[467] Arahato asucisukkavisaṭṭhi asitapītakhāyitasāyitassa nissando
natthi tassa āsayoti. Āmantā. Arahato uccārapassāvo
asitapītakhāyitasāyitassa nissando natthi tassa āsayoti. Na
hevaṁ vattabbe .pe.

[468] Atthi arahato asucisukkavisaṭṭhīti. Āmantā.
Arahā methunaṁ dhammaṁ paṭiseveyya methunaṁ dhammaṁ uppādeyya puttasambādhasayanaṁ
ajjhāvaseyya kāsikacandanaṁ paccanubhaveyya mālāgandhavilepanaṁ
dhāreyya jātarūparajataṁ sādiyeyyāti. Na hevaṁ
vattabbe .pe.

[469] Atthi puthujjanassa asucisukkavisaṭṭhi puthujjano methunaṁ
dhammaṁ paṭiseveyya methunaṁ dhammaṁ uppādeyya .pe. Jātarūparajataṁ
sādiyeyyāti. Āmantā. Atthi arahato asucisukkavisaṭṭhi arahā
methunaṁ dhammaṁ paṭiseveyya methunaṁ dhammaṁ uppādeyya .pe.
Jātarūparajataṁ sādiyeyyāti. Na hevaṁ vattabbe .pe.

[470] Atthi arahato asucisukkavisaṭṭhi na ca arahā methunaṁ
dhammaṁ paṭiseveyya methunaṁ dhammaṁ uppādeyya .pe. Jātarūparajataṁ
sādiyeyyāti. Āmantā. Atthi puthujjanassa asucisukkavisaṭṭhi
na ca puthujjano methunaṁ dhammaṁ paṭiseveyya methunaṁ dhammaṁ
Uppādeyya puttasambādhasayanaṁ ajjhāvaseyya kāsikacandanaṁ paccanubhaveyya
mālāgandhavilepanaṁ dhāreyya jātarūparajataṁ sādiyeyyāti.
Na hevaṁ vattabbe .pe.

[471] Atthi arahato asucisukkavisaṭṭhīti. Āmantā. Nanu
arahato rāgo pahīno ucchinnamūlo tālāvatthukato anabhāvaṁ kato
āyatiṁanuppādadhammoti. Āmantā. Hañci arahato rāgo pahīno
ucchinnamūlo tālāvatthukato anabhāvaṁ kato āyatiṁanuppādadhammo
no vata re vattabbe atthi arahato asucisukkavisaṭṭhīti.

[472] Atthi arahato asucisukkavisaṭṭhīti. Āmantā. Nanu
arahato doso pahīno .pe. Moho pahīno māno pahīno
diṭṭhi pahīnā vicikicchā pahīnā thīnaṁ pahīnaṁ uddhaccaṁ pahīnaṁ
ahirikaṁ pahīnaṁ .pe. Anottappaṁ pahīnaṁ ucchinnamūlaṁ tālāvatthu kataṁ
anabhāvaṁ kataṁ āyatiṁanuppādadhammanti. Āmantā. Hañci arahato
anottappaṁ pahīnaṁ ucchinnamūlaṁ tālāvatthukataṁ anabhāvaṁ kataṁ āyatiṁanuppādadhammaṁ
no vata re vattabbe atthi arahato asucisukkavisaṭṭhīti.

[473] Atthi arahato asucisukkavisaṭṭhīti. Āmantā. Nanu
arahato rāgappahānāya maggo bhāvitoti. Āmantā. Hañci
arahato rāgappahānāya maggo bhāvito no vata re vattabbe
atthi arahato asucisukkavisaṭṭhīti

[474] Atthi arahato asucisukkavisaṭṭhīti. Āmantā. Nanu
arahato rāgappahānāya satipaṭṭhānā bhāvitā .pe. Sammappadhānā
bhāvitā iddhipādā bhāvitā indriyā bhāvitā balā bhāvitā
.pe. Bojjhaṅgā bhāvitāti. Āmantā. Hañci arahato
rāgappahānāya bojjhaṅgā bhāvitā no vata re vattabbe atthi
arahato asucisukkavisaṭṭhīti.

[475] Atthi arahato asucisukkavisaṭṭhīti. Āmantā. Nanu
arahato dosappahānāya .pe. Mohappahānāya .pe.
Anottappappahānāya maggo bhāvito .pe. Bojjhaṅgā bhāvitāti.
Āmantā. Hañci arahato anottappappahānāya bojjhaṅgā
bhāvitā no vata re vattabbe atthi arahato asucisukkavisaṭṭhīti.

[476] Atthi arahato asucisukkavisaṭṭhīti. Āmantā. Nanu
arahā vītarāgo vītadoso vītamoho katakaraṇīyo ohitabhāro
anuppattasadattho parikkhīṇabhavasaññojano sammadaññāvimutto ukkhittapaligho
saṅkiṇṇaparikho abbuḷhesiko niraggaḷo ariyo pannaddhajo
pannabhāro visaññutto suvijitavijayo 1 dukkhantassa pariññātaṁ
samudayo pahīno nirodho sacchikato maggo bhāvito abhiññeyyaṁ
abhiññātaṁ pariññeyyaṁ pariññātaṁ pahātabbaṁ pahīnaṁ bhāvetabbaṁ
bhāvitaṁ sacchikātabbaṁ sacchikatanti. Āmantā. Hañci arahā
vītarāgo vītadoso vītamoho katakaraṇīyo .pe. Sacchikātabbaṁ
1. Ma. suvijitavijayī.
Sacchikataṁ no vata re vattabbe atthi arahato asucisukkavisaṭṭhīti.