[157] Nerayikaṁ dukkhaṁ upalabbhatīti. Nerayikassa dukkhassa
paṭisaṁvedī upalabbhatīti. Āmantā. Mahāpaṭhavī upalabbhatīti .pe.
Mahāsamuddo upalabbhatīti. Sinerupabbatarājā upalabbhatīti. Āpo
upalabbhatīti. Tejo upalabbhatīti. Vāyo upalabbhatīti.
Tiṇakaṭṭhavanappatayo upalabbhantīti. Tiṇakaṭṭhavanappatīnaṁ paṭisaṁvedī
upalabbhatīti. Na hevaṁ vattabbe .pe.

[158] Nerayikaṁ dukkhaṁ upalabbhatīti. Nerayikassa dukkhassa
paṭisaṁvedī upalabbhatīti. Āmantā. Aññaṁ nerayikaṁ dukkhaṁ
añño nerayikassa dukkhassa paṭisaṁvedīti. Na hevaṁ vattabbe .pe.

[159] Kalyāṇapāpakāni kammāni upalabbhantīti. Kalyāṇapāpakānaṁ
kammānaṁ kattā kāretā vipākapaṭisaṁvedī upalabbhatīti.
Āmantā. So karoti so paṭisaṁvedetīti. Na hevaṁ vattabbe
.pe. So karoti so paṭisaṁvedetīti. Āmantā. Sayaṁkataṁ
sukhadukkhanti. Na hevaṁ vattabbe .pe.

[160] Kalyāṇapāpakāni kammāni upalabbhantīti. Kalyāṇapāpakānaṁ
kammānaṁ kattā kāretā vipākapaṭisaṁvedī upalabbhatīti.
Āmantā. Añño karoti añño paṭisaṁvedetīti. Na hevaṁ
vattabbe .pe. Añño karoti añño paṭisaṁvedetīti. Āmantā.
Parakataṁ sukhadukkhanti. Na hevaṁ vattabbe .pe.

[161] Kalyāṇapāpakāni kammāni upalabbhantīti. Kalyāṇapāpakānaṁ
kammānaṁ kattā kāretā vipākapaṭisaṁvedī upalabbhatīti.
Āmantā. So ca añño ca karonti so ca añño ca
paṭisaṁvedentīti. Na hevaṁ vattabbe .pe. So ca añño ca
karonti so ca añño ca paṭisaṁvedentīti. Āmantā.
Sayaṁkatañca parakatañca sukhadukkhanti. Na hevaṁ vattabbe .pe.

[162] Kalyāṇapāpakāni kammāni upalabbhantīti. Kalyāṇapāpakānaṁ
kammānaṁ kattā kāretā vipākapaṭisaṁvedī upalabbhatīti.
Āmantā. Neva so karoti na so paṭisaṁvedeti na añño
karoti na añño paṭisaṁvedetīti. Na hevaṁ vattabbe .pe.
Neva so karoti na so paṭisaṁvedeti na añño karoti na
añño paṭisaṁvedetīti. Āmantā. Asayaṁkāraṁ aparakāraṁ
paṭiccasamuppannaṁ sukhadukkhanti. Na hevaṁ vattabbe .pe.

[163] Kalyāṇapāpakāni kammāni upalabbhantīti. Kalyāṇapāpakānaṁ
kammānaṁ kattā kāretā vipākapaṭisaṁvedī upalabbhatīti.
Āmantā. So karoti so paṭisaṁvedeti añño karoti
añño paṭisaṁvedeti so ca añño ca karonti so ca añño ca
paṭisaṁvedenti neva so karoti na so paṭisaṁvedeti na añño
karoti na añño paṭisaṁvedetīti. Na hevaṁ vattabbe .pe. So
karoti so paṭisaṁvedeti añño karoti añño paṭisaṁvedeti
so ca añño ca karonti so ca añño ca paṭisaṁvedenti
neva so karoti na so paṭisaṁvedeti na añño karoti na
añño pasaṁvedetīti. Āmantā. Sayaṁkataṁ sukhadukkhaṁ parakataṁ
sukhadukkhaṁ sayaṁkatañca parakatañca sukhadukkhaṁ asayaṁkāraṁ aparakāraṁ
paṭiccasamuppannaṁ sukhadukkhanti. Na hevaṁ vattabbe .pe.

