[92] Tena kho pana samayena bhikkhūnaṁ kismiñci kismiñci ṭhāne
kukkuccaṁ uppajjati kinnu kho bhagavatā anuññātaṁ kiṁ
ananuññātanti. Bhagavato etamatthaṁ ārocesuṁ. Yaṁ bhikkhave mayā
idaṁ na kappatīti appaṭikkhittaṁ tañca akappiyaṁ anulometi
kappiyaṁ paṭibāhati taṁ vo na kappati yaṁ bhikkhave mayā idaṁ
na kappatīti appaṭikkhittaṁ tañce kappiyaṁ anulometi akappiyaṁ
paṭibāhati taṁ vo kappati yaṁ 1 bhikkhave mayā idaṁ kappatīti
ananuññātaṁ tañce akappiyaṁ anulometi kappiyaṁ paṭibāhati taṁ
1 Ma. yaññe ca. Yu. yañca.
Vo na kappati yaṁ bhikkhave mayā idaṁ kappatīti ananuññātaṁ
tañce kappiyaṁ anulometi akappiyaṁ paṭibāhati taṁ vo kappatīti.

[93] Athakho bhikkhūnaṁ etadahosi kappati nu kho yāvakālikena
yāmakālikaṁ na nu kho kappati kappati nu kho yāvakālikena
sattāhakālikaṁ na nu kho kappati kappati nu kho yāvakālikena
yāvajīvikaṁ na nu kho kappati kappati nu kho yāmakālikena
sattāhakālikaṁ na nu kho kappati kappati nu kho yāmakālikena
yāvajīvikaṁ na nu kho kappati kappati nu kho sattāhakālikena
yāvajīvikaṁ na nu kho kappatīti. Bhagavato etamatthaṁ ārocesuṁ.
Yāvakālikena bhikkhave yāmakālikaṁ tadahupaṭiggahitaṁ kāle kappati vikāle
na kappati yāvakālikena bhikkhave sattāhakālikaṁ tadahupaṭiggahitaṁ
kāle kappati vikāle na kappati yāvakālikena bhikkhave yāvajīvikaṁ
tadahupaṭiggahitaṁ kāle kappati vikāle na kappati yāmakālikena
bhikkhave sattāhakālikaṁ tadahupaṭiggahitaṁ yāme kappati yāmātikkante
na kappati yāmakālikena bhikkhave yāvajīvikaṁ tadahupaṭiggahitaṁ yāme
kappati yāmātikkante na kappati sattāhakālikena bhikkhave yāvajīvikaṁ
tadahupaṭiggahitaṁ sattāhaṁ kappati sattāhātikkante na kappatīti.
Bhesajjakkhandhakaṁ niṭṭhitaṁ chaṭṭhaṁ.
Imamhi khandhake vatthu ekasataṁ chavatthu.
-----------
Tassuddānaṁ

