[245] Tena kho pana samayena chabbaggiyā bhikkhū sāpattikā
pavārenti. Bhagavato etamatthaṁ ārocesuṁ. Na bhikkhave sāpattikena
pavāretabbaṁ yo pavāreyya āpatti dukkaṭassa. Anujānāmi
bhikkhave yo sāpattiko pavāreti tassa okāsaṁ kārāpetvā
āpattiyā codetunti. Tena kho pana samayena chabbaggiyā bhikkhū
okāsaṁ kārāpiyamānā na icchanti okāsaṁ kātuṁ. Bhagavato
etamatthaṁ ārocesuṁ. Anujānāmi bhikkhave okāsaṁ akarontassa
pavāraṇaṁ ṭhapetuṁ 1 evañca pana bhikkhave ṭhapetabbā tadahupavāraṇāya
cātuddase vā paṇṇarase vā tasmiṁ puggale sammukhībhūte saṅghamajjhe
udāharitabbaṁ suṇātu me bhante saṅgho itthannāmo puggalo
1 Po. ṭhapetunti.
Sāpattiko pavāreti tassa pavāraṇaṁ ṭhapemi na tasmiṁ sammukhībhūte
pavāretabbanti. Ṭhapitā hoti pavāraṇāti. Tena kho pana samayena
chabbaggiyā bhikkhū puramhākaṁ pesalā bhikkhū pavāraṇaṁ ṭhapentīti
paṭikacceva suddhānaṁ bhikkhūnaṁ anāpattikānaṁ avatthusmiṁ akāraṇe
pavāraṇaṁ ṭhapenti pavāritānampi pavāraṇaṁ ṭhapenti. Bhagavato
etamatthaṁ ārocesuṁ. Na bhikkhave suddhānaṁ bhikkhūnaṁ anāpattikānaṁ
avatthusmiṁ akāraṇe pavāraṇā ṭhapetabbā yo ṭhapeyya āpatti
dukkaṭassa. Na ca 1 bhikkhave pavāritānampi pavāraṇā ṭhapetabbā
yo ṭhapeyya āpatti dukkaṭassa.

[246] Evaṁ kho bhikkhave ṭhapitā hoti pavāraṇā evaṁ
aṭṭhapitā. Kathañca bhikkhave aṭṭhapitā hoti pavāraṇā. Tevācikāya
ce bhikkhave pavāraṇāya bhāsitāya lapitāya pariyositāya pavāraṇaṁ
ṭhapeti aṭṭhapitā hoti pavāraṇā dvevācikāya ce bhikkhave
ekavācikāya ce bhikkhave samānavassikāya ce bhikkhave pavāraṇāya
bhāsitāya lapitāya pariyositāya pavāraṇaṁ ṭhapeti aṭṭhapitā hoti
pavāraṇā. Evaṁ kho bhikkhave aṭṭhapitā hoti pavāraṇā.
Kathañca bhikkhave ṭhapitā hoti pavāraṇā. Tevācikāya ce bhikkhave
pavāraṇāya bhāsitāya lapitāya apariyositāya pavāraṇaṁ ṭhapeti ṭhapitā
hoti pavāraṇā. Dvevācikāya ce bhikkhave ekavācikāya ce
bhikkhave samānavassikāya ce bhikkhave pavāraṇāya bhāsitāya lapitāya
1 Ma. Yu. casaddo natthi.
Apariyositāya pavāraṇaṁ ṭhapeti ṭhapitā hoti pavāraṇā. Evaṁ
kho bhikkhave ṭhapitā hoti pavāraṇā.

[247] Idha pana bhikkhave tadahupavāraṇāya bhikkhu bhikkhussa pavāraṇaṁ
ṭhapeti. Tañce bhikkhuṁ aññe bhikkhū jānanti ayaṁ kho āyasmā
aparisuddhakāyasamācāro aparisuddhavacīsamācāro aparisuddhāajīvo
bālo abyatto na paṭibalo anuyuñjiyamāno anuyogaṁ dātunti.
Alaṁ bhikkhu mā bhaṇḍanaṁ mā kalahaṁ mā viggahaṁ mā vivādanti
omadditvā saṅghena pavāretabbaṁ. Idha pana bhikkhave tadahupavāraṇāya
bhikkhu bhikkhussa pavāraṇaṁ ṭhapeti. Tañce bhikkhuṁ aññe bhikkhū
jānanti ayaṁ kho āyasmā parisuddhakāyasamācāro aparisuddhavacīsamācāro
aparisuddhāajīvo bālo abyatto na paṭibalo anuyuñjiyamāno
anuyogaṁ dātunti. Alaṁ bhikkhu mā bhaṇḍanaṁ mā
kalahaṁ mā viggahaṁ mā vivādanti omadditvā saṅghena pavāretabbaṁ.
Idha pana bhikkhave tadahupavāraṇāya bhikkhu bhikkhussa pavāraṇaṁ ṭhapeti.
