[436] Pañcimāni bhikkhave indriyāni katamāni pañca
saddhindriyaṁ viriyindriyaṁ satindriyaṁ samādhindriyaṁ paññindriyaṁ.
Kattha ca bhikkhave saddhindriyaṁ daṭṭhabbaṁ catūsu sotāpattiyaṅgesu
ettha saddhindriyaṁ daṭṭhabbaṁ.
Kattha ca bhikkhave viriyindriyaṁ daṭṭhabbaṁ catūsu sammappadhānesu
ettha viriyindriyaṁ daṭṭhabbaṁ.
Kattha ca bhikkhave satindriyaṁ daṭṭhabbaṁ catūsu satipaṭṭhānesu
ettha satindriyaṁ daṭṭhabbaṁ.
Kattha ca bhikkhave samādhindriyaṁ daṭṭhabbaṁ catūsu jhānesu ettha
samādhindriyaṁ daṭṭhabbaṁ.
Kattha ca bhikkhave paññindriyaṁ daṭṭhabbaṁ catūsu ariyasaccesu
Ettha paññindriyaṁ daṭṭhabbaṁ.

[437] Catūsu sotāpattiyaṅgesu saddhindriyassa vasena
katihākārehi pañcindriyāni daṭṭhabbāni catūsu sammappadhānesu
viriyindriyassa vasena katihākārehi pañcindriyāni daṭṭhabbāni
catūsu satipaṭṭhānesu satindriyassa vasena katihākārehi pañcindriyāni
daṭṭhabbāni catūsu jhānesu samādhindriyassa vasena katihākārehi
pañcindriyāni daṭṭhabbāni catūsu ariyasaccesu paññindriyassa
vasena katihākārehi pañcindriyāni daṭṭhabbāni. Catūsu
sotāpattiyaṅgesu saddhindriyassa vasena vīsatiyā ākārehi pañcindriyāni
daṭṭhabbāni catūsu sammappadhānesu viriyindriyassa
vasena vīsatiyā ākārehi pañcindriyāni daṭṭhabbāni catūsu satipaṭṭhānesu
satindriyassa vasena vīsatiyā ākārehi pañcindriyāni
daṭṭhabbāni catūsu jhānesu samādhindriyassa vasena vīsatiyā ākārehi
pañcindriyāni daṭṭhabbāni catūsu ariyasaccesu paññindriyassa
vasena vīsatiyā ākārehi pañcindriyāni daṭṭhabbāni.

[438] Catūsu sotāpattiyaṅgesu saddhindriyassa vasena katamehi
vīsatiyā ākārehi pañcindriyāni daṭṭhabbāni. Sappurisasaṁseve
sotāpattiyaṅge adhimokkhādhipateyyaṭṭhena saddhindriyaṁ daṭṭhabbaṁ
saddhindriyassa vasena paggahaṭṭhena viriyindriyaṁ daṭṭhabbaṁ
upaṭṭhānaṭṭhena satindriyaṁ daṭṭhabbaṁ avikkhepaṭṭhena samādhindriyaṁ
Daṭṭhabbaṁ dassanaṭṭhena paññindriyaṁ daṭṭhabbaṁ saddhammassavane
sotāpattiyaṅge yonisomanasikāre sotāpattiyaṅge dhammānudhammapaṭipattiyā
sotāpattiyaṅge adhimokkhādhipateyyaṭṭhena saddhindriyaṁ
daṭṭhabbaṁ saddhindriyassa vasena paggahaṭṭhena viriyindriyaṁ daṭṭhabbaṁ
upaṭṭhānaṭṭhena satindriyaṁ daṭṭhabbaṁ avikkhepaṭṭhena samādhindriyaṁ
daṭṭhabbaṁ dassanaṭṭhena paññindriyaṁ daṭṭhabbaṁ catūsu sotāpattiyaṅgesu
saddhindriyassa vasena imehi vīsatiyā ākārehi
pañcindriyāni daṭṭhabbāni.

