[650] Katamantaṁ rūpaṁ sappaṭighaṁ mahābhūtaṁ phoṭṭhabbāyatanaṁ
idantaṁ rūpaṁ sappaṭighaṁ mahābhūtaṁ. Katamantaṁ rūpaṁ sappaṭighaṁ namahābhūtaṁ
cakkhāyatanaṁ .pe. Rasāyatanaṁ idantaṁ rūpaṁ sappaṭighaṁ namahābhūtaṁ.
Katamantaṁ rūpaṁ appaṭighaṁ mahābhūtaṁ āpodhātu idantaṁ rūpaṁ appaṭighaṁ
mahābhūtaṁ. Katamantaṁ rūpaṁ appaṭighaṁ namahābhūtaṁ itthindriyaṁ .pe.
Kabaḷiṁkāro āhāro idantaṁ rūpaṁ appaṭighaṁ namahābhūtaṁ.

[651] Katamantaṁ rūpaṁ indriyaṁ oḷārikaṁ cakkhundriyaṁ .pe.
Kāyindriyaṁ idantaṁ rūpaṁ indriyaṁ oḷārikaṁ. Katamantaṁ rūpaṁ
indriyaṁ sukhumaṁ itthindriyaṁ purisindriyaṁ jīvitindriyaṁ idantaṁ rūpaṁ
Indriyaṁ sukhumaṁ. Katamantaṁ rūpaṁ naindriyaṁ oḷārikaṁ rūpāyatanaṁ
.pe. Phoṭṭhabbāyatanaṁ idantaṁ rūpaṁ naindriyaṁ oḷārikaṁ. Katamantaṁ
rūpaṁ naindriyaṁ sukhumaṁ kāyaviññatti .pe. Kabaḷiṁkāro āhāro
idantaṁ rūpaṁ naindriyaṁ sukhumaṁ.

[652] Katamantaṁ rūpaṁ indriyaṁ dūre itthindriyaṁ purisindriyaṁ
jīvitindriyaṁ idantaṁ rūpaṁ indriyaṁ dūre. Katamantaṁ rūpaṁ indriyaṁ
santike cakkhundriyaṁ .pe. Kāyindriyaṁ idantaṁ rūpaṁ indriyaṁ
santike. Katamantaṁ rūpaṁ naindriyaṁ dūre kāyaviññatti .pe.
Kabaḷiṁkāro āhāro idantaṁ rūpaṁ naindriyaṁ dūre. Katamantaṁ
rūpaṁ naindriyaṁ santike rūpāyatanaṁ .pe. Phoṭṭhabbāyatanaṁ idantaṁ
rūpaṁ naindriyaṁ santike.

[653] Katamantaṁ rūpaṁ mahābhūtaṁ oḷārikaṁ phoṭṭhabbāyatanaṁ
idantaṁ rūpaṁ mahābhūtaṁ oḷārikaṁ. Katamantaṁ rūpaṁ mahābhūtaṁ sukhumaṁ
āpodhātu idantaṁ rūpaṁ mahābhūtaṁ sukhumaṁ. Katamantaṁ rūpaṁ namahābhūtaṁ
oḷārikaṁ cakkhāyatanaṁ .pe. Rasāyatanaṁ idantaṁ rūpaṁ namahābhūtaṁ
oḷārikaṁ. Katamantaṁ rūpaṁ namahābhūtaṁ sukhumaṁ itthindriyaṁ .pe.
Kabaḷiṁkāro āhāro idantaṁ rūpaṁ namahābhūtaṁ sukhumaṁ.

[654] Katamantaṁ rūpaṁ mahābhūtaṁ dūre āpodhātu idantaṁ rūpaṁ
mahābhūtaṁ dūre. Katamantaṁ rūpaṁ mahābhūtaṁ santike phoṭṭhabbāyatanaṁ
idantaṁ rūpaṁ mahābhūtaṁ santike. Katamantaṁ rūpaṁ namahābhūtaṁ dūre
Itthindriyaṁ .pe. Kabaḷiṁkāro āhāro idantaṁ rūpaṁ namahābhūtaṁ
dūre. Katamantaṁ rūpaṁ namahābhūtaṁ santike cakkhāyatanaṁ .pe.
Rasāyatanaṁ idantaṁ rūpaṁ namahābhūtaṁ santike.

