[225] Āciṇṇaṁ kho panetaṁ vassaṁ vutthānaṁ bhikkhūnaṁ bhagavantaṁ
dassanāya upasaṅkamituṁ. Athakho te bhikkhū vassaṁ vutthā
temāsaccayena senāsanaṁ saṁsāmetvā pattacīvaramādāya yena
sāvatthī tena pakkamiṁsu anupubbena yena sāvatthī jetavanaṁ
anāthapiṇḍikassa ārāmo yena bhagavā tenupasaṅkamiṁsu upasaṅkamitvā
bhagavantaṁ abhivādetvā ekamantaṁ nisīdiṁsu. Āciṇṇaṁ kho panetaṁ
Buddhānaṁ bhagavantānaṁ āgantukehi bhikkhūhi saddhiṁ paṭisammodituṁ.
Athakho bhagavā te bhikkhū etadavoca kacci bhikkhave khamanīyaṁ kacci
yāpanīyaṁ kacci samaggā sammodamānā avivadamānā phāsukaṁ vassaṁ
vasittha na ca piṇḍakena kilamitthāti. Khamanīyaṁ bhagavā yāpanīyaṁ
bhagavā samaggā ca mayaṁ bhante sammodamānā avivadamānā phāsukaṁ
vassaṁ vasimhā na ca piṇḍakena kilamimhāti. Jānantāpi
tathāgatā pucchanti jānantāpi na pucchanti kālaṁ viditvā pucchanti
kālaṁ viditvā na pucchanti atthasañhitaṁ tathāgatā pucchanti no
anatthasañhitaṁ anatthasañhite setughāto tathāgatānaṁ. Dvīhākārehi
buddhā bhagavanto bhikkhū paṭipucchanti dhammaṁ vā desessāma
sāvakānaṁ vā sikkhāpadaṁ paññāpessāmāti. Athakho bhagavā te
bhikkhū etadavoca yathākathaṁ pana tumhe bhikkhave samaggā sammodamānā
avivadamānā phāsukaṁ vassaṁ vasittha na ca piṇḍakena kilamitthāti.
Idha mayaṁ bhante sambahulā sandiṭṭhā sambhattā bhikkhū kosalesu
janapadesu aññatarasmiṁ āvāse vassaṁ upagacchimhā tesaṁ no
bhante amhākaṁ etadahosi kena nu kho mayaṁ upāyena samaggā
sammodamānā avivadamānā phāsukaṁ vassaṁ vaseyyāma na ca piṇḍakena
kilameyyāmāti tesaṁ no bhante amhākaṁ etadahosi sace kho
mayaṁ aññamaññaṁ neva ālapeyyāma na sallapeyyāma yo paṭhamaṁ
gāmato piṇḍāya paṭikkameyya so āsanaṁ paññāpeyya pādodakaṁ
Pādapīṭhaṁ pādakathalikaṁ upanikkhipeyya avakkārapātiṁ dhovitvā
upaṭṭhāpeyya pānīyaṁ paribhojanīyaṁ upaṭṭhāpeyya yo pacchā gāmato
piṇḍāya paṭikkameyya sacassa bhuttāvaseso sace ākaṅkheyya
bhuñjeyya no ce ākaṅkheyya apaharite vā chaḍḍeyya
appāṇake vā udake opilāpeyya so āsanaṁ uddhareyya
pādodakaṁ pādapīṭhaṁ pādakathalikaṁ paṭisāmeyya avakkārapātiṁ dhovitvā
paṭisāmeyya pānīyaṁ paribhojanīyaṁ paṭisāmeyya bhattaggaṁ sammajjeyya
yo passeyya pānīyaghaṭaṁ vā paribhojanīyaghaṭaṁ vā vaccaghaṭaṁ vā rittaṁ
tucchaṁ so upaṭṭhāpeyya sacassa hoti avisayhaṁ hatthavikārena
dutiyaṁ āmantetvā hatthavilaṅghakena upaṭṭhāpeyya na tveva
tappaccayā vācaṁ bhindeyya evaṁ kho mayaṁ samaggā sammodamānā
avivadamānā phāsukaṁ vassaṁ vaseyyāma na ca piṇḍakena kilameyyāmāti
athakho mayaṁ bhante aññamaññaṁ neva ālapimhā na sallapimhā
yo paṭhamaṁ gāmato piṇḍāya paṭikkamati so āsanaṁ paññāpeti
pādodakaṁ pādapīṭhaṁ pādakathalikaṁ upanikkhipati avakkārapātiṁ dhovitvā
upaṭṭhāpeti pānīyaṁ paribhojanīyaṁ upaṭṭhāpeti yo pacchā gāmato
piṇḍāya paṭikkamati sace hoti bhuttāvaseso sace ākaṅkhati
bhuñjati no ce ākaṅkhati apaharite vā chaḍḍeti appāṇake
vā udake opilāpeti so āsanaṁ uddharati pādodakaṁ pādapīṭhaṁ
pādakathalikaṁ paṭisāmeti avakkārapātiṁ dhovitvā paṭisāmeti pānīyaṁ
Paribhojanīyaṁ paṭisāmeti bhattaggaṁ sammajjati yo passati pānīyaghaṭaṁ
vā paribhojanīyaghaṭaṁ vā vaccaghaṭaṁ vā rittaṁ tucchaṁ so upaṭṭhāpeti
sacassa hoti avisayhaṁ hatthavikārena dutiyaṁ āmantetvā
hatthavilaṅghakena upaṭṭhāpeti na tveva tappaccayā vācaṁ bhindati evaṁ
kho mayaṁ bhante samaggā sammodamānā avivadamānā phāsukaṁ vassaṁ
vasimhā na ca piṇḍakena kilamimhāti.

