[120] Athakho sārīputtamoggallānappamukho bhikkhusaṅgho kiṭāgiriṁ
gantvā assajipunabbasukānaṁ bhikkhūnaṁ kiṭāgirismā pabbājanīyakammaṁ
akāsi nāssajipunabbasukehi bhikkhūhi kiṭāgirismiṁ vatthabbanti.
Te saṅghena pabbājanīyakammakatā na sammā vattanti na lomaṁ pātenti
na netthāraṁ vattanti bhikkhū na khamāpenti akkosanti paribhāsanti
chandagāmitā dosagāmitā mohagāmitā bhayagāmitā pāpenti
pakkamantipi vibbhamantipi ye te bhikkhū appicchā .pe. Te ujjhāyanti
khīyanti vipācenti kathaṁ hi nāma assajipunabbasukā bhikkhū saṅghena
pabbājanīyakammakatā na sammā vattissanti na lomaṁ pātessanti
Na netthāraṁ vattissanti bhikkhū na khamāpessanti akkosissanti
paribhāsissanti chandagāmitā dosagāmitā mohagāmitā bhayagāmitā
pāpessanti pakkamissantipi vibbhamissantipīti. Athakho te bhikkhū
bhagavato etamatthaṁ ārocesuṁ.

[121] Athakho bhagavā etasmiṁ nidāne etasmiṁ pakaraṇe bhikkhusaṅghaṁ
sannipātāpetvā bhikkhū paṭipucchi saccaṁ kira bhikkhave assajipunabbasukā
bhikkhū saṅghena pabbājanīyakammakatā na sammā vattanti na lomaṁ
pātenti na netthāraṁ vattanti bhikkhū na khamāpenti akkosanti
paribhāsanti chandagāmitā dosagāmitā mohagāmitā bhayagāmitā pāpenti
pakkamantipi vibbhamantipīti. Saccaṁ bhagavāti. Vigarahi buddho bhagavā
ananucchavikaṁ bhikkhave tesaṁ moghapurisānaṁ .pe. Kathaṁ hi nāma te
bhikkhave moghapurisā saṅghena pabbājanīyakammakatā na sammā vattissanti
na lomaṁ pātessanti na netthāraṁ vattissanti bhikkhū na khamāpessanti
akkosissanti paribhāsissanti chandagāmitā dosagāmitā mohagāmitā
bhayagāmitā pāpessanti pakkamissantipi vibbhamissantipi netaṁ
bhikkhave appasannānaṁ vā pasādāya .pe. Vigarahitvā dhammiṁ kathaṁ
katvā bhikkhū āmantesi tenahi bhikkhave saṅgho pabbājanīyakammaṁ
[1]- Paṭippassambhetu 2 .

[122] Pañcahi bhikkhave aṅgehi samannāgatassa bhikkhuno pabbājanīyakammaṁ
na paṭippassambhetabbaṁ upasampādeti nissayaṁ deti
1 nakāro naṭṭho bhaveyya. 2 po ... saṅghena pabbājanīyakammaṁ (na)
paṭippassambhetabbaṁ.
Sāmaṇeraṁ upaṭṭhāpeti bhikkhunovādakasammatiṁ sādiyati sammatopi
bhikkhuniyo ovadati imehi kho bhikkhave pañcahaṅgehi samannāgatassa
bhikkhuno pabbājanīyakammaṁ na paṭippassambhetabbaṁ.

[123] Aparehipi bhikkhave pañcahaṅgehi samannāgatassa bhikkhuno
pabbājanīyakammaṁ na paṭippassambhetabbaṁ yāya āpattiyā saṅghena
pabbājanīyakammaṁ kataṁ hoti taṁ āpattiṁ āpajjati aññaṁ vā
tādisikaṁ tato vā pāpiṭṭhataraṁ kammaṁ garahati kammike
garahati imehi kho bhikkhave pañcahaṅgehi samannāgatassa bhikkhuno
pabbājanīyakammaṁ na paṭippassambhetabbaṁ.

[124] Aṭṭhahi bhikkhave aṅgehi samannāgatassa bhikkhuno pabbājanīyakammaṁ
na paṭippassambhetabbaṁ pakatattassa bhikkhuno uposathaṁ
ṭhapeti pavāraṇaṁ ṭhapeti savacanīyaṁ karoti anuvādaṁ paṭṭhapeti
okāsaṁ kāreti codeti sāreti bhikkhū bhikkhūhi sampayojeti
imehi kho bhikkhave aṭṭhahaṅgehi samannāgatassa bhikkhuno
pabbājanīyakammaṁ na paṭippassambhetabbaṁ.
Pabbājanīyakamme napaṭippassambhetabbāṭṭhārasakaṁ niṭṭhitaṁ.

[125] Pañcahi bhikkhave aṅgehi samannāgatassa bhikkhuno
pabbājanīyakammaṁ paṭippassambhetabbaṁ na upasampādeti na nissayaṁ
deti na sāmaṇeraṁ upaṭṭhāpeti na bhikkhunovādakasammatiṁ sādiyati
sammatopi bhikkhuniyo na ovadati imehi kho bhikkhave pañcahaṅgehi
Samannāgatassa bhikkhuno pabbājanīyakammaṁ paṭippassambhetabbaṁ.