Tañce bhikkhuṁ aññe bhikkhū jānanti ayaṁ kho āyasmā parisuddhakāyasamācāro
parisuddhavacīsamācāro aparisuddhāajīvo bālo abyatto
na paṭibalo anuyuñjiyamāno anuyogaṁ dātunti. Alaṁ bhikkhu mā
bhaṇḍanaṁ mā kalahaṁ mā viggahaṁ mā vivādanti omadditvā saṅghena
pavāretabbaṁ. Idha pana bhikkhave tadahupavāraṇāya bhikkhussa pavāraṇaṁ
ṭhapeti. Tañce bhikkhuṁ aññe bhikkhū jānanti ayaṁ kho āyasmā
Parisuddhakāyasamācāro parisuddhavacīsamācāro parisuddhāajīvo bālo
abyatto na paṭibalo anuyuñjiyamāno anuyogaṁ dātunti. Alaṁ bhikkhu
mā bhaṇḍanaṁ mā kalahaṁ mā viggahaṁ mā vivādanti omadditvā saṅghena
pavāretabbaṁ. Idha pana bhikkhave tadahupavāraṇāya bhikkhu bhikkhussa
pavāraṇaṁ ṭhapeti. Tañce bhikkhuṁ aññe bhikkhū jānanti ayaṁ
kho āyasmā parisuddhakāyasamācāro parisuddhavacīsamācāro parisuddhāajīvo
paṇḍito byatto medhāvī paṭibalo anuyuñjiyamāno anuyogaṁ
dātunti. So evamassa vacanīyo yaṁ kho tvaṁ āvuso imassa
bhikkhuno pavāraṇaṁ ṭhapesi kimhi naṁ ṭhapesi sīlavipattiyā [1]- ṭhapesi
ācāravipattiyā [2]- ṭhapesi diṭṭhivipattiyā [3]- ṭhapesīti. So ce evaṁ
vadeyya sīlavipattiyā [4]- ṭhapemi ācāravipattiyā ṭhapemi diṭṭhivipattiyā
ṭhapemīti. So evamassa vacanīyo jānāti panāyasmā
sīlavipattiṁ jānāti ācāravipattiṁ jānāti diṭṭhivipattinti. So
ce evaṁ vadeyya jānāmi kho ahaṁ āvuso sīlavipattiṁ jānāmi
ācāravipattiṁ jānāmi diṭṭhivipattinti. So evamassa vacanīyo
katamā panāvuso sīlavipatti katamā ācāravipatti katamā
diṭṭhivipattīti. So ce evaṁ vadeyya cattāri pārājikāni terasa
saṅghādisesā ayaṁ sīlavipatti thullaccayaṁ pācittiyaṁ pāṭidesanīyaṁ
dukkaṭaṁ dubbhāsitaṁ ayaṁ ācāravipatti micchādiṭṭhi antaggāhikā
diṭṭhi ayaṁ diṭṭhivipattīti. So evamassa vacanīyo yaṁ kho
1-2-3 Ma. vā. 4 Ma. evamupari.
Tvaṁ āvuso imassa bhikkhuno pavāraṇaṁ ṭhapesi diṭṭhena ṭhapesi
sutena ṭhapesi parisaṅkāya ṭhapesīti. So ce evaṁ vadeyya
diṭṭhena vā ṭhapemi sutena vā ṭhapemi parisaṅkāya vā ṭhapemīti.