[439] Catūsu sammappadhānesu viriyindriyassa vasena katamehi
vīsatiyā ākārehi pañcindriyāni daṭṭhabbāni. Anuppannānaṁ
pāpakānaṁ akusalānaṁ dhammānaṁ anuppādāya sammappadhāne paggahādhipateyyaṭṭhena
viriyindriyaṁ daṭṭhabbaṁ viriyindriyassa vasena
upaṭṭhānaṭṭhena satindriyaṁ daṭṭhabbaṁ avikkhepaṭṭhena samādhindriyaṁ
daṭṭhabbaṁ dassanaṭṭhena paññindriyaṁ daṭṭhabbaṁ adhimokkhaṭṭhena
saddhindriyaṁ daṭṭhabbaṁ uppannānaṁ pāpakānaṁ akusalānaṁ dhammānaṁ
pahānāya sammappadhāne .pe. Anuppannānaṁ kusalānaṁ dhammānaṁ
uppādāya sammappadhāne .pe. Uppannānaṁ kusalānaṁ dhammānaṁ ṭhitiyā
asammosāya bhiyyobhāvāya vepullāya bhāvanāya pāripūriyā
sammappadhāne paggahādhipateyyaṭṭhena viriyindriyaṁ daṭṭhabbaṁ viriyindriyassa
vasena upaṭṭhānaṭṭhena satindriyaṁ daṭṭhabbaṁ avikkhepaṭṭhena
Samādhindriyaṁ daṭṭhabbaṁ dassanaṭṭhena paññindriyaṁ daṭṭhabbaṁ
adhimokkhaṭṭhena saddhindriyaṁ daṭṭhabbaṁ catūsu sammappadhānesu
viriyindriyassa vasena imehi vīsatiyā ākārehi pañcindriyāni
daṭṭhabbāni.

[440] Catūsu satipaṭṭhānesu satindriyassa vasena katamehi
vīsatiyā ākārehi pañcindriyāni daṭṭhabbāni. Kāye
kāyānupassanāsatipaṭṭhāne upaṭṭhānādhipateyyaṭṭhena satindriyaṁ daṭṭhabbaṁ
satindriyassa vasena avikkhepaṭṭhena samādhindriyaṁ daṭṭhabbaṁ
dassanaṭṭhena paññindriyaṁ daṭṭhabbaṁ adhimokkhaṭṭhena saddhindriyaṁ
daṭṭhabbaṁ paggahaṭṭhena viriyindriyaṁ daṭṭhabbaṁ vedanāsu
vedanānupassanāsatipaṭṭhāne .pe. Citte cittānupassanāsatipaṭṭhāne
dhammesu dhammānupassanāsatipaṭṭhāne upaṭṭhānādhipateyyaṭṭhena
satindriyaṁ daṭṭhabbaṁ satindriyassa vasena avikkhepaṭṭhena samādhindriyaṁ
daṭṭhabbaṁ dassanaṭṭhena paññindriyaṁ daṭṭhabbaṁ adhimokkhaṭṭhena
saddhindriyaṁ daṭṭhabbaṁ paggahaṭṭhena viriyindriyaṁ daṭṭhabbaṁ catūsu
satipaṭṭhānesu satindriyassa vasena imehi vīsatiyā ākārehi
pañcindriyāni daṭṭhabbāni.

[441] Catūsu jhānesu samādhindriyassa vasena katamehi
vīsatiyā ākārehi pañcindriyāni daṭṭhabbāni. Paṭhamajjhāne
avikkhepādhipateyyaṭṭhena samādhindriyaṁ daṭṭhabbaṁ samādhindriyassa vasena
Dassanaṭṭhena paññindriyaṁ daṭṭhabbaṁ adhimokkhaṭṭhena saddhindriyaṁ
daṭṭhabbaṁ paggahaṭṭhena viriyindriyaṁ daṭṭhabbaṁ upaṭṭhānaṭṭhena
satindriyaṁ daṭṭhabbaṁ dutiyajjhāne .pe. Tatiyajjhāne catutthajjhāne
avikkhepādhipateyyaṭṭhena samādhindriyaṁ daṭṭhabbaṁ samādhindriyassa
vasena dassanaṭṭhena paññindriyaṁ daṭṭhabbaṁ adhimokkhaṭṭhena
saddhindriyaṁ daṭṭhabbaṁ paggahaṭṭhena viriyindriyaṁ daṭṭhabbaṁ
upaṭṭhānaṭṭhena satindriyaṁ daṭṭhabbaṁ catūsu jhānesu samādhindriyassa
vasena imehi vīsatiyā ākārehi pañcindriyāni daṭṭhabbāni.

