahagatassa dhammassa
upanissayapaccayena paccayo ārammaṇūpanissayo anantarūpanissayo
pakatūpanissayo. Pakatūpanissayo: sukhasahagataṁ saddhaṁ upanissāya
upekkhāsahagatena cittena dānaṁ deti ... Abhiññaṁ uppādeti ... Diṭṭhiṁ
gaṇhāti sukhasahagataṁ sīlaṁ ... Patthanaṁ ... Sukhasahagataṁ kāyaviññāṇaṁ
upanissāya upekkhāsahagatena cittena dānaṁ deti ... Nigamaghātaṁ karoti
sukhasahagatā saddhā ... Patthanā ... Sukhasahagataṁ kāyaviññāṇaṁ
upekkhāsahagatāya saddhāya patthanāya upanissayapaccayena paccayo.