So evamassa vacanīyo yaṁ kho tvaṁ āvuso imassa bhikkhuno
diṭṭhena pavāraṇaṁ ṭhapesi kinte diṭṭhaṁ kinti te diṭṭhaṁ kadā
te diṭṭhaṁ kattha te diṭṭhaṁ pārājikaṁ ajjhāpajjanto diṭṭho
saṅghādisesaṁ ajjhāpajjanto diṭṭho thullaccayaṁ pācittiyaṁ pāṭidesanīyaṁ
dukkaṭaṁ dubbhāsitaṁ ajjhāpajjanto diṭṭho kattha ca tvaṁ
ahosi kattha cāyaṁ bhikkhu ahosi kiñci 1 tvaṁ karosi kiñcāyaṁ
bhikkhu karotīti. So ce evaṁ vadeyya na kho ahaṁ āvuso
imassa bhikkhuno diṭṭhena pavāraṇaṁ ṭhapemi apica sutena pavāraṇaṁ
ṭhapemīti. So evamassa vacanīyo yaṁ kho tvaṁ āvuso imassa
bhikkhuno sutena pavāraṇaṁ ṭhapesi kinte sutaṁ kinti te sutaṁ
kadā te sutaṁ kattha te sutaṁ pārājikaṁ ajjhāpannoti sutaṁ
saṅghādisesaṁ ajjhāpannoti sutaṁ thullaccayaṁ pācittiyaṁ pāṭidesanīyaṁ
dukkaṭaṁ dubbhāsitaṁ ajjhāpannoti sutaṁ bhikkhussa sutaṁ bhikkhuniyā
sutaṁ sikkhamānāya sutaṁ sāmaṇerassa sutaṁ sāmaṇeriyā sutaṁ
upāsakassa sutaṁ upāsikāya sutaṁ rājūnaṁ sutaṁ rājamahāmattānaṁ
sutaṁ titthiyānaṁ sutaṁ titthiyasāvakānaṁ sutanti. So ce evaṁ
vadeyya na kho ahaṁ āvuso imassa bhikkhuno sutena pavāraṇaṁ
1 Po. Ma. Yu. kiñca.
Ṭhapemi apica parisaṅkāya pavāraṇaṁ ṭhapemīti. So evamassa
vacanīyo yaṁ kho tvaṁ āvuso imassa bhikkhuno parisaṅkāya pavāraṇaṁ
ṭhapesi kiṁ parisaṅkasi kinti parisaṅkasi kadā parisaṅkasi kattha
parisaṅkasi pārājikaṁ ajjhāpannoti parisaṅkasi saṅghādisesaṁ ajjhāpannoti
parisaṅkasi thullaccayaṁ pācittiyaṁ pāṭidesanīyaṁ dukkaṭaṁ
dubbhāsitaṁ ajjhāpannoti parisaṅkasi bhikkhussa sutvā parisaṅkasi
bhikkhuniyā sutvā parisaṅkasi sikkhamānāya sutvā parisaṅkasi sāmaṇerassa
sutvā parisaṅkasi sāmaṇeriyā sutvā parisaṅkasi upāsakassa
sutvā parisaṅkasi upāsikāya sutvā parisaṅkasi rājūnaṁ sutvā
parisaṅkasi rājamahāmattānaṁ sutvā parisaṅkasi titthiyānaṁ sutvā
parisaṅkasi titthiyasāvakānaṁ sutvā parisaṅkasīti. So ce evaṁ
vadeyya na kho ahaṁ āvuso imassa bhikkhuno parisaṅkāya pavāraṇaṁ
ṭhapemi apica ahampi 1 na jānāmi kenapāhaṁ 2 imassa bhikkhuno
pavāraṇaṁ ṭhapemīti. So ce bhikkhave codako bhikkhu anuyogena
viññūnaṁ sabrahmacārīnaṁ cittaṁ na ārādheti ananuvādo cudito
bhikkhūti alaṁ vacanāya. So ce bhikkhave codako bhikkhu anuyogena
viññūnaṁ sabrahmacārīnaṁ cittaṁ ārādheti sānuvādo cudito bhikkhūti
alaṁ vacanāya. So ce bhikkhave codako bhikkhu amūlakena pārājikena
anuddhaṁsitaṁ paṭijānāti saṅghādisesaṁ āropetvā saṅghena pavāretabbaṁ.
1 Sī. Ma. Yu. ahaṁ. 2 Sī. Ma. Yu. kena ahaṁ. Sī. Ma. Yu. kenapahaṁ.
Sī. Ma. Yu. kena panāhaṁ.
So ce bhikkhave codako bhikkhu amūlakena saṅghādisesena anuddhaṁsitaṁ
paṭijānāti yathādhammaṁ kārāpetvā saṅghena pavāretabbaṁ. So
ce bhikkhave codako bhikkhu amūlakena thullaccayena pācittiyena
pāṭidesanīyena dukkaṭena dubbhāsitena anuddhaṁsitaṁ paṭijānāti
yathādhammaṁ kārāpetvā saṅghena pavāretabbaṁ. So ce bhikkhave cudito
bhikkhu pārājikaṁ ajjhāpannoti paṭijānāti nāsetvā saṅghena
pavāretabbaṁ. So ce bhikkhave cudito bhikkhu saṅghādisesaṁ
ajjhāpannoti paṭijānāti saṅghādisesaṁ āropetvā saṅghena
pavāretabbaṁ. So ce bhikkhave cudito bhikkhu thullaccayaṁ pācittiyaṁ
pāṭidesanīyaṁ dukkaṭaṁ dubbhāsitaṁ ajjhāpannoti paṭijānāti
yathādhammaṁ kārāpetvā saṅghena pavāretabbaṁ.

[248] Idha pana bhikkhave bhikkhu tadahupavāraṇāya thullaccayaṁ
ajjhāpanno hoti. Ekacce bhikkhū thullaccayadiṭṭhino honti
ekacce bhikkhū saṅghādisesadiṭṭhino honti. Ye te bhikkhave bhikkhū
thullaccayadiṭṭhino tehi so bhikkhave bhikkhu ekamantaṁ apanetvā
yathādhammaṁ kārāpetvā saṅghaṁ upasaṅkamitvā evamassa vacanīyo yaṁ
kho so āvuso bhikkhu āpattiṁ āpanno sāssa yathādhammaṁ
paṭikatā yadi saṅghassa pattakallaṁ saṅgho pavāreyyāti. Idha
pana bhikkhave bhikkhu tadahupavāraṇāya thullaccayaṁ ajjhāpanno hoti.
Ekacce bhikkhū thullaccayadiṭṭhino honti ekacce bhikkhū
Pācittiyadiṭṭhino honti ekacce bhikkhū thullaccayadiṭṭhino honti
ekacce bhikkhū pāṭidesanīyadiṭṭhino honti ekacce bhikkhū
thullaccayadiṭṭhino honti ekacce bhikkhū dukkaṭadiṭṭhino honti
ekacce bhikkhū thullaccayadiṭṭhino honti ekacce bhikkhū
dubbhāsitadiṭṭhino honti. Ye te bhikkhave bhikkhū thullaccayadiṭṭhino
tehi so bhikkhave bhikkhu ekamantaṁ apanetvā yathādhammaṁ kārāpetvā saṅghaṁ
upasaṅkamitvā evamassa vacanīyo yaṁ kho so āvuso bhikkhu āpattiṁ
āpanno sāssa yathādhammaṁ paṭikatā yadi saṅghassa pattakallaṁ
saṅgho pavāreyyāti. Idha pana bhikkhave bhikkhu tadahupavāraṇāya
pācittiyaṁ ajjhāpanno hoti pāṭidesanīyaṁ ajjhāpanno hoti
dukkaṭaṁ ajjhāpanno hoti dubbhāsitaṁ ajjhāpanno hoti.
Ekacce bhikkhū dubbhāsitadiṭṭhino honti ekacce bhikkhū
saṅghādisesadiṭṭhino honti. Ye te bhikkhave bhikkhū dubbhāsitadiṭṭhino
tehi so bhikkhave bhikkhu ekamantaṁ apanetvā yathādhammaṁ kārāpetvā
saṅghaṁ upasaṅkamitvā evamassa vacanīyo yaṁ kho so āvuso bhikkhu
āpattiṁ āpanno sāssa yathādhammaṁ paṭikatā yadi saṅghassa
pattakallaṁ saṅgho pavāreyyāti. Idha pana bhikkhave bhikkhu
tadahupavāraṇāya dubbhāsitaṁ ajjhāpanno hoti. Ekacce bhikkhū
dubbhāsitadiṭṭhino honti ekacce bhikkhū thullaccayadiṭṭhino honti
ekacce bhikkhū dubbhāsitadiṭṭhino honti ekacce bhikkhū pācittiyadiṭṭhino
Honti ekacce bhikkhū dubbhāsitadiṭṭhino honti ekacce
bhikkhū pāṭidesanīyadiṭṭhino honti ekacce bhikkhū dubbhāsitadiṭṭhino
honti ekacce bhikkhū dukkaṭadiṭṭhino honti. Ye te bhikkhave
bhikkhū dubbhāsitadiṭṭhino tehi so bhikkhave bhikkhu ekamantaṁ apanetvā
yathādhammaṁ kārāpetvā saṅghaṁ upasaṅkamitvā evamassa vacanīyo yaṁ
kho so āvuso bhikkhu āpattiṁ āpanno sāssa yathādhammaṁ
paṭikatā yadi saṅghassa pattakallaṁ saṅgho pavāreyyāti.

[249] Idha pana bhikkhave bhikkhu tadahupavāraṇāya saṅghamajjhe
udāhareyya suṇātu me bhante saṅgho idaṁ vatthuṁ paññāyati
na puggalo yadi saṅghassa pattakallaṁ vatthuṁ ṭhapetvā saṅgho
pavāreyyāti. So evamassa vacanīyo bhagavatā kho āvuso
visuddhānaṁ pavāraṇā paññattā sace vatthuṁ paññāyati na puggalo
idāneva naṁ vadehīti. Idha pana bhikkhave bhikkhu tadahupavāraṇāya
saṅghamajjhe udāhareyya suṇātu me bhante saṅgho ayaṁ puggalo
paññāyati na vatthuṁ yadi saṅghassa pattakallaṁ puggalaṁ ṭhapetvā
saṅgho pavāreyyāti. So evamassa vacanīyo bhagavatā kho āvuso
samaggānaṁ pavāraṇā paññattā sace puggalo paññāyati na
vatthuṁ idāneva naṁ vadehīti. Idha pana bhikkhave bhikkhu
tadahupavāraṇāya saṅghamajjhe udāhareyya suṇātu me bhante saṅgho
idaṁ vatthuñca puggalo ca paññāyati yadi saṅghassa pattakallaṁ
Vatthuñca puggalañca ṭhapetvā saṅgho pavāreyyāti. So evamassa
vacanīyo bhagavatā kho āvuso visuddhānañca samaggānañca pavāraṇā
paññattā sace vatthuñca puggalo ca paññāyati idāneva naṁ
vadehīti. Pubbe ce bhikkhave pavāraṇāya vatthuṁ paññāyati pacchā
puggalo kallaṁ vacanāya. Pubbe ce bhikkhave pavāraṇāya puggalo
paññāyati pacchā vatthuṁ kallaṁ vacanāya. Pubbe ce bhikkhave
pavāraṇāya vatthuñca puggalo ca paññāyati tañce katāya
pavāraṇāya ukkoṭeti ukkoṭanakaṁ pācittiyanti.

[250] Tena kho pana samayena sambahulā sandiṭṭhā sambhattā bhikkhū
kosalesu janapadesu aññatarasmiṁ āvāse vassaṁ upagacchiṁsu. Tesaṁ
samantā aññe bhikkhū bhaṇḍanakārakā kalahakārakā vivādakārakā
bhassakārakā saṅghe adhikaraṇakārakā vassaṁ upagacchiṁsu mayaṁ tesaṁ
bhikkhūnaṁ vassaṁ vutthānaṁ pavāraṇāya pavāraṇaṁ ṭhapessāmāti. Assosuṁ
kho te bhikkhū amhākaṁ kira samantā aññe bhikkhū bhaṇḍanakārakā
kalahakārakā vivādakārakā bhassakārakā saṅghe adhikaraṇakārakā vassaṁ
upagatā mayaṁ tesaṁ bhikkhūnaṁ vassaṁ vutthānaṁ pavāraṇāya pavāraṇaṁ
ṭhapessāmāti kathaṁ nu kho amhehi paṭipajjitabbanti. Bhagavato
etamatthaṁ ārocesuṁ. Idha pana bhikkhave sambahulā sandiṭṭhā
sambhattā bhikkhū aññatarasmiṁ āvāse vassaṁ upagacchanti. Tesaṁ
sāmantā aññe bhikkhū bhaṇḍanakārakā kalahakārakā vivādakārakā
Bhassakārakā saṅghe adhikaraṇakārakā vassaṁ upagacchanti mayaṁ tesaṁ
bhikkhūnaṁ vassaṁ vutthānaṁ pavāraṇāya pavāraṇaṁ ṭhapessāmāti. Anujānāmi
bhikkhave tehi bhikkhūhi dve tayo uposathe cātuddasike kātuṁ kathaṁ
mayaṁ tehi bhikkhūhi paṭhamataraṁ pavāreyyāmāti. Te ce bhikkhave
bhikkhū bhaṇḍanakārakā kalahakārakā vivādakārakā bhassakārakā saṅghe
adhikaraṇakārakā [1]- āvāsaṁ āgacchanti tehi bhikkhave āvāsikehi
bhikkhūhi lahuṁ lahuṁ sannipatitvā pavāretabbaṁ pavāretvā vattabbā
pavāritā kho mayaṁ āvuso yathā āyasmanto 2 maññanti tathā
karontūti. Te ce bhikkhave bhikkhū bhaṇḍanakārakā kalahakārakā
vivādakārakā bhassakārakā saṅghe adhikaraṇakārakā asaṁvihitā taṁ
āvāsaṁ āgacchanti tehi bhikkhave āvāsikehi bhikkhūhi āsanaṁ
paññāpetabbaṁ pādodakaṁ pādapīṭhaṁ pādakathalikaṁ upanikkhipitabbaṁ
paccuggantvā pattacīvaraṁ paṭiggahetabbaṁ pānīyena pucchitabbā 3 .
Tesaṁ vikkhitvā nissīmaṁ gantvā pavāretabbaṁ. Pavāretvā vattabbā
pavāritā kho mayaṁ āvuso yathā āyasmanto maññanti tathā
karontūti. Evañcetaṁ labhetha iccetaṁ kusalaṁ no ce labhetha
āvāsikena bhikkhunā byattena paṭibalena āvāsikā bhikkhū ñāpetabbā
suṇantu me āyasmanto āvāsikā yadāyasmantānaṁ pattakallaṁ
idāni uposathaṁ kareyyāma pātimokkhaṁ uddiseyyāma āgame
kāḷe pavāreyyāmāti. Te ce bhikkhave bhikkhū bhaṇḍanakārakā
1 Ma. taṁ. 2 Ma. Yu. āyasmantā. evamupari. 3 Ma. paripucchitabbā.
Kalahakārakā vivādakārakā bhassakārakā saṅghe adhikaraṇakārakā te
bhikkhū evaṁ vadeyyuṁ sādhu āvuso idāneva no pavārethāti.
Te evamassu vacanīyā anissarā kho tumhe āvuso amhākaṁ
pavāraṇāya na tāva mayaṁ pavāressāmāti 1 . Te ce bhikkhave
bhikkhū bhaṇḍanakārakā kalahakārakā vivādakārakā bhassakārakā saṅghe
adhikaraṇakārakā taṁ kāḷaṁ anuvaseyyuṁ āvāsikena [2]- bhikkhunā byattena
paṭibalena āvāsikā bhikkhū ñāpetabbā suṇantu me āyasmanto
āvāsikā yadāyasmantānaṁ pattakallaṁ idāni uposathaṁ kareyyāma
pātimokkhaṁ uddiseyyāma āgame juṇhe pavāreyyāmāti. Te
ce bhikkhave bhikkhū bhaṇḍanakārakā kalahakārakā vivādakārakā
bhassakārakā saṅghe adhikaraṇakārakā te bhikkhū evaṁ vadeyyuṁ sādhu
āvuso idāneva no pavārethāti 3 . Te evamassu vacanīyā anissarā
kho tumhe āvuso amhākaṁ pavāraṇāya na tāva mayaṁ
pavāressāmāti 4 . Te ce bhikkhave bhikkhū bhaṇḍanakārakā kalahakārakā
vivādakārakā bhassakārakā saṅghe adhikaraṇakārakā tampi juṇhaṁ
anuvaseyyuṁ tehi bhikkhave bhikkhūhi sabbeheva āgame juṇhe komudiyā
cātumāsiniyā akāmā pavāretabbaṁ. Tehi ce bhikkhave bhikkhūhi
pavāriyamāne gilāno agilānassa pavāraṇaṁ ṭhapeti so evamassa
vacanīyo āyasmā kho gilāno gilāno ca ananuyogakkhamo
vutto bhagavatā āgamehi āvuso yāva arogo hosi arogo
1 Ma. pavāreyyāmāti. 2 Ma. Yu. bhikkhave. 3 Ma. pavāreyyāthāti.
4 Ma. pavāreyyāmāti.
Ākaṅkhamāno codessasīti. Evañca vuccamāno codeti
anādariye pācittiyaṁ. Tehi ce bhikkhave bhikkhūhi pavāriyamāne agilāno
gilānassa pavāraṇaṁ ṭhapeti so evamassa vacanīyo ayaṁ kho
āvuso bhikkhu gilāno gilāno ca ananuyogakkhamo vutto bhagavatā
āgamehi āvuso yāvāyaṁ bhikkhu arogo hoti arogaṁ ākaṅkhamāno
codessasīti. Evañce vuccamāno codeti anādariye pācittiyaṁ.
