[205] Tena samayena buddho bhagavā rājagahe viharati veḷuvane
kalandakanivāpe. Tena kho pana samayena bhagavatā bhikkhūnaṁ vassāvāso
appaññatto hoti. Tedha 1 bhikkhū hemantampi gimhampi vassampi
cārikaṁ caranti. Manussā ujjhāyanti khīyanti vipācenti kathaṁ
hi nāma samaṇā sakyaputtiyā hemantampi gimhampi vassampi
cārikaṁ carissanti haritāni tiṇāni sammaddantā ekindriyaṁ jīvaṁ
viheṭhentā bahū khuddake pāṇe saṅghātaṁ āpādentā ime
hi nāma aññatitthiyā paribbājakā 2 durakkhātadhammā vassāvāsaṁ
alliyissanti saṅkāsayissanti 3 ime hi nāma sakuntakā rukkhaggesu
kulāvakāni karitvā vassāvāsaṁ alliyissanti saṅkāsayissanti ime
pana samaṇā sakyaputtiyā hemantampi gimhampi vassampi cārikaṁ
caranti haritāni tiṇāni sammaddantā ekindriyaṁ jīvaṁ viheṭhentā
bahū khuddake pāṇe saṅghātaṁ āpādentāti. Assosuṁ kho bhikkhū
tesaṁ manussānaṁ ujjhāyantānaṁ khīyantānaṁ vipācentānaṁ. Athakho
te bhikkhū bhagavato etamatthaṁ ārocesuṁ. Athakho bhagavā etasmiṁ
nidāne etasmiṁ pakaraṇe dhammiṁ kathaṁ katvā bhikkhū āmantesi
anujānāmi bhikkhave vassaṁ upagantunti.
1 idhasaddo nipātamattoti tabbaṇṇanā. 2 Ma. Yu. ayaṁ pāṭho natthi.
3 Ma. saṅkasāyissanti. Yu. Rā. saṅkāpayissanti.

[206] Athakho bhikkhūnaṁ etadahosi kadā nu kho vassaṁ
upagantabbanti. Bhagavato etamatthaṁ ārocesuṁ. Anujānāmi
bhikkhave vassāne vassaṁ upagantunti. Athakho bhikkhūnaṁ etadahosi
kati nu kho vassūpanāyikāti. Bhagavato etamatthaṁ ārocesuṁ.
Dvemā bhikkhave vassūpanāyikā purimikā pacchimikā 1 aparajjugatāya
āsāḷhiyā purimikā upagantabbā māsagatāya āsāḷhiyā
pacchimikā upagantabbā imā kho bhikkhave dve vassūpanāyikāti.

[207] Tena kho pana samayena chabbaggiyā bhikkhū vassaṁ upagantvā
antarāvassaṁ cārikaṁ caranti. Manussā tatheva ujjhāyanti khīyanti
vipācenti kathaṁ hi nāma samaṇā sakyaputtiyā hemantampi gimhampi
vassampi cārikaṁ carissanti haritāni tiṇāni sammaddantā ekindriyaṁ
jīvaṁ viheṭhentā bahū khuddake pāṇe saṅghātaṁ āpādentā ime hi nāma
aññatitthiyā durakkhātadhammā vassāvāsaṁ alliyissanti saṅkāsayissanti
ime hi nāma sakuntakā rukkhaggesu kulāvakāni karitvā vassāvāsaṁ
alliyissanti saṅkāsayissanti ime pana samaṇā sakyaputtiyā
hemantampi gimhampi vassampi cārikaṁ caranti haritāni tiṇāni
sammaddantā ekindriyaṁ jīvaṁ viheṭhentā bahū khuddake pāṇe
saṅghātaṁ āpādentāti. Assosuṁ kho bhikkhū tesaṁ manussānaṁ
ujjhāyantānaṁ khīyantānaṁ vipācentānaṁ. Ye te bhikkhū appicchā
te ujjhāyanti khīyanti vipācenti kathaṁ hi nāma chabbaggiyā
1 Ma. Yu. pacchimikāti.
Bhikkhū vassaṁ upagantvā antarāvassaṁ cārikaṁ carissantīti. Athakho
te bhikkhū bhagavato etamatthaṁ ārocesuṁ. Athakho bhagavā etasmiṁ
nidāne etasmiṁ pakaraṇe dhammiṁ kathaṁ katvā bhikkhū āmantesi na
bhikkhave vassaṁ upagantvā purimaṁ vā temāsaṁ pacchimaṁ vā temāsaṁ
avasitvā cārikā pakkamitabbā yo pakkameyya āpatti
dukkaṭassāti.

[208] Tena kho pana samayena chabbaggiyā bhikkhū na icchanti
vassaṁ upagantuṁ. Bhagavato etamatthaṁ ārocesuṁ. Na bhikkhave
vassaṁ na upagantabbaṁ yo na upagaccheyya āpatti dukkaṭassāti.
Tena kho pana samayena chabbaggiyā bhikkhū tadahuvassūpanāyikāya vassaṁ
anupagantukāmā sañcicca āvāsaṁ atikkamanti. Bhagavato etamatthaṁ
ārocesuṁ. Na bhikkhave tadahuvassūpanāyikāya vassaṁ anupagantukāmena
sañcicca āvāso atikkamitabbo yo atikkameyya āpatti
dukkaṭassāti.

[209] Tena kho pana samayena rājā māgadho seniyo bimbisāro
vassaṁ ukkaḍḍhitukāmo bhikkhūnaṁ santike dūtaṁ pāhesi yadi panayyā 1
āgame juṇhe vassaṁ upagaccheyyunti. Bhagavato etamatthaṁ
ārocesuṁ. Anujānāmi bhikkhave rājūnaṁ anuvattitunti.

