[177] Puggalo kiṁ nissāya tiṭṭhatīti. Bhavaṁ nissāya tiṭṭhatīti.
Bhavo anicco saṅkhato paṭiccasamuppanno khayadhammo vayadhammo virāgadhammo
nirodhadhammo vipariṇāmadhammoti. Āmantā. Puggalopi anicco
saṅkhato paṭiccasamuppanno khayadhammo vayadhammo virāgadhammo nirodhadhammo
vipariṇāmadhammoti. Na hevaṁ vattabbe .pe.

[178] Na vattabbaṁ puggalo upalabbhati sacchikaṭṭhaparamaṭṭhenāti.
Āmantā. Nanu atthi koci sukhaṁ vedanaṁ vediyamāno sukhaṁ vedanaṁ
vediyāmīti pajānātīti. Āmantā. Hañci atthi koci sukhaṁ vedanaṁ
vediyamāno sukhaṁ vedanaṁ vediyāmīti pajānāti tena vata re vattabbe
puggalo upalabbhati sacchikaṭṭhaparamaṭṭhenāti. Na vattabbaṁ puggalo
upalabbhati sacchikaṭṭhaparamaṭṭhenāti. Āmantā. Nanu atthi koci
Dukkhaṁ vedanaṁ vediyamāno .pe. Adukkhamasukhaṁ vedanaṁ vediyamāno
adukkhamasukhaṁ vedanaṁ vediyāmīti pajānātīti. Āmantā. Hañci atthi
koci adukkhamasukhaṁ vedanaṁ vediyamāno adukkhamasukhaṁ vedanaṁ vediyāmīti
pajānāti tena vata re vattabbe puggalo upalabbhati sacchikaṭṭhaparamaṭṭhenāti.
Atthi koci sukhaṁ vedanaṁ vediyamāno sukhaṁ vedanaṁ
vediyāmīti pajānātīti katvā tena ca kāraṇena puggalo upalabbhati
sacchikaṭṭhaparamaṭṭhenāti. Āmantā. Yo sukhaṁ vedanaṁ vediyamāno
sukhaṁ vedanaṁ vediyāmīti pajānāti sveva puggalo yo sukhaṁ vedanaṁ
vediyamāno sukhaṁ vedanaṁ vediyāmīti na pajānāti na so puggaloti.
Na hevaṁ vattabbe .pe. Yo dukkhaṁ vedanaṁ vediyamāno .pe.
Yo adukkhamasukhaṁ vedanaṁ vediyamāno adukkhamasukhaṁ vedanaṁ vediyāmīti
pajānāti sveva puggalo yo adukkhamasukhaṁ vedanaṁ vediyamāno
adukkhamasukhaṁ vedanaṁ vediyāmīti na pajānāti na so puggaloti. Na
hevaṁ vattabbe .pe. Atthi koci sukhaṁ vedanaṁ vediyamāno sukhaṁ
vedanaṁ vediyāmīti pajānātīti katvā tena ca kāraṇena puggalo
upalabbhati sacchikaṭṭhaparamaṭṭhenāti. Āmantā. Aññā sukhā
vedanā añño sukhaṁ vedanaṁ vediyamāno sukhaṁ vedanaṁ vediyāmīti
pajānātīti. Na hevaṁ vattabbe .pe. Aññā dukkhā vedanā
.pe. Aññā adukkhamasukhā vedanā añño adukkhamasukhaṁ vedanaṁ
vediyamāno adukkhamasukhaṁ vedanaṁ vediyāmīti pajānātīti. Na hevaṁ
Vattabbe .pe.