[126] Aparehipi bhikkhave pañcahaṅgehi samannāgatassa bhikkhuno
pabbājanīyakammaṁ paṭippassambhetabbaṁ yāya āpattiyā saṅghena
pabbājanīyakammaṁ kataṁ hoti taṁ āpattiṁ nāpajjati aññaṁ vā
tādisikaṁ tato vā pāpiṭṭhataraṁ kammaṁ na garahati kammike na
garahati imehi kho bhikkhave pañcahaṅgehi samannāgatassa bhikkhuno
pabbājanīyakammaṁ paṭippassambhetabbaṁ.

[127] Aṭṭhahi bhikkhave aṅgehi samannāgatassa bhikkhuno
pabbājanīyakammaṁ paṭippassambhetabbaṁ na pakatattassa bhikkhuno uposathaṁ
ṭhapeti na pavāraṇaṁ ṭhapeti na savacanīyaṁ karoti na anuvādaṁ
paṭṭhapeti na okāsaṁ kāreti na codeti na sāreti na
bhikkhū bhikkhūhi sampayojeti imehi kho bhikkhave aṭṭhahaṅgehi
samannāgatassa bhikkhuno pabbājanīyakammaṁ paṭippassambhetabbaṁ.
Pabbājanīyakamme paṭippassambhetabbāṭṭhārasakaṁ niṭṭhitaṁ.

[128] Evañca pana bhikkhave paṭippassambhetabbaṁ. Tena
bhikkhave pabbājanīyakammakatena bhikkhunā saṅghaṁ upasaṅkamitvā ekaṁsaṁ
uttarāsaṅgaṁ karitvā vuḍḍhānaṁ bhikkhūnaṁ pāde vanditvā ukkuṭikaṁ
nisīditvā añjaliṁ paggahetvā evamassa vacanīyo ahaṁ bhante
saṅghena pabbājanīyakammakato sammā vattāmi lomaṁ pātemi
netthāraṁ vattāmi pabbājanīyakammassa paṭippassaddhiṁ yācāmīti.
Dutiyampi yācitabbā. Tatiyampi yācitabbā. Byattena bhikkhunā
paṭibalena saṅgho ñāpetabbo suṇātu me bhante saṅgho ayaṁ
itthannāmo bhikkhu saṅghena pabbājanīyakammakato sammā vattati
lomaṁ pāteti netthāraṁ vattati pabbājanīyakammassa paṭippassaddhiṁ
yācati. Yadi saṅghassa pattakallaṁ saṅgho itthannāmassa bhikkhuno
pabbājanīyakammaṁ paṭippassambheyya. Esā ñatti. Suṇātu me
bhante saṅgho ayaṁ itthannāmo bhikkhu saṅghena pabbājanīyakammakato
sammā vattati lomaṁ pāteti netthāraṁ vattati pabbājanīyakammassa
paṭippassaddhiṁ yācati. Saṅgho itthannāmassa bhikkhuno pabbājanīyakammaṁ
paṭippassambheti. Yassāyasmato khamati itthannāmassa bhikkhuno
pabbājanīyakammassa paṭippassaddhi so tuṇhassa yassa nakkhamati
so bhāseyya. Dutiyampi etamatthaṁ vadāmi .pe. Tatiyampi
etamatthaṁ vadāmi. Suṇātu me bhante saṅgho ayaṁ itthannāmo
bhikkhu saṅghena pabbājanīyakammakato sammā vattati lomaṁ pāteti
netthāraṁ vattati pabbājanīyakammassa paṭippassaddhiṁ yācati.
Saṅgho itthannāmassa bhikkhuno pabbājanīyakammaṁ paṭippassambheti.
Yassāyasmato khamati itthannāmassa bhikkhuno pabbājanīyakammassa
paṭippassaddhi so tuṇhassa yassa nakkhamati so bhāseyya.
Paṭippassaddhaṁ 1 saṅghena itthannāmassa bhikkhuno pabbājanīyakammaṁ
khamati saṅghassa tasmā tuṇhī. Evametaṁ dhārayāmīti.
1 Po. paṭippassambhitaṁ.
Pabbājanīyakammaṁ tatiyaṁ niṭṭhitaṁ.

[129] Tena kho pana samayena āyasmā sudhammo macchikāsaṇḍe
cittassa gahapatino āvāsiko hoti navakammiko dhuvabhattiko.
Yadā citto gahapati saṅghaṁ vā gaṇaṁ vā puggalaṁ vā nimantetukāmo
hoti [1]- na āyasmantaṁ sudhammaṁ anapaloketvā saṅghaṁ vā gaṇaṁ
vā puggalaṁ vā nimanteti. Tena kho pana samayena sambahulā
therā bhikkhū āyasmā ca sārīputto āyasmā ca mahāmoggallāno
āyasmā ca mahākaccāno āyasmā ca mahākoṭṭhiko āyasmā
ca mahākappino āyasmā ca mahācundo āyasmā ca anuruddho
āyasmā ca revato āyasmā ca upāli āyasmā ca ānando
āyasmā ca rāhulo kāsīsu cārikañcaramānā yena macchikāsaṇḍo
tadavasaruṁ.