[130] Assosi kho citto gahapati therā kira bhikkhū macchikāsaṇḍaṁ
anuppattāti. Athakho citto gahapati yena therā bhikkhū
tenupasaṅkami upasaṅkamitvā there bhikkhū abhivādetvā ekamantaṁ
nisīdi. Ekamantaṁ nisinnaṁ kho cittaṁ gahapatiṁ āyasmā sārīputto
dhammiyā kathāya sandassesi samādapesi samuttejesi sampahaṁsesi.
Athakho citto gahapati āyasmatā sārīputtena dhammiyā kathāya
sandassito samādapito samuttejito sampahaṁsito there bhikkhū
1 Ma. tadā.
Etadavoca adhivāsentu me bhante therā svātanāya āgantukabhattanti.
Adhivāsesuṁ kho te 1 therā bhikkhū tuṇhībhāvena.

[131] Athakho citto gahapati therānaṁ bhikkhūnaṁ adhivāsanaṁ viditvā
uṭṭhāyāsanā there bhikkhū abhivādetvā padakkhiṇaṁ katvā yenāyasmā
sudhammo tenupasaṅkami upasaṅkamitvā āyasmantaṁ sudhammaṁ
abhivādetvā ekamantaṁ aṭṭhāsi. Ekamantaṁ ṭhito kho citto gahapati
āyasmantaṁ sudhammaṁ etadavoca adhivāsetu me bhante ayyo
sudhammo svātanāya bhattaṁ saddhiṁ therehīti. Athakho āyasmā
sudhammo pubbe khvāyaṁ citto gahapati yadā saṅghaṁ vā gaṇaṁ
vā puggalaṁ vā nimantetukāmo na maṁ anapaloketvā saṅghaṁ vā
gaṇaṁ vā puggalaṁ vā nimanteti sodāni maṁ anapaloketvā
there bhikkhū nimantesi duṭṭhodānāyaṁ citto gahapati anapekkho
virattarūpo mayīti cittaṁ gahapatiṁ etadavoca alaṁ gahapati nādhivāsemīti.
Dutiyampi kho citto gahapati āyasmantaṁ sudhammaṁ etadavoca
adhivāsetu me bhante ayyo sudhammo svātanāya bhattaṁ saddhiṁ
therehīti. Alaṁ gahapati nādhivāsemīti. Tatiyampi kho citto
gahapati āyasmantaṁ sudhammaṁ etadavoca adhivāsetu me bhante
ayyo sudhammo svātanāya bhattaṁ saddhiṁ therehīti. Alaṁ gahapati
nādhivāsemīti. Athakho citto gahapati kiṁ me karissati ayyo
1 Ma. Yu. tesaddo na dissati.
Sudhammo adhivāsento vā anadhivāsento vāti āyasmantaṁ sudhammaṁ
abhivādetvā padakkhiṇaṁ katvā pakkāmi.

