[660] Katamantaṁ rūpaṁ cakkhundriyaṁ yaṁ cakkhuṁ catunnaṁ mahābhūtānaṁ
upādāya pasādo .pe. Suñño gāmopeso idantaṁ rūpaṁ
Cakkhundriyaṁ. Katamantaṁ rūpaṁ sotindriyaṁ .pe. Ghānindriyaṁ .pe.
Jivhindriyaṁ .pe. Kāyindriyaṁ .pe. Itthindriyaṁ .pe.
Purisindriyaṁ .pe. Jīvitindriyaṁ yo tesaṁ rūpīnaṁ dhammānaṁ āyu ṭhiti
yapanā yāpanā iriyanā vattanā pālanā jīvitaṁ jīvitindriyaṁ idantaṁ rūpaṁ
jīvitindriyaṁ. Katamantaṁ rūpaṁ na indriyaṁ rūpāyatanaṁ .pe. Kabaḷiṁkāro
āhāro idantaṁ rūpaṁ na indriyaṁ. Evaṁ navavidhena rūpasaṅgaho.
Navakaṁ.

[661] Katamantaṁ rūpaṁ cakkhundriyaṁ yaṁ cakkhuṁ catunnaṁ mahābhūtānaṁ
upādāya pasādo .pe. Suñño gāmopeso idantaṁ rūpaṁ
cakkhundriyaṁ. Katamantaṁ rūpaṁ sotindriyaṁ .pe. Ghānindriyaṁ .pe.
Jivhindriyaṁ .pe. Kāyindriyaṁ .pe. Itthindriyaṁ .pe. Purisindriyaṁ
.pe. Jīvitindriyaṁ yo tesaṁ rūpīnaṁ dhammānaṁ āyu ṭhiti yapanā
yāpanā iriyanā vattanā pālanā jīvitaṁ jīvitindriyaṁ idantaṁ rūpaṁ
jīvitindriyaṁ. Katamantaṁ rūpaṁ na indriyaṁ sappaṭighaṁ rūpāyatanaṁ .pe.
Phoṭṭhabbāyatanaṁ idantaṁ rūpaṁ na indriyaṁ sappaṭighaṁ. Katamantaṁ rūpaṁ
na indriyaṁ appaṭighaṁ kāyaviññatti .pe. Kabaḷiṁkāro āhāro
idantaṁ rūpaṁ na indriyaṁ appaṭighaṁ. Evaṁ dasavidhena rūpasaṅgaho.
Dasakaṁ.

[662] Katamantaṁ rūpaṁ cakkhāyatanaṁ yaṁ cakkhuṁ catunnaṁ mahābhūtānaṁ
upādāya pasādo .pe. Suñño gāmopeso idantaṁ rūpaṁ
Cakkhāyatanaṁ. Katamantaṁ rūpaṁ sotāyatanaṁ .pe. Ghānāyatanaṁ .pe.
Jivhāyatanaṁ .pe. Kāyāyatanaṁ .pe. Rūpāyatanaṁ .pe. Saddāyatanaṁ
.pe. Gandhāyatanaṁ .pe. Rasāyatanaṁ .pe. Phoṭṭhabbāyatanaṁ
paṭhavīdhātu .pe. Phoṭṭhabbadhātupesā idantaṁ rūpaṁ phoṭṭhabbāyatanaṁ.
Katamantaṁ rūpaṁ anidassanaṁ appaṭighaṁ dhammāyatanapariyāpannaṁ itthindriyaṁ
.pe. Kabaḷiṁkāro āhāro idantaṁ rūpaṁ anidassanaṁ appaṭighaṁ
dhammāyatanapariyāpannaṁ. Evaṁ ekādasavidhena rūpasaṅgaho.
Ekādasakaṁ.
Rūpavibhatti.
Aṭṭhamaṁ bhāṇavāraṁ 1 .
--------
1 rūpakaṇḍe dutiyaṁ bhavitabbaṁ. atirekachabhāṇavāraṁ cittuppādakaṇḍaṁ
atirekadvibhāṇavāraṁ rūpakaṇḍaṁ timattabhāṇavāraṁ nikkhepakaṇḍaṁ dvimattabhāṇavāraṁ
atthuddhārakaṇḍaṁ iti atirekaterasamattabhāṇavāraṁ sakalaṁ dhammasaṅgaṇippakaraṇaṁ
vitthāriyamānaṁ anantaparimāṇaṁ hotīti aṭṭhasāliniyaṁ nayo. iminā pana nayena
kusaladhamme dve akusaladhamme dveabyākate cittasaṅgahe dveti
cittuppādakaṇḍe cha idha dveti aṭṭha bhāṇavārā daṭṭhabbā. iti cittuppādakaṇḍe
bhāṇavārato sambandhagaṇanāya idheva aṭṭhamaṁ hoti.
Nikkhepakaṇḍaṁ

