[759] Yassa yattha cakkhāyatanaṁ uppajjati tassa tattha manāyatanaṁ
nirujjhissatīti: āmantā. Yassa vā pana yattha manāyatanaṁ nirujjhissati
tassa tattha cakkhāyatanaṁ uppajjatīti: pañcavokārā cavantānaṁ
acakkhukānaṁ kāmāvacaraṁ upapajjantānaṁ arūpānaṁ tesaṁ tattha manāyatanaṁ
nirujjhissati no ca tesaṁ tattha cakkhāyatanaṁ uppajjati sacakkhukānaṁ
upapajjantānaṁ tesaṁ tattha manāyatanañca nirujjhissati cakkhāyatanañca
uppajjati.

[760] Yassa yattha cakkhāyatanaṁ uppajjati tassa tattha dhammāyatanaṁ
nirujjhissatīti: āmantā. Yassa vā pana yattha dhammāyatanaṁ
Nirujjhissati tassa tattha cakkhāyatanaṁ uppajjatīti: sabbesaṁ cavantānaṁ
acakkhukānaṁ upapajjantānaṁ tesaṁ tattha dhammāyatanaṁ nirujjhissati no ca
tesaṁ tattha cakkhāyatanaṁ uppajjati sacakkhukānaṁ upapajjantānaṁ
tesaṁ tattha dhammāyatanañca nirujjhissati cakkhāyatanañca uppajjati.

[761] Yassa yattha ghānāyatanaṁ uppajjati tassa tattha rūpāyatanaṁ
nirujjhissatīti: āmantā. Yassa vā pana yattha rūpāyatanaṁ nirujjhissati
tassa tattha ghānāyatanaṁ uppajjatīti: kāmāvacarā cavantānaṁ
aghānakānaṁ kāmāvacaraṁ upapajjantānaṁ rūpāvacarānaṁ tesaṁ tattha rūpāyatanaṁ
nirujjhissati no ca tesaṁ tattha ghānāyatanaṁ uppajjati saghānakānaṁ
upapajjantānaṁ tesaṁ tattha rūpāyatanañca nirujjhissati ghānāyatanañca
uppajjati.

[762] Yassa yattha ghānāyatanaṁ uppajjati tassa tattha manāyatanaṁ
nirujjhissatīti: āmantā. Yassa vā pana yattha manāyatanaṁ nirujjhissati
tassa tattha ghānāyatanaṁ uppajjatīti: kāmāvacarā cavantānaṁ
aghānakānaṁ kāmāvacaraṁ upapajjantānaṁ rūpāvacarānaṁ arūpāvacarānaṁ tesaṁ
tattha manāyatanaṁ nirujjhissati no ca tesaṁ tattha ghānāyatanaṁ uppajjati
saghānakānaṁ upapajjantānaṁ tesaṁ tattha manāyatanañca nirujjhissati
ghānāyatanañca uppajjati.

[763] Yassa yattha ghānāyatanaṁ uppajjati tassa tattha dhammāyatanaṁ
nirujjhissatīti: āmantā. Yassa vā pana yattha dhammāyatanaṁ
Nirujjhissati tassa tattha ghānāyatanaṁ uppajjatīti: sabbesaṁ cavantānaṁ
aghānakānaṁ upapajjantānaṁ tesaṁ tattha dhammāyatanaṁ nirujjhissati no ca
tesaṁ tattha ghānāyatanaṁ uppajjati saghānakānaṁ upapajjantānaṁ tesaṁ
tattha dhammāyatanañca nirujjhissati ghānāyatanañca uppajjati.