[132] Athakho citto gahapati tassā rattiyā accayena therānaṁ
bhikkhūnaṁ paṇītaṁ khādanīyaṁ bhojanīyaṁ paṭiyādāpesi. Athakho āyasmā
sudhammo yannūnāhaṁ cittassa gahapatino therānaṁ bhikkhūnaṁ paṭiyattaṁ
passeyyanti pubbaṇhasamayaṁ nivāsetvā pattacīvaramādāya yena
cittassa gahapatino nivesanaṁ tenupasaṅkami upasaṅkamitvā paññatte
āsane nisīdi. Athakho citto gahapati yenāyasmā sudhammo
tenupasaṅkami upasaṅkamitvā āyasmantaṁ sudhammaṁ abhivādetvā
ekamantaṁ nisīdi. Ekamantaṁ nisinnaṁ kho cittaṁ gahapatiṁ āyasmā
sudhammo etadavoca pahūtaṁ kho te idaṁ gahapati khādanīyaṁ bhojanīyaṁ
paṭiyattaṁ ekā ca kho idha natthi yadidaṁ tilasaṅguḷikāti.
Bahumhi vata bhante [1]- buddhavacane vijjamāne ayyena sudhammena
yadeva kiñci bhāsitaṁ yadidaṁ tilasaṅguḷikāti bhūtapubbaṁ bhante
dakkhiṇāpathakā vāṇijā puratthimaṁ janapadaṁ agamaṁsu te vāṇijā 2
tato kukkuṭiṁ ānesuṁ athakho sā bhante kukkuṭī kākena saddhiṁ
saṁvāsaṁ kappesi sā potakaṁ janesi yadā kho so bhante
1 Ma. Yu. ratane. ito paraṁ īdisameva. 2 Ma. Yu. vāṇijjāya. te
Kukkuṭapotako kākavassaṁ vassitukāmo hoti kākākukkuṭīti 1
vassati yadā kukkuṭavassaṁ 2 vassitukāmo hoti kukkuṭīkākāti 3
vassati evameva kho bhante bahumhi buddhavacane vijjamāne ayyena
sudhammena yadeva kiñci bhāsitaṁ yadidaṁ tilasaṅguḷikāti. Akkosasi
maṁ tvaṁ gahapati paribhāsasi maṁ tvaṁ gahapati eso te gahapati
āvāso tamhā āvāsā 4 pakkamissāmīti. Nāhaṁ bhante ayyaṁ
sudhammaṁ akkosāmi na 5 paribhāsāmi vasatu kho 6 bhante ayyo
sudhammo macchikāsaṇḍe rammaṇīye ambāṭakavane 7 ahaṁ ayyassa
sudhammassa ussukkaṁ karissāmi cīvarapiṇḍapātasenāsanagilānapaccayabhesajja-
parikkhārānanti. Dutiyampi kho āyasmā sudhammo cittaṁ
gahapatiṁ etadavoca akkosasi maṁ tvaṁ gahapati paribhāsasi maṁ
tvaṁ gahapati eso te gahapati āvāso tamhā āvāsā
pakkamissāmīti. Nāhaṁ bhante ayyaṁ sudhammaṁ akkosāmi na paribhāsāmi
vasatu kho bhante ayyo sudhammo macchikāsaṇḍe rammaṇīye
ambāṭakavane ahaṁ ayyassa sudhammassa ussukkaṁ karissāmi
1 Yu. kukkuṭakāti. Ma. kākakukkuṭīti. 2 Ma. kukkuṭivassaṁ. 3 Yu. kākāti.
4 Ma. Yu. tamhā āvāsāti dvayaṁ na dissati. ito paraṁ sabbattha īdisameva.
5 Ma. Yu. nasaddo natthi. 6 Ma. Yu. khosaddo natthi.
7 Ma. Yu. rammaṇīyaṁ ambāṭakavanaṁ.
Cīvarapiṇḍapātasenāsanagilānapaccayabhesajjaparikkhārānanti. Tatiyampi kho
āyasmā sudhammo cittaṁ gahapatiṁ etadavoca akkosasi maṁ tvaṁ
gahapati paribhāsasi maṁ tvaṁ gahapati eso te gahapati āvāso
tamhā āvāsā pakkamissāmīti. Kahaṁ bhante ayyo sudhammo
gamissatīti. Sāvatthiṁ kho ahaṁ gahapati gamissāmi bhagavantaṁ dassanāyāti.
Tenahi bhante yañca attanā bhaṇitaṁ yañca mayā bhaṇitaṁ taṁ
sabbaṁ bhagavato ārocehi anacchariyaṁ kho panetaṁ bhante yaṁ
ayyo sudhammo punadeva macchikāsaṇḍaṁ paccāgaccheyyāti.

[133] Athakho āyasmā sudhammo senāsanaṁ saṁsāmetvā
pattacīvaramādāya yena sāvatthī tena pakkāmi anupubbena yena
sāvatthī [1]- jetavanaṁ anāthapiṇḍikassa ārāmo yena bhagavā
tenupasaṅkami upasaṅkamitvā bhagavantaṁ abhivādetvā ekamantaṁ
nisīdi. Ekamantaṁ nisinno kho āyasmā sudhammo yañca attanā
bhaṇitaṁ yañca cittena gahapatinā bhaṇitaṁ taṁ sabbaṁ bhagavato
ārocesi.