[663] Katame dhammā kusalā tīṇi kusalamūlāni alobho adoso
amoho taṁsampayutto vedanākkhandho saññākkhandho saṅkhārakkhandho
viññāṇakkhandho taṁsamuṭṭhānaṁ kāyakammaṁ vacīkammaṁ manokammaṁ ime
dhammā kusalā. Katame dhammā akusalā tīṇi akusalamūlāni lobho
doso moho tadekaṭṭhā ca kilesā taṁsampayutto vedanākkhandho
saññākkhandho saṅkhārakkhandho viññāṇakkhandho taṁsamuṭṭhānaṁ kāyakammaṁ
vacīkammaṁ manokammaṁ ime dhammā akusalā. Katame dhammā
abyākatā kusalākusalānaṁ dhammānaṁ vipākā kāmāvacarā rūpāvacarā
arūpāvacarā apariyāpannā vedanākkhandho saññākkhandho saṅkhārakkhandho
viññāṇakkhandho ye ca dhammā kiriyā neva kusalā
nākusalā na ca kammavipākā sabbañca rūpaṁ asaṅkhatā ca dhātu
ime dhammā abyākatā.

[664] Katame dhammā sukhāyavedanāyasampayuttā sukhabhūmiyaṁ
kāmāvacare rūpāvacare apariyāpanne sukhaṁ vedanaṁ ṭhapetvā taṁsampayutto
saññākkhandho saṅkhārakkhandho viññāṇakkhandho ime dhammā
sukhāyavedanāyasampayuttā. Katame dhammā dukkhāyavedanāyasampayuttā
dukkhabhūmiyaṁ kāmāvacare dukkhaṁ vedanaṁ ṭhapetvā taṁsampayutto saññākkhandho
saṅkhārakkhandho viññāṇakkhandho ime dhammā dukkhāyavedanāyasampayuttā.
Katame dhammā adukkhamasukhāyavedanāyasampayuttā
adukkhamasukhabhūmiyaṁ kāmāvacare rūpāvacare arūpāvacare apariyāpanne
adukkhamasukhaṁ vedanaṁ ṭhapetvā taṁsampayutto saññākkhandho saṅkhārakkhandho
viññāṇakkhandho ime dhammā adukkhamasukhāyavedanāyasampayuttā.

[665] Katame dhammā vipākā kusalākusalānaṁ dhammānaṁ vipākā
kāmāvacarā rūpāvacarā arūpāvacarā apariyāpannā vedanākkhandho
saññākkhandho saṅkhārakkhandho viññāṇakkhandho ime dhammā
vipākā. Katame dhammā vipākadhammadhammā kusalākusalā dhammā
kāmāvacarā rūpāvacarā arūpāvacarā apariyāpannā vedanākkhandho
.pe. Viññāṇakkhandho ime dhammā vipākadhammadhammā. Katame
dhammā nevavipākanavipākadhammadhammā ye ca dhammā kiriyā neva
kusalā nākusalā na ca kammavipākā sabbañca rūpaṁ asaṅkhatā ca
dhātu ime dhammā nevavipākanavipākadhammadhammā.

