[687] Labbhā elaṇḍiyāya laṭṭhiyā dhaññapuñjopi suvaṇṇapuñjopi
ācikkhitunti. Āmantā. Evameva bhagavā lokiyena
vohārena lokiyampi lokuttarampi dhammaṁ voharatīti.

[688] Buddhassa bhagavato vohāro lokiyaṁ voharantassa lokiyo
hoti lokuttaraṁ voharantassa lokuttaro hotīti. Āmantā.
Lokiyaṁ voharantassa so lokiye sote paṭihaññati lokuttaraṁ
voharantassa lokuttare sote paṭihaññati lokiyaṁ voharantassa
lokiyena viññāṇena paṭivijānanti lokuttaraṁ voharantassa lokuttarena
viññāṇena paṭivijānanti lokiyaṁ voharantassa puthujjanā paṭivijānanti
Lokuttaraṁ voharantassa sāvakā paṭivijānantīti. Na hevaṁ
vattabbe .pe.

[689] Na vattabbaṁ buddhassa bhagavato vohāro lokiyaṁ voharantassa
lokiyo hoti lokuttaraṁ voharantassa lokuttaro hotīti. Āmantā.
Nanu bhagavā lokiyampi lokuttarampi dhammaṁ voharatīti. Āmantā.
Hañci bhagavā lokiyampi lokuttarampi dhammaṁ voharati tena vata
re vattabbe buddhassa bhagavato vohāro lokiyaṁ voharantassa lokiyo
hoti lokuttaraṁ voharantassa lokuttaro hotīti.

[690] Buddhassa bhagavato vohāro lokiyaṁ voharantassa lokiyo
hoti lokuttaraṁ voharantassa lokuttaro hotīti. Āmantā.
Maggaṁ voharantassa maggo hoti amaggaṁ voharantassa amaggo
hoti phalaṁ vohārantassa phalaṁ hoti aphalaṁ voharantassa aphalaṁ
hoti nibbānaṁ voharantassa nibbānaṁ hoti anibbānaṁ voharantassa
anibbānaṁ hoti saṅkhataṁ voharantassa saṅkhataṁ hoti asaṅkhataṁ
voharantassa asaṅkhataṁ hoti rūpaṁ voharantassa rūpaṁ hoti arūpaṁ
voharantassa arūpaṁ hoti vedanaṁ voharantassa vedanā hoti avedanaṁ
voharantassa avedanā hoti saññaṁ voharantassa saññā hoti
asaññaṁ voharantassa asaññā hoti saṅkhāre voharantassa saṅkhārā
honti asaṅkhāre voharantassa asaṅkhārā honti viññāṇaṁ
voharantassa viññāṇaṁ hoti aviññāṇaṁ voharantassa aviññāṇaṁ
Hotīti. Na hevaṁ vattabbe .pe.
Vohārakathā.
-------
Nirodhakathā

[691] Dve nirodhāti. Āmantā. Dve dukkhanirodhāti.
Na hevaṁ vattabbe .pe. Dve dukkhanirodhāti. Āmantā. Dve
nirodhasaccānīti. Na hevaṁ vattabbe .pe. Dve nirodhasaccānīti.
Āmantā. Dve dukkhasaccānīti. Na hevaṁ vattabbe .pe.
Dve nirodhasaccānīti. Āmantā. Dve samudayasaccānīti. Na
hevaṁ vattabbe .pe. Dve nirodhasaccānīti. Āmantā. Dve
maggasaccānīti. Na hevaṁ vattabbe .pe. Dve nirodhasaccānīti.
Āmantā. Dve tāṇāni .pe. Dve leṇāni dve saraṇāni
dve parāyanāni dve accutāni dve amatāni .pe. Dve
nibbānānīti. Na hevaṁ vattabbe .pe. Dve nibbānānīti.
Āmantā. Atthi dvinnaṁ nibbānānaṁ uccanīcatā hīnapaṇītatā
ukkaṁsāvakaṁso sīmā vā bhedo vā rājī vā antarikā 1 vāti.
Na hevaṁ vattabbe .pe.

[692] Dve nirodhāti. Āmantā. Nanu appaṭisaṅkhāniruddhe
saṅkhāre paṭisaṅkhā nirodhentīti. Āmantā. Hañci appaṭisaṅkhāniruddhe
1 Ma. ahīrikā.
Saṅkhāre paṭisaṅkhā nirodhenti no vata re vattabbe dve nirodhāti.

[693] Na vattabbaṁ dve nirodhāti. Āmantā. Nanu
appaṭisaṅkhāniruddhāpi saṅkhārā accantabhaggā paṭisaṅkhāniruddhāpi
saṅkhārā accantabhaggāti. Āmantā. Hañci appaṭisaṅkhāniruddhāpi
saṅkhārā accantabhaggā paṭisaṅkhāniruddhāpi saṅkhārā accantabhaggā
tena vata re vattabbe dve nirodhāti.

[694] Dve nirodhāti. Āmantā. Paṭisaṅkhāniruddhāpi saṅkhārā
ariyamaggaṁ āgamma niruddhāti. Āmantā. Appaṭisaṅkhāniruddhā
saṅkhārā ariyamaggaṁ āgamma niruddhāti. Na hevaṁ vattabbe .pe.

[695] Dve nirodhāti. Āmantā. Paṭisaṅkhāniruddhā saṅkhārā
na puna uppajjantīti. Āmantā. Appaṭisaṅkhāniruddhā saṅkhārā
na puna uppajjantīti. Na hevaṁ vattabbe .pe. Tena hi na vattabbaṁ
dve nirodhāti.
Nirodhakathā.
Dutiyo vaggo.
Tassa uddānaṁ
parūpahāro aññāṇaṁ kaṅkhā paravitāraṇā
vacībhedo dukkhāhāro ṭhiti kukkuḷā saṅkhārā
eko abhisamayo eko vohāro eko nirodhoti 1 .
---------
1 Ma. parūpahāro aññāṇaṁ kaṅkhā paravitāraṇā
saṅkhāhārakathāmaggo cittaṭhiti ca kukkaḷā
ekābhisamayo ceva vohāro ca nirodhakoti.
Balakathā

[696] Tathāgatabalaṁ sāvakasādhāraṇanti. Āmantā. Tathāgatabalaṁ
sāvakabalaṁ sāvakabalaṁ tathāgatabalanti. Na hevaṁ vattabbe .pe.