[972] Tattha katamāni aparānipi cattāri bhayāni rājabhayaṁ
corabhayaṁ aggibhayaṁ udakabhayaṁ imāni cattāri bhayāni.

[973] Tattha katamāni aparānipi cattāri bhayāni ūmibhayaṁ
kumbhilabhayaṁ āvaṭṭabhayaṁ susukābhayaṁ imāni cattāri bhayāni.

[974] Tattha katamāni aparānipi cattāri bhayāni attānuvādabhayaṁ
parānuvādabhayaṁ daṇḍabhayaṁ duggatibhayaṁ imāni cattāri bhayāni.

[975] Tattha katamā catasso diṭṭhiyo sayaṁkataṁ sukhadukkhanti
saccato thetato diṭṭhi uppajjati parakataṁ sukhadukkhanti saccato
thetato diṭṭhi uppajjati sayaṁkatañca parakatañca sukhadukkhanti saccato
thetato diṭṭhi uppajjati asayaṁkataṁ aparakataṁ adhiccasamuppannaṁ sukhadukkhanti
saccato thetato diṭṭhi uppajjati imā catasso diṭṭhiyo.
Catukkaṁ.

[976] Tattha katamāni pañcorambhāgiyāni saññojanāni
sakkāyadiṭṭhi vicikicchā sīlabbataparāmāso kāmacchando byāpādo
imāni pañcorambhāgiyāni saññojanāni.

[977] Tattha katamāni pañcuddhambhāgiyāni saññojanāni rūparāgo
arūparāgo māno uddhaccaṁ avijjā imāni pañcuddhambhāgiyāni
saññojanāni.

[978] Tattha katamāni pañca macchariyāni āvāsamacchariyaṁ
kulamacchariyaṁ lābhamacchariyaṁ vaṇṇamacchariyaṁ dhammamacchariyaṁ imāni pañca
macchariyāni.

[979] Tattha katame pañca saṅgā rāgasaṅgo dosasaṅgo
mohasaṅgo mānasaṅgo diṭṭhisaṅgo ime pañca saṅgā.

[980] Tattha katame pañca sallā rāgasallaṁ dosasallaṁ
mohasallaṁ mānasallaṁ diṭṭhisallaṁ ime pañca sallā.

[981] Tattha katame pañca cetokhilā satthari kaṅkhati vicikicchati
Nādhimuccati na sampasīdati dhamme kaṅkhati vicikicchati nādhimuccati
na sampasīdati saṅghe kaṅkhati vicikicchati nādhimuccati na sampasīdati
sikkhāya kaṅkhati vicikicchati nādhimuccati na sampasīdati sabrahmacārīsu
kupito hoti anattamano āhatacitto khilajāto ime pañca
cetokhilā.