[94] Sāradike vikālepi vasaṁ mūle piṭṭhehi ca 1
kasāvehi paṇṇaṁ phalaṁ jatu loṇaṁ ca chakkaṇaṁ 2
cuṇṇaṁ cālinī maṁsañca añjanaṁ upapiṁsanaṁ 3
añjanī uccāpāruttā 4 salākā salākodhanī 5
thavikaṁ vaddhakaṁ 6 suttaṁ muddhanitelanatthu ca 7
natthukaraṇī dhūmañca nettañcāpidhanatthavi 8
telapākesu majjañca atikkhittaṁ abbhañjanaṁ
tumbaṁ sedaṁ sambhārañca mahābhaṅgodakaṁ tathā 9
dakakoṭṭhaṁ 10 lohitañca visāṇaṁ pādabbhañjanaṁ
majjaṁ 11 satthaṁ kasāvañca tilakakkakabaḷikaṁ 12
colaṁ sāsapakuḍḍañca 13 dhūmasakkharikāya ca
vaṇatelaṁ vikāsāyaṁ 14 vikaṭañca paṭiggahaṁ
gūthaṁ karonto lobī ca 15 khāraṁ muttaharīṭakī 16
gandhā 17 virecanañceva acchākaṭaṁ kaṭākaṭaṁ
1 Po. vasaṁ mūlehi piṭṭhakaṁ. 2 Ma. Yu. jatu loṇaṁ chakkaṇaṁ ca. 3 Po. upapiṁsanī.
Ma. upapisanī. Yu. upapisanaṁ. 4 Po. añjanī ca uccāvacā. Yu. uccaparutā.
5 Ma. salākaṭhāniṁ. 6 Ma. thavikaṁ sabaddhakaṁ. 7 Po. -natthukaṁ. 8 Ma. -cāpidhanā thavi.
Yu. cāpidhānaṁ thavi. 9 Po. -pica. 10 Po. uda-. 11 Ma. Yu. pajjaṁ.
12 Po. -kavallikaṁ. 13 Po. koṭañca. Ma. koṭṭañca. 14 Po. vikāsekaṁ.
Ma. Yu. vikāsikaṁ. 15 Po. loḷikaṁ. Ma. Yu. loḷiñca. 16 Po. -hariṭakiṁ.
Ma. hariṭakaṁ. 17 Po. gandhaṁ.
Paṭicchādanī pabbhārā ārāmī sattahena ca
guḷaṁ muggaṁ sucīrañca 1 sāmapākā 2 punāpace
punānuññāsi dubbhikkhe phalañca tilakhādanī
purebhattaṁ kāyadāho nibbaṭṭañca bhagandalaṁ
vatthikammañca suppī ca 3 manussamaṁsameva ca
hatthiassā sunakho ca ahi sīhabyagghadīpikaṁ
acchataracchamaṁsañca paṭipāṭi ca yāgu ca
taruṇaṁ aññatra guḷaṁ sunīdhāvasathāgaraṁ 4
gaṅgā koṭisaccakathā ambapālī ca licchavī 5
uddissa kataṁ subhikkhaṁ punareva 6 paṭikkhipi
megho yaso 7 meṇḍako ca gorasaṁ pātheyyakena ca
keṇī ambo jambu coca- mocamadhumuddikasālukaṁ 8
phārusakaḍākapiṭṭhaṁ 9 ātumāyaṁ nahāpito
sāvatthiyaṁ phalaṁ bījaṁ kismiṁ 10 ṭhāne ca kālikāti 11 .
1 Ma. Yu. sovirañca. 2 Po. sāmaṁ pakkaṁ. 3 Ma. vatthikammaṁ suppiyañca.
4 Po. sunīdhavassakāraṇakā. Ma. -gāraṁ. 5 Ma. Yu. ambapālī ca licchavī gaṅgā koṭisaccakathā. 6 Ma. Yu. punadeva. 7 Yu. yasojo. 8 Yu. -muddikā -.
9 Yu. phārusakā. 10 Yu. kasmiṁ. 11 Ma. kāliketi. Yu. kālikoti.
Kaṭhinakkhandhakaṁ

[95] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena tiṁsamattā
pāṭheyyakā bhikkhū sabbe āraññakā sabbe piṇḍapātikā sabbe
paṁsukūlikā sabbe tecīvarikā sāvatthiṁ gacchantā bhagavantaṁ dassanāya
upakaṭṭhāya vassūpanāyikāya nāsakkhiṁsu sāvatthiyaṁ vassūpanāyikaṁ
sambhāvetuṁ antarāmagge sākete vassaṁ upagacchiṁsu. Te
ukkaṇṭhitarūpā vassaṁ vasiṁsu āsanne va no bhagavā viharati ito
chasu yojanesu na ca mayaṁ labhāma bhagavantaṁ dassanāyāti.
Athakho te bhikkhū vassaṁ vutthā temāsaccayena katāya pavāraṇāya
deve vassante udakasaṅgahe udakacikkhalle okapuṇṇehi cīvarehi
kilantarūpā yena sāvatthī jetavanaṁ anāthapiṇḍikassa ārāmo
yena bhagavā tenupasaṅkamiṁsu upasaṅkamitvā bhagavantaṁ abhivādetvā
ekamantaṁ nisīdiṁsu. Āciṇṇaṁ kho panetaṁ buddhānaṁ bhagavantānaṁ
āgantukehi bhikkhūhi saddhiṁ paṭisammodituṁ. Athakho bhagavā te bhikkhū
etadavoca kacci bhikkhave khamanīyaṁ kacci yāpanīyaṁ kacci samaggā
sammodamānā avivadamānā phāsukaṁ vassaṁ vasittha na ca piṇḍakena
kilamitthāti. Khamanīyaṁ bhagavā yāpanīyaṁ bhagavā samaggā ca mayaṁ
bhante sammodamānā avivadamānā vassaṁ vasimhā na ca piṇḍakena
Kilamimhā idha mayaṁ bhante tiṁsamattā pāṭheyyakā bhikkhū sāvatthiṁ
āgacchantā bhagavantaṁ dassanāya upakaṭṭhāya vassūpanāyikāya
nāsakkhimhā sāvatthiyaṁ vassūpanāyikaṁ sambhāvetuṁ antarāmagge sākete
vassaṁ upagacchimhā te mayaṁ bhante ukkaṇṭhitarūpā vassaṁ vasimhā
āsanne va no bhagavā viharati ito chasu yojanesu na ca mayaṁ
labhāma bhagavantaṁ dassanāyāti athakho mayaṁ bhante vassaṁ vutthā
temāsaccayena katāya pavāraṇāya deve vassante udakasaṅgahe
udakacikkhalle okapuṇṇehi cīvarehi kilantarūpā addhānaṁ āgatāti.