[134] Vigarahi buddho bhagavā ananucchavikaṁ moghapurisa ananulomikaṁ
appaṭirūpaṁ assāmaṇakaṁ akappiyaṁ akaraṇīyaṁ kathaṁ hi nāma tvaṁ
moghapurisa cittaṁ gahapatiṁ saddhiṁ pasannaṁ dāyakaṁ kārakaṁ saṅghupaṭṭhākaṁ
hīnena khuṁsessasi hīnena vambhessasi netaṁ moghapurisa appasannānaṁ
1 Ma. yena.
Vā pasādāya .pe. Vigarahitvā .pe. Dhammiṁ kathaṁ katvā bhikkhū
āmantesi tenahi bhikkhave saṅgho sudhammassa bhikkhuno paṭisāraṇīyakammaṁ
karotu citto te gahapati khamāpetabbo 1 . Evañca
pana bhikkhave kātabbaṁ. Paṭhamaṁ sudhammo bhikkhu codetabbo
codetvā sāretabbo sāretvā āpatti āropetabbā 2 āpattiṁ
āropetvā byattena bhikkhunā paṭibalena saṅgho ñāpetabbo
suṇātu me bhante saṅgho ayaṁ sudhammo bhikkhu cittaṁ gahapatiṁ
saddhaṁ pasannaṁ dāyakaṁ kārakaṁ saṅghupaṭṭhākaṁ hīnena khuṁseti hīnena
vambheti. Yadi saṅghassa pattakallaṁ saṅgho sudhammassa bhikkhuno
paṭisāraṇīyakammaṁ kareyya citto te gahapati khamāpetabboti.
Esā ñatti. Suṇātu me bhante saṅgho ayaṁ sudhammo bhikkhu
cittaṁ gahapatiṁ saddhaṁ pasannaṁ dāyakaṁ kārakaṁ saṅghupaṭṭhākaṁ hīnena
khuṁseti hīnena vambheti. Saṅgho sudhammassa bhikkhuno paṭisāraṇīyakammaṁ
karoti citto te gahapati khamāpetabboti. Yassāyasmato khamati
sudhammassa bhikkhuno paṭisāraṇīyakammassa karaṇaṁ citto te gahapati
khamāpetabboti so tuṇhassa yassa nakkhamati so bhāseyya.
Dutiyampi etamatthaṁ vadāmi .pe. Tatiyampi etamatthaṁ vadāmi.
Suṇātu me bhante saṅgho ayaṁ sudhammo bhikkhu cittaṁ gahapatiṁ
saddhaṁ pasannaṁ dāyakaṁ kārakaṁ saṅghupaṭṭhākaṁ hīnena khuṁseti hīnena
vambheti. Saṅgho sudhammassa bhikkhuno paṭisāraṇīyakammaṁ karoti
1 Ma. Yu. khamāpetabboti. 2 Ma. Yu. āpattiṁ āropetabbo.
Citto te gahapati khamāpetabboti. Yassāyasmato khamati sudhammassa
bhikkhuno paṭisāraṇīyakammassa karaṇaṁ citto te gahapati khamāpetabboti
so tuṇhassa yassa nakkhamati so bhāseyya. Kataṁ
saṅghena sudhammassa bhikkhuno paṭisāraṇīyakammaṁ citto te gahapati
khamāpetabboti khamati saṅghassa tasmā tuṇhī. Evametaṁ
dhārayāmīti.

[135] Tīhi bhikkhave aṅgehi samannāgataṁ paṭisāraṇīyakammaṁ
adhammakammañceva hoti avinayakammañca duvūpasantañca asammukhā
kataṁ hoti appaṭipucchā kataṁ hoti appaṭiññāya kataṁ hoti
imehi kho bhikkhave tīhaṅgehi samannāgataṁ paṭisāraṇīyakammaṁ
adhammakammañceva hoti avinayakammañca duvūpasantañca.

[136] Aparehipi bhikkhave tīhaṅgehi samannāgataṁ paṭisāraṇīyakammaṁ
adhammakammañceva hoti avinayakammañca duvūpasantañca anāpattiyā
kataṁ hoti adesanāgāminiyā āpattiyā kataṁ hoti desitāya
āpattiyā kataṁ hoti imehi kho bhikkhave tīhaṅgehi samannāgataṁ
paṭisāraṇīyakammaṁ adhammakammañceva hoti avinayakammañca
duvūpasantañca.

[137] Aparehipi bhikkhave tīhaṅgehi samannāgataṁ paṭisāraṇīyakammaṁ
adhammakammañceva hoti avinayakammañca duvūpasantañca acodetvā
kataṁ hoti asāretvā kataṁ hoti āpattiṁ anāropetvā kataṁ
Hoti imehi kho bhikkhave tīhaṅgehi samannāgataṁ paṭisāraṇīyakammaṁ
adhammakammañceva hoti avinayakammañca duvūpasantañca.

[138] Aparehipi bhikkhave tīhaṅgehi samannāgataṁ paṭisāraṇīyakammaṁ
adhammakammañceva hoti avinayakammañca duvūpasantañca asammukhā
kataṁ hoti adhammena kataṁ hoti vaggena kataṁ hoti imehi
kho bhikkhave .pe.

[139] Aparehipi bhikkhave tīhaṅgehi samannāgataṁ paṭisāraṇīyakammaṁ
adhammakammañceva hoti avinayakammañca duvūpasantañca appaṭipucchā
kataṁ hoti adhammena kataṁ hoti vaggena kataṁ hoti imehi
kho bhikkhave tīhaṅgehi samannāgataṁ paṭisāraṇīyakammaṁ adhammakammañceva
hoti avinayakammañca duvūpasantañca.