[442] Catūsu ariyasaccesu paññindriyassa vasena katamehi
vīsatiyā ākārehi pañcindriyāni daṭṭhabbāni. Dukkhe ariyasacce
dassanādhipateyyaṭṭhena paññindriyaṁ daṭṭhabbaṁ paññindriyassa
vasena adhimokkhaṭṭhena saddhindriyaṁ daṭṭhabbaṁ paggahaṭṭhena viriyindriyaṁ
daṭṭhabbaṁ upaṭṭhānaṭṭhena satindriyaṁ daṭṭhabbaṁ avikkhepaṭṭhena
samādhindriyaṁ daṭṭhabbaṁ dukkhasamudaye ariyasacce .pe.
Dukkhanirodhagāminiyā paṭipadāya ariyasacce dassanādhipateyyaṭṭhena
paññindriyaṁ daṭṭhabbaṁ paññindriyassa vasena adhimokkhaṭṭhena
saddhindriyaṁ daṭṭhabbaṁ paggahaṭṭhena viriyindriyaṁ daṭṭhabbaṁ upaṭṭhānaṭṭhena
satindriyaṁ daṭṭhabbaṁ avikkhepaṭṭhena samādhindriyaṁ
daṭṭhabbaṁ catūsu ariyasaccesu paññindriyassa vasena imehi
vīsatiyā ākārehi pañcindriyāni daṭṭhabbāni.

[443] Catūsu sotāpattiyaṅgesu saddhindriyassa vasena
katihākārehi pañcannaṁ indriyānaṁ cariyā daṭṭhabbā catūsu sammappadhānesu
.pe. Catūsu satipaṭṭhānesu .pe. Catūsu jhānesu .pe.
Catūsu ariyasaccesu paññindriyassa vasena katihākārehi pañcannaṁ
indriyānaṁ cariyā daṭṭhabbā. Catūsu sotāpattiyaṅgesu saddhindriyassa
vasena vīsatiyā ākārehi pañcannaṁ indriyānaṁ cariyā
daṭṭhabbā catūsu sammappadhānesu .pe. Catūsu satipaṭṭhānesu
catūsu jhānesu catūsu ariyasaccesu paññindriyassa vasena vīsatiyā
ākārehi pañcannaṁ indriyānaṁ cariyā daṭṭhabbā.

[444] Catūsu sotāpattiyaṅgesu saddhindriyassa vasena katamehi
vīsatiyā ākārehi pañcannaṁ indriyānaṁ cariyā daṭṭhabbā.
Sappurisasaṁseve sotāpattiyaṅge adhimokkhādhipateyyaṭṭhena saddhindriyassa
cariyā daṭṭhabbā saddhindriyassa vasena paggahaṭṭhena
viriyindriyassa cariyā daṭṭhabbā upaṭṭhānaṭṭhena satindriyassa cariyā
daṭṭhabbā avikkhepaṭṭhena samādhindriyassa cariyā daṭṭhabbā
dassanaṭṭhena paññindriyassa cariyā daṭṭhabbā saddhammassavane
sotāpattiyaṅge .pe. Yonisomanasikāre sotāpattiyaṅge
dhammānudhammapaṭipattiyā sotāpattiyaṅge adhimokkhādhipateyyaṭṭhena
saddhindriyassa cariyā daṭṭhabbā saddhindriyassa vasena paggahaṭṭhena
viriyindriyassa cariyā daṭṭhabbā upaṭṭhānaṭṭhena satindriyassa
Cariyā daṭṭhabbā avikkhepaṭṭhena samādhindriyassa cariyā
daṭṭhabbā dassanaṭṭhena paññindriyassa cariyā daṭṭhabbā catūsu
sotāpattiyaṅgesu saddhindriyassa vasena imehi vīsatiyā ākārehi
pañcannaṁ indriyānaṁ cariyā daṭṭhabbā.

[445] Catūsu sammappadhānesu viriyindriyassa vasena katamehi
vīsatiyā ākārehi pañcannaṁ indriyānaṁ cariyā daṭṭhabbā. Anuppannānaṁ
pāpakānaṁ akusalānaṁ dhammānaṁ anuppādāