[992] Tattha katame cha chandarāgā gehasitā dhammā manāpikesu
rūpesu gehasito rāgo sārāgo .pe. Cittassa sārāgo manāpikesu
saddesu .pe. Manāpikesu gandhesu .pe. Manāpikesu rasesu
.pe. Manāpikesu phoṭṭhabbesu .pe. Manāpikesu dhammesu gehasito
Rāgo sārāgo .pe. Cittassa sārāgo ime cha chandarāgā
gehasitā dhammā.

[993] Tattha katamāni cha virodhavatthūni amanāpikesu rūpesu
cittassa āghāto paṭighāto .pe. Caṇḍikkaṁ assuropo anattamanatā
cittassa amanāpikesu saddesu .pe. Amanāpikesu gandhesu .pe.
Amanāpikesu rasesu .pe. Amanāpikesu phoṭṭhabbesu .pe. Amanāpikesu
dhammesu cittassa āghāto paṭighāto .pe. Caṇḍikkaṁ assuropo
anattamanatā cittassa imāni cha virodhavatthūni.

[994] Tattha katame cha taṇhākāyā rūpataṇhā saddataṇhā
gandhataṇhā rasataṇhā phoṭṭhabbataṇhā dhammataṇhā ime cha
taṇhākāyā.

[995] Tattha katame cha agāravā satthari agāravo viharati
appaṭisso dhamme .pe. Saṅghe .pe. Sikkhāya .pe. Appamāde
.pe. Paṭisanthāre agāravo viharati appaṭisso ime cha agāravā.

[996] Tattha katame cha parihāniyā dhammā kammārāmatā
bhassārāmatā niddārāmatā saṅgaṇikārāmatā saṁsaggārāmatā
papañcārāmatā ime cha parihāniyā dhammā.

[997] Tattha katame aparepi cha parihāniyā dhammā kammārāmatā
bhassārāmatā niddārāmatā saṅgaṇikārāmatā dovacassatā pāpamittatā
ime cha parihāniyā dhammā.

[998] Tattha katame cha somanassupavicārā cakkhunā rūpaṁ disvā
somanassaṭṭhāniyaṁ rūpaṁ upavicarati sotena saddaṁ sutvā .pe.
Ghānena gandhaṁ ghāyitvā .pe. Jivhāya rasaṁ sāyitvā .pe. Kāyena
phoṭṭhabbaṁ phusitvā .pe. Manasā dhammaṁ viññāya somanassaṭṭhāniyaṁ
dhammaṁ upavicarati ime cha somanassupavicārā.

[999] Tattha katame cha domanassupavicārā cakkhunā rūpaṁ disvā
domanassaṭṭhāniyaṁ rūpaṁ upavicarati sotena saddaṁ sutvā .pe.
Ghānena gandhaṁ ghāyitvā .pe. Jivhāya rasaṁ sāyitvā .pe. Kāyena
phoṭṭhabbaṁ phusitvā .pe. Manasā dhammaṁ viññāya domanassaṭṭhāniyaṁ
dhammaṁ upavicarati ime cha domanassupavicārā.

[1000] Tattha katame cha upekkhūpavicārā cakkhunā rūpaṁ disvā
upekkhaṭṭhāniyaṁ rūpaṁ upavicarati sotena saddaṁ sutvā .pe. Ghānena
gandhaṁ ghāyitvā .pe. Jivhāya rasaṁ sāyitvā .pe. Kāyena
phoṭṭhabbaṁ phusitvā .pe. Manasā dhammaṁ viññāya upekkhaṭṭhāniyaṁ
dhammaṁ upavicarati ime cha upekkhūpavicārā.

[1001] Tattha katamāni cha gehasitāni somanassāni manāpikesu
rūpesu gehasitaṁ cetasikaṁ sātaṁ cetasikaṁ sukhaṁ cetosamphassajaṁ sātaṁ sukhaṁ
vedayitaṁ cetosamphassajā sātā sukhā vedanā manāpikesu saddesu
.pe. Manāpikesu gandhesu .pe. Manāpikesu rasesu .pe. Manāpikesu
phoṭṭhabbesu .pe. Manāpikesu dhammesu gehasitaṁ cetasikaṁ sātaṁ cetasikaṁ
Sukhaṁ cetosamphassajaṁ sātaṁ sukhaṁ vedayitaṁ cetosamphassajā sātā sukhā
vedanā imāni cha gehasitāni somanassāni.