[164] Kammaṁ atthīti. Āmantā. Kammakārako atthīti.
Na hevaṁ vattabbe .pe. Kammaṁ atthīti. Kammakārako atthīti.
Āmantā. Tassa kārako atthīti. Na hevaṁ vattabbe .pe.
Tassa kārako atthīti. Āmantā. Tassa tasseva natthi dukkhassa
antakiriyā natthi vaṭṭūpacchedo natthi anupādāparinibbānanti.
Na hevaṁ vattabbe .pe. Kammaṁ atthīti. Kammakārako atthīti.
Āmantā. Puggalo atthīti. Puggalassa kārako atthīti. Na hevaṁ
vattabbe .pe. Kammaṁ atthīti. Kammakārako atthīti. Āmantā.
Nibbānaṁ atthīti. Nibbānassa kārako atthīti. Na hevaṁ vattabbe
.pe. Kammaṁ atthīti. Kammakārako atthīti. Āmantā. Mahāpaṭhavī
atthīti .pe. Mahāsamuddo atthīti. Sinerupabbatarājā atthīti.
Āpo atthīti. Tejo atthīti. Vāyo atthīti. Tiṇakaṭṭhavanappatayo
atthīti. Tiṇakaṭṭhavanappatīnaṁ kārako atthīti. Na
hevaṁ vattabbe .pe. Kammaṁ atthīti. Kammakārako atthīti.
Āmantā. Aññaṁ kammaṁ añño kammakārakoti. Na hevaṁ vattabbe
.pe. Vipāko atthīti. Āmantā. Vipākapaṭisaṁvedī atthīti.
Na hevaṁ vattabbe .pe. Vipāko atthīti. Vipākapaṭisaṁvedī
atthīti. Āmantā. Tassa paṭisaṁvedī atthīti. Na hevaṁ
vattabbe .pe. Tassa paṭisaṁvedī atthīti. Āmantā. Tassa
tasseva natthi dukkhassa antakiriyā natthi vaṭṭūpacchedo natthi
anupādāparinibbānanti. Na hevaṁ vattabbe .pe. Vipāko
atthīti. Vipākapaṭisaṁvedī atthīti. Āmantā. Puggalo atthīti.
Puggalassa paṭisaṁvedī atthīti. Na hevaṁ vattabbe .pe. Vipāko
atthīti. Vipākapaṭisaṁvedī atthīti. Āmantā. Nibbānaṁ atthīti.
Nibbānassa paṭisaṁvedī atthīti. Na hevaṁ vattabbe .pe. Vipāko
atthīti. Vipākapaṭisaṁvedī atthīti. Āmantā. Mahāpaṭhavī
atthīti .pe. Mahāsamuddo atthīti. Sinerupabbatarājā atthīti.
Āpo atthīti. Tejo atthīti. Vāyo atthīti. Tiṇakaṭṭhavanappatayo
Atthīti. Tiṇakaṭṭhavanappatīnaṁ paṭisaṁvedī atthīti. Na
hevaṁ vattabbe .pe. Vipāko atthīti. Vipākapaṭisaṁvedī atthīti.
Āmantā. Añño vipāko añño vipākapaṭisaṁvedīti. Na hevaṁ
vattabbe .pe. Saṅkhittaṁ.
Kalyāṇavaggo paṭhamo.

[165] Na vattabbaṁ puggalo upalabbhati sacchikaṭṭhaparamaṭṭhenāti.
Āmantā. Nanu atthi koci iddhiṁ vikubbatīti. Āmantā.
Hañci atthi koci iddhiṁ vikubbati tena vata re vattabbe puggalo
upalabbhati sacchikaṭṭhaparamaṭṭhenāti. Na vattabbaṁ puggalo upalabbhati
sacchikaṭṭhaparamaṭṭhenāti. Āmantā. Nanu atthi koci dibbāya
sotadhātuyā saddaṁ suṇāti .pe. Paracittaṁ jānāti .pe. Pubbenivāsaṁ
anussarati .pe. Dibbena cakkhunā rūpaṁ passati .pe. Āsavānaṁ
khayaṁ sacchikarotīti. Āmantā. Hañci atthi koci āsavānaṁ khayaṁ
sacchikaroti tena vata re vattabbe puggalo upalabbhati
sacchikaṭṭhaparamaṭṭhenāti. Atthi koci iddhiṁ vikubbatīti katvā tena ca
kāraṇena puggalo upalabbhati sacchikaṭṭhaparamaṭṭhenāti. Āmantā.
Yo iddhiṁ vikubbati sveva puggalo yo iddhiṁ na vikubbati na so
puggaloti. Na hevaṁ vattabbe .pe. Yo dibbāya sotadhātuyā
saddaṁ suṇāti .pe. Yo paracittaṁ jānāti .pe. Yo pubbenivāsaṁ
anussarati .pe. Yo dibbena cakkhunā rūpaṁ passati .pe. Yo
Āsavānaṁ khayaṁ sacchikaroti sveva puggalo yo āsavānaṁ khayaṁ na
sacchikaroti na so puggaloti. Na hevaṁ vattabbe .pe.
Abhiññānuyogo.

[166] Na vattabbaṁ puggalo upalabbhati sacchikaṭṭhaparamaṭṭhenāti.
Āmantā. Nanu mātā atthīti. Āmantā. Hañci mātā
atthi tena vata re vattabbe puggalo upalabbhati sacchikaṭṭhaparamaṭṭhenāti.
Na vattabbaṁ puggalo upalabbhati sacchikaṭṭhaparamaṭṭhenāti.
Āmantā. Nanu pitā atthi .pe. Bhātā atthi bhaginī atthi
khattiyo atthi brāhmaṇo atthi vesso atthi suddo atthi
gahaṭṭho atthi pabbajito atthi devo atthi manusso atthīti.
Āmantā. Hañci manusso atthi tena vata re vattabbe
puggalo upalabbhati sacchikaṭṭhaparamaṭṭhenāti.