Tehi ce bhikkhave bhikkhūhi pavāriyamāne gilāno gilānassa pavāraṇaṁ
ṭhapeti so evamassa vacanīyo āyasmantā kho gilānā gilāno
ca ananuyogakkhamo vutto bhagavatā āgamehi āvuso yāva
arogā hotha arogo arogaṁ ākaṅkhamāno codessasīti. Evañce
vuccamāno codeti anādariye pācittiyaṁ. Tehi ce bhikkhave
bhikkhūhi pavāriyamāne agilāno agilānassa pavāraṇaṁ ṭhapeti. Ubho
saṅghena samanuyuñjitvā samanuggāhitvā yathādhammaṁ kārāpetvā saṅghena
pavāretabbanti.

[251] Tena kho pana samayena sambahulā sandiṭṭhā sambhattā
bhikkhū kosalesu janapadesu aññatarasmiṁ āvāse vassaṁ upagacchiṁsu.
Tesaṁ samaggānaṁ sammodamānānaṁ avivadamānānaṁ viharataṁ aññataro
phāsuvihāro adhigato hoti. Athakho tesaṁ bhikkhūnaṁ etadahosi
amhākaṁ kho samaggānaṁ sammodamānānaṁ avivadamānānaṁ viharataṁ
aññataro phāsuvihāro adhigato sace mayaṁ idāni pavāressāma
Siyāpi bhikkhū pavāretvā cārikaṁ pakkameyyuṁ evaṁ mayaṁ imamhā
phāsuvihārā paribāhirā bhavissāma kathaṁ nu kho amhehi
paṭipajjitabbanti. Bhagavato etamatthaṁ ārocesuṁ. Idha pana bhikkhave sambahulā
sandiṭṭhā sambhattā bhikkhū aññatarasmiṁ āvāse vassaṁ upagacchanti.
Tesaṁ samaggānaṁ sammodamānānaṁ avivadamānānaṁ viharataṁ aññataro
phāsuvihāro adhigato hoti. Tatra ce bhikkhūnaṁ evaṁ hoti amhākaṁ
kho samaggānaṁ sammodamānānaṁ avivadamānānaṁ viharataṁ aññataro
phāsuvihāro adhigato sace mayaṁ idāni pavāressāma siyāpi
bhikkhū pavāretvā cārikaṁ pakkameyyuṁ evaṁ mayaṁ imamhā phāsuvihārā
paribāhirā bhavissāmāti. Anujānāmi bhikkhave tehi bhikkhūhi
pavāraṇāsaṅgahaṁ kātuṁ. Evañca pana bhikkhave kātabbo.
Sabbeheva ekajjhaṁ sannipatitabbaṁ. Sannipatitvā byattena bhikkhunā
paṭibalena saṅgho ñāpetabbo suṇātu me bhante saṅgho amhākaṁ
samaggānaṁ sammodamānānaṁ avivadamānānaṁ viharataṁ aññataro phāsuvihāro
adhigato. Sace mayaṁ idāni pavāressāma siyāpi bhikkhū pavāretvā
cārikaṁ pakkameyyuṁ evaṁ mayaṁ imamhā phāsuvihārā paribāhirā
bhavissāma. Yadi saṅghassa pattakallaṁ saṅgho pavāraṇāsaṅgahaṁ
kareyya idāni uposathaṁ kareyya pātimokkhaṁ uddiseyya āgame [1]-
komudiyā cātumāsiniyā pavāreyya. Esā ñatti. Suṇātu me
bhante saṅgho amhākaṁ samaggānaṁ sammodamānānaṁ avivadamānānaṁ
1 Ma. juṇhe. evamupari.
Viharataṁ aññataro phāsuvihāro adhigato. Sace mayaṁ idāni
pavāressāma siyāpi bhikkhū pavāretvā cārikaṁ pakkameyyuṁ evaṁ
mayaṁ imamhā phāsuvihārā paribāhirā bhavissāma. Saṅgho pavāraṇāsaṅgahaṁ
karoti idāni uposathaṁ karissati pātimokkhaṁ uddisissati
āgame komudiyā cātumāsiniyā pavāressati. Yassāyasmato khamati
pavāraṇāsaṅgahassa karaṇaṁ idāni uposathaṁ karissati pātimokkhaṁ
uddisissati āgame komudiyā cātumāsiniyā pavāressati so
tuṇhassa yassa nakkhamati so bhāseyya. Kato saṅghena
pavāraṇāsaṅgaho idāni uposathaṁ karissati pātimokkhaṁ uddisissati
āgame komudiyā cātumāsiniyā pavāressati. Khamati saṅghassa
tasmā tuṇhī. Evametaṁ dhārayāmīti. Tehi ce bhikkhave bhikkhūhi
kate pavāraṇāsaṅgahe aññataro bhikkhu evaṁ vadeyya icchāmahaṁ
āvuso janapadacārikaṁ pakkamituṁ atthi me janapade karaṇīyanti.
So evamassa vacanīyo sādhu āvuso pavāretvā gacchāhīti.
