[220] Tena kho pana samayena aññataro bhikkhu taṁ maññamāno
taṁ jīvitā voropesi. Taṁ maññamāno aññaṁ jīvitā voropesi.
Aññaṁ maññamāno taṁ jīvitā voropesi. Aññaṁ maññamāno
aññaṁ jīvitā voropesi. Tassa kukkuccaṁ ahosi .pe. Āpattiṁ
tvaṁ bhikkhu āpanno pārājikanti.
[221] Tena kho pana samayena aññataro bhikkhu amanussena
gahito hoti. Aññataro bhikkhu tassa bhikkhuno pahāraṁ adāsi.
So bhikkhu kālamakāsi. Tassa kukkuccaṁ ahosi .pe. Anāpatti
Bhikkhu namaraṇādhippāyassāti. Tena kho pana samayena aññataro
bhikkhu amanussena gahito hoti. Aññataro bhikkhu maraṇādhippāyo
tassa bhikkhuno pahāraṁ adāsi. So bhikkhu kālamakāsi .pe. So
bhikkhu na kālamakāsi. Tassa kukkuccaṁ ahosi .pe. Anāpatti
bhikkhu pārājikassa āpatti thullaccayassāti.
[222] Tena kho pana samayena aññataro bhikkhu kalyāṇakammassa
saggakathaṁ kathesi. So adhimutto kālamakāsi. Tassa kukkuccaṁ
ahosi .pe. Anāpatti bhikkhu namaraṇādhippāyassāti. Tena
kho pana samayena aññataro bhikkhu maraṇādhippāyo kalyāṇakammassa
saggakathaṁ kathesi. So adhimutto kālamakāsi .pe. So adhimutto
na kālamakāsi. Tassa kukkuccaṁ ahosi .pe. Anāpatti bhikkhu
pārājikassa āpatti thullaccayassāti. Tena kho pana samayena
aññataro bhikkhu nerayikassa nirayakathaṁ kathesi. So uttasitvā
kālamakāsi. Tassa kukkuccaṁ ahosi .pe. Anāpatti bhikkhu
namaraṇādhippāyassāti. Tena kho pana samayena aññataro bhikkhu
maraṇādhippāyo nerayikassa nirayakathaṁ kathesi. So uttasitvā
kālamakāsi .pe. So uttasitvā na kālamakāsi. Tassa kukkuccaṁ
ahosi .pe. Anāpatti bhikkhu pārājikassa āpatti thullaccayassāti.
[223] Tena kho pana samayena āḷavikā bhikkhū navakammaṁ
karontā rukkhaṁ chindanti. Aññataro bhikkhu aññataraṁ bhikkhuṁ
Etadavoca āvuso atra ṭhito chindāhīti. Taṁ tatra ṭhitaṁ chindantaṁ
rukkho ottharitvā māresi. Tassa kukkuccaṁ ahosi .pe. Anāpatti
bhikkhu namaraṇādhippāyassāti. Tena kho pana samayena āḷavikā
bhikkhū navakammaṁ karontā rukkhaṁ chindanti. Aññataro bhikkhu
maraṇādhippāyo aññataraṁ bhikkhuṁ etadavoca āvuso atra ṭhito
chindāhīti. Taṁ tatra ṭhitaṁ chindantaṁ rukkho ottharitvā māresi
.pe. Rukkho ottharitvā na māresi. Tassa kukkuccaṁ ahosi
.pe. Anāpatti bhikkhu pārājikassa āpatti thullaccayassāti.
[224] Tena kho pana samayena chabbaggiyā bhikkhū dāyaṁ ālimpesuṁ.
Manussā daḍḍhā kālamakaṁsu. Tesaṁ kukkuccaṁ ahosi .pe. Anāpatti
bhikkhave namaraṇādhippāyassāti. Tena kho pana samayena chabbaggiyā
bhikkhū maraṇādhippāyā dāyaṁ ālimpesuṁ. Manussā daḍḍhā kālamakaṁsu
.pe. Manussā daḍḍhā na kālamakaṁsu. Tesaṁ kukkuccaṁ ahosi
.pe. Anāpatti bhikkhave pārājikassa āpatti thullaccayassāti.
[225] Tena kho pana samayena aññataro bhikkhu āghātanaṁ
gantvā coraghātakaṁ etadavoca āvuso māyimaṁ kilamesi ekena
pahārena jīvitā voropehīti. Suṭṭhu bhanteti ekena pahārena
jīvitā voropesi. Tassa kukkuccaṁ ahosi .pe. Āpattiṁ tvaṁ
bhikkhu āpanno pārājikanti. Tena kho pana samayena aññataro
bhikkhu āghātanaṁ gantvā coraghātaṁ etadavoca āvuso māyimaṁ
Kilamesi ekena pahārena jīvitā voropehīti. So nāhaṁ tuyhaṁ
vacanaṁ karissāmīti taṁ jīvitā voropesi. Tassa kukkuccaṁ ahosi
.pe. Anāpatti bhikkhu pārājikassa āpatti dukkaṭassāti.
[226] Tena kho pana samayena aññataro puriso kulaghare 1
hatthapādacchinno ñātakehi samparikiṇṇo hoti. Aññataro
bhikkhu te manusse etadavoca āvuso icchatha imassa maraṇanti.
Āma bhante icchāmāti. Tenahi takkaṁ pāyethāti. Te taṁ
takkaṁ pāyesuṁ. So kālamakāsi. Tassa kukkuccaṁ ahosi .pe.
Āpattiṁ tvaṁ bhikkhu āpanno pārājikanti. Tena kho pana samayena
aññataro puriso kulaghare hatthapādacchinno ñātakehi samparikiṇṇo
hoti. Aññatarā bhikkhunī te manusse etadavoca āvuso icchatha
imassa maraṇanti. Āmayye icchāmāti. Tenahi loṇasocirakaṁ 2
pāyethāti. Te taṁ loṇasocirakaṁ pāyesuṁ. So kālamakāsi.
Tassā kukkuccaṁ ahosi. Athakho sā bhikkhunī bhikkhunīnaṁ etamatthaṁ
ārocesi. Bhikkhuniyo bhikkhūnaṁ etamatthaṁ ārocesuṁ. Bhikkhū
bhagavato etamatthaṁ ārocesuṁ. Āpattiṁ sā bhikkhave bhikkhunī
āpannā pārājikanti.
Tatiyapārājikaṁ niṭṭhitaṁ.
------------
1 Yu. Ma. ñātighare. 2-3 Yu. Ma. loṇasucīrakaṁ.
Catutthapārājikakaṇḍaṁ
[227] Tena samayena buddho bhagavā vesāliyaṁ viharati mahāvane
kūṭāgārasālāyaṁ. Tena kho pana samayena sambahulā sandiṭṭhā
sambhattā bhikkhū vaggumudāya nadiyā tīre vassaṁ upagacchiṁsu. Tena
kho pana samayena vajjī dubbhikkhā hoti dvīhitikā setaṭṭhikā
salākāvuttā na sukarā uñchena paggahena yāpetuṁ. Athakho tesaṁ
bhikkhūnaṁ etadahosi etarahi kho vajjī dubbhikkhā dvīhitikā setaṭṭhikā
salākāvuttā na sukarā uñchena paggahena yāpetuṁ kena nu kho
mayaṁ upāyena samaggā sammodamānā avivadamānā phāsukaṁ vassaṁ
vaseyyāma na ca piṇḍakena kilameyyāmāti. Ekacce evamāhaṁsu
handa mayaṁ āvuso gihīnaṁ kammantaṁ adhiṭṭhema evante amhākaṁ
dātuṁ maññissanti evaṁ mayaṁ samaggā sammodamānā avivadamānā
phāsukaṁ vassaṁ vasissāma na ca piṇḍakena kilamissāmāti. Ekacce
evamāhaṁsu alaṁ āvuso kiṁ gihīnaṁ kammantaṁ adhiṭṭhitena handa mayaṁ
āvuso gihīnaṁ dūteyyaṁ harāma evante amhākaṁ dātuṁ maññissanti
evaṁ mayaṁ samaggā sammodamānā avivadamānā phāsukaṁ vassaṁ vasissāma
na ca piṇḍakena kilamissāmāti. Ekacce evamāhaṁsu alaṁ āvuso
kiṁ gihīnaṁ kammantaṁ adhiṭṭhitena kiṁ gihīnaṁ dūteyyaṁ haṭena 1 handa
1 haraṇenātipi pāṭho.
