[667] Na vattabbaṁ anupubbābhisamayoti. Āmantā. Nanu
vuttaṁ bhagavatā
anupubbena medhāvī thokaṁ thokaṁ khaṇe khaṇe
kammāro rajatasseva niddhame malamattanoti
attheva suttantoti. Āmantā. Tena hi anupubbābhisamayoti.

[668] Na vattabbaṁ anupubbābhisamayoti. Āmantā. Nanu
āyasmā gavampatitthero bhikkhū etadavoca sammukhā metaṁ āvuso
bhagavato sutaṁ sammukhā paṭiggahitaṁ yo bhikkhave dukkhaṁ passati
dukkhasamudayampi so passati dukkhanirodhampi passati dukkhanirodhagāminīpaṭipadampi
1 aṁ. aṭṭhaka. 62.
Passati yo dukkhasamudayaṁ passati dukkhampi so
passati dukkhanirodhampi passati dukkhanirodhagāminīpaṭipadampi passati
yo dukkhanirodhaṁ passati dukkhampi so passati dukkhasamudayampi passati
dukkhanirodhagāminīpaṭipadampi passati yo dukkhanirodhagāminīpaṭipadaṁ
passati dukkhampi so passati dukkhasamudayampi passati dukkhanirodhampi
passatīti 1 attheva suttantoti. Āmantā. Tena hi na vattabbaṁ
anupubbābhisamayoti.

[669] Anupubbābhisamayoti. Āmantā. Nanu vuttaṁ bhagavatā
sahāvassa dassanasampadāya .pe. Chacābhiṭṭhānāni abhabbo kātunti
attheva suttantoti. Āmantā. Tena hi na vattabbaṁ anupubbābhisamayoti.

[670] Anupubbābhisamayoti. Āmantā. Nanu vuttaṁ bhagavatā
yasmiṁ bhikkhave samaye ariyasāvakassa virajaṁ vītamalaṁ dhammacakkhuṁ udapādi
yaṁ kiñci samudayadhammaṁ sabbantaṁ nirodhadhammanti saha dassanuppādā
bhikkhave ariyasāvakassa tīṇi saññojanāni pahīyanti sakkāyadiṭṭhi
vicikicchā sīlabbataparāmāsoti attheva suttantoti. Āmantā.
Tena hi na vattabbaṁ anupubbābhisamayoti.
Anupubbābhisamayakathā.
1 saṁ. mahāvāra. 416.
Vohārakathā

[671] Buddhassa bhagavato vohāro lokuttaroti. Āmantā.
Lokuttare sote paṭihaññati no lokiye lokuttarena viññāṇena
paṭivijānanti no lokiyena sāvakā paṭivijānanti no puthujjanāti.
Na hevaṁ vattabbe .pe.

[672] Nanu buddhassa bhagavato vohāro lokiye sote paṭihaññatīti.
Āmantā. Hañci buddhassa bhagavato vohāro lokiye
sote paṭihaññati no vata re vattabbe buddhassa bhagavato vohāro
lokuttaroti.

[673] Nanu buddhassa bhagavato vohāraṁ lokiyena viññāṇena
paṭivijānantīti. Āmantā. Hañci buddhassa bhagavato vohāraṁ
lokiyena viññāṇena paṭivijānanti no vata re vattabbe buddhassa
bhagavato vohāro lokuttaroti.

[674] Nanu buddhassa bhagavato vohāraṁ puthujjanā paṭivijānantīti.
Āmantā. Hañci buddhassa bhagavato vohāraṁ puthujjanā paṭivijānanti
no vata re vattabbe buddhassa bhagavato vohāro lokuttaroti.

[675] Buddhassa bhagavato vohāro lokuttaroti. Āmantā.
Maggo phalaṁ nibbānaṁ sotāpattimaggo sotāpattiphalaṁ sakadāgāmimaggo
sakadāgāmiphalaṁ anāgāmimaggo anāgāmiphalaṁ arahattamaggo arahattaphalaṁ
Satipaṭṭhānaṁ sammappadhānaṁ iddhipādo indriyaṁ balaṁ bojjhaṅgoti.
Na hevaṁ vattabbe .pe.

[676] Buddhassa bhagavato vohāro lokuttaroti. Āmantā.
Atthi keci buddhassa bhagavato vohāraṁ suṇantīti. Āmantā.
Lokuttaro dhammo sotaviññeyyo sotasmiṁ paṭihaññati sotassa
āpāthaṁ āgacchatīti. Na hevaṁ vattabbe .pe.