[447] Natthi arahato rāgo kāmarāgo kāmarāgapariyuṭṭhānaṁ
kāmarāgasaññojanaṁ kāmogho kāmayogo kāmacchandanīvaraṇanti.
Āmantā. Hañci natthi arahato rāgo kāmarāgo kāmarāgapariyuṭṭhānaṁ
kāmarāgasaññojanaṁ kāmogho kāmayogo kāmacchandanīvaraṇaṁ
no vata re vattabbe atthi arahato asucisukkavisaṭṭhīti.

[448] Atthi puthujjanassa asucisukkavisaṭṭhi atthi tassa rāgo
kāmarāgo kāmarāgapariyuṭṭhānaṁ kāmarāgasaññojanaṁ kāmogho kāmayogo
kāmacchandanīvaraṇanti. Āmantā. Atthi arahato asucisukkavisaṭṭhi
atthi tassa rāgo kāmarāgo kāmarāgapariyuṭṭhānaṁ
.pe. Kāmacchandanīvaraṇanti. Na hevaṁ vattabbe .pe.

[449] Atthi arahato asucisukkavisaṭṭhi natthi tassa rāgo
kāmarāgo kāmarāgapariyuṭṭhānaṁ .pe. Kāmacchandanīvaraṇanti.
Āmantā. Atthi puthujjanassa asucisukkavisaṭṭhi natthi tassa rāgo
kāmarāgo kāmarāgapariyuṭṭhānaṁ .pe. Kāmacchandanīvaraṇanti. Na
hevaṁ vattabbe .pe.

[450] Atthi arahato asucisukkavisaṭṭhīti. Āmantā. Kenaṭṭhenāti.
Handa hi mārakāyikā devatā arahato asucisukkavisaṭṭhiṁ
upasaṁharantīti.

[451] Mārakāyikā devatā arahato asucisukkavisaṭṭhiṁ upasaṁharantīti.
Āmantā. Atthi mārakāyikānaṁ devatānaṁ asucisukkavisaṭṭhīti.
Na hevaṁ vattabbe .pe.

[452] Natthi mārakāyikānaṁ devatānaṁ asucisukkavisaṭṭhīti.
Āmantā. Hañci natthi mārakāyikānaṁ devatānaṁ asucisukkavisaṭṭhi
no vata re vattabbe mārakāyikā devatā arahato asucisukkavisaṭṭhiṁ
upasaṁharantīti.

[453] Mārakāyikā devatā arahato asucisukkavisaṭṭhiṁ upasaṁharantīti.
Āmantā. Mārakāyikā devatā attano asucisukkavisaṭṭhiṁ
upasaṁharanti aññesaṁ asucisukkavisaṭṭhiṁ upasaṁharanti tassa
asucisukkavisaṭṭhiṁ upasaṁharantīti. Na hevaṁ vattabbe .pe.

[454] Mārakāyikā devatā neva attano na aññesaṁ na
tassa asucisukkavisaṭṭhiṁ upasaṁharantīti. Āmantā. Hañci mārakāyikā
devatā neva attano na aññesaṁ na tassa asucisukkavisaṭṭhiṁ
upasaṁharanti no vata re vattabbe mārakāyikā devatā arahato
asucisukkavisaṭṭhiṁ upasaṁharantīti.

[455] Mārakāyikā devatā arahato asucisukkavisaṭṭhiṁ upasaṁharantīti.
Āmantā. Lomakūpehi upasaṁharantīti. Na hevaṁ
vattabbe .pe.

[456] Mārakāyikā devatā arahato asucisukkavisaṭṭhiṁ upasaṁharantīti.
Āmantā. Kiṁkāraṇāti. Handa hi vimatiṁ gāhayissāmāti.
Atthi arahato vimatīti. Na hevaṁ vattabbe .pe.