[179] Na vattabbaṁ puggalo upalabbhati sacchikaṭṭhaparamaṭṭhenāti.
Āmantā. Nanu atthi koci kāye kāyānupassī viharatīti. Āmantā.
Hañci atthi koci kāye kāyānupassī viharati tena vata re vattabbe
puggalo upalabbhati sacchikaṭṭhaparamaṭṭhenāti. Na vattabbaṁ puggalo
upalabbhati sacchikaṭṭhaparamaṭṭhenāti. Āmantā. Nanu atthi koci
vedanāsu .pe. Citte .pe. Dhammesu dhammānupassī viharatīti.
Āmantā. Hañci atthi koci dhammesu dhammānupassī viharati tena
vata re vattabbe puggalo upalabbhati sacchikaṭṭhaparamaṭṭhenāti.
Atthi koci kāye kāyānupassī viharatīti katvā tena ca kāraṇena
puggalo upalabbhati sacchikaṭṭhaparamaṭṭhenāti. Āmantā. Yo
kāye kāyānupassī viharati sveva puggalo yo na kāye kāyānupassī
viharati na so puggaloti. Na hevaṁ vattabbe .pe. Yo vedanāsu
.pe. Citte .pe. Dhammesu dhammānupassī viharati sveva puggalo
yo na dhammesu dhammānupassī viharati na so puggaloti. Na hevaṁ
vattabbe .pe. Atthi koci kāye kāyānupassī viharatīti katvā
tena ca kāraṇena puggalo upalabbhati sacchikaṭṭhaparamaṭṭhenāti.
Āmantā. Añño kāyo añño kāye kāyānupassī viharatīti.
Na hevaṁ vattabbe .pe. Aññā vedanā .pe. Aññaṁ cittaṁ
.pe. Aññe dhammā añño dhammesu dhammānupassī viharatīti.
Na hevaṁ vattabbe .pe.

[180] Puggalo upalabbhati sacchikaṭṭhaparamaṭṭhenāti. Āmantā.
Nanu vuttaṁ bhagavatā
suññato lokaṁ avekkhassu mogharāja sadā sato
attānudiṭṭhiṁ ūhacca evaṁ maccutaro siyā
evaṁ lokaṁ avekkhantaṁ maccurājā na passatīti 1
attheva suttantoti. Āmantā. Tena hi na vattabbaṁ puggalo
upalabbhati sacchikaṭṭhaparamaṭṭhenāti.

[181] Puggalo avekkhatīti. Āmantā. Saha rūpena avekkhatīti
vinā rūpena avekkhatīti. Saha rūpena avekkhatīti. Taṁ jīvaṁ taṁ
sarīranti. Na hevaṁ vattabbe .pe. Vinā rūpena avekkhatīti.
Aññaṁ jīvaṁ aññaṁ sarīranti. Na hevaṁ vattabbe .pe. Puggalo
avekkhatīti. Āmantā. Abbhantaragato avekkhatīti bahiddhā
nikkhamitvā avekkhatīti. Abbhantaragato avekkhatīti. Taṁ jīvaṁ taṁ
sarīranti. Na hevaṁ vattabbe .pe. Bahiddhā nikkhamitvā avekkhatīti.
Aññaṁ jīvaṁ aññaṁ sarīranti. Na hevaṁ vattabbe .pe.

[182] Na vattabbaṁ puggalo upalabbhati sacchikaṭṭhaparamaṭṭhenāti.
Āmantā. Nanu bhagavā saccavādī kālavādī bhūtavādī tathavādī
avitathavādī anaññathavādīti. Āmantā. Vuttaṁ bhagavatā atthi
1 khu, su. 549.
Puggalo attahitāya paṭipannoti 1 attheva suttantoti. Āmantā.
Tena hi puggalo upalabbhati sacchikaṭṭhaparamaṭṭhenāti. Na vattabbaṁ
puggalo upalabbhati sacchikaṭṭhaparamaṭṭhenāti. Āmantā. Nanu bhagavā
saccavādī kālavādī bhūtavādī tathavādī avitathavādī anaññathavādīti.
Āmantā. Vuttaṁ bhagavatā ekapuggalo bhikkhave loke uppajjamāno
uppajjati bahujanahitāya bahujanasukhāya lokānukampāya atthāya hitāya
sukhāya devamanussānanti 2 attheva suttantoti. Āmantā.
Tena hi puggalo upalabbhati sacchikaṭṭhaparamaṭṭhenāti.