[666] Katame dhammā upādinnupādāniyā sāsavā kusalākusalānaṁ
dhammānaṁ vipākā kāmāvacarā rūpāvacarā arūpāvacarā
vedanākkhandho .pe. Viññāṇakkhandho yañca rūpaṁ kammassa
katattā ime dhammā upādinnupādāniyā. Katame dhammā
anupādinnupādāniyā sāsavā kusalākusalā dhammā kāmāvacarā rūpāvacarā
arūpāvacarā vedanākkhandho .pe. Viññāṇakkhandho ye ca dhammā
kiriyā neva kusalā nākusalā na ca kammavipākā yañca rūpaṁ.
Kammassa katattā ime dhammā anupādinnupādāniyā. Katame
dhammā anupādinnānupādāniyā apariyāpannā maggā ca maggaphalānica
asaṅkhatā ca dhātu ime dhammā anupādinnānupādāniyā.

[667] Katame dhammā saṅkiliṭṭhasaṅkilesikā tīṇi akusalamūlāni
lobho doso moho tadekaṭṭhā ca kilesā taṁsampayutto vedanākkhandho
.pe. Viññāṇakkhandho taṁsamuṭṭhānaṁ kāyakammaṁ vacīkammaṁ
manokammaṁ ime dhammā saṅkiliṭṭhasaṅkilesikā. Katame dhammā
asaṅkiliṭṭhasaṅkilesikā sāsavā kusalābyākatā dhammā kāmāvacarā
rūpāvacarā arūpāvacarā rūpakkhandho vedanākkhandho saññākkhandho
saṅkhārakkhandho viññāṇakkhandho ime dhammā asaṅkiliṭṭhasaṅkilesikā.
Katame dhammā asaṅkiliṭṭhāsaṅkilesikā apariyāpannā
maggā ca maggaphalāni ca asaṅkhatā ca dhātu ime dhammā
asaṅkiliṭṭhāsaṅkilesikā.

[668] Katame dhammā savitakkasavicārā savitakkasavicārabhūmiyaṁ
kāmāvacare rūpāvacare apariyāpanne vitakkavicāre ṭhapetvā taṁsampayutto
vedanākkhandho .pe. Viññāṇakkhandho ime dhammā
savitakkasavicārā. Katame dhammā avitakkavicāramattā avitakkavicāramattabhūmiyaṁ
rūpāvacare apariyāpanne vicāraṁ ṭhapetvā taṁsampayutto
vedanākkhandho .pe. Viññāṇakkhandho ime dhammā avitakkavicāramattā.
Katame dhammā avitakkāvicārā avitakkāvicārabhūmiyaṁ kāmāvacare
Rūpāvacare arūpāvacare apariyāpanne vedanākkhandho .pe. Viññāṇakkhandho
sabbañca rūpaṁ asaṅkhatā ca dhātu ime dhammā avitakkāvicārā.

[669] Katame dhammā pītisahagatā pītibhūmiyaṁ kāmāvacare rūpāvacare
apariyāpanne pītiṁ ṭhapetvā taṁsampayutto vedanākkhandho
.pe. Viññāṇakkhandho ime dhammā pītisahagatā. Katame dhammā
sukhasahagatā sukhabhūmiyaṁ kāmāvacare rūpāvacare apariyāpanne sukhaṁ
ṭhapetvā taṁsampayutto saññākkhandho saṅkhārakkhandho viññāṇakkhandho
ime dhammā sukhasahagatā. Katame dhammā upekkhāsahagatā
upekkhābhūmiyaṁ kāmāvacare rūpāvacare arūpāvacare apariyāpanne
upekkhaṁ ṭhapetvā taṁsampayutto saññākkhandho saṅkhārakkhandho
viññāṇakkhandho ime dhammā upekkhāsahagatā.