So ce bhikkhave bhikkhu pavārayamāno aññatarassa bhikkhuno pavāraṇaṁ
ṭhapeti so evamassa vacanīyo anissaro kho me tvaṁ āvuso
pavāraṇāya na tāvāhaṁ pavāressāmīti. Tassa ce bhikkhave
bhikkhuno pavārayamānassa aññataro bhikkhu tassa bhikkhuno pavāraṇaṁ
ṭhapeti ubho saṅghena samanuyuñjitvā samanuggāhitvā yathādhammaṁ
kārāpetabbā. So ce bhikkhave bhikkhu janapade taṁ karaṇīyaṁ
Tīretvā punadeva antokomudiyā cātumāsiniyā taṁ āvāsaṁ āgacchati
tehi ce bhikkhave bhikkhūhi pavāriyamāne aññataro bhikkhu tassa
bhikkhuno pavāraṇaṁ ṭhapeti so evamassa vacanīyo anissaro kho
me tvaṁ āvuso pavāraṇāya pavārito ahanti. Tehi ce
bhikkhave bhikkhūhi pavāriyamāne so bhikkhu aññatarassa bhikkhuno
pavāraṇaṁ ṭhapeti. Ubho saṅghena samanuyuñjitvā samanuggāhitvā
yathādhammaṁ kārāpetvā saṅghena pavāretabbanti.
Pavāraṇākkhandhakaṁ niṭṭhitaṁ catutthaṁ.
Imamhi khandhake vatthu chacattāḷīsa.
-------
Tassuddānaṁ

[252] Vassaṁ vutthā kosalesu āgamma 1 satthu dassanaṁ
aphāsupasusaṁvāsaṁ aññamaññānulomatā 2
pavārentāsane 3 dve ca kammagilānañātakā 4
rājā corā ca dhuttā ca bhikkhupaccatthikā 5 tathā
pañca catutayo dveko āpanno vematī sarī
sabbo saṅgho vematiko bahusamā 6 ca thokikā
āvāsikā catuddassā 7 liṅgasaṁvāsakā ubho
1 Ma. Yu. agamuṁ. 2 Sī. aññamaññānulomitā. 3 Ma. pavārentā paṇāmañca.
Yu. pavārentā paṇā dve ca. 4 Ma. Yu. kammaṁ gilānañātakā. 5 Yu. bhikkhū
paccatthikā tathā. 6 Ma. Yu. bahū samā .... 7 Ma. catuddasa. Yu. catuddasā.
Gantabbaṁ na nisinnāya chandadāne pavāraṇā 1
sañcarehi 2 khepitā megho antarā ca pavāraṇā
na karonti 3 puramhākaṁ aṭṭhapitā ca bhikkhuno
kimhi cāti 4 katamañca diṭṭhena sutasaṅkāya
codako cuditako ca thullavatthu 5 ca bhaṇḍanaṁ
pavāraṇassa saṅgaho 6 anissaro pavārayeti.
---------------
1 Yu. chandadānapavāraṇā. 2 Sī. Ma. Yu. savarehi. 3 Ma. na icchanti.
4 Ma. Yu. kimhi vāti. 5 Ma. Yu. thullaccayavatthu ....
6 Ma. Yu. pavāraṇāsaṅgaho ca.

Vinayapiṭake mahāvaggassa
dutiyo bhāgo
----------
cammakkhandhakaṁ

[1] Tena samayena buddho bhagavā rājagahe viharati gijjhakūṭe
pabbate. Tena kho pana samayena rājā māgadho seniyo bimbisāro
asītiyā gāmikasahassesu 1 issariyādhipaccaṁ 2 rajjaṁ kāreti. Tena kho pana
samayena campāyaṁ soṇo nāma koḷiviso seṭṭhiputto sukhumālo hoti.
Tassa pādatalesu lomāni jātāni honti. Athakho rājā māgadho
seniyo bimbisāro tāni asītiṁ gāmikasahassāni sannipātāpetvā
kenacideva karaṇīyena soṇassa koḷivisassa santike dūtaṁ pāhesi
āgacchatu soṇo icchāmi soṇassa āgatanti. Athakho soṇassa
koḷivisassa mātāpitaro soṇaṁ koḷivisaṁ etadavocuṁ rājā te tāta
soṇa pāde dakkhitukāmo mā kho tvaṁ tāta soṇa yena rājā
tena pāde abhippasāreyyāsi rañño purato pallaṅkena nisīda
nisinnassa te rājā pāde dakkhissatīti. Athakho soṇaṁ koḷivisaṁ
sivikāya ānesuṁ. Athakho soṇo koḷiviso yena rājā māgadho
seniyo bimbisāro tenupasaṅkami upasaṅkamitvā rājānaṁ māgadhaṁ
seniyaṁ bimbisāraṁ abhivādetvā rañño purato pallaṅkena nisīdi.
1 Ma. Yu. gāmasahassesu. 2 Ma. Yu. issarādhipaccaṁ.
Addasā 1 kho rājā māgadho seniyo bimbisāro soṇassa koḷivisassa
pādatalesu lomāni jātāni. [2]- Athakho rājā māgadho seniyo
bimbisāro tāni asītiṁ gāmikasahassāni diṭṭhadhammike atthe anusāsitvā
uyyojesi tumhe khvattha bhaṇe mayā diṭṭhadhammike atthe
anusāsitā gacchatha bhagavantaṁ 3 payirūpāsatha so no bhagavā
samparāyike atthe anusāsissatīti. Athakho tāni asīti
gāmikasahassāni yena gijjhakūṭo pabbato tenupasaṅkamiṁsu. Tena kho
pana samayena āyasmā sāgato bhagavato upaṭṭhāko hoti.