[183] Puggalo upalabbhati sacchikaṭṭhaparamaṭṭhenāti. Āmantā.
Nanu bhagavā saccavādī kālavādī bhūtavādī tathavādī avitathavādī anaññathavādīti.
Āmantā. Vuttaṁ bhagavatā sabbe dhammā anattāti 3
attheva suttantoti. Āmantā. Tena hi na vattabbaṁ puggalo
upalabbhati sacchikaṭṭhaparamaṭṭhenāti.

[184] Puggalo upalabbhati sacchikaṭṭhaparamaṭṭhenāti. Āmantā.
Nanu bhagavā saccavādī kālavādī bhūtavādī tathavādī avitathavādī
anaññathavādīti. Āmantā. Vuttaṁ bhagavatā dukkhameva uppajjamānaṁ
uppajjati dukkhameva nirujjhamānaṁ nirujjhatīti na kaṅkhati na vicikicchati.
Aparapaccayā ñāṇamevassa ettha hoti ettāvatā kho kaccāna sammādiṭṭhi
hotīti 4 attheva suttantoti. Āmantā. Tena hi na
1 abhi. pu. 167-193. 2 aṁ. eka. 28. 3 khu. khu. 43. 4 saṁ. ni. 21.
Vattabbaṁ puggalo upalabbhati sacchikaṭṭhaparamaṭṭhenāti.

[185] Puggalo upalabbhati sacchikaṭṭhaparamaṭṭhenāti. Āmantā.
Nanu vajirā bhikkhunī māraṁ pāpimantaṁ etadavoca
kiṁ nu sattoti paccesi māra diṭṭhigataṁ nu te
suddhasaṅkhārapuñjoyaṁ na yidha sattūpalabbhati
yathā hi aṅgasambhārā hoti saddo ratho iti
evaṁ khandhesu santesu hoti sattoti sammati
dukkhameva hi sambhoti dukkhaṁ tiṭṭhati veti ca
nāññatra dukkhā sambhoti nāññatra dukkhā nirujjhatīti 1
attheva suttantoti. Āmantā. Tena hi na vattabbaṁ puggalo
upalabbhati sacchikaṭṭhaparamaṭṭhenāti.

[186] Puggalo upalabbhati sacchikaṭṭhaparamaṭṭhenāti. Āmantā.
Nanu āyasmā ānando bhagavantaṁ etadavoca suñño loko
suñño lokoti bhante vuccati kittāvatā nukho bhante suñño
lokoti vuccatīti yasmā kho ānanda suññaṁ attena vā attaniyena
vā tasmā suñño lokoti vuccati kiñcānanda suññaṁ attena vā
attaniyena vā cakkhuṁ kho ānanda suññaṁ attena vā attaniyena
vā rūpā suññā .pe. Cakkhuviññāṇaṁ suññaṁ .pe. Cakkhusamphasso
suñño .pe. Yampidaṁ cakkhusamphassapaccayā uppajjati
1 saṁ. sa. 198.
Vedayitaṁ sukhaṁ vā dukkhaṁ vā adukkhamasukhaṁ vā tampi suññaṁ attena
vā attaniyena vā sotaṁ suññaṁ .pe. Saddā suññā .pe.
Ghānaṁ suññaṁ ... Gandhā suññā .pe. Jivhā suññā ... Rasā suññā
.pe. Kāyo suñño ... Phoṭṭhabbā suññā .pe. Mano suñño ...
Dhammā suññā ... Manoviññāṇaṁ suññaṁ ... Manosamphasso suñño .pe.
Yampidaṁ manosamphassapaccayā uppajjati vedayitaṁ sukhaṁ vā dukkhaṁ vā
adukkhamasukhaṁ vā tampi suññaṁ attena vā attaniyena vā yasmā
kho ānanda suññaṁ attena vā attaniyena vā tasmā suñño
lokoti vuccatīti 1 attheva suttantoti. Āmantā. Tena hi
na vattabbaṁ puggalo upalabbhati sacchikaṭṭhaparamaṭṭhenāti.