[210] Athakho bhagavā rājagahe yathābhirantaṁ viharitvā yena
sāvatthī tena cārikaṁ pakkāmi anupubbena cārikaṁ caramāno yena
1 Ma. panāyyā.
Sāvatthī tadavasari. Tatra sudaṁ bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena kosalesu
janapadesu udenena upāsakena saṅghaṁ uddissa vihāro kārāpito
hoti. So bhikkhūnaṁ santike dūtaṁ pāheti 1 āgacchantu bhadantā
icchāmi dānañca dātuṁ dhammañca sotuṁ bhikkhū ca passitunti.
Bhikkhū evamāhaṁsu bhagavatā āvuso paññattaṁ na vassaṁ upagantvā
purimaṁ vā temāsaṁ pacchimaṁ vā temāsaṁ avasitvā cārikā
pakkamitabbāti āgametu udeno upāsako yāva bhikkhū vassaṁ vasanti
vassaṁ vutthā gamissanti sace panassa accāyikaṁ karaṇīyaṁ tattheva
āvāsikānaṁ bhikkhūnaṁ santike vihāraṁ patiṭṭhāpetūti. Udeno
upāsako ujjhāyati khīyati vipāceti kathaṁ hi nāma bhadantā
mayā pahite na āgacchissanti ahaṁ hi dāyako kārako
saṅghupaṭṭhākoti. Assosuṁ kho bhikkhū udenassa upāsakassa ujjhāyantassa
khīyantassa vipācentassa. Athakho te bhikkhū bhagavato etamatthaṁ
ārocesuṁ. Athakho bhagavā etasmiṁ nidāne [2]- dhammiṁ kathaṁ katvā
bhikkhū āmantesi anujānāmi bhikkhave sattannaṁ sattāhakaraṇīyena
pahite gantuṁ na tveva appahite bhikkhussa bhikkhuniyā sikkhamānāya
sāmaṇerassa sāmaṇeriyā upāsakassa upāsikāya anujānāmi
bhikkhave imesaṁ sattannaṁ sattāhakaraṇīyena pahite gantuṁ na tveva
appahite sattāhaṁ sannivaṭṭo kātabbo. Idha pana bhikkhave
1 Ma. Yu. pāhesi. 2 Ma. etasmiṁ pakaraṇe.
Upāsakena saṅghaṁ uddissa vihāro kārāpito hoti. So ce
bhikkhūnaṁ santike dūtaṁ pahiṇeyya āgacchantu bhadantā icchāmi
dānañca dātuṁ dhammañca sotuṁ bhikkhū ca passitunti. Gantabbaṁ
bhikkhave sattāhakaraṇīyena pahite na tveva appahite sattāhaṁ
sannivaṭṭo kātabbo. Idha pana bhikkhave upāsakena saṅghaṁ
uddissa aḍḍhayogo kārāpito hoti .pe. Pāsādo kārāpito
hoti. Hammiyaṁ kārāpitaṁ hoti. Guhā kārāpitā hoti.
Pariveṇaṁ kārāpitaṁ hoti. Koṭṭhako kārāpito hoti. Upaṭṭhānasālā
kārāpitā hoti. Aggisālā kārāpitā hoti. Kappiyakuṭī kārāpitā
hoti. Vaccakuṭī kārāpitā hoti. Caṅkamo kārāpito hoti.
Caṅkamanasālā kārāpitā hoti. Udapāno kārāpito hoti. Udapānasālā
kārāpitā hoti. Jantāgharaṁ kārāpitaṁ hoti. Jantāgharasālā
kārāpitā hoti. Pokkharaṇī kārāpitā hoti. Maṇḍapo kārāpito
hoti. Ārāmo kārāpito hoti. Ārāmavatthuṁ kārāpitaṁ hoti. So
ce bhikkhūnaṁ santike dūtaṁ pahiṇeyya āgacchantu bhadantā icchāmi
dānañca dātuṁ dhammañca sotuṁ bhikkhū ca passitunti. Gantabbaṁ
bhikkhave sattāhakaraṇīyena pahite na tveva appahite sattāhaṁ
sannivaṭṭo kātabbo. Idha pana bhikkhave upāsakena sambahule
bhikkhū uddissa .pe. Ekaṁ bhikkhuṁ uddissa vihāro kārāpito
hoti. Aḍḍhayogo kārāpito hoti. Pāsādo kārāpito
Hoti. Hammiyaṁ kārāpitaṁ hoti. Guhā kārāpitā hoti.
Pariveṇaṁ kārāpitaṁ hoti. Koṭṭhako kārāpito hoti. Upaṭṭhānasālā
kārāpitā hoti. Aggisālā kārāpitā hoti. Kappiyakuṭī
kārāpitā hoti. Vaccakuṭī kārāpitā hoti. Caṅkamo kārāpito
hoti. Caṅkamanasālā kārāpitā hoti. Udapāno kārāpito
hoti. Udapānasālā kārāpitā hoti. Jantāgharaṁ kārāpitaṁ
hoti. Jantāgharasālā kārāpitā hoti. Pokkharaṇī kārāpitā
hoti. Maṇḍapo kārāpito hoti. Ārāmo kārāpito hoti.
Ārāmavatthuṁ kārāpitaṁ hoti. So ce bhikkhūnaṁ santike dūtaṁ
pahiṇeyya āgacchantu bhadantā icchāmi dānañca dātuṁ dhammañca
sotuṁ bhikkhū ca passitunti. Gantabbaṁ bhikkhave sattāhakaraṇīyena
pahite na tveva appahite sattāhaṁ sannivaṭṭo kātabbo. Idha
pana bhikkhave upāsakena bhikkhunīsaṅghaṁ uddissa sambahulā bhikkhuniyo
uddissa ekaṁ bhikkhuniṁ uddissa sambahulā sikkhamānāyo uddissa
ekaṁ sikkhamānaṁ uddissa sambahule sāmaṇere uddissa ekaṁ
sāmaṇeraṁ uddissa sambahulā sāmaṇeriyo uddissa ekaṁ sāmaṇeriṁ
uddissa vihāro kārāpito hoti. Aḍḍhayogo kārāpito hoti.
Pāsādo kārāpito hoti. Hammiyaṁ kārāpitaṁ hoti. Guhā
kārāpitā hoti. Pariveṇaṁ kārāpitaṁ hoti. Koṭṭhako kārāpito
hoti. Upaṭṭhānasālā kārāpitā hoti. Aggisālā kārāpitā
Hoti. Kappiyakuṭī kārāpitā hoti. Vaccakuṭī kārāpitā hoti 1 .
Caṅkamo kārāpito hoti. Caṅkamanasālā kārāpitā hoti.
Udapāno kārāpito hoti. Udapānasālā kārāpitā hoti.
Pokkharaṇī kārāpitā hoti. Maṇḍapo kārāpito hoti.
Ārāmo kārāpito hoti. Ārāmavatthuṁ kārāpitaṁ hoti. So
ce bhikkhūnaṁ santike dūtaṁ pahiṇeyya āgacchantu bhadantā icchāmi
dānañca dātuṁ dhammañca sotuṁ bhikkhū ca passitunti. Gantabbaṁ
bhikkhave sattāhakaraṇīyena pahite na tveva appahite sattāhaṁ
sannivaṭṭo kātabbo. Idha pana bhikkhave upāsakena attano
atthāya nivesanaṁ kārāpitaṁ hoti. Sayanigharaṁ kārāpitaṁ hoti.
Uddosito kārāpito hoti. Aṭṭo kārāpito hoti. Māḷo
kārāpito hoti. Āpaṇo kārāpito hoti. Āpaṇasālā
kārāpitā hoti. Pāsādo kārāpito hoti. Hammiyaṁ kārāpitaṁ hoti.
Guhā kārāpitā hoti. Pariveṇaṁ kārāpitaṁ hoti. Koṭṭhako
kārāpito hoti. Upaṭṭhānasālā kārāpitā hoti. Aggisālā
kārāpitā hoti. Rasavatī kārāpitā hoti. Vaccakuṭī kārāpitā
hoti. Caṅkamo kārāpito hoti. Caṅkamanasālā kārāpitā hoti.
Udapāno kārāpito hoti. Udapānasālā kārāpitā hoti. Jantāgharaṁ
kārāpitaṁ hoti. Jantāgharasālā kārāpitā hoti. Pokkharaṇī
kārāpitā hoti. Maṇḍapo kārāpito hoti. Ārāmo kārāpito
1 Ma. Yu. ito paraṁ kiriyāpadaṁ na dissati.
Hoti. Ārāmavatthuṁ kārāpitaṁ hoti. Puttassa vā vāreyyaṁ
hoti dhītuyā vā vāreyyaṁ hoti gilāno vā hoti abhiññātaṁ
vā suttantaṁ bhaṇati. So ce bhikkhūnaṁ santike dūtaṁ pahiṇeyya
āgacchantu bhadantā imaṁ suttantaṁ pariyāpuṇissanti purāyaṁ
suttanto na 1 palujjatīti. Aññataraṁ vā panassa kiccaṁ hoti
karaṇīyaṁ vā. So ce bhikkhūnaṁ santike dūtaṁ pahiṇeyya āgacchantu
bhadantā icchāmi dānañca dātuṁ dhammañca sotuṁ bhikkhū ca
passitunti. Gantabbaṁ bhikkhave sattāhakaraṇīyena pahite na tveva
appahite sattāhaṁ sannivaṭṭo kātabbo. Idha pana bhikkhave
upāsikāya saṅghaṁ uddissa vihāro kārāpito hoti. Sā ce
bhikkhūnaṁ santike dūtaṁ pahiṇeyya āgacchantu ayyā icchāmi
dānañca dātuṁ dhammañca sotuṁ bhikkhū ca passitunti. Gantabbaṁ
bhikkhave sattāhakaraṇīyena pahite na tveva appahite sattāhaṁ
sannivaṭṭo kātabbo. Idha pana bhikkhave upāsikāya saṅghaṁ
uddissa aḍḍhayogo kārāpito hoti. Pāsādo kārāpito
hoti. Hammiyaṁ kārāpitaṁ hoti. Guhā kārāpitā hoti. Pariveṇaṁ
kārāpitaṁ hoti. Koṭṭhako kārāpito hoti. Upaṭṭhānasālā kārāpitā
hoti. Aggisālā kārāpitā hoti. Kappiyakuṭī kārāpitā
hoti. Vaccakuṭī kārāpitā hoti. Caṅkamo kārāpito hoti.
Caṅkamanasālā kārāpitā hoti. Udapāno kārāpito hoti. Udapānasālā
1 Ma. Yu. nasaddo natthi.
Kārāpitā hoti. Jantāgharaṁ kārāpitaṁ hoti. Jantāgharasālā
kārāpitā hoti. Pokkharaṇī kārāpitā hoti. Maṇḍapo
kārāpito hoti. Ārāmo kārāpito hoti. Ārāmavatthuṁ
kārāpitaṁ hoti. Sā ce bhikkhūnaṁ santike dūtaṁ pahiṇeyya āgacchantu
ayyā icchāmi dānañca dātuṁ dhammañca sotuṁ bhikkhū ca passitunti.
Gantabbaṁ bhikkhave sattāhakaraṇīyena pahite na tveva appahite
sattāhaṁ sannivaṭṭo kātabbo. Idha pana bhikkhave upāsikāya
sambahule bhikkhū uddissa .pe. Ekaṁ bhikkhuṁ uddissa bhikkhunīsaṅghaṁ
uddissa sambahulā bhikkhuniyo uddissa ekaṁ bhikkhuniṁ uddissa
sambahulā sikkhamānāyo uddissa ekaṁ sikkhamānaṁ uddissa sambahule
sāmaṇere uddissa ekaṁ sāmaṇeraṁ uddissa sambahulā sāmaṇeriyo
uddissa ekaṁ sāmaṇeriṁ uddissa .pe. Attano atthāya nivesanaṁ
kārāpitaṁ hoti. Sayanigharaṁ kārāpitaṁ hoti. Uddosito kārāpito
hoti. Aṭṭo kārāpito hoti. Māḷo kārāpito hoti.
Āpaṇo kārāpito hoti. Āpaṇasālā kārāpitā hoti.
Pāsādo kārāpito hoti. Hammiyaṁ kārāpitaṁ hoti. Guhā kārāpitā
hoti. Pariveṇaṁ kārāpitaṁ hoti. Koṭṭhako kārāpito hoti.
Upaṭṭhānasālā kārāpitā hoti. Aggisālā kārāpitā hoti. Rasavatī
kārāpitā hoti. Vaccakuṭī kārāpitā hoti. Caṅkamo kārāpito
hoti. Caṅkamanasālā kārāpitā hoti. Udapāno kārāpito
Hoti. Udapānasālā kārāpitā hoti. Pokkharaṇī kārāpitā hoti.
Maṇḍapo kārāpito hoti. Ārāmo kārāpito hoti. Ārāmavatthuṁ
kārāpitaṁ hoti. Puttassa vā vāreyyaṁ hoti dhītuyā vā vāreyyaṁ
hoti gilānā vā hoti abhiññātaṁ vā suttantaṁ bhaṇati. Sā ce
bhikkhūnaṁ santike dūtaṁ pahiṇeyya āgacchantu ayyā imaṁ suttantaṁ
pariyāpuṇissanti purāyaṁ suttanto na 1 palujjatīti. Aññataraṁ
vā panassā kiccaṁ hoti karaṇīyaṁ vā. Sā ce bhikkhūnaṁ santike
dūtaṁ pahiṇeyya āgacchantu ayyā icchāmi dānañca dātuṁ
dhammañca sotuṁ bhikkhū ca passitunti. Gantabbaṁ bhikkhave sattāhakaraṇīyena
pahite na tveva appahite sattāhaṁ sannivaṭṭo
kātabbo. Idha pana bhikkhave bhikkhunā saṅghaṁ uddissa bhikkhuniyā
saṅghaṁ uddissa sikkhamānāya saṅghaṁ uddissa sāmaṇerena saṅghaṁ
uddissa sāmaṇeriyā saṅghaṁ uddissa sambahule bhikkhū uddissa
ekaṁ bhikkhuṁ uddissa bhikkhunīsaṅghaṁ uddissa sambahulā bhikkhuniyo
uddissa ekaṁ bhikkhuniṁ uddissa sambahulā sikkhamānāyo uddissa
ekaṁ sikkhamānaṁ uddissa sambahule sāmaṇere uddissa ekaṁ
sāmaṇeraṁ uddissa sambahulā sāmaṇeriyo uddissa ekaṁ sāmaṇeriṁ
uddissa .pe. Attano atthāya vihāro kārāpito hoti.
Aḍḍhayogo kārāpito hoti. Pāsādo kārāpito hoti.
Hammiyaṁ kārāpitaṁ hoti. Guhā kārāpitā hoti. Pariveṇaṁ kārāpitaṁ
1 Ma. Yu. nasaddo natthi.
Hoti. Koṭṭhako kārāpito hoti. Upaṭṭhānasālā kārāpitā
hoti. Aggisālā kārāpitā hoti. Kappiyakuṭī kārāpitā
hoti. Vaccakuṭī kārāpitā hoti. Caṅkamo kārāpito hoti.
Caṅkamanasālā kārāpitā hoti. Udapāno kārāpito hoti.
Udapānasālā kārāpitā hoti. Pokkharaṇī kārāpitā hoti.
Maṇḍapo kārāpito hoti. Ārāmo kārāpito hoti.
Ārāmavatthuṁ kārāpitaṁ hoti. Sā ce bhikkhūnaṁ santike dūtaṁ
pahiṇeyya āgacchantu ayyā icchāmi dānañca dātuṁ dhammañca
sotuṁ bhikkhū ca passitunti. Gantabbaṁ bhikkhave sattāhakaraṇīyena
pahite na tveva appahite sattāhaṁ sannivaṭṭo kātabboti.

[211] Tena kho pana samayena aññataro bhikkhu gilāno hoti.
So bhikkhūnaṁ santike dūtaṁ pāhesi ahaṁ hi gilāno āgacchantu
bhikkhū icchāmi bhikkhūnaṁ āgatanti. Bhagavato etamatthaṁ ārocesuṁ.
Anujānāmi bhikkhave pañcannaṁ sattāhakaraṇīyena appahitepi gantuṁ
pageva pahite bhikkhussa bhikkhuniyā sikkhamānāya sāmaṇerassa
sāmaṇeriyā anujānāmi bhikkhave imesaṁ pañcannaṁ sattāhakaraṇīyena
appahitepi gantuṁ pageva pahite sattāhaṁ sannivaṭṭo kātabbo.
Idha pana bhikkhave bhikkhu gilāno hoti. So ce bhikkhūnaṁ santike
dūtaṁ pahiṇeyya ahaṁ hi gilāno āgacchantu bhikkhū icchāmi
bhikkhūnaṁ āgatanti. Gantabbaṁ bhikkhave sattāhakaraṇīyena appahitepi
Pageva pahite gilānabhattaṁ vā pariyesissāmi gilānupaṭṭhākabhattaṁ
vā pariyesissāmi gilānabhesajjaṁ vā pariyesissāmi pucchissāmi
vā upaṭṭhahissāmi vāti sattāhaṁ sannivaṭṭo kātabbo.
Idha pana bhikkhave bhikkhussa anabhirati uppannā hoti. So ce
bhikkhūnaṁ santike dūtaṁ pahiṇeyya anabhirati me uppannā āgacchantu
bhikkhū icchāmi bhikkhūnaṁ āgatanti. Gantabbaṁ bhikkhave sattāhakaraṇīyena
appahitepi pageva pahite anabhiratiṁ vūpakāsessāmi
vā vūpakāsāpessāmi vā dhammakathaṁ vāssa karissāmīti sattāhaṁ
sannivaṭṭo kātabbo. Idha pana bhikkhave bhikkhussa kukkuccaṁ
uppannaṁ hoti. So ce bhikkhūnaṁ santike dūtaṁ pahiṇeyya kukkuccaṁ
me uppannaṁ āgacchantu bhikkhū icchāmi bhikkhūnaṁ āgatanti.
Gantabbaṁ bhikkhave sattāhakaraṇīyena appahitepi pageva pahite
kukkuccaṁ vinodessāmi vā vinodāpessāmi vā dhammakathaṁ vāssa
karissāmīti sattāhaṁ sannivaṭṭo kātabbo. Idha pana bhikkhave
bhikkhussa diṭṭhigataṁ uppannaṁ hoti. So ce bhikkhūnaṁ santike dūtaṁ
pahiṇeyya diṭṭhigataṁ me uppannaṁ āgacchantu bhikkhū icchāmi
bhikkhūnaṁ āgatanti. Gantabbaṁ bhikkhave sattāhakaraṇīyena appahitepi
pageva pahite diṭṭhigataṁ vivecessāmi vā vivecāpessāmi vā
dhammakathaṁ vāssa karissāmīti sattāhaṁ sannivaṭṭo kātabbo.
Idha pana bhikkhave bhikkhu garudhammaṁ ajjhāpanno hoti parivāsāraho.
So ce bhikkhūnaṁ santike dūtaṁ pahiṇeyya ahaṁ hi garudhammaṁ
ajjhāpanno parivāsāraho āgacchantu bhikkhū icchāmi bhikkhūnaṁ
āgatanti. Gantabbaṁ bhikkhave sattāhakaraṇīyena appahitepi pageva
pahite parivāsadānaṁ ussukkaṁ karissāmi vā anussāvessāmi vā
gaṇapūrako vā bhavissāmīti sattāhaṁ sannivaṭṭo kātabbo.
Idha pana bhikkhave bhikkhu mūlāya paṭikassanāraho hoti. So ce
bhikkhūnaṁ santike dūtaṁ pahiṇeyya ahaṁ 1 hi mūlāya paṭikassanāraho
āgacchantu bhikkhū icchāmi bhikkhūnaṁ āgatanti. Gantabbaṁ bhikkhave
sattāhakaraṇīyena appahitepi pageva pahite mūlāya paṭikassanaṁ
ussukkaṁ karissāmi vā anussāvessāmi vā gaṇapūrako vā bhavissāmīti
sattāhaṁ sannivaṭṭo kātabbo. Idha pana bhikkhave bhikkhu
mānattāraho hoti. So ce bhikkhūnaṁ santike dūtaṁ pahiṇeyya ahaṁ
hi mānattāraho āgacchantu bhikkhū icchāmi bhikkhūnaṁ āgatanti.
Gantabbaṁ bhikkhave sattāhakaraṇīyena appahitepi pageva pahite
mānattadānaṁ ussukkaṁ karissāmi vā anussāvessāmi vā gaṇapūrako
vā bhavissāmīti sattāhaṁ sannivaṭṭo kātabbo. Idha pana
bhikkhave bhikkhu abbhānāraho hoti. So ce bhikkhūnaṁ santike
dūtaṁ pahiṇeyya ahaṁ hi abbhānāraho āgacchantu bhikkhū
icchāmi bhikkhūnaṁ āgatanti. Gantabbaṁ bhikkhave sattāhakaraṇīyena
appahitepi pageva pahite abbhānaṁ ussukkaṁ karissāmi vā
1 Po. ahañcamhi. ito paraṁ īdisameva.
Anussāvessāmi vā gaṇapūrako vā bhavissāmīti sattāhaṁ sannivaṭṭo
kātabbo. Idha pana bhikkhave bhikkhussa saṅgho kammaṁ kattukāmo
hoti tajjanīyaṁ vā niyassaṁ 1 vā pabbājanīyaṁ vā paṭisāraṇīyaṁ vā
ukkhepanīyaṁ vā. So ce bhikkhūnaṁ santike dūtaṁ pahiṇeyya saṅgho
me kammaṁ kattukāmo āgacchantu bhikkhū icchāmi bhikkhūnaṁ
āgatanti. Gantabbaṁ bhikkhave sattāhakaraṇīyena appahitepi pageva
pahite kinti nu kho saṅgho kammaṁ na kareyya lahukāya vā
pariṇāmeyyāti sattāhaṁ sannivaṭṭo kātabbo. Kataṁ vā panassa
hoti saṅghena kammaṁ tajjanīyaṁ vā niyassaṁ vā pabbājanīyaṁ vā
paṭisāraṇīyaṁ vā ukkhepanīyaṁ vā. So ce bhikkhūnaṁ santike dūtaṁ
pahiṇeyya saṅgho me kammaṁ akāsi āgacchantu bhikkhū icchāmi
bhikkhūnaṁ āgatanti. Gantabbaṁ bhikkhave sattāhakaraṇīyena appahitepi
pageva pahite kinti nu kho sammāvatteyya lomaṁ pāteyya
netthāraṁ vatteyya saṅgho taṁ kammaṁ paṭippassambheyyāti sattāhaṁ
sannivaṭṭo kātabbo. Idha pana bhikkhave bhikkhunī gilānā hoti.
Sā ce bhikkhūnaṁ santike dūtaṁ pahiṇeyya ahaṁ hi 2 gilānā
āgacchantu ayyā icchāmi ayyānaṁ āgatanti. Gantabbaṁ
bhikkhave sattāhakaraṇīyena appahitepi pageva pahite gilānabhattaṁ
vā pariyesissāmi gilānupaṭṭhākabhattaṁ vā pariyesissāmi gilānabhesajjaṁ
1 Yu. Rā. nissayaṁ. 2 Ma. hisaddo natthi.
Vā pariyesissāmi pucchissāmi vā upaṭṭhahissāmi vāti sattāhaṁ
sannivaṭṭo kātabbo. Idha pana bhikkhave bhikkhuniyā anabhirati
uppannā hoti. Sā ce bhikkhūnaṁ santike dūtaṁ pahiṇeyya
anabhirati me uppannā āgacchantu ayyā icchāmi ayyānaṁ
āgatanti. Gantabbaṁ bhikkhave sattāhakaraṇīyena appahitepi pageva
pahite anabhiratiṁ vūpakāsessāmi vā vūpakāsāpessāmi vā dhammakathaṁ
vāssā karissāmīti sattāhaṁ sannivaṭṭo kātabbo. Idha pana
bhikkhave bhikkhuniyā kukkuccaṁ uppannaṁ hoti. Sā ce bhikkhūnaṁ
santike dūtaṁ pahiṇeyya kukkuccaṁ me uppannaṁ āgacchantu
ayyā icchāmi ayyānaṁ āgatanti. Gantabbaṁ bhikkhave sattāhakaraṇīyena
appahitepi pageva pahite kukkuccaṁ vinodessāmi vā
vinodāpessāmi vā dhammakathaṁ vāssā karissāmīti sattāhaṁ
sannivaṭṭo kātabbo. Idha pana bhikkhave bhikkhuniyā diṭṭhigataṁ
uppannaṁ hoti. Sā ce bhikkhūnaṁ santike dūtaṁ pahiṇeyya
diṭṭhigataṁ me uppannaṁ āgacchantu ayyā icchāmi ayyānaṁ
āgatanti. Gantabbaṁ bhikkhave sattāhakaraṇīyena appahitepi pageva
pahite diṭṭhigataṁ vivecessāmi vā vivecāpessāmi vā dhammakathaṁ
vāssā karissāmīti sattāhaṁ sannivaṭṭo kātabbo. Idha pana
bhikkhave bhikkhunī garudhammaṁ ajjhāpannā hoti mānattārahā. Sā
ce bhikkhūnaṁ santike dūtaṁ pahiṇeyya ahaṁ hi garudhammaṁ ajjhāpannā
Mānattārahā āgacchantu ayyā icchāmi ayyānaṁ āgatanti.
Gantabbaṁ bhikkhave sattāhakaraṇīyena appahitepi pageva pahite
mānattadānaṁ ussukkaṁ karissāmīti sattāhaṁ sannivaṭṭo kātabbo.
Idha pana bhikkhave bhikkhunī mūlāya paṭikassanārahā hoti. Sā
ce bhikkhūnaṁ santike dūtaṁ pahiṇeyya ahaṁ hi mūlāya paṭikassanārahā
āgacchantu ayyā icchāmi ayyānaṁ āgatanti. Gantabbaṁ bhikkhave
sattāhakaraṇīyena appahitepi pageva pahite mūlāya paṭikassanaṁ
ussukkaṁ karissāmīti sattāhaṁ sannivaṭṭo kātabbo. Idha pana
bhikkhave bhikkhunī abbhānārahā hoti. Sā ce bhikkhūnaṁ santike
dūtaṁ pahiṇeyya ahaṁ hi abbhānārahā āgacchantu ayyā
icchāmi ayyānaṁ āgatanti. Gantabbaṁ bhikkhave sattāhakaraṇīyena
appahitepi pageva pahite abbhānaṁ ussukkaṁ karissāmīti sattāhaṁ
sannivaṭṭo kātabbo. Idha pana bhikkhave bhikkhuniyā saṅgho
kammaṁ kattukāmo hoti tajjanīyaṁ vā niyassaṁ vā pabbājanīyaṁ vā
paṭisāraṇīyaṁ vā ukkhepanīyaṁ vā. Sā ce bhikkhūnaṁ santike dūtaṁ
pahiṇeyya saṅgho me kammaṁ kattukāmo āgacchantu ayyā
icchāmi ayyānaṁ āgatanti. Gantabbaṁ bhikkhave sattāhakaraṇīyena
appahitepi pageva pahite kinti nu kho saṅgho kammaṁ na
kareyya lahukāya 1 vā pariṇāmeyyāti sattāhaṁ sannivaṭṭo
kātabbo. Kataṁ vā panassā hoti saṅghena kammaṁ tajjanīyaṁ
1 Po. lahutāya.
Vā niyassaṁ vā pabbājanīyaṁ vā paṭisāraṇīyaṁ vā ukkhepanīyaṁ vā. Sā
ce bhikkhūnaṁ santike dūtaṁ pahiṇeyya saṅgho me kammaṁ akāsi āgacchantu
ayyā icchāmi ayyānaṁ āgatanti. Gantabbaṁ bhikkhave sattāhakaraṇīyena
appahitepi pageva pahite kinti nu kho sammāvatteyya
lomaṁ pāteyya netthāraṁ vatteyya saṅgho taṁ kammaṁ
paṭippassambheyyāti sattāhaṁ sannivaṭṭo kātabbo. Idha pana
bhikkhave sikkhamānā gilānā hoti. Sā ce bhikkhūnaṁ santike dūtaṁ
pahiṇeyya ahaṁ hi gilānā āgacchantu ayyā icchāmi
ayyānaṁ āgatanti. Gantabbaṁ bhikkhave sattāhakaraṇīyena appahitepi
pageva pahite gilānabhattaṁ vā pariyesissāmi gilānupaṭṭhākabhattaṁ
vā pariyesissāmi gilānabhesajjaṁ vā pariyesissāmi pucchissāmi vā
upaṭṭhahissāmi vāti sattāhaṁ sannivaṭṭo kātabbo. Idha pana
bhikkhave sikkhamānāya anabhirati uppannā hoti .pe. Kukkuccaṁ
uppannaṁ hoti. Diṭṭhigataṁ uppannaṁ hoti. Sikkhā kupitā hoti.
