[422] Tattha katamaṁ viññāṇapaccayā nāmaṁ vedanākkhandho
saññākkhandho saṅkhārakkhandho idaṁ vuccati viññāṇapaccayā nāmaṁ.

[423] Tattha katamaṁ nāmapaccayā chaṭṭhāyatanaṁ yaṁ cittaṁ mano
mānasaṁ .pe. Tajjā manoviññāṇadhātu idaṁ vuccati nāmapaccayā
chaṭṭhāyatanaṁ.

[424] Tattha katamo chaṭṭhāyatanapaccayā phasso yo phasso phusanā
samphusanā samphusitattaṁ ayaṁ vuccati chaṭṭhāyatanapaccayā phasso.

[425] Tattha katamā phassapaccayā vedanā yaṁ cetasikaṁ neva sātaṁ
nāsātaṁ cetosamphassajaṁ adukkhamasukhaṁ vedayitaṁ cetosamphassajā
adukkhamasukhā vedanā ayaṁ vuccati phassapaccayā vedanā.

[426] Tattha katamo vedanāpaccayā adhimokkho yo cittassa
adhimokkho adhimuccanā tadadhimuttatā ayaṁ vuccati vedanāpaccayā
adhimokkho.

[427] Tattha katamo adhimokkhapaccayā bhavo ṭhapetvā adhimokkhaṁ
vedanākkhandho saññākkhandho saṅkhārakkhandho viññāṇakkhandho ayaṁ
vuccati adhimokkhapaccayā bhavo.

[428] Tattha katamā bhavapaccayā jāti yā tesaṁ dhammānaṁ jāti
sañjāti nibbatti abhinibbatti pātubhāvo ayaṁ vuccati bhavapaccayā jāti.

[429] Tattha katamaṁ jātipaccayā jarāmaraṇaṁ atthi jarā atthi
maraṇaṁ. Tattha katamā jarā yā tesaṁ dhammānaṁ jarā jīraṇatā āyuno
saṁhāni ayaṁ vuccati jarā. Tattha katamaṁ maraṇaṁ yo tesaṁ dhammānaṁ khayo
vayo bhedo paribhedo aniccatā antaradhānaṁ idaṁ vuccati maraṇaṁ. Iti
ayañca jarā idañca maraṇaṁ idaṁ vuccati jātipaccayā jarāmaraṇaṁ.

[430] Evametassa kevalassa dukkhakkhandhassa samudayo hotīti
evametassa kevalassa dukkhakkhandhassa saṅgati hoti samāgamo hoti
Samodhānaṁ hoti pātubhāvo hoti tena vuccati evametassa kevalassa
dukkhakkhandhassa samudayo hotīti.
Akusalamūlakavipākaniddeso.
Abhidhammabhājanīyaṁ.
Paccayākāravibhaṅgo samatto.
------------
Satipaṭṭhānavibhaṅgo

[431] Cattāro satipaṭṭhānā. Idha bhikkhu ajjhattaṁ kāye
kāyānupassī viharati bahiddhā kāye kāyānupassī viharati ajjhattabahiddhā
kāye kāyānupassī viharati ātāpī sampajāno satimā
vineyya loke abhijjhādomanassaṁ. Ajjhattaṁ vedanāsu vedanānupassī
viharati bahiddhā vedanāsu vedanānupassī viharati ajjhattabahiddhā
vedanāsu vedanānupassī viharati ātāpī sampajāno satimā vineyya
loke abhijjhādomanassaṁ. Ajjhattaṁ citte cittānupassī viharati
bahiddhā citte cittānupassī viharati ajjhattabahiddhā citte
cittānupassī viharati ātāpī sampajāno satimā vineyya loke
abhijjhādomanassaṁ. Ajjhattaṁ dhammesu dhammānupassī viharati bahiddhā
dhammesu dhammānupassī viharati ajjhattabahiddhā dhammesu dhammānupassī
viharati ātāpī sampajāno satimā vineyya loke abhijjhādomanassaṁ.