[457] Atthi arahato vimatīti. Āmantā. Atthi arahato
satthari vimati dhamme vimati saṅghe vimati sikkhāya vimati pubbante
vimati aparante vimati pubbantāparante vimati idappaccayatāpaṭiccasamuppannesu
dhammesu vimatīti. Na hevaṁ vattabbe .pe.

[458] Natthi arahato satthari vimati dhamme vimati saṅghe
vimati sikkhāya vimati pubbante vimati aparante vimati pubbantāparante
vimati idappaccayatāpaṭiccasamuppannesu dhammesu vimatīti.
Āmantā. Hañci natthi arahato satthari vimati .pe. Idappaccayatāpaṭicca-
samuppannesu dhammesu vimati no vata re vattabbe
atthi arahato vimatīti.

[459] Atthi puthujjanassa vimati atthi tassa satthari vimati
.pe. Idappaccayatāpaṭiccasamuppannesu dhammesu vimatīti. Āmantā.
Atthi arahato vimati atthi tassa satthari vimati .pe. Idappaccayatāpaṭicca-
samuppannesu dhammesu vimatīti. Na hevaṁ vattabbe .pe.

[460] Atthi arahato vimati natthi tassa satthari vimati
.pe. Idappaccayatāpaṭiccasamuppannesu dhammesu vimatīti. Āmantā.
Atthi puthujjanassa vimati natthi tassa satthari vimati .pe.
Idappaccayatāpaṭiccasamuppannesu dhammesu vimatīti. Na hevaṁ vattabbe .pe.

[461] Atthi arahato asucisukkavisaṭṭhīti. Āmantā. Arahato
asucisukkavisaṭṭhi kissa nissandoti. Asitapītakhāyitasāyitassa nissandoti.
Arahato asucisukkavisaṭṭhi asitapītakhāyitasāyitassa nissandoti.
Āmantā. Ye keci asanti pivanti khādanti 1 sāyanti
sabbesaññeva atthi asucisukkavisaṭṭhīti. Na hevaṁ vattabbe .pe.

[462] Ye keci asanti pivanti khādanti sāyanti sabbesaññeva
atthi asucisukkavisaṭṭhīti. Āmantā. Dārakā asanti
pivanti khādanti sāyanti atthi dārakānaṁ asucisukkavisaṭṭhīti.
Na hevaṁ vattabbe .pe.

[463] Paṇḍakā asanti pivanti khādanti sāyanti atthi
paṇḍakānaṁ asucisukkavisaṭṭhīti. Na hevaṁ vattabbe .pe.

[464] Devā asanti pivanti khādanti sāyanti atthi devatānaṁ
asucisukkavisaṭṭhīti. Na hevaṁ vattabbe .pe.

[465] Arahato asucisukkavisaṭṭhi asitapītakhāyitasāyitassa nissandoti.
Āmantā. Atthi tassa āsayoti. Na hevaṁ vattabbe .pe.

[466] Arahato uccārapassāvo asitapītakhāyitasāyitassa nissando
atthi tassa āsayoti. Āmantā. Arahato asucisukkavisaṭṭhi
1. Yu. sabbattha khāyanti.
Asitapītakhāyitasāyitassa nissando atthi tassa āsayoti. Na
hevaṁ vattabbe .pe.