Athakho tāni asīti gāmikasahassāni yenāyasmā sāgato
tenupasaṅkamiṁsu upasaṅkamitvā āyasmantaṁ sāgataṁ etadavocuṁ imāni
bhante asīti gāmikasahassāni idhūpasaṅkantāni 4 bhagavantaṁ dassanāya
sādhu mayaṁ bhante labheyyāma bhagavantaṁ dassanāyāti. Tenahi
tumhe āyasmanto muhuttaṁ idheva tāva hotha yāvāhaṁ bhagavantaṁ
paṭivedemīti. Athakho āyasmā sāgato tesaṁ asītiyā
gāmikasahassānaṁ purato pekkhamānānaṁ pāṭikāya nimmujjitvā bhagavato
purato ummujjitvā bhagavantaṁ etadavoca imāni bhante asīti
gāmikasahassāni idhūpasaṅkantāni 5 bhagavantaṁ dassanāya yassadāni
bhante bhagavā kālaṁ maññatīti. Tenahi tvaṁ sāgata vihārappacchāyāyaṁ
āsanaṁ paññāpehīti. Evaṁ bhanteti kho āyasmā
1 Ma. Yu. addasa. 2 Po. disvāna. 3 Ma. Yu. taṁ bhagavantaṁ.
4-5 Ma. idhūpasaṅkamantāni.
Sāgato bhagavato paṭissuṇitvā pīṭhaṁ gahetvā bhagavato purato
nimmujjitvā tesaṁ asītiyā gāmikasahassānaṁ purato pekkhamānānaṁ
pāṭikāya ummujjitvā vihārappacchāyāyaṁ āsanaṁ paññāpesi.
Athakho bhagavā vihārā nikkhamitvā vihārappacchāyāyaṁ paññatte
āsane nisīdi. Athakho tāni asīti gāmikasahassāni yena bhagavā
tenupasaṅkamiṁsu upasaṅkamitvā bhagavantaṁ abhivādetvā ekamantaṁ
nisīdiṁsu. Athakho tāni asīti gāmikasahassāni āyasmantaṁyeva sāgataṁ
samannāharanti no tathā bhagavantaṁ. Athakho bhagavā tesaṁ asītiyā
gāmikasahassānaṁ cetasā cetoparivitakkamaññāya āyasmantaṁ sāgataṁ
āmantesi tenahi tvaṁ sāgata bhiyyoso mattāya uttarimanussadhammaṁ
iddhipāṭihāriyaṁ dassehīti. Evaṁ bhanteti kho āyasmā
sāgato bhagavato paṭissuṇitvā vehāsaṁ abbhuggantvā ākāse
antalikkhe caṅkamatipi tiṭṭhatipi nisīdatipi seyyaṁpi kappeti padhūpāyatipi 1
pajjalatipi antaradhāyatipi. Athakho āyasmā sāgato ākāse
antalikkhe anekavihitaṁ uttarimanussadhammaṁ iddhipāṭihāriyaṁ dassetvā
bhagavato pādesu sirasā nipatitvā bhagavantaṁ etadavoca satthā me
bhante bhagavā sāvakohamasmi satthā me bhante bhagavā
sāvakohamasmīti. Athakho tāni asīti gāmikasahassāni acchariyaṁ vata
bho abbhutaṁ vata bho sāvako hi 2 nāma evaṁmahiddhiko bhavissati
evaṁmahānubhāvo aho nūna satthāti bhagavantaṁyeva samannāharanti
1 Ma. dhūmāyatipi. Yu. dhūpāyatipi. 2 Ma. Yu. pi.
No tathā āyasmantaṁ sāgataṁ. Athakho bhagavā tesaṁ asītiyā
gāmikasahassānaṁ cetasā cetoparivitakkamaññāya anupubbīkathaṁ kathesi
seyyathīdaṁ dānakathaṁ sīlakathaṁ saggakathaṁ kāmānaṁ ādīnavaṁ okāraṁ
saṅkilesaṁ nekkhamme ānisaṁsaṁ pakāsesi. Yadā te bhagavā
aññāsi kallacitte muducitte vinīvaraṇacitte udaggacitte
pasannacitte atha yā buddhānaṁ sāmukkaṁsikā dhammadesanā taṁ pakāsesi
dukkhaṁ samudayaṁ nirodhaṁ maggaṁ. Seyyathāpi nāma suddhaṁ vatthaṁ apagatakāḷakaṁ
sammadeva rajanaṁ paṭiggaṇheyya evameva tesaṁ asītiyā
gāmikasahassānaṁ tasmiṁyeva āsane virajaṁ vītamalaṁ dhammacakkhuṁ udapādi
yaṅkiñci samudayadhammaṁ sabbantaṁ nirodhadhammanti. Te diṭṭhadhammā
pattadhammā viditadhammā pariyogāḷhadhammā tiṇṇavicikicchā
vigatakathaṁkathā vesārajjappattā aparappaccayā satthu sāsane bhagavantaṁ
etadavocuṁ abhikkantaṁ bhante abhikkantaṁ bhante seyyathāpi
bhante nikkujjitaṁ vā ukkujjeyya paṭicchannaṁ vā vivareyya
mūḷhassa vā maggaṁ ācikkheyya andhakāre vā telappajjotaṁ
dhāreyya cakkhumanto rūpāni dakkhantīti evameva bhagavatā
anekapariyāyena dhammo pakāsito ete mayaṁ bhante bhagavantaṁ
saraṇaṁ gacchāma dhammañca bhikkhusaṅghañca upāsake no bhagavā dhāretu
ajjatagge pāṇupete saraṇaṅgateti.