[655] Rūpāyatanaṁ diṭṭhaṁ saddāyatanaṁ sutaṁ gandhāyatanaṁ rasāyatanaṁ
phoṭṭhabbāyatanaṁ mutaṁ sabbaṁ rūpaṁ manasā viññātaṁ rūpaṁ.
Evaṁ catubbidhena rūpasaṅgaho.
Catukkaṁ.

[656] Katamantaṁ rūpaṁ paṭhavīdhātu yaṁ kakkhaḷaṁ kharagataṁ kakkhaḷattaṁ
kakkhaḷabhāvo ajjhattaṁ vā bahiddhā vā upādinnaṁ vā anupādinnaṁ
vā idantaṁ rūpaṁ paṭhavīdhātu. Katamantaṁ rūpaṁ āpodhātu yaṁ āpo
āpogataṁ sineho sinehagataṁ bandhanattaṁ rūpassa ajjhattaṁ vā bahiddhā
vā upādinnaṁ vā anupādinnaṁ vā idantaṁ rūpaṁ āpodhātu.
Katamantaṁ rūpaṁ tejodhātu yaṁ tejo tejogataṁ usmā usmāgataṁ usumaṁ
usumagataṁ ajjhattaṁ vā bahiddhā vā upādinnaṁ vā anupādinnaṁ vā
idantaṁ rūpaṁ tejodhātu. Katamantaṁ rūpaṁ vāyodhātu yaṁ vāyo
vāyogataṁ thambhitattaṁ rūpassa ajjhattaṁ vā bahiddhā vā upādinnaṁ
vā anupādinnaṁ vā idantaṁ rūpaṁ vāyodhātu. Katamantaṁ rūpaṁ
upādā cakkhāyatanaṁ .pe. Kabaḷiṁkāro āhāro idantaṁ rūpaṁ
upādā. Evaṁ pañcavidhena rūpasaṅgaho.
Pañcakaṁ.

[657] Rūpāyatanaṁ cakkhuviññeyyaṁ rūpaṁ saddāyatanaṁ sotaviññeyyaṁ
rūpaṁ gandhāyatanaṁ ghānaviññeyyaṁ rūpaṁ rasāyatanaṁ jivhāviññeyyaṁ
rūpaṁ phoṭṭhabbāyatanaṁ kāyaviññeyyaṁ rūpaṁ sabbaṁ rūpaṁ
manoviññeyyaṁ rūpaṁ. Evaṁ chabbidhena rūpasaṅgaho.
Chakkaṁ.

[658] Rūpāyatanaṁ cakkhuviññeyyaṁ rūpaṁ saddāyatanaṁ sotaviññeyyaṁ
rūpaṁ gandhāyatanaṁ ghānaviññeyyaṁ rūpaṁ rasāyatanaṁ jivhāviññeyyaṁ
rūpaṁ phoṭṭhabbāyatanaṁ kāyaviññeyyaṁ rūpaṁ rūpāyatanaṁ saddāyatanaṁ
gandhāyatanaṁ rasāyatanaṁ phoṭṭhabbāyatanaṁ manodhātuviññeyyaṁ rūpaṁ sabbaṁ
rūpaṁ manoviññāṇadhātuviññeyyaṁ rūpaṁ. Evaṁ sattavidhena rūpasaṅgaho.
Sattakaṁ.

[659] Rūpāyatanaṁ cakkhuviññeyyaṁ rūpaṁ saddāyatanaṁ sotaviññeyyaṁ
rūpaṁ gandhāyatanaṁ ghānaviññeyyaṁ rūpaṁ rasāyatanaṁ jivhāviññeyyaṁ rūpaṁ
manāpiyo phoṭṭhabbo sukhasamphasso kāyaviññeyyaṁ rūpaṁ amanāpiyo
phoṭṭhabbo dukkhasamphasso kāyaviññeyyaṁ rūpaṁ rūpāyatanaṁ saddāyatanaṁ
gandhāyatanaṁ rasāyatanaṁ phoṭṭhabbāyatanaṁ manodhātuviññeyyaṁ rūpaṁ sabbaṁ
rūpaṁ manoviññāṇadhātuviññeyyaṁ rūpaṁ. Evaṁ aṭṭhavidhena rūpasaṅgaho.
Aṭṭhakaṁ.