[96] Athakho bhagavā etasmiṁ nidāne etasmiṁ pakaraṇe dhammiṁ
kathaṁ katvā bhikkhū āmantesi anujānāmi bhikkhave vassaṁ vutthānaṁ
bhikkhūnaṁ kaṭhinaṁ attharituṁ. Atthatakaṭhinānaṁ vo bhikkhave pañca
kappissanti anāmantacāro asamādānacāro gaṇabhojanaṁ yāvadatthacīvaraṁ
yo ca tattha cīvaruppādo so nesaṁ bhavissatīti.
Atthatakaṭhinānaṁ vo bhikkhave imāni pañca kappissanti. Evañca
pana bhikkhave kaṭhinaṁ attharitabbaṁ. Byattena bhikkhunā paṭibalena
saṅgho ñāpetabbo suṇātu me bhante saṅgho idaṁ saṅghassa
kaṭhinadussaṁ uppannaṁ. Yadi saṅghassa pattakallaṁ saṅgho imaṁ
kaṭhinadussaṁ itthannāmassa bhikkhuno dadeyya kaṭhinaṁ attharituṁ. Esā
ñatti. Suṇātu me bhante saṅgho idaṁ saṅghassa kaṭhinadussaṁ
uppannaṁ. Saṅgho imaṁ kaṭhinadussaṁ itthannāmassa bhikkhuno deti
Kaṭhinaṁ attharituṁ. Yassāyasmato khamati imassa kaṭhinadussassa
itthannāmassa bhikkhuno dānaṁ kaṭhinaṁ attharituṁ so tuṇhassa yassa
nakkhamati so bhāseyya. Dinnaṁ idaṁ saṅghena kaṭhinadussaṁ
itthannāmassa bhikkhuno kaṭhinaṁ attharituṁ. Khamati saṅghassa tasmā
tuṇhī. Evametaṁ dhārayāmīti.
Evaṁ kho bhikkhave atthataṁ hoti kaṭhinaṁ evaṁ anatthataṁ

