[779] Yassa yattha cakkhāyatanaṁ nuppajjati tassa tattha manāyatanaṁ
na nirujjhissatīti: pañcavokārā cavantānaṁ acakkhukānaṁ kāmāvacaraṁ
upapajjantānaṁ arūpānaṁ tesaṁ tattha cakkhāyatanaṁ nuppajjati no ca
tesaṁ tattha manāyatanaṁ na nirujjhissati parinibbantānaṁ asaññasattānaṁ
tesaṁ tattha cakkhāyatanañca nuppajjati manāyatanañca na nirujjhissati.
Yassa vā pana yattha manāyatanaṁ na nirujjhissati tassa tattha cakkhāyatanaṁ
nuppajjatīti: āmantā.

[780] Yassa yattha cakkhāyatanaṁ nuppajjati tassa tattha dhammāyatanaṁ
na nirujjhissatīti: sabbesaṁ cavantānaṁ acakkhukānaṁ upapajjantānaṁ tesaṁ
tattha cakkhāyatanaṁ nuppajjati no ca tesaṁ tattha dhammāyatanaṁ na
nirujjhissati parinibbantānaṁ tesaṁ tattha cakkhāyatanañca nuppajjati
dhammāyatanañca na nirujjhissati. Yassa vā pana yattha dhammāyatanaṁ
na nirujjhissati tassa tattha cakkhāyatanaṁ nuppajjatīti: āmantā.

[781] Yassa yattha ghānāyatanaṁ nuppajjati tassa tattha rūpāyatanaṁ
na nirujjhissatīti: kāmāvacarā cavantānaṁ aghānakānaṁ kāmāvacaraṁ
upapajjantānaṁ rūpāvacarānaṁ tesaṁ tattha ghānāyatanaṁ nuppajjati no ca
tesaṁ tattha rūpāyatanaṁ na nirujjhissati pañcavokāre parinibbantānaṁ
arūpānaṁ tesaṁ tattha ghānāyatanañca nuppajjati rūpāyatanañca na nirujjhissati.
Yassa vā pana yattha rūpāyatanaṁ na nirujjhissati tassa tattha
ghānāyatanaṁ nuppajjatīti: āmantā.

[782] Yassa yattha ghānāyatanaṁ nuppajjati tassa tattha manāyatanaṁ
na nirujjhissatīti: kāmāvacarā cavantānaṁ aghānakānaṁ kāmāvacaraṁ
upapajjantānaṁ rūpāvacarānaṁ arūpāvacarānaṁ tesaṁ tattha ghānāyatanaṁ
nuppajjati no ca tesaṁ tattha manāyatanaṁ na nirujjhissati parinibbantānaṁ
asaññasattānaṁ tesaṁ tattha ghānāyatanañca nuppajjati manāyatanañca
na nirujjhissati. Yassa vā pana yattha manāyatanaṁ na nirujjhissati
tassa tattha ghānāyatanaṁ nuppajjatīti: āmantā.

[783] Yassa yattha ghānāyatanaṁ nuppajjati tassa tattha dhammāyatanaṁ
na nirujjhissatīti: sabbesaṁ cavantānaṁ aghānakānaṁ upapajjantānaṁ
tesaṁ tattha ghānāyatanaṁ nuppajjati no ca tesaṁ tattha dhammāyatanaṁ
na nirujjhissati parinibbantānaṁ tesaṁ tattha ghānāyatanañca nuppajjati
dhammāyatanañca na nirujjhissati. Yassa vā pana yattha dhammāyatanaṁ
na nirujjhissati tassa tattha ghānāyatanaṁ nuppajjatīti: āmantā.

[784] Yassa yattha rūpāyatanaṁ nuppajjati tassa tattha manāyatanaṁ
na nirujjhissatīti: pañcavokārā cavantānaṁ arūpānaṁ tesaṁ tattha
rūpāyatanaṁ nuppajjati no ca tesaṁ tattha manāyatanaṁ na nirujjhissati
parinibbantānaṁ asaññasattā cavantānaṁ tesaṁ tattha rūpāyatanañca
nuppajjati manāyatanañca na nirujjhissati. Yassa vā pana yattha
Manāyatanaṁ na nirujjhissati tassa tattha rūpāyatanaṁ nuppajjatīti: asaññasattaṁ
upapajjantānaṁ tesaṁ tattha manāyatanaṁ na nirujjhissati no ca
tesaṁ tattha rūpāyatanaṁ nuppajjati parinibbantānaṁ asaññasattā
cavantānaṁ tesaṁ tattha manāyatanañca na nirujjhissati rūpāyatanañca
nuppajjati.

[785] Yassa yattha rūpāyatanaṁ nuppajjati tassa tattha dhammāyatanaṁ
na nirujjhissatīti: sabbesaṁ cavantānaṁ arūpakānaṁ upapajjantānaṁ tesaṁ
tattha rūpāyatanaṁ nuppajjati no ca tesaṁ tattha dhammāyatanaṁ na nirujjhissati
parinibbantānaṁ tesaṁ tattha rūpāyatanañca nuppajjati dhammāyatanañca
na nirujjhissati. Yassa vā pana yattha dhammāyatanaṁ na nirujjhissati
tassa tattha rūpāyatanaṁ nuppajjatīti: āmantā.

[786] Yassa yattha manāyatanaṁ nuppajjati tassa tattha dhammāyatanaṁ
na nirujjhissatīti: sabbesaṁ cavantānaṁ acittakānaṁ upapajjantānaṁ
tesaṁ tattha manāyatanaṁ nuppajjati no ca tesaṁ tattha dhammāyatanaṁ
na nirujjhissati parinibbantānaṁ tesaṁ tattha manāyatanañca nuppajjati
dhammāyatanañca na nirujjhissati. Yassa vā pana yattha dhammāyatanaṁ
na nirujjhissati tassa tattha manāyatanaṁ nuppajjatīti: āmantā.
--------

[787] Yassa cakkhāyatanaṁ uppajjittha tassa sotāyatanaṁ nirujjhissatīti:
pañcavokāre parinibbantānaṁ arūpe pacchimabhavikānaṁ ye
Ca arūpaṁ upapajjitvā parinibbāyissanti tesaṁ cavantānaṁ tesaṁ
cakkhāyatanaṁ uppajjittha no ca tesaṁ sotāyatanaṁ nirujjhissati.
Itaresaṁ tesaṁ cakkhāyatanañca uppajjittha sotāyatanañca nirujjhissati.
Yassa vā pana sotāyatanaṁ nirujjhissati tassa cakkhāyatanaṁ uppajjitthāti:
āmantā. Yathā nirodhavāre atītenānāgatā pucchā yassakampi
yatthakampi yassayatthakampi anulomampi paccaniyampi vibhattaṁ evaṁ
uppādanirodhepi atītenānāgatā pucchā vibhajitabbā.
Uppādanirodhavāraṁ niṭṭhitaṁ.
Pavattivāro.
---------
Pariññāvāro

[788] Yo cakkhāyatanaṁ parijānāti so sotāyatanaṁ parijānātīti:
āmantā. Yo vā pana sotāyatanaṁ parijānāti so cakkhāyatanaṁ
parijānātīti: āmantā. Yo cakkhāyatanaṁ na parijānāti so sotāyatanaṁ
na parijānātīti: āmantā. Yo vā pana sotāyatanaṁ na parijānāti
so cakkhāyatanaṁ na parijānātīti: āmantā.