[210] Tena kho pana samayena aññataro piṇḍacāriko bhikkhu
visagataṁ piṇḍapātaṁ labhitvā paṭikkamanaṁ haritvā bhikkhūnaṁ aggakārikaṁ
adāsi. Te bhikkhū kālamakaṁsu. Tassa kukkuccaṁ ahosi .pe.
Kiṁcitto tvaṁ bhikkhūti. Nāhaṁ bhagavā jānāmīti. Anāpatti
bhikkhu ajānantassāti. Tena kho pana samayena aññataro bhikkhu
Vīmaṁsādhippāyo aññatarassa bhikkhuno visaṁ adāsi. So bhikkhu
kālamakāsi. Tassa kukkuccaṁ ahosi .pe. Kiṁcitto tvaṁ
bhikkhūti. Vīmaṁsādhippāyo ahaṁ bhagavāti. Anāpatti bhikkhu
pārājikassa āpatti thullaccayassāti.

[211] Tena kho pana samayena āḷavikā 1 bhikkhū vihāravatthuṁ
karonti. Aññataro bhikkhu heṭṭhā hutvā silaṁ uccāresi.
Uparimena bhikkhunā duggahitā silā heṭṭhimassa bhikkhuno matthake
avatthāsi. So bhikkhu kālamakāsi. Tassa kukkuccaṁ ahosi
.pe. Anāpatti bhikkhu asañciccāti. Tena kho pana samayena
āḷavikā bhikkhū vihāravatthuṁ karonti. Aññataro bhikkhu heṭṭhā
hutvā silaṁ uccāresi. Uparimo bhikkhu maraṇādhippāyo heṭṭhimassa
bhikkhuno matthake silaṁ muñci. So bhikkhu kālamakāsi. Tassa
kukkuccaṁ ahosi .pe. Āpattiṁ tvaṁ bhikkhu āpanno pārājikanti.
Tena kho pana samayena āḷavikā bhikkhū vihāravatthuṁ karonti.
Aññataro bhikkhu heṭṭhā hutvā silaṁ uccāresi. Uparimo bhikkhu
maraṇādhippāyo heṭṭhimassa bhikkhuno matthake silaṁ muñci. So
bhikkhu na kālamakāsi. Tassa kukkuccaṁ ahosi .pe. Anāpatti
bhikkhu pārājikassa āpatti thullaccayassāti. Tena kho pana
samayena āḷavikā bhikkhū vihārassa kuḍḍaṁ uṭṭhāpenti. Aññataro
1 Yu. Ma. āḷavakā.
Bhikkhu heṭṭhā hutvā iṭṭhakaṁ uccāresi. Uparimena bhikkhunā
duggahitā iṭṭhakā heṭṭhimassa bhikkhuno matthake avatthāsi. So
bhikkhu kālamakāsi. Tassa kukkuccaṁ ahosi .pe. Anāpatti
bhikkhu asañciccāti. Tena kho pana samayena āḷavikā bhikkhū
vihārassa kuḍḍaṁ uṭṭhāpenti. Aññataro bhikkhu heṭṭhā hutvā
iṭṭhakaṁ uccāresi. Uparimo bhikkhu maraṇādhippāyo heṭṭhimassa
bhikkhuno matthake iṭṭhakaṁ muñci. So bhikkhu kālamakāsi .pe.
So bhikkhu na kālamakāsi. Tassa kukkuccaṁ ahosi .pe.
Anāpatti bhikkhu pārājikassa āpatti thullaccayassāti. Tena
kho pana samayena āḷavikā bhikkhū navakammaṁ karonti. Aññataro
bhikkhu heṭṭhā hutvā vāsiṁ uccāresi. Uparimena bhikkhunā
duggahitā vāsī heṭṭhimassa bhikkhuno matthake avatthāsi. So
bhikkhu kālamakāsi. Tassa kukkuccaṁ ahosi .pe. Anāpatti
bhikkhu asañciccāti. Tena kho pana samayena āḷavikā bhikkhū
navakammaṁ karonti. Aññataro bhikkhu heṭṭhā hutvā vāsiṁ
uccāresi. Uparimo bhikkhu maraṇādhippāyo heṭṭhimassa bhikkhuno
matthake vāsiṁ muñci. So bhikkhu kālamakāsi .pe. So
bhikkhu na kālamakāsi. Tassa kukkuccaṁ ahosi .pe. Anāpatti
bhikkhu pārājikassa āpatti thullaccayassāti. Tena kho pana
samayena āḷavikā bhikkhū navakammaṁ karonti. Aññataro bhikkhu
Heṭṭhā hutvā gopānasiṁ uccāresi. Uparimena bhikkhunā duggahitā
gopānasī heṭṭhimassa bhikkhuno matthake avatthāsi. So bhikkhu
kālamakāsi. Tassa kukkuccaṁ ahosi .pe. Anāpatti bhikkhu
asañciccāti. Tena kho pana samayena āḷavikā bhikkhū navakammaṁ
karonti. Aññataro bhikkhu heṭṭhā hutvā gopānasiṁ uccāresi.
Uparimo bhikkhu maraṇādhippāyo heṭṭhimassa bhikkhuno matthake
gopānasiṁ muñci. So bhikkhu kālamakāsi .pe. So bhikkhu na
kālamakāsi. Tassa kukkuccaṁ ahosi .pe. Anāpatti bhikkhu
pārājikassa āpatti thullaccayassāti. Tena kho pana samayena
āḷavikā bhikkhū navakammaṁ karontā aṭṭakaṁ bandhanti. Aññataro
bhikkhu aññataraṁ bhikkhuṁ etadavoca āvuso atra ṭhito bandhāhīti.
So tatra ṭhito bandhanto paripatitvā kālamakāsi. Tassa kukkuccaṁ
ahosi .pe. Kiṁcitto tvaṁ bhikkhūti. Nāhaṁ bhagavā maraṇādhippāyoti.
Anāpatti bhikkhu namaraṇādhippāyassāti. Tena kho pana samayena
āḷavikā bhikkhū navakammaṁ karontā aṭṭakaṁ bandhanti. Aññataro
bhikkhu maraṇādhippāyo aññataraṁ bhikkhuṁ etadavoca āvuso atra
ṭhito bandhāhīti. So tatra ṭhito bandhanto paripatitvā kālamakāsi
.pe. Paripatitvā na kālamakāsi. Tassa kukkuccaṁ ahosi .pe.
Anāpatti bhikkhu pārājikassa āpatti thullaccayassāti.

[212] Tena kho pana samayena aññataro bhikkhu vihāraṁ chādetvā
Otarati. Aññataro bhikkhu taṁ bhikkhuṁ etadavoca āvuso ito
otarāhīti. So tena otaranto paripatitvā kālamakāsi. Tassa
kukkuccaṁ ahosi .pe. Anāpatti bhikkhu namaraṇādhippāyassāti.
Tena kho pana samayena aññataro bhikkhu vihāraṁ chādetvā otarati.
Aññataro bhikkhu maraṇādhippāyo taṁ bhikkhuṁ etadavoca āvuso
ito otarāhīti. So tena otaranto paripatitvā kālamakāsi
.pe. Paripatitvā na kālamakāsi. Tassa kukkuccaṁ ahosi
.pe. Anāpatti bhikkhu pārājikassa āpatti thullaccayassāti.

[213] Tena kho pana samayena aññataro bhikkhu anabhiratiyā
pīḷito gijjhakūṭaṁ abhirūhitvā papāte papatanto aññataraṁ vilīvakāraṁ
ottharitvā māresi. Tassa kukkuccaṁ ahosi .pe. Anāpatti
bhikkhu pārājikassa na ca bhikkhave attānaṁ pātetabbaṁ yo pāteyya
āpatti dukkaṭassāti. Tena kho pana samayena chabbaggiyā
bhikkhū gijjhakūṭaṁ pabbataṁ abhirūhitvā davāya silaṁ pavijjhiṁsu. Sā 1
aññataraṁ gopālakaṁ ottharitvā māresi 2 . Tesaṁ kukkuccaṁ ahosi
.pe. Anāpatti bhikkhave pārājikassa na ca bhikkhave davāya
silā pavijjhitabbā yo pavijjheyya āpatti dukkaṭassāti.

[214] Tena kho pana samayena aññataro bhikkhu gilāno
1 yuropiyamarammapotthakesu ayaṁ pāṭho na dissati. rāmaññapotthake
pana silāti dissati. 2 Yu. Ma. māresuṁ.
Hoti. Taṁ bhikkhū sedesuṁ. So bhikkhu kālamakāsi. Tesaṁ
kukkuccaṁ ahosi .pe. Anāpatti bhikkhave namaraṇādhippāyassāti.
Tena kho pana samayena aññataro bhikkhu gilāno hoti. Taṁ
bhikkhū maraṇādhippāyā sedesuṁ. So bhikkhu kālamakāsi .pe.
So bhikkhu na kālamakāsi. Tesaṁ kukkuccaṁ ahosi .pe.
Anāpatti bhikkhave pārājikassa āpatti thullaccayassāti. Tena
kho pana samayena aññatarassa bhikkhuno sīsābhitāpo hoti.
Tassa bhikkhū natthuṁ adaṁsu. So bhikkhu kālamakāsi. Tesaṁ kukkuccaṁ
ahosi .pe. Anāpatti bhikkhave namaraṇādhippāyassāti. Tena
kho pana samayena aññatarassa bhikkhuno sīsābhitāpo hoti. Tassa
bhikkhū maraṇādhippāyā natthuṁ adaṁsu. So bhikkhu kālamakāsi.
.pe. So bhikkhu na kālamakāsi. Tesaṁ kukkuccaṁ ahosi .pe.
Anāpatti bhikkhave pārājikassa āpatti thullaccayassāti. Tena
kho pana samayena aññataro bhikkhu gilāno hoti. Taṁ bhikkhū
sambāhesuṁ. So bhikkhu kālamakāsi. Tesaṁ kukkuccaṁ ahosi
.pe. Anāpatti bhikkhave namaraṇādhippāyassāti. Tena kho
pana samayena aññataro bhikkhu gilāno hoti. Taṁ bhikkhū maraṇādhippāyā
sambāhesuṁ. So bhikkhu kālamakāsi .pe. So bhikkhu
na kālamakāsi. Tesaṁ kukkuccaṁ ahosi .pe. Anāpatti bhikkhave
pārājikassa āpatti thullaccayassāti. Tena kho pana samayena
Aññataro bhikkhu gilāno hoti. Taṁ bhikkhū nahāpesuṁ.
So bhikkhu kālamakāsi. Tesaṁ kukkuccaṁ ahosi .pe.
Anāpatti bhikkhave namaraṇādhippāyassāti. Tena kho pana samayena
aññataro bhikkhu gilāno hoti. Taṁ bhikkhū maraṇādhippāyā
nahāpesuṁ. So bhikkhu kālamakāsi .pe. So bhikkhu na
kālamakāsi. Tesaṁ kukkuccaṁ ahosi .pe. Anāpatti bhikkhave
pārājikassa āpatti thullaccayassāti. Tena kho pana samayena
aññataro bhikkhu gilāno hoti. Taṁ bhikkhū telena abbhañjiṁsu.
So bhikkhu kālamakāsi. Tesaṁ kukkuccaṁ ahosi .pe. Anāpatti
bhikkhave namaraṇādhippāyassāti. Tena kho pana samayena aññataro
bhikkhu gilāno hoti. Taṁ bhikkhū maraṇādhippāyā telena
abbhañjiṁsu. So bhikkhu kālamakāsi .pe. So bhikkhu na
kālamakāsi. Tesaṁ kukkuccaṁ ahosi .pe. Anāpatti bhikkhave
pārājikassa āpatti thullaccayassāti. Tena kho pana samayena
aññataro bhikkhu gilāno hoti. Taṁ bhikkhū uṭṭhāpesuṁ. So
bhikkhu kālamakāsi. Tesaṁ kukkuccaṁ ahosi .pe. Anāpatti
bhikkhave namaraṇādhippāyassāti. Tena kho pana samayena aññataro
bhikkhu gilāno hoti. Taṁ bhikkhū maraṇādhippāyā uṭṭhāpesuṁ. So
bhikkhu kālamakāsi .pe. So bhikkhu na kālamakāsi. Tesaṁ
kukkuccaṁ ahosi .pe. Anāpatti bhikkhave pārājikassa āpatti
Thullaccayassāti. Tena kho pana samayena aññataro bhikkhu
gilāno hoti. Taṁ bhikkhū nipātesuṁ. So bhikkhu kālamakāsi.
Tesaṁ kukkuccaṁ ahosi .pe. Anāpatti bhikkhave namaraṇādhippāyassāti.
Tena kho pana samayena aññataro bhikkhu
gilāno hoti. Taṁ bhikkhū maraṇādhippāyā nipātesuṁ. So
bhikkhu kālamakāsi .pe. So bhikkhu na kālamakāsi. Tesaṁ
kukkuccaṁ ahosi .pe. Anāpatti bhikkhave pārājikassa āpatti
thullaccayassāti. Tena kho pana samayena aññataro bhikkhu gilāno
hoti. Tassa bhikkhū annaṁ adaṁsu. So bhikkhu kālamakāsi.
Tesaṁ kukkuccaṁ ahosi .pe. Anāpatti bhikkhave namaraṇādhippāyassāti.
Tena kho pana samayena aññataro bhikkhu gilāno
hoti. Tassa bhikkhū maraṇādhippāyā annaṁ adaṁsu. So bhikkhu
kālamakāsi .pe. So bhikkhu na kālamakāsi. Tesaṁ kukkuccaṁ ahosi
.pe. Anāpatti bhikkhave pārājikassa āpatti thullaccayassāti.
Tena kho pana samayena aññataro bhikkhu gilāno hoti. Tassa
bhikkhū pānaṁ adaṁsu. So bhikkhu kālamakāsi. Tesaṁ kukkuccaṁ
ahosi .pe. Anāpatti bhikkhave namaraṇādhippāyassāti. Tena
kho pana samayena aññataro bhikkhu gilāno hoti. Tassa bhikkhū
maraṇādhippāyā pānaṁ adaṁsu. So bhikkhu kālamakāsi .pe.
So bhikkhu na kālamakāsi. Tesaṁ kukkuccaṁ ahosi .pe. Anāpatti
Bhikkhave pārājikassa āpatti thullaccayassāti.

[215] Tena kho pana samayena aññatarā itthī pavutthapatikā
jārena gabbhinī hoti. Sā kulūpakaṁ bhikkhuṁ etadavoca iṅghayya
gabbhapātanaṁ jānāhīti. Suṭṭhu bhaginīti tassā gabbhapātanaṁ adāsi.
Dārako kālamakāsi. Tassa kukkuccaṁ ahosi .pe. Āpattiṁ
tvaṁ bhikkhu āpanno pārājikanti. Tena kho pana samayena
aññatarassa purisassa dve pajāpatiyo honti ekā vañjhā
ekā vijāyinī. Vañjhā itthī kulūpakaṁ bhikkhuṁ etadavoca sace
sā bhante vijāyissati sabbassa kuṭumbassa issarā bhavissati
iṅghayya tassā gabbhapātanaṁ jānāhīti. Suṭṭhu bhaginīti tassā
gabbhapātanaṁ adāsi. Dārako kālamakāsi. Mātā na kālamakāsi.
Tassa kukkuccaṁ ahosi .pe. Āpattiṁ tvaṁ bhikkhu āpanno
pārājikanti. Tena kho pana samayena aññatarassa purisassa dve
pajāpatiyo honti ekā vañjhā ekā vijāyinī. Vañjhā itthī
kulūpakaṁ bhikkhuṁ etadavoca sace sā bhante vijāyissati sabbassa
kuṭumbassa issarā bhavissati iṅghayya tassā gabbhapātanaṁ jānāhīti.
Suṭṭhu bhaginīti tassā gabbhapātanaṁ adāsi. Mātā kālamakāsi.
Dārako na kālamakāsi. Tassa kukkuccaṁ ahosi .pe. Anāpatti
bhikkhu pārājikassa āpatti thullaccayassāti. Tena kho pana
samayena aññatarassa purisassa dve pajāpatiyo honti ekā
Vañjhā ekā vijāyinī. Vañjhā itthī kulūpakaṁ bhikkhuṁ etadavoca
sace sā bhante vijāyissati sabbassa kuṭumbassa issarā bhavissati
iṅghayya tassā gabbhapātanaṁ jānāhīti. Suṭṭhu bhaginīti tassā
gabbhapātanaṁ adāsi. Ubho kālamakaṁsu .pe. Ubho na kālamakaṁsu.
Tassa kukkuccaṁ ahosi .pe. Anāpatti bhikkhu pārājikassa āpatti
thullaccayassāti. Tena kho pana samayena aññatarā gabbhinī
itthī kulūpakaṁ bhikkhuṁ etadavoca iṅghayya gabbhapātanaṁ jānāhīti.
Tenahi bhagini maddassūti. Sā madditvā gabbhaṁ pātesi. Tassa
kukkuccaṁ ahosi .pe. Āpattiṁ tvaṁ bhikkhu āpanno pārājikanti.
Tena kho pana samayena aññatarā gabbhinī itthī kulūpakaṁ bhikkhuṁ
etadavoca iṅghayya gabbhapātanaṁ jānāhīti. Tenahi bhagini tāpehīti.
Sā tāpetvā gabbhaṁ pātesi. Tassa kukkuccaṁ ahosi .pe. Āpattiṁ
tvaṁ bhikkhu āpanno pārājikanti. Tena kho pana samayena
aññatarā vañjhā itthī kulūpakaṁ bhikkhuṁ etadavoca iṅghayya
bhesajjaṁ jānāhi yenāhaṁ vijāyeyyanti. Suṭṭhu bhaginīti tassā
bhesajjaṁ adāsi. Sā kālamakāsi. Kukkuccaṁ ahosi .pe.
Anāpatti bhikkhu pārājikassa āpatti dukkaṭassāti. Tena kho pana
samayena aññatarā vijāyinī itthī kulūpakaṁ bhikkhuṁ etadavoca iṅghayya
bhesajjaṁ jānāhi yenāhaṁ na vijāyeyyanti. Suṭṭhu bhaginīti tassā
bhesajjaṁ adāsi. Sā kālamakāsi. Tassa kukkuccaṁ ahosi .pe.
Anāpatti bhikkhu pārājikassa āpatti dukkaṭassāti.

[216] Tena kho pana samayena chabbaggiyā bhikkhū sattarasavaggiyaṁ
bhikkhuṁ aṅgulipatodakena hāsesuṁ. So bhikkhu uttasanto 1 anassāsako
kālamakāsi. Tesaṁ kukkuccaṁ ahosi .pe. Anāpatti bhikkhave
pārājikassa āpatti pācittiyassāti 2 .

[217] Tena kho pana samayena sattarasavaggiyā bhikkhū chabbaggiyaṁ
bhikkhuṁ kammaṁ karissāmāti ottharitvā māresuṁ. Tesaṁ kukkuccaṁ ahosi
.pe. Anāpatti bhikkhave pārājikassa āpatti pācittiyassāti 3 .

[218] Tena kho pana samayena aññataro bhūtavejjako bhikkhu
yakkhaṁ jīvitā voropesi. Tassa kukkuccaṁ ahosi .pe. Anāpatti
bhikkhu pārājikassa āpatti thullaccayassāti.

[219] Tena kho pana samayena aññataro bhikkhu aññataraṁ bhikkhuṁ
vāḷayakkhaṁ vihāraṁ pāhesi. Taṁ yakkhā jīvitā voropesuṁ. Tassa
kukkuccaṁ ahosi .pe. Anāpatti bhikkhu namaraṇādhippāyassāti.
Tena kho pana samayena aññataro bhikkhu maraṇādhippāyo aññataraṁ
bhikkhuṁ vāḷayakkhaṁ vihāraṁ pāhesi. Taṁ yakkhā jīvitā voropesuṁ.
.pe. Taṁ yakkhā na jīvitā voropesuṁ. Tassa kukkuccaṁ ahosi
.pe. Anāpatti bhikkhu pārājikassa āpatti thullaccayassāti.
Tena kho pana samayena aññataro bhikkhu aññataraṁ bhikkhuṁ vāḷakantāraṁ
1 Yu. Ma. uttanto. 2-3 Yu. Ma. anāpatti bhikkhave pārājikassāti.
Pāhesi. Taṁ vāḷā jīvitā voropesuṁ. Tassa kukkuccaṁ ahosi
.pe. Anāpatti bhikkhu namaraṇādhippāyassāti. Tena kho pana
samayena aññataro bhikkhu maraṇādhippāyo aññataraṁ bhikkhuṁ vāḷakantāraṁ
pāhesi. Taṁ vāḷā jīvitā voropesuṁ .pe. Taṁ vāḷā jīvitā na
voropesuṁ. Tassa kukkuccaṁ ahosi .pe. Anāpatti bhikkhu
pārājikassa āpatti thullaccayassāti. Tena kho pana samayena
aññataro bhikkhu aññataraṁ bhikkhuṁ corakantāraṁ pāhesi. Taṁ corā
jīvitā voropesuṁ. Tassa kukkuccaṁ ahosi .pe. Anāpatti bhikkhu
namaraṇādhippāyassāti. Tena kho pana samayena aññataro bhikkhu
maraṇādhippāyo aññataraṁ bhikkhuṁ corakantāraṁ pāhesi. Taṁ corā jīvitā
voropesuṁ .pe. Taṁ corā na jīvitā voropesuṁ. Tassa kukkuccaṁ
ahosi. Anāpatti bhikkhu pārājikassa āpatti thullaccayassāti.