[97] Kathañca bhikkhave anatthataṁ hoti kaṭhinaṁ. Na
ullikhitamattena atthataṁ hoti kaṭhinaṁ. Na dhovanamattena atthataṁ hoti
kaṭhinaṁ. Na cīvaravicāraṇamattena atthataṁ hoti kaṭhinaṁ. Na
chedanamattena atthataṁ hoti kaṭhinaṁ. Na bandhanamattena atthataṁ hoti
kaṭhinaṁ. Na ovaṭṭikakaraṇamattena atthataṁ hoti kaṭhinaṁ. Na
kaṇḍasakaraṇamattena atthataṁ hoti kaṭhinaṁ. Na daḷhīkammakaraṇamattena
atthataṁ hoti kaṭhinaṁ. Na anuvātakaraṇamattena atthataṁ hoti
kaṭhinaṁ. Na paribhaṇḍakaraṇamattena atthataṁ hoti kaṭhinaṁ. Na
ovaṭṭeyyakaraṇamattena 1 atthataṁ hoti kaṭhinaṁ. Na kambalamaddanamattena
atthataṁ hoti kaṭhinaṁ. Na nimittakatena atthataṁ hoti kaṭhinaṁ.
Na parikathākatena atthataṁ hoti kaṭhinaṁ. Na kukkukatena atthataṁ
hoti kaṭhinaṁ. Na sannidhikatena atthataṁ hoti kaṭhinaṁ.
Na nissaggiyena atthataṁ hoti kaṭhinaṁ. Na akappakatena atthataṁ hoti
1 Sī. Yu. ovaddheyyakaraṇamattena. Ma. ovadeyyakaraṇamattena.
Kaṭhinaṁ. Na aññatra saṅghāṭiyā atthataṁ hoti kaṭhinaṁ. Na
aññatra uttarāsaṅgena atthataṁ hoti kaṭhinaṁ. Na aññatra
antaravāsakena atthataṁ hoti kaṭhinaṁ. Na aññatra pañcakena vā
atirekapañcakena vā tadaheva sañchinnena samaṇḍalīkatena atthataṁ
hoti kaṭhinaṁ. Na 1 aññatra puggalassa atthārā atthataṁ hoti
kaṭhinaṁ. Na sammā ceva atthataṁ hoti kaṭhinaṁ. Tañce nissīmaṭṭho
anumodati evaṁpi anatthataṁ hoti kaṭhinaṁ. Evaṁ kho bhikkhave
anatthataṁ hoti kaṭhinaṁ.

[98] Kathañca bhikkhave atthataṁ hoti kaṭhinaṁ. Ahatena atthataṁ
hoti kaṭhinaṁ. Ahatakappena atthataṁ hoti kaṭhinaṁ. Pilotikāya
atthataṁ hoti kaṭhinaṁ. Paṁsukūlena atthataṁ hoti kaṭhinaṁ. Pāpaṇikena
atthataṁ hoti kaṭhinaṁ. Animittakatena atthataṁ hoti kaṭhinaṁ.
Aparikathākatena atthataṁ hoti kaṭhinaṁ. Akukkukatena atthataṁ hoti
kaṭhinaṁ. Asannidhikatena atthataṁ hoti kaṭhinaṁ. Anissaggiyena atthataṁ
hoti kaṭhinaṁ. Kappakatena atthataṁ hoti kaṭhinaṁ. Saṅghāṭiyā
atthataṁ hoti kaṭhinaṁ. Uttarāsaṅgena atthataṁ hoti kaṭhinaṁ.
Antaravāsakena atthataṁ hoti kaṭhinaṁ. Pañcakena vā atirekapañcakena
vā tadaheva sañchinnena samaṇḍalīkatena atthataṁ hoti kaṭhinaṁ.
Puggalassa atthārā atthataṁ hoti kaṭhinaṁ. Sammā ceva atthataṁ
hoti kaṭhinaṁ. Tañce sīmaṭṭho anumodati evaṁpi atthataṁ
1 Ma. Yu. nasaddo natthi.
Hoti kaṭhinaṁ. Evaṁ kho bhikkhave atthataṁ hoti kaṭhinaṁ.

[99] Kathañca bhikkhave ubbhataṁ hoti kaṭhinaṁ. Aṭṭhimā bhikkhave
mātikā kaṭhinassa ubbhārāya pakkamanantikā niṭṭhānantikā
sanniṭṭhānantikā nāsanantikā savanantikā āsāvacchedikā
sīmātikkantikā sahubbhārāti.

[100] Bhikkhu atthatakaṭhino katacīvaraṁ ādāya pakkamati na
paccessanti. Tassa bhikkhuno pakkamanantiko kaṭhinuddhāro.
Bhikkhu atthatakaṭhino cīvaraṁ ādāya pakkamati. Tassa bahisīmagatassa
evaṁ hoti idhevimaṁ cīvaraṁ kāressaṁ na paccessanti. So taṁ
cīvaraṁ kāreti. Tassa bhikkhuno niṭṭhānantiko kaṭhinuddhāro.
Bhikkhu atthatakaṭhino cīvaraṁ ādāya pakkamati. Tassa bahisīmagatassa
evaṁ hoti nevimaṁ cīvaraṁ kāressaṁ na paccessanti. Tassa
bhikkhuno sanniṭṭhānantiko kaṭhinuddhāro. Bhikkhu atthatakaṭhino cīvaraṁ
ādāya pakkamati. Tassa bahisīmagatassa evaṁ hoti idhevimaṁ
cīvaraṁ kāressaṁ na paccessanti. So taṁ cīvaraṁ kāreti. Tassa
taṁ cīvaraṁ kayiramānaṁ nassati. Tassa bhikkhuno nāsanantiko
kaṭhinuddhāro. Bhikkhu atthatakaṭhino cīvaraṁ ādāya pakkamati
paccessanti. So bahisīmagato taṁ cīvaraṁ kāreti. So katacīvaro
suṇāti ubbhataṁ kira tasmiṁ āvāse kaṭhinanti. Tassa bhikkhuno
savanantiko kaṭhinuddhāro. Bhikkhu atthatakaṭhino cīvaraṁ ādāya pakkamati
Paccessanti. So bahisīmagato taṁ cīvaraṁ kāreti. So katacīvaro
paccessaṁ paccessanti bahiddhā kaṭhinuddhāraṁ vītināmeti. Tassa
bhikkhuno sīmātikkantiko kaṭhinuddhāro. Bhikkhu atthatakaṭhino cīvaraṁ
ādāya pakkamati paccessanti. So bahisīmagato taṁ cīvaraṁ
kāreti. So katacīvaro paccessaṁ paccessanti sambhuṇāti
kaṭhinuddhāraṁ. Tassa bhikkhuno saha bhikkhūhi kaṭhinuddhāro.
Ādāyasattakaṁ niṭṭhitaṁ paṭhamaṁ.

[101] Bhikkhu atthatakaṭhino katacīvaraṁ samādāya pakkamati na
paccessanti. Tassa bhikkhuno pakkamanantiko kaṭhinuddhāro.
Bhikkhu atthatakaṭhino cīvaraṁ samādāya pakkamati. Tassa bahisīmagatassa
evaṁ hoti idhevimaṁ cīvaraṁ kāressaṁ na paccessanti. So taṁ
cīvaraṁ kāreti. Tassa bhikkhuno niṭṭhānantiko kaṭhinuddhāro.
Bhikkhu atthatakaṭhino cīvaraṁ samādāya pakkamati. Tassa bahisīmagatassa
evaṁ hoti nevimaṁ cīvaraṁ kāressaṁ na paccessanti. Tassa
bhikkhuno sanniṭṭhānantiko kaṭhinuddhāro. Bhikkhu atthatakaṭhino
cīvaraṁ samādāya pakkamati. Tassa bahisīmagatassa evaṁ hoti idhevimaṁ
cīvaraṁ kāressaṁ na paccessanti. So taṁ cīvaraṁ kāreti. Tassa
bhikkhuno taṁ cīvaraṁ kayiramānaṁ nassati. Tassa bhikkhuno nāsanantiko
kaṭhinuddhāro. Bhikkhu atthatakaṭhino cīvaraṁ samādāya pakkamati
paccessanti. So bahisīmagato taṁ cīvaraṁ kāreti. So katacīvaro
Suṇāti ubbhataṁ kira tasmiṁ āvāse kaṭhinanti. Tassa bhikkhuno
savanantiko kaṭhinuddhāro. Bhikkhu atthatakaṭhino cīvaraṁ samādāya
pakkamati paccessanti. So bahisīmagato taṁ cīvaraṁ kāreti.
So katacīvaro paccessaṁ paccessanti bahiddhā kaṭhinuddhāraṁ
vītināmeti. Tassa bhikkhuno sīmātikkantiko kaṭhinuddhāro. Bhikkhu
atthatakaṭhino cīvaraṁ samādāya pakkamati paccessanti. So
bahisīmagato taṁ cīvaraṁ kāreti. So katacīvaro paccessaṁ paccessanti
sambhuṇāti kaṭhinuddhāraṁ. Tassa bhikkhuno saha bhikkhūhi kaṭhinuddhāro.
Samādāyasattakaṁ niṭṭhitaṁ dutiyaṁ.