Sā ce bhikkhūnaṁ santike dūtaṁ pahiṇeyya sikkhā me kupitā
āgacchantu ayyā icchāmi ayyānaṁ āgatanti. Gantabbaṁ bhikkhave
sattāhakaraṇīyena appahitepi pageva pahite sikkhāsamādānaṁ
ussukkaṁ karissāmīti sattāhaṁ sannivaṭṭo kātabbo. Idha pana
bhikkhave sikkhamānā upasampajjitukāmā hoti. Sā ce bhikkhūnaṁ
santike dūtaṁ pahiṇeyya ahaṁ hi upasampajjitukāmā āgacchantu
Ayyā icchāmi ayyānaṁ āgatanti. Gantabbaṁ bhikkhave sattāhakaraṇīyena
appahitepi pageva pahite upasampadaṁ ussukkaṁ karissāmi
vā anussāvessāmi vā gaṇapūrako vā bhavissāmīti sattāhaṁ
sannivaṭṭo kātabbo. Idha pana bhikkhave sāmaṇero gilāno
hoti. So ce bhikkhūnaṁ santike dūtaṁ pahiṇeyya ahaṁ hi gilāno
āgacchantu bhikkhū icchāmi bhikkhūnaṁ āgatanti. Gantabbaṁ bhikkhave
sattāhakaraṇīyena appahitepi pageva pahite gilānabhattaṁ vā
pariyesissāmi gilānupaṭṭhākabhattaṁ vā pariyesissāmi gilānabhesajjaṁ
vā pariyesissāmi pucchissāmi vā upaṭṭhahissāmi vāti sattāhaṁ
sannivaṭṭo kātabbo. Idha pana bhikkhave sāmaṇerassa anabhirati
uppannā hoti .pe. Kukkuccaṁ uppannaṁ hoti. Diṭṭhigataṁ
uppannaṁ hoti. Sāmaṇero vassaṁ pucchitukāmo hoti. So
ce bhikkhūnaṁ santike dūtaṁ pahiṇeyya ahaṁ hi vassaṁ pucchitukāmo
āgacchantu bhikkhū icchāmi bhikkhūnaṁ āgatanti. Gantabbaṁ bhikkhave
sattāhakaraṇīyena appahitepi pageva pahite pucchissāmi vā
ācikkhissāmi vāti sattāhaṁ sannivaṭṭo kātabbo. Idha pana
bhikkhave sāmaṇero upasampajjitukāmo hoti. So ce bhikkhūnaṁ
santike dūtaṁ pahiṇeyya ahaṁ hi upasampajjitukāmo āgacchantu
bhikkhū icchāmi bhikkhūnaṁ āgatanti. Gantabbaṁ bhikkhave sattāhakaraṇīyena
appahitepi pageva pahite upasampadaṁ ussukkaṁ karissāmi vā
Anussāvessāmi vā gaṇapūrako vā bhavissāmīti sattāhaṁ sannivaṭṭo
kātabbo. Idha pana bhikkhave sāmaṇerī gilānā hoti. Sā ce
bhikkhūnaṁ santike dūtaṁ pahiṇeyya ahaṁ hi gilānā āgacchantu
ayyā icchāmi ayyānaṁ āgatanti. Gantabbaṁ bhikkhave sattāhakaraṇīyena
appahitepi pageva pahite gilānabhattaṁ vā pariyesissāmi
gilānupaṭṭhākabhattaṁ vā pariyesissāmi gilānabhesajjaṁ vā pariyesissāmi
pucchissāmi vā upaṭṭhahissāmi vāti sattāhaṁ sannivaṭṭo kātabbo.
Idha pana bhikkhave sāmaṇeriyā anabhirati uppannā hoti. Kukkuccaṁ
uppannaṁ hoti. Diṭṭhigataṁ uppannaṁ hoti. Sāmaṇerī vassaṁ
pucchitukāmā hoti. Sikkhaṁ samādayitukāmā hoti. Sā ce
bhikkhūnaṁ santike dūtaṁ pahiṇeyya ahaṁ hi sikkhaṁ samādayitukāmā
āgacchantu ayyā icchāmi ayyānaṁ āgatanti. Gantabbaṁ bhikkhave
sattāhakaraṇīyena appahitepi pageva pahite. Sikkhāsamādānaṁ ussukkaṁ
karissāmīti sattāhaṁ sannivaṭṭo kātabboti.

[212] Tena kho pana samayena aññatarassa bhikkhuno mātā
gilānā hoti. Sā puttassa santike dūtaṁ pāhesi ahaṁ hi
gilānā [1]- icchāmi puttassa āgatanti. Athakho tassa bhikkhuno etadahosi
bhagavatā paññattaṁ sattannaṁ sattāhakaraṇīyena pahite gantuṁ na
tveva appahite pañcannaṁ sattāhakaraṇīyena appahitepi gantuṁ
pageva pahite ayañca me mātā gilānā sā ca anupāsikā
1 Po. Ma. Yu. agacchatu me putto.
Kathaṁ nu kho mayā paṭipajjitabbanti. Bhagavato etamatthaṁ ārocesuṁ.
