[697] Tathāgatabalaṁ sāvakasādhāraṇanti. Āmantā. Taññeva
tathāgatabalaṁ taṁ sāvakabalaṁ taññeva sāvakabalaṁ taṁ tathāgatabalanti.
Na hevaṁ vattabbe .pe.

[698] Tathāgatabalaṁ sāvakasādhāraṇanti. Āmantā. Yādisaṁ
tathāgatabalaṁ tādisaṁ sāvakabalaṁ yādisaṁ sāvakabalaṁ tādisaṁ tathāgatabalanti.
Na hevaṁ vattabbe .pe.

[699] Tathāgatabalaṁ sāvakasādhāraṇanti. Āmantā. Yādiso
tathāgatassa pubbayogo pubbacariyā dhammakkhānaṁ dhammadesanā tādiso
sāvakassa pubbayogo pubbacariyā dhammakkhānaṁ dhammadesanāti. Na
hevaṁ vattabbe .pe.

[700] Tathāgatabalaṁ sāvakasādhāraṇanti. Āmantā. Tathāgato
jino satthā sammāsambuddho sabbaññū sabbadassāvī dhammasāmī
dhammapaṭisaraṇoti. Āmantā. Sāvako jino satthā sammāsambuddho
sabbaññū sabbadassāvī dhammasāmī dhammapaṭisaraṇoti. Na hevaṁ
vattabbe .pe.

[701] Tathāgatabalaṁ sāvakasādhāraṇanti. Āmantā. Tathāgato
Anuppannassa maggassa uppādetā asañjātassa maggassa sañjanetā 1
anakkhātassa maggassa akkhātā maggaññū maggavidū maggakovidoti.
Āmantā. Sāvako anuppannassa maggassa uppādetā
asañjātassa maggassa sañjanetā anakkhātassa maggassa
akkhātā maggaññū maggavidū maggakovidoti. Na hevaṁ vattabbe .pe.

[702] Indriyaparopariyattaṁ yathābhūtaṁ ñāṇaṁ tathāgatabalaṁ
sāvakasādhāraṇanti. Āmantā. Sāvako sabbaññū sabbadassāvīti.
Na hevaṁ vattabbe .pe.

[703] Sāvako ṭhānāṭhānaṁ jānātīti. Āmantā. Hañci
sāvako ṭhānāṭhānaṁ jānāti tena vata re vattabbe ṭhānāṭhānaṁ
yathābhūtaṁ ñāṇaṁ tathāgatabalaṁ sāvakasādhāraṇanti.

[704] Sāvako atītānāgatapaccuppannānaṁ kammasamādānānaṁ ṭhānaso
hetuso vipākaṁ jānātīti. Āmantā. Hañci sāvako atītānāgata-
paccuppannānaṁ kammasamādānānaṁ ṭhānaso hetuso vipākaṁ
jānāti tena vata re vattabbe atītānāgatapaccuppannānaṁ
kammasamādānānaṁ ṭhānaso hetuso vipākaṁ yathābhūtaṁ ñāṇaṁ tathāgatabalaṁ
sāvakasādhāraṇanti.

[705] Sāvako sabbatthagāminīpaṭipadaṁ jānātīti. Āmantā.
Hañci sāvako sabbatthagāminīpaṭipadaṁ jānāti tena vata re vattabbe
sabbatthagāminīpaṭipadaṁ yathābhūtaṁ ñāṇaṁ tathāgatabalaṁ sāvakasādhāraṇanti.
1 Ma. sañjānetā. sabbattha īdisameva dissati.

[706] Sāvako anekadhātuṁ nānādhātuṁ lokaṁ jānātīti.
Āmantā. Hañci sāvako anekadhātuṁ nānādhātuṁ lokaṁ jānāti
tena vata re vattabbe anekadhātuṁ nānādhātuṁ lokaṁ yathābhūtaṁ ñāṇaṁ
tathāgatabalaṁ sāvakasādhāraṇanti.