[226] Athakho bhagavā bhikkhū āmantesi aphāsuññeva kirame
bhikkhave moghapurisā vutthā samānā phāsumha vutthāti paṭijānanti
pasusaṁvāsaññeva kirame bhikkhave moghapurisā vutthā samānā phāsumha
vutthāti paṭijānanti eḷakasaṁvāsaññeva kirame bhikkhave moghapurisā
vutthā samānā phāsumha vutthāti paṭijānanti pamattasaṁvāsaññeva
kirame bhikkhave moghapurisā vutthā samānā phāsumha vutthāti
paṭijānanti kathaṁ hi nāmime 1 bhikkhave moghapurisā mūgabbattaṁ 2
titthiyasamādānaṁ samādiyissanti netaṁ bhikkhave appasannānaṁ vā
pasādāya .pe. Vigarahitvā dhammiṁ kathaṁ katvā bhikkhū āmantesi na bhikkhave
mūgabbattaṁ titthiyasamādānaṁ samādiyitabbaṁ yo samādiyeyya āpatti
dukkaṭassa. Anujānāmi bhikkhave vassaṁ vutthānaṁ bhikkhūnaṁ tīhi ṭhānehi
pavāretuṁ diṭṭhena vā sutena vā parisaṅkāya vā. Sā vo bhavissati
aññamaññānulomatā āpattivuṭṭhānatā vinayapurekkhāratā. Evañca
pana bhikkhave pavāretabbaṁ. Byattena bhikkhunā paṭibalena saṅgho
1 Ma. ime iti saddo na dissati. 2 Ma. mūgabbataṁ. ito paraṁ īdisameva.
Ñāpetabbo suṇātu me bhante saṅgho ajja pavāraṇā.
Yadi saṅghassa pattakallaṁ saṅgho pavāreyyāti. Therena bhikkhunā
ekaṁsaṁ uttarāsaṅgaṁ karitvā ukkuṭikaṁ nisīditvā añjaliṁ paggahetvā
evamassa vacanīyo saṅghaṁ āvuso pavāremi diṭṭhena vā sutena
vā parisaṅkāya vā vadantu maṁ āyasmanto anukampaṁ upādāya
passanto paṭikarissāmi dutiyampi āvuso saṅghaṁ pavāremi diṭṭhena
vā sutena vā parisaṅkāya vā vadantu maṁ āyasmanto anukampaṁ
upādāya passanto paṭikarissāmi tatiyampi āvuso saṅghaṁ
pavāremi diṭṭhena vā sutena vā parisaṅkāya vā vadantu maṁ
āyasmanto anukampaṁ upādāya passanto paṭikarissāmīti. Navakena
bhikkhunā ekaṁsaṁ uttarāsaṅgaṁ karitvā ukkuṭikaṁ nisīditvā añjaliṁ
paggahetvā evamassa vacanīyo saṅghaṁ bhante pavāremi diṭṭhena
vā sutena vā parisaṅkāya vā vadantu maṁ āyasmanto anukampaṁ
upādāya passanto paṭikarissāmi dutiyampi bhante saṅghaṁ pavāremi
diṭṭhena vā sutena vā parisaṅkāya vā vadantu maṁ āyasmanto
anukampaṁ upādāya passanto paṭikarissāmi tatiyampi bhante
saṅghaṁ pavāremi diṭṭhena vā sutena vā parisaṅkāya vā vadantu maṁ
āyasmanto anukampaṁ upādāya passanto paṭikarissāmīti.

[227] Tena kho pana samayena chabbaggiyā bhikkhū theresu bhikkhūsu
ukkuṭikaṁ nisinnesu pavārayamānesu āsanesu acchanti. Ye te
Bhikkhū appicchā te ujjhāyanti khīyanti vipācenti kathaṁ hi
nāma chabbaggiyā bhikkhū theresu bhikkhūsu ukkuṭikaṁ nisinnesu
pavārayamānesu āsanesu acchissantīti. Athakho te bhikkhū bhagavato
etamatthaṁ ārocesuṁ. Saccaṁ kira bhikkhave chabbaggiyā bhikkhū theresu
bhikkhūsu ukkuṭikaṁ nisinnesu pavārayamānesu āsanesu acchantīti.
Saccaṁ bhagavāti. Vigarahi buddho bhagavā kathaṁ hi nāma te bhikkhave
moghapurisā theresu bhikkhūsu ukkuṭikaṁ nisinnesu pavārayamānesu āsanesu
acchissanti netaṁ bhikkhave appasannānaṁ vā pasādāya .pe.
Vigarahitvā dhammiṁ kathaṁ katvā bhikkhū āmantesi na bhikkhave theresu
bhikkhūsu ukkuṭikaṁ nisinnesu pavārayamānesu āsanesu acchitabbaṁ yo
accheyya āpatti dukkaṭassa anujānāmi bhikkhave sabbeheva
ukkuṭikaṁ nisinnehi pavāretunti. Tena kho pana samayena aññataro
thero jarādubbalo yāva sabbe pavārenti 1 ukkuṭikaṁ nisinno 2
āgamayamāno mucchito papati. Bhagavato etamatthaṁ ārocesuṁ.
Anujānāmi bhikkhave tadanantarā ukkuṭikaṁ nisīdituṁ yāva pavāreti
pavāretvā āsane nisīditunti.

[228] Athakho bhikkhūnaṁ etadahosi kati nu kho pavāraṇāti.