Anujānāmi bhikkhave sattannaṁ sattāhakaraṇīyena appahitepi gantuṁ
pageva pahite bhikkhussa bhikkhuniyā sikkhamānāya sāmaṇerassa
sāmaṇeriyā mātuyā ca pitussa ca anujānāmi bhikkhave imesaṁ
sattannaṁ sattāhakaraṇīyena appahitepi gantuṁ pageva pahite sattāhaṁ
sannivaṭṭo kātabbo. Idha pana bhikkhave bhikkhussa mātā gilānā
hoti. Sā ce puttassa santike dūtaṁ pahiṇeyya ahaṁ hi gilānā
āgacchatu me putto icchāmi puttassa āgatanti. Gantabbaṁ
bhikkhave sattāhakaraṇīyena appahitepi pageva pahite gilānabhattaṁ
vā pariyesissāmi gilānupaṭṭhākabhattaṁ vā pariyesissāmi gilānabhesajjaṁ
vā pariyesissāmi pucchissāmi vā upaṭṭhahissāmi vāti sattāhaṁ
sannivaṭṭo kātabbo. Idha pana bhikkhave bhikkhussa pitā gilāno
hoti. So ce puttassa santike dūtaṁ pahiṇeyya ahaṁ hi gilāno
āgacchatu me putto icchāmi puttassa āgatanti. Gantabbaṁ
bhikkhave sattāhakaraṇīyena appahitepi pageva pahite gilānabhattaṁ
vā pariyesissāmi gilānupaṭṭhākabhattaṁ vā pariyesissāmi gilānabhesajjaṁ
vā pariyesissāmi pucchissāmi vā upaṭṭhahissāmi vāti sattāhaṁ
sannivaṭṭo kātabbo. Idha pana bhikkhave bhikkhussa bhātā gilāno
hoti. So ce bhātuno santike dūtaṁ pahiṇeyya ahaṁ hi gilāno
āgacchatu me bhātā icchāmi bhātuno āgatanti. Gantabbaṁ
Bhikkhave sattāhakaraṇīyena pahite na tveva appahite sattāhaṁ
sannivaṭṭo kātabbo. Idha pana bhikkhave bhikkhussa bhaginī gilānā
hoti. Sā ce bhikkhussa 1 santike dūtaṁ pahiṇeyya ahaṁ hi gilānā
āgacchatu me bhātā icchāmi bhātuno āgatanti. Gantabbaṁ bhikkhave
sattāhakaraṇīyena pahite na tveva appahite sattāhaṁ sannivaṭṭo
kātabbo. Idha pana bhikkhave bhikkhussa ñātako gilāno hoti.
So ce bhikkhussa santike dūtaṁ pahiṇeyya ahaṁ hi gilāno āgacchatu
bhadanto icchāmi bhadantassa āgatanti. Gantabbaṁ bhikkhave
sattāhakaraṇīyena pahite na tveva appahite sattāhaṁ sannivaṭṭo
kātabbo. Idha pana bhikkhave bhikkhussa 2 bhatiko gilāno hoti.
So ce bhikkhūnaṁ santike dūtaṁ pahiṇeyya ahaṁ hi gilāno āgacchantu
bhikkhū 3 icchāmi bhikkhūnaṁ 4 āgatanti. Gantabbaṁ bhikkhave
sattāhakaraṇīyena pahite na tveva appahite sattāhaṁ sannivaṭṭo
kātabboti.

[213] Tena kho pana samayena saṅghassa mahāvihāro 5 udriyati 6
aññatarena upāsakena araññe bhaṇḍaṁ chedāpitaṁ hoti. So
bhikkhūnaṁ santike dūtaṁ pāhesi sace bhadantā taṁ bhaṇḍaṁ avahāpeyyuṁ 7
dajjāhaṁ taṁ bhaṇḍanti. Bhagavato etamatthaṁ ārocesuṁ. Anujānāmi
bhikkhave saṅghakaraṇīyena gantuṁ sattāhaṁ sannivaṭṭo kātabboti.
1 Po. Ma. bhātuno. 2 Ma. Yu. bhikkhugatiko. 3 Ma. bhadantā. 4 Ma. bhadantānaṁ.
5 Ma. Yu. vihāro. 6 Po. Ma. undriyati. 7 Po. Ma. āvahāpeyyuṁ. Yu.
avahareyyuṁ.
Vassāvāsabhāṇavāraṁ niṭṭhitaṁ paṭhamaṁ 1

[214] Tena kho pana samayena kosalesu janapadesu 2 aññatarasmiṁ
āvāse vassūpagatā bhikkhū vāḷehi ubbāḷhā honti. Gaṇhiṁsupi
paripātiṁsupi. Bhagavato etamatthaṁ ārocesuṁ. Idha pana bhikkhave
vassūpagatā bhikkhū vāḷehi ubbāḷhā honti gaṇhantipi paripātentipi.
Eseva antarāyoti pakkamitabbaṁ. Anāpatti vassacchedassa.
Idha pana bhikkhave vassūpagatā bhikkhū siriṁsapehi ubbāḷhā
honti. Ḍaṁsantipi paripātentipi. Eseva antarāyoti pakkamitabbaṁ.
Anāpatti vassacchedassa. Idha pana bhikkhave vassūpagatā bhikkhū
corehi ubbāḷhā honti. Vilumpantipi ākoṭentipi. Eseva
antarāyoti pakkamitabbaṁ. Anāpatti vassacchedassa. Idha pana
bhikkhave vassūpagatā bhikkhū pisācehi ubbāḷhā honti. Āvisantipi
harantipi 3 . Eseva antarāyoti pakkamitabbaṁ. Anāpatti vassacchedassa.
Idha pana bhikkhave vassūpagatānaṁ bhikkhūnaṁ gāmo agginā
daḍḍho hoti. Bhikkhū piṇḍakena 4 kilamanti. Eseva antarāyoti
pakkamitabbaṁ. Anāpatti vassacchedassa. Idha pana bhikkhave
vassūpagatānaṁ bhikkhūnaṁ senāsanaṁ agginā daḍḍhaṁ hoti. Bhikkhū senāsanena
kilamanti. Eseva antarāyoti pakkamitabbaṁ. Anāpatti
vassacchedassa. Idha pana bhikkhave vassūpagatānaṁ bhikkhūnaṁ gāmo
1 Po. vassāvāsikabhāṇavāro niṭṭhito. Ma. vassāvāsabhāṇavāro niṭṭhito.
Yu. vassāvāsabhāṇavāraṁ niṭṭhitaṁ. Sī. vassāvāsabhāṇavāraṁ paṭhamaṁ. 2 Ma. sabbattha janapade.
3 Ma. hanantipi. 4 Po. piṇḍena.
Udakena vuḷho hoti. Bhikkhū piṇḍakena kilamanti. Eseva
antarāyoti pakkamitabbaṁ. Anāpatti vassacchedassa. Idha pana
bhikkhave vassūpagatānaṁ bhikkhūnaṁ senāsanaṁ udakena vuḷhaṁ hoti. Bhikkhū
senāsanena kilamanti. Eseva antarāyoti pakkamitabbaṁ. Anāpatti
vassacchedassāti.