Mayaṁ āvuso gihīnaṁ aññamaññassa uttarimanussadhammassa vaṇṇaṁ
bhāsissāma asuko bhikkhu paṭhamassa jhānassa lābhī asuko bhikkhu
dutiyassa jhānassa lābhī asuko bhikkhu tatiyassa jhānassa lābhī
asuko bhikkhu catutthassa jhānassa lābhī asuko bhikkhu sotāpanno
asuko bhikkhu sakadāgāmī asuko bhikkhu anāgāmī asuko bhikkhu
arahā asuko bhikkhu tevijjo asuko bhikkhu chaḷabhiññoti evante
amhākaṁ dātuṁ maññissanti evaṁ mayaṁ samaggā sammodamānā
avivadamānā phāsukaṁ vassaṁ vasissāma na ca piṇḍakena kilamissāmāti.
Esoyeva kho āvuso seyyo yo amhākaṁ gihīnaṁ aññamaññassa
uttarimanussadhammassa vaṇṇo bhāsitoti. Athakho te bhikkhū gihīnaṁ
aññamaññassa uttarimanussadhammassa vaṇṇaṁ bhāsiṁsu asuko bhikkhu
paṭhamassa jhānassa lābhī .pe. Asuko bhikkhu catutthassa jhānassa
lābhī asuko bhikkhu sotāpanno .pe. Asuko bhikkhu chaḷabhiññoti.
Athakho te manussā lābhā vata no suladdhaṁ vata no yesaṁ no
evarūpā bhikkhū vassaṁ upagatā na vata no ito pubbe evarūpā
bhikkhū vassaṁ upagatā yathayime bhikkhū sīlavanto kalyāṇadhammāti.
Te 1 na 2 tādisāni bhojanāni attanā bhuñjanti na mātāpitūnaṁ denti
na puttadārassa denti na dāsakammakaraporisassa denti na
mittāmaccānaṁ denti na ñātisālohitānaṁ denti yādisāni
1-2 Yu. Ma. potthakesu ayaṁ pāṭho sabbattha vāresu āgato.
Bhikkhūnaṁ denti na tādisāni khādanīyāni attanā khādanti na
mātāpitūnaṁ denti .pe. Na ñātisālohitānaṁ denti yādisāni
bhikkhūnaṁ denti na 1 tādisāni sāyanīyāni attanā sāyanti na
mātāpitūnaṁ denti .pe. Na ñātisālohitānaṁ denti yādisāni
bhikkhūnaṁ denti na 2 tādisāni pānāni attanā pivanti na mātāpitūnaṁ
denti na puttadārassa denti na dāsakammakaraporisassa
denti na mittāmaccānaṁ denti na ñātisālohitānaṁ denti
yādisāni bhikkhūnaṁ denti. Athakho te bhikkhū vaṇṇavanto ahesuṁ
pīnindriyā pasannamukhavaṇṇā vippasannacchavivaṇṇā. Āciṇṇaṁ
kho panetaṁ vassaṁ vutthānaṁ bhikkhūnaṁ bhagavantaṁ dassanāya upasaṅkamituṁ.
Athakho te bhikkhū vassaṁ vutthā temāsaccayena senāsanaṁ saṁsāmetvā
pattacīvaramādāya yena vesālī tena pakkamiṁsu anupubbena
cārikaṁ 3 caramānā 4 yena vesālī yena mahāvanaṁ yena kūṭāgārasālā
yena bhagavā tenupasaṅkamiṁsu upasaṅkamitvā bhagavantaṁ abhivādetvā
ekamantaṁ nisīdiṁsu.
[228] Tena kho pana samayena disāsu vassaṁ vutthā bhikkhū kisā
honti lūkhā dubbaṇṇā uppaṇḍuppaṇḍukajātā dhamanisanthatagattā.
Vaggumudātīriyā pana bhikkhū vaṇṇavanto honti pīnindriyā pasannamukhavaṇṇā
1-2 ayampana ekekasmiṁ vāre ekekoyeva pākaṭo. 3-4 tīsupi
potthakesu idaṁ pāṭhadvayaṁ na paññāyati.
Vippasannacchavivaṇṇā. Āciṇṇaṁ kho panetaṁ buddhānaṁ
bhagavantānaṁ āgantukehi bhikkhūhi saddhiṁ paṭisammodituṁ. Athakho
bhagavā vaggumudātīriye bhikkhū etadavoca kacci bhikkhave khamanīyaṁ
kacci yāpanīyaṁ kacci samaggā sammodamānā avivadamānā phāsukaṁ
vassaṁ vasittha na ca piṇḍakena kilamitthāti. Khamanīyaṁ bhagavā
yāpanīyaṁ bhagavā samaggā ca mayaṁ bhante sammodamānā avivadamānā
phāsukaṁ vassaṁ vasimhā na ca piṇḍakena kilamimhāti. Jānantāpi
tathāgatā pucchanti jānantāpi na pucchanti kālaṁ viditvā pucchanti
kālaṁ viditvā na pucchanti atthasañhitaṁ tathāgatā pucchanti no
anatthasañhitaṁ anatthasañhite setughāto tathāgatānaṁ. Dvīhākārehi
buddhā bhagavanto bhikkhū paṭipucchanti dhammaṁ vā desissāma
sāvakānaṁ vā sikkhāpadaṁ paññāpessāmāti. Athakho bhagavā
vaggumudātīriye bhikkhū etadavoca yathā kathaṁ pana tumhe bhikkhave
samaggā sammodamānā avivadamānā phāsukaṁ vassaṁ vasittha na ca
piṇḍakena kilamitthāti. Athakho te bhikkhū bhagavato etamatthaṁ
ārocesuṁ. Kacci pana vo bhikkhave bhūtanti. Abhūtaṁ bhagavāti.
[229] Vigarahi buddho bhagavā ananucchavikaṁ moghapurisā ananulomikaṁ
appaṭirūpaṁ assāmaṇakaṁ akappiyaṁ akaraṇīyaṁ kathaṁ hi nāma tumhe
moghapurisā udarassa kāraṇā gihīnaṁ aññamaññassa uttarimanussadhammassa
vaṇṇaṁ bhāsissatha varaṁ tumhehi moghapurisā tiṇhena
Govikantanena 1 kucchiparikanto na tveva udarassa kāraṇā gihīnaṁ
aññamaññassa uttarimanussadhammassa vaṇṇo bhāsito taṁ kissa
hetu tatonidānaṁ hi moghapurisā maraṇaṁ vā nigaccheyya maraṇamattaṁ
vā dukkhaṁ na tveva tappaccayā kāyassa bhedā paraṁ maraṇā
apāyaṁ duggatiṁ vanipātaṁ nirayaṁ upapajjeyya itonidānañca kho
moghapurisā kāyassa bhedā paraṁ maraṇā apāyaṁ duggatiṁ vinipātaṁ
nirayaṁ upapajjeyya netaṁ moghapurisā appasannānaṁ vā pasādāya
pasannānaṁ vā bhiyyobhāvāya .pe. Vigarahitvā dhammiṁ kathaṁ katvā
bhikkhū āmantesi.