Bhagavato etamatthaṁ ārocesuṁ. Dvemā bhikkhave pavāraṇā
cātuddasikā [3]- paṇṇarasikā ca imā kho bhikkhave dve pavāraṇāti.
1 Sī. Ma. Yu. pavārentīti. 2 Rā. tāva ukkuṭikaṁ nisinno. 3 Po. Ma. ca.
Athakho bhikkhūnaṁ etadahosi kati nu kho pavāraṇākammānīti 1 .
Bhagavato etamatthaṁ ārocesuṁ. Cattārīmāni bhikkhave pavāraṇākammāni 2
adhammena vaggaṁ pavāraṇākammaṁ adhammena samaggaṁ pavāraṇākammaṁ
dhammena vaggaṁ pavāraṇākammaṁ dhammena samaggaṁ pavāraṇākammaṁ.
Tatra bhikkhave yadidaṁ adhammena vaggaṁ pavāraṇākammaṁ na bhikkhave
evarūpaṁ pavāraṇākammaṁ kātabbaṁ na ca mayā evarūpaṁ pavāraṇākammaṁ
anuññātaṁ. Tatra bhikkhave yadidaṁ adhammena samaggaṁ pavāraṇākammaṁ
na bhikkhave evarūpaṁ pavāraṇākammaṁ kātabbaṁ na ca mayā evarūpaṁ
pavāraṇākammaṁ anuññātaṁ. Tatra bhikkhave yadidaṁ dhammena vaggaṁ
pavāraṇākammaṁ na ca 3 bhikkhave evarūpaṁ pavāraṇākammaṁ kātabbaṁ
na ca mayā evarūpaṁ pavāraṇākammaṁ anuññātaṁ. Tatra bhikkhave
yadidaṁ dhammena samaggaṁ pavāraṇākammaṁ evarūpaṁ bhikkhave pavāraṇākammaṁ
kātabbaṁ evarūpaṁ 4 mayā pavāraṇākammaṁ anuññātaṁ. Tasmātiha
bhikkhave evarūpaṁ pavāraṇākammaṁ karissāma yadidaṁ dhammena
samagganti evaṁ hi vo bhikkhave sikkhitabbanti.

[229] Athakho bhagavā bhikkhū āmantesi sannipatatha bhikkhave
saṅgho pavāressatīti. Evaṁ vutte aññataro bhikkhu bhagavantaṁ
etadavoca atthi bhante bhikkhu gilāno so anāgatoti.
Anujānāmi bhikkhave gilānena bhikkhunā pavāraṇaṁ dātuṁ. Evañca
pana bhikkhave dātabbā. Tena gilānena bhikkhunā ekaṁ bhikkhuṁ
1 Ma. Yu. pavāraṇakammānīti. 2 Ma. Yu. sabbattha pavāraṇakammāni-kammaṁ.
3 Ma. casaddo natthi. 4 Ma. evarūpañca.
Upasaṅkamitvā ekaṁsaṁ uttarāsaṅgaṁ karitvā ukkuṭikaṁ nisīditvā añjaliṁ
paggahetvā evamassa vacanīyo pavāraṇaṁ dammi pavāraṇaṁ me
hara [1]- mamatthāya pavārehīti kāyena viññāpeti vācāya viññāpeti
kāyena vācāya viññāpeti dinnā hoti pavāraṇā. Na kāyena
viññāpeti na vācāya viññāpeti na kāyena vācāya viññāpeti
na dinnā hoti pavāraṇā. Evañcetaṁ labhetha iccetaṁ kusalaṁ
no ce labhetha so bhikkhave gilāno bhikkhu mañcena vā pīṭhena
vā saṅghamajjhe ānetvā pavāretabbaṁ. Sace bhikkhave gilānupaṭṭhākānaṁ
bhikkhūnaṁ evaṁ 2 hoti sace kho mayaṁ gilānaṁ ṭhānā cāvessāma
ābādho vā abhivaḍḍhissati kālakiriyā vā bhavissatīti. Na bhikkhave
gilāno [3]- ṭhānā cāvetabbo saṅghena tattha gantvā pavāretabbaṁ
na tveva vaggena saṅghena pavāretabbaṁ pavāreyya ce āpatti
dukkaṭassa. Pavāraṇāhārako ce bhikkhave dinnāya pavāraṇāya tattheva
pakkamati aññassa dātabbā pavāraṇā. Pavāraṇāhārako ce
bhikkhave dinnāya pavāraṇāya tattheva vibbhamati .pe. Kālaṁ karoti
sāmaṇero paṭijānāti sikkhaṁ paccakkhātako paṭijānāti
antimavatthuṁ ajjhāpannako paṭijānāti ummattako paṭijānāti
khittacitto paṭijānāti vedanaṭṭo paṭijānāti āpattiyā adassane
ukkhittako paṭijānāti āpattiyā appaṭikamme ukkhittako
paṭijānāti pāpikāya diṭṭhiyā appaṭinissagge ukkhittako paṭijānāti
1 Po. Ma. pavāraṇaṁ me ārocehi. 2 Ma. etadahosi. 3 Ma. bhikkhu.
Paṇḍako paṭijānāti theyyasaṁvāsako paṭijānāti titthiyapakkantako
paṭijānāti tiracchānagato paṭijānāti mātughātako paṭijānāti
pitughātako paṭijānāti arahantaghātako paṭijānāti bhikkhunīdūsako
paṭijānāti saṅghabhedako paṭijānāti lohituppādako paṭijānāti
ubhatobyañjanako paṭijānāti aññassa dātabbā pavāraṇā.
Pavāraṇāhārako ce bhikkhave dinnāya pavāraṇāya antarāmagge
pakkamati anāhaṭā hoti pavāraṇā. Pavāraṇāhārako ce
bhikkhave dinnāya pavāraṇāya antarāmagge vibbhamati kālaṁ
karoti .pe. Ubhatobyañjanako paṭijānāti anāhaṭā hoti pavāraṇā.
Pavāraṇāhārako ce bhikkhave dinnāya pavāraṇāya saṅghappatto
pakkamati āhaṭā hoti pavāraṇā. Pavāraṇāhārako ce bhikkhave
dinnāya pavāraṇāya saṅghappatto vibbhamati kālaṁ karoti .pe.
Ubhatobyañjanako paṭijānāti āhaṭā hoti pavāraṇā.
Pavāraṇāhārako ce bhikkhave dinnāya pavāraṇāya saṅghappatto sutto
na āroceti āhaṭā hoti pavāraṇā pavāraṇāhārakassa
anāpatti. Pavāraṇāhārako ce bhikkhave dinnāya pavāraṇāya
saṅghappatto samāpanno na āroceti āhaṭā hoti pavāraṇā
pavāraṇāhārakassa anāpatti. Pavāraṇāhārako ce bhikkhave dinnāya
pavāraṇāya saṅghappatto pamatto na āroceti āhaṭā hoti
pavāraṇā pavāraṇāhārakassa anāpatti. Pavāraṇāhārako ce
Bhikkhave dinnāya pavāraṇāya saṅghappatto sañcicca na āroceti
āhaṭā hoti pavāraṇā pavāraṇāhārakassa āpatti dukkaṭassa.
Anujānāmi bhikkhave tadahupavāraṇāya pavāraṇaṁ dentena chandampi
dātuṁ santi saṅghassa karaṇīyanti.

[230] Tena kho pana samayena aññataraṁ bhakkhuṁ tadahupavāraṇāya
ñātakā gaṇhiṁsu. Bhagavato etamatthaṁ ārocesuṁ. Idha pana
bhikkhave bhikkhuṁ tadahupavāraṇāya ñātakā gaṇhanti. Te ñātakā
bhikkhūhi evamassu vacanīyā iṅgha tumhe āyasmanto imaṁ bhikkhuṁ
muhuttaṁ muñcatha yāvāyaṁ bhikkhu pavāretīti. Evañcetaṁ labhetha
iccetaṁ kusalaṁ no ce labhetha te ñātakā bhikkhūhi evamassu
vacanīyā iṅgha tumhe āyasmanto muhuttaṁ ekamantaṁ hotha yāvāyaṁ
bhikkhu pavāraṇaṁ detīti. Evañcetaṁ labhetha iccetaṁ kusalaṁ
no ce labhetha te ñātakā bhikkhūhi evamassu vacanīyā iṅgha
tumhe āyasmanto imaṁ bhikkhuṁ muhuttaṁ nissīmaṁ netha yāva saṅgho
pavāretīti. Evañcetaṁ labhetha iccetaṁ kusalaṁ no ce labhetha
na tveva vaggena saṅghena pavāretabbaṁ pavāreyya ce āpatti
dukkaṭassa. Idha pana bhikkhave bhikkhuṁ tadahupavāraṇāya rājāno
gaṇhanti corā gaṇhanti dhuttā gaṇhanti bhikkhupaccatthikā
gaṇhanti. Te bhikkhupaccatthikā bhikkhūhi evamassu vacanīyā iṅgha
tumhe āyasmanto imaṁ bhikkhuṁ muhuttaṁ muñcatha yāvāyaṁ bhikkhu
Pavāretīti. Evañcetaṁ labhetha iccetaṁ kusalaṁ no ce labhetha te
bhikkhupaccatthikā bhikkhūhi evamassu vacanīyā iṅgha tumhe āyasmanto
muhuttaṁ ekamantaṁ hotha yāvāyaṁ bhikkhu pavāraṇaṁ detīti. Evañcetaṁ
labhetha iccetaṁ kusalaṁ no ce labhetha te bhikkhupaccatthikā
bhikkhūhi evamassu vacanīyā iṅgha tumhe āyasmanto imaṁ bhikkhuṁ
muhuttaṁ nissīmaṁ netha yāva saṅgho pavāretīti. Evañcetaṁ
labhetha iccetaṁ kusalaṁ no ce labhetha na tveva vaggena
saṅghena pavāretabbaṁ pavāreyya ce āpatti dukkaṭassāti.

[231] Tena kho pana samayena aññatarasmiṁ āvāse
tadahupavāraṇāya pañca bhikkhū viharanti. Athakho tesaṁ bhikkhūnaṁ etadahosi
bhagavatā paññattaṁ saṅghena pavāretabbanti mayañcamha pañca
janā kathaṁ nu kho amhehi pavāretabbanti. Bhagavato etamatthaṁ
ārocesuṁ. Anujānāmi bhikkhave pañcannaṁ saṅghena 1 pavāretunti.
Tena kho pana samayena aññatarasmiṁ āvāse tadahupavāraṇāya
cattāro bhikkhū viharanti. Athakho tesaṁ bhikkhūnaṁ etadahosi
bhagavatā anuññātaṁ pañcannaṁ saṅghena pavāretuṁ mayañcamha cattāro
janā kathaṁ nu kho amhehi pavāretabbanti. Bhagavato etamatthaṁ
ārocesuṁ. Anujānāmi bhikkhave catunnaṁ aññamaññaṁ pavāretuṁ.
Evañca pana bhikkhave pavāretabbaṁ. Byattena bhikkhunā paṭibalena
te bhikkhū ñāpetabbā suṇantu me āyasmanto ajja pavāraṇā.
1 Ma. Yu. saṅghe. ito paraṁ īdisameva.
Yadāyasmantānaṁ pattakallaṁ mayaṁ aññamaññaṁ pavāreyyāmāti.
Therena bhikkhunā ekaṁsaṁ uttarāsaṅgaṁ karitvā ukkuṭikaṁ nisīditvā
añjaliṁ paggahetvā te bhikkhū evamassu vacanīyā ahaṁ āvuso
āyasmante pavāremi diṭṭhena vā sutena vā parisaṅkāya vā
vadantu maṁ āyasmanto anukampaṁ upādāya passanto paṭikarissāmi
dutiyampi āvuso āyasmante pavāremi diṭṭhena vā sutena vā
parisaṅkāya vā vadantu maṁ āyasmanto anukampaṁ upādāya
passanto paṭikarissāmi tatiyampi āvuso āyasmante pavāremi
diṭṭhena vā sutena vā parisaṅkāya vā vadantu maṁ āyasmanto
anukampaṁ upādāya passanto paṭikarissāmīti. Navakena bhikkhunā
ekaṁsaṁ uttarāsaṅgaṁ karitvā ukkuṭikaṁ nisīditvā añjaliṁ paggahetvā
te bhikkhū evamassu vacanīyā ahaṁ bhante āyasmante pavāremi
diṭṭhena vā sutena vā parisaṅkāya vā vadantu maṁ āyasmanto
anukampaṁ upādāya passanto paṭikarissāmi dutiyampi bhante
āyasmante pavāremi diṭṭhena vā sutena vā parisaṅkāya vā
vadantu maṁ āyasmanto anukampaṁ upādāya passanto paṭikarissāmi
tatiyampi bhante āyasmante pavāremi diṭṭhena vā sutena vā
parisaṅkāya vā vadantu maṁ āyasmanto anukampaṁ upādāya
passanto paṭikarissāmīti. Tena kho pana samayena aññatarasmiṁ
āvāse tadahupavāraṇāya tayo bhikkhū viharanti. Athakho tesaṁ
Bhikkhūnaṁ etadahosi bhagavatā anuññātaṁ pañcannaṁ saṅghena pavāretuṁ
catunnaṁ aññamaññaṁ pavāretuṁ mayañcamha tayo janā kathaṁ nu
kho amhehi pavāretabbanti. Bhagavato etamatthaṁ ārocesuṁ.
Anujānāmi bhikkhave tiṇṇannaṁ aññamaññaṁ pavāretuṁ. Evañca
pana bhikkhave pavāretabbaṁ. Byattena bhikkhunā paṭibalena te
bhikkhū ñāpetabbā suṇantu me āyasmantā ajja pavāraṇā.
Yadāyasmantānaṁ pattakallaṁ mayaṁ aññamaññaṁ pavāreyyāmāti.
Therena bhikkhunā ekaṁsaṁ uttarāsaṅgaṁ karitvā ukkuṭikaṁ nisīditvā
añjaliṁ paggahetvā te bhikkhū evamassu vacanīyā ahaṁ āvuso
āyasmante pavāremi diṭṭhena vā sutena vā parisaṅkāya vā vadantu
maṁ āyasmantā anukampaṁ upādāya passanto paṭikarissāmi
dutiyampi āvuso āyasmante pavāremi diṭṭhena vā sutena vā
parisaṅkāya vā vadantu maṁ āyasmantā anukampaṁ upādāya
passanto paṭikarissāmi tatiyampi āvuso āyasmante pavāremi
diṭṭhena vā sutena vā parisaṅkāya vā vadantu maṁ āyasmantā
anukampaṁ upādāya passanto paṭikarissāmīti. Navakena bhikkhunā
ekaṁsaṁ uttarāsaṅgaṁ karitvā ukkuṭikaṁ nisīditvā añjaliṁ paggahetvā
te bhikkhū evamassu vacanīyā ahaṁ bhante āyasmante pavāremi
diṭṭhena vā sutena vā parisaṅkāya vā vadantu maṁ āyasmantā
anukampaṁ upādāya passanto paṭikarissāmi dutiyampi bhante
Āyasmante pavāremi diṭṭhena vā sutena vā parisaṅkāya vā
vadantu maṁ āyasmantā anukampaṁ upādāya passanto paṭikarissāmi
tatiyampi bhante āyasmante pavāremi diṭṭhena vā sutena vā
parisaṅkāya vā vadantu maṁ āyasmantā anukampaṁ upādāya
passanto paṭikarissāmīti. Tena kho pana samayena aññatarasmiṁ
āvāse tadahupavāraṇāya dve bhikkhū viharanti athakho tesaṁ
bhikkhūnaṁ etadahosi bhagavatā anuññātaṁ pañcannaṁ saṅghena pavāretuṁ
catunnaṁ aññamaññaṁ pavāretuṁ tiṇṇannaṁ aññamaññaṁ pavāretuṁ
mayañcamha dve janā kathaṁ nu kho amhehi pavāretabbanti.
Bhagavato etamatthaṁ ārocesuṁ. Anujānāmi bhikkhave dvinnaṁ aññamaññaṁ
pavāretuṁ. Evañca pana bhikkhave pavāretabbaṁ. Therena bhikkhunā ekaṁsaṁ
uttarāsaṅgaṁ karitvā ukkuṭikaṁ nisīditvā añjaliṁ paggahetvā navo
bhikkhu evamassa vacanīyo ahaṁ āvuso āyasmantaṁ pavāremi diṭṭhena
vā sutena vā parisaṅkāya vā vadatu maṁ āyasmā anukampaṁ
upādāya passanto paṭikarissāmi dutiyampi āvuso āyasmantaṁ
pavāremi diṭṭhena vā sutena vā parisaṅkāya vā vadatu maṁ
āyasmā anukampaṁ upādāya passanto paṭikarissāmi tatiyampi
āvuso āyasmantaṁ pavāremi diṭṭhena vā sutena vā parisaṅkāya
vā vadatu maṁ āyasmā anukampaṁ upādāya passanto
paṭikarissāmīti. Navakena bhikkhunā ekaṁsaṁ uttarāsaṅgaṁ karitvā ukkuṭikaṁ
Nisīditvā añjaliṁ paggahetvā thero bhikkhu evamassa vacanīyo
ahaṁ bhante āyasmantaṁ pavāremi diṭṭhena vā sutena vā parisaṅkāya
vā vadatu maṁ āyasmā anukampaṁ upādāya passanto paṭikarissāmi
dutiyampi bhante āyasmantaṁ pavāremi diṭṭhena vā sutena vā
parisaṅkāya vā vadatu maṁ āyasmā anukampaṁ upādāya passanto
paṭikarissāmi tatiyampi bhante āyasmantaṁ pavāremi diṭṭhena vā
sutena vā parisaṅkāya vā vadatu maṁ āyasmā anukampaṁ upādāya
passanto paṭikarissāmīti. Tena kho pana samayena aññatarasmiṁ
āvāse tadahupavāraṇāya eko bhikkhu viharati. Athakho tassa
bhikkhuno etadahosi bhagavatā anuññātaṁ pañcannaṁ saṅghena pavāretuṁ
catunnaṁ aññamaññaṁ pavāretuṁ tiṇṇannaṁ aññamaññaṁ pavāretuṁ
dvinnaṁ aññamaññaṁ pavāretuṁ ahañcamhi ekako kathaṁ nu kho
mayā pavāretabbanti. Bhagavato etamatthaṁ ārocesuṁ. Idha pana
bhikkhave aññatarasmiṁ āvāse tadahupavāraṇāya eko bhikkhu viharati.
Tena bhikkhave bhikkhunā yattha bhikkhū paṭikkamanti upaṭṭhānasālāya
vā maṇḍape vā rukkhamūle vā so deso sammajjitvā pānīyaṁ
paribhojanīyaṁ upaṭṭhāpetvā āsanaṁ paññāpetvā padīpaṁ katvā
nisīditabbaṁ. Sace aññe bhikkhū āgacchanti tehi saddhiṁ pavāretabbaṁ
no ce āgacchanti ajja me pavāraṇāti adhiṭṭhātabbaṁ no
ce adhiṭṭhaheyya āpatti dukkaṭassa. Tatra bhikkhave yattha
Pañca bhikkhū viharanti na ekassa pavāraṇaṁ āharitvā catūhi
saṅghena pavāretabbaṁ pavāreyyuṁ ce āpatti dukkaṭassa.
Tatra bhikkhave yattha cattāro bhikkhū viharanti na ekassa pavāraṇaṁ
āharitvā tīhi aññamaññaṁ pavāretabbaṁ pavāreyyuṁ ce āpatti
dukkaṭassa. Tatra bhikkhave yattha tayo bhikkhū viharanti na ekassa
pavāraṇaṁ āharitvā dvīhi aññamaññaṁ pavāretabbaṁ pavāreyyuṁ
ce āpatti dukkaṭassa. Tatra bhikkhave yattha dve bhikkhū
viharanti na ekassa pavāraṇaṁ āharitvā ekena adhiṭṭhātabbaṁ
adhiṭṭhaheyya ce āpatti dukkaṭassāti.

[232] Tena kho pana samayena aññataro bhikkhu tadahupavāraṇāya
āpattiṁ āpanno hoti. Athakho tassa bhikkhuno etadahosi
bhagavatā paññattaṁ na sāpattikena pavāretabbanti ahañcamhi
āpattiṁ āpanno kathaṁ nu kho mayā paṭipajjitabbanti. Bhagavato
etamatthaṁ ārocesuṁ. Idha pana bhikkhave tadahupavāraṇāya āpattiṁ
āpanno hoti. Tena bhikkhave bhikkhunā ekaṁ bhikkhuṁ upasaṅkamitvā
ekaṁsaṁ uttarāsaṅgaṁ karitvā ukkuṭikaṁ nisīditvā añjaliṁ paggahetvā
evamassa vacanīyo ahaṁ āvuso itthannāmaṁ āpattiṁ āpanno
taṁ paṭidesemīti. Tena vattabbo passasīti. Āma passāmīti.
Āyatiṁ saṁvareyyāsīti. Idha pana bhikkhave bhikkhu tadahupavāraṇāya
āpattiyā vematiko hoti. Tena bhikkhave bhikkhunā ekaṁ bhikkhuṁ
Upasaṅkamitvā ekaṁsaṁ uttarāsaṅgaṁ karitvā ukkuṭikaṁ nisīditvā
añjaliṁ paggahetvā evamassa vacanīyo ahaṁ āvuso itthannāmāya
āpattiyā vematiko yadā nibbematiko bhavissāmi tadā
taṁ āpattiṁ paṭikarissāmīti vatvā pavāretabbaṁ. Na tveva
tappaccayā pavāraṇāya antarāyo kātabboti. Tena kho pana
samayena aññataro bhikkhu pavārayamāno āpattiṁ sarati. Athakho
tassa bhikkhuno etadahosi bhagavatā paññattaṁ na sāpattikena
pavāretabbanti ahañcamhi āpattiṁ āpanno kathaṁ nu kho mayā
paṭipajjitabbanti. Bhagavato etamatthaṁ ārocesuṁ. Idha pana
bhikkhave bhikkhu pavārayamāno āpattiṁ sarati. Tena bhikkhave
bhikkhunā sāmanto bhikkhu evamassa vacanīyo ahaṁ āvuso itthannāmaṁ
āpattiṁ āpanno ito vuṭṭhahitvā taṁ āpattiṁ paṭikarissāmīti
vatvā pavāretabbaṁ. Na tveva tappaccayā pavāraṇāya antarāyo
kātabbo. Idha pana bhikkhave bhikkhu pavārayamāno āpattiyā
vematiko hoti. Tena bhikkhave bhikkhunā sāmanto bhikkhu evamassa
vacanīyo ahaṁ āvuso itthannāmāya āpattiyā vematiko yadā
nibbematiko bhavissāmi tadā taṁ āpattiṁ paṭikarissāmīti vatvā
pavāretabbaṁ. Na tveva tappaccayā pavāraṇāya antarāyo
kātabboti. Tena kho pana samayena aññatarasmiṁ āvāse tadahupavāraṇāya
sabbo saṅgho sabhāgaṁ āpattiṁ āpanno hoti. Athakho tesaṁ
Bhikkhūnaṁ etadahosi bhagavatā paññattaṁ na sabhāgā āpatti
desetabbā na sabhāgā āpatti paṭiggahetabbāti ayañca sabbo
saṅgho sabhāgaṁ āpattiṁ āpanno kathaṁ nu kho amhehi paṭipajjitabbanti.
Bhagavato etamatthaṁ ārocesuṁ. Idha pana bhikkhave
aññatarasmiṁ āvāse tadahupavāraṇāya sabbo saṅgho sabhāgaṁ āpattiṁ
āpanno hoti. Tehi bhikkhave bhikkhūhi eko bhikkhu samantā
āvāsā sajjukaṁ pāhetabbo gacchāvuso taṁ āpattiṁ paṭikaritvā
āgaccha mayaṁ te santike taṁ āpattiṁ paṭikarissāmāti. Evañcetaṁ
labhetha iccetaṁ kusalaṁ no ce labhetha byattena bhikkhunā
paṭibalena saṅgho ñāpetabbo suṇātu me bhante saṅgho ayaṁ
sabbo saṅgho sabhāgaṁ āpattiṁ āpanno yadā aññaṁ bhikkhuṁ
suddhaṁ anāpattikaṁ passissati tadā tassa santike taṁ āpattiṁ
paṭikarissatīti patvā pavāretabbaṁ. Na tveva tappaccayā
pavāraṇāya antarāyo kātabbo. Idha pana bhikkhave aññatarasmiṁ
āvāse tadahupavāraṇāya sabbo saṅgho sabhāgāya āpattiyā vematiko
hoti byattena bhikkhunā paṭibalena saṅgho ñāpetabbo suṇātu
me bhante saṅgho ayaṁ sabbo saṅgho sabhāgāya āpattiyā
vematiko yadā nibbematiko bhavissati tadā taṁ āpattiṁ
paṭikarissatīti vatvā pavāretabbaṁ. Na tveva tappaccayā pavāraṇāya
antarāyo kātabboti.
Paṭhamabhāṇavāraṁ niṭṭhitaṁ.

[233] Tena kho pana samayena aññatarasmiṁ āvāse tadahupavāraṇāya
sambahulā āvāsikā bhikkhū sannipatiṁsu pañca vā atirekā
vā. Te na jāniṁsu atthaññe āvāsikā bhikkhū anāgatāti.
Te dhammasaññino vinayasaññino vaggā samaggasaññino pavāresuṁ.
Tehi pavāriyamāne athaññe āvāsikā bhikkhū āgacchiṁsu bahutarā.
Bhagavato etamatthaṁ ārocesuṁ. Idha pana bhikkhave aññatarasmiṁ
āvāse tadahupavāraṇāya sambahulā āvāsikā bhikkhū sannipatanti
pañca vā atirekā vā. Te na jānanti atthaññe āvāsikā
bhikkhū anāgatāti. Te dhammasaññino vinayasaññino vaggā samaggasaññino
pavārenti. Tehi pavāriyamāne athaññe āvāsikā
bhikkhū āgacchanti bahutarā. Tehi bhikkhave bhikkhūhi puna pavāretabbaṁ
pavāritānaṁ anāpatti. Idha pana bhikkhave aññatarasmiṁ āvāse
tadahupavāraṇāya sambahulā āvāsikā bhikkhū sannipatanti pañca
vā atirekā vā. Te na jānanti atthaññe āvāsikā bhikkhū
anāgatāti. Te dhammasaññino vinayasaññino vaggā samaggasaññino
pavārenti. Tehi pavāriyamāne athaññe āvāsikā bhikkhū āgacchanti
samasamā. Pavāritā suppavāritā avasesehi pavāretabbaṁ pavāritānaṁ
anāpatti. Idha pana bhikkhave aññatarasmiṁ āvāse tadahupavāraṇāya
sambahulā āvāsikā bhikkhū sannipatanti pañca vā
Atirekā vā. Te na jānanti atthaññe āvāsikā bhikkhū
anāgatāti. Te dhammasaññino vinayasaññino vaggā samaggasaññino
pavārenti. Tehi pavāriyamāne athaññe āvāsikā bhikkhū
āgacchanti thokatarā. Pavāritā suppavāritā avasesehi pavāretabbaṁ
pavāritānaṁ anāpatti. Idha pana bhikkhave aññatarasmiṁ āvāse
tadahupavāraṇāya sambahulā āvāsikā bhikkhū sannipatanti pañca vā
atirekā vā. Te na jānanti atthaññe āvāsikā bhikkhū
anāgatāti. Te dhammasaññino vinayasaññino vaggā samaggasaññino
pavārenti. Tehi pavāritamatte athaññe āvāsikā bhikkhū āgacchanti
bahutarā. Tehi bhikkhave bhikkhūhi puna pavāretabbaṁ pavāritānaṁ
anāpatti .pe. Athaññe āvāsikā bhikkhū āgacchanti samasamā.
Pavāritā suppavāritā tesaṁ santike pavāretabbaṁ pavāritānaṁ
anāpatti .pe. Athaññe āvāsikā bhikkhū āgacchanti thokatarā.
Pavāritā suppavāritā tesaṁ santike pavāretabbaṁ pavāritānaṁ
anāpatti. Idha pana bhikkhave aññatarasmiṁ āvāse tadahupavāraṇāya
sambahulā āvāsikā bhikkhū sannipatanti pañca vā atirekā vā.
Te na jānanti atthaññe āvāsikā bhikkhū anāgatāti. Te
dhammasaññino vinayasaññino vaggā samaggasaññino pavārenti.
Tehi pavāritamatte avuṭṭhitāya parisāya athaññe āvāsikā bhikkhū
āgacchanti bahutarā. Tehi bhikkhave bhikkhūhi puna pavāretabbaṁ
Pavāritānaṁ anāpatti .pe. Athaññe āvāsikā bhikkhū āgacchanti
samasamā .pe. Thokatarā. Pavāritā suppavāritā tesaṁ
santike pavāretabbaṁ pavāritānaṁ anāpatti. Idha pana bhikkhave
aññatarasmiṁ āvāse tadahupavāraṇāya sambahulā āvāsikā bhikkhū
sannipatanti pañca vā atirekā vā. Te na jānanti atthaññe
āvāsikā bhikkhū anāgatāti. Te dhammasaññino vinayasaññino
vaggā samaggasaññino pavārenti. Tehi pavāritamatte ekaccāya
vuṭṭhitāya parisāya athaññe āvāsikā bhikkhū āgacchanti bahutarā.
Tehi bhikkhave bhikkhūhi puna pavāretabbaṁ pavāritānaṁ anāpatti .pe.
Athaññe āvāsikā bhikkhū āgacchanti samasamā .pe.
Thokatarā. Pavāritā suppavāritā tesaṁ santike pavāretabbaṁ
pavāritānaṁ anāpatti. Idha pana bhikkhave aññatarasmiṁ āvāse
tadahupavāraṇāya sambahulā āvāsikā bhikkhū sannipatanti pañca vā
atirekā vā. Te na jānanti atthaññe āvāsikā bhikkhū
anāgatāti. Te dhammasaññino vinayasaññino vaggā samaggasaññino
pavārenti. Tehi pavāritamatte sabbāya vuṭṭhitāya parisāya
athaññe āvāsikā bhikkhū āgacchanti bahutarā. Tehi bhikkhave
bhikkhūhi puna pavāretabbaṁ pavāritānaṁ anāpatti .pe. Athaññe
āvāsikā bhikkhū āgacchanti samasamā .pe. Thokatarā. Pavāritā
suppavāritā tesaṁ santike pavāretabbaṁ pavāritānaṁ anāpatti.
Anāpattipaṇṇarasakaṁ niṭṭhitaṁ.

[234] Idha pana bhikkhave aññatarasmiṁ āvāse tadahupavāraṇāya
sambahulā āvāsikā bhikkhū sannipatanti pañca vā atirekā vā.
Te jānanti atthaññe āvāsikā bhikkhū anāgatāti. Te
dhammasaññino vinayasaññino vaggā samaggasaññino pavārenti.
Tehi pavāriyamāne athaññe āvāsikā bhikkhū āgacchanti bahutarā.
Tehi bhikkhave bhikkhūhi puna pavāretabbaṁ pavāritānaṁ āpatti
dukkaṭassa .pe. Athaññe āvāsikā bhikkhū āgacchanti samasamā .pe.
Thokatarā. Pavāritā suppavāritā avasesehi pavāretabbaṁ
pavāritānaṁ āpatti dukkaṭassa. Idha pana bhikkhave aññatarasmiṁ
āvāse tadahupavāraṇāya sambahulā āvāsikā bhikkhū sannipatanti
pañca vā atirekā vā. Te jānanti atthaññe āvāsikā
bhikkhū anāgatāti. Te dhammasaññino vinayasaññino vaggā samaggasaññino
pavārenti. Tehi pavāritamatte .pe. Avuṭṭhitāya
parisāya ekaccāya vuṭṭhitāya parisāya sabbāya vuṭṭhitāya
parisāya athaññe āvāsikā bhikkhū āgacchanti bahutarā .pe.
Samasamā .pe. Thokatarā. Pavāritā suppavāritā tesaṁ santike
pavāretabbaṁ pavāritānaṁ āpatti dukkaṭassa.
Vaggāsamaggasaññipaṇṇarasakaṁ niṭṭhitaṁ.