[764] Yassa yattha rūpāyatanaṁ uppajjati tassa tattha manāyatanaṁ
nirujjhissatīti: asaññasattaṁ upapajjantānaṁ tesaṁ tattha rūpāyatanaṁ
uppajjati no ca tesaṁ tattha manāyatanaṁ nirujjhissati pañcavokāraṁ
upapajjantānaṁ tesaṁ tattha rūpāyatanañca uppajjati manāyatanañca
nirujjhissati. Yassa vā pana yattha manāyatanaṁ nirujjhissati tassa
tattha rūpāyatanaṁ uppajjatīti: pañcavokārā cavantānaṁ arūpānaṁ
tesaṁ tattha manāyatanaṁ nirujjhissati no ca tesaṁ tattha rūpāyatanaṁ
uppajjati pañcavokāraṁ upapajjantānaṁ tesaṁ tattha manāyatanañca
nirujjhissati rūpāyatanañca uppajjati.

[765] Yassa yattha rūpāyatanaṁ uppajjati tassa tattha dhammāyatanaṁ
nirujjhissatīti: āmantā. Yassa vā pana yattha dhammāyatanaṁ
nirujjhissati tassa tattha rūpāyatanaṁ uppajjatīti: sabbesaṁ cavantānaṁ
arūpakānaṁ upapajjantānaṁ tesaṁ tattha dhammāyatanaṁ nirujjhissati no
ca tesaṁ tattha rūpāyatanaṁ uppajjati sarūpakānaṁ upapajjantānaṁ
tesaṁ tattha dhammāyatanañca nirujjhissati rūpāyatanañca uppajjati.

[766] Yassa yattha manāyatanaṁ uppajjati tassa tattha dhammāyatanaṁ
Nirujjhissatīti: āmantā. Yassa vā pana yattha dhammāyatanaṁ
nirujjhissati tassa tattha manāyatanaṁ uppajjatīti: sabbesaṁ cavantānaṁ
acittakānaṁ upapajjantānaṁ tesaṁ tattha dhammāyatanaṁ nirujjhissati no ca
tesaṁ tattha manāyatanaṁ uppajjati sacittakānaṁ upapajjantānaṁ tesaṁ
tattha dhammāyatanañca nirujjhissati manāyatanañca uppajjati.

[767] Yassa cakkhāyatanaṁ nuppajjati tassa sotāyatanaṁ na
nirujjhissatīti: sabbesaṁ cavantānaṁ acakkhukānaṁ upapajjantānaṁ tesaṁ
cakkhāyatanaṁ nuppajjati no ca tesaṁ sotāyatanaṁ na nirujjhissati pañcavokāre
parinibbantānaṁ arūpe pacchimabhavikānaṁ ye ca arūpaṁ upapajjitvā
parinibbāyissanti tesaṁ cavantānaṁ tesaṁ cakkhāyatanañca nuppajjati
sotāyatanañca na nirujjhissati. Yassa vā pana sotāyatanaṁ na nirujjhissati
tassa cakkhāyatanaṁ nuppajjatīti: āmantā.

[768] Yassa cakkhāyatanaṁ nuppajjati tassa ghānāyatanaṁ na
nirujjhissatīti: sabbesaṁ cavantānaṁ acakkhukānaṁ upapajjantānaṁ tesaṁ
cakkhāyatanaṁ nuppajjati no ca tesaṁ ghānāyatanaṁ na nirujjhissati
pañcavokāre parinibbantānaṁ arūpe pacchimabhavikānaṁ ye ca rūpāvacaraṁ
arūpāvacaraṁ upapajjitvā parinibbāyissanti tesaṁ cavantānaṁ tesaṁ
cakkhāyatanañca nuppajjati ghānāyatanañca na nirujjhissati. Yassa
vā pana ghānāyatanaṁ na nirujjhissati tassa cakkhāyatanaṁ nuppajjatīti:
pacchimabhavikānaṁ rūpāvacaraṁ upapajjantānaṁ tesaṁ ghānāyatanaṁ na nirujjhissati
No ca tesaṁ cakkhāyatanaṁ nuppajjati pañcavokāre parinibbantānaṁ
arūpe pacchimabhavikānaṁ ye ca rūpāvacaraṁ arūpāvacaraṁ upapajjitvā
parinibbāyissanti tesaṁ cavantānaṁ tesaṁ ghānāyatanañca na nirujjhissati
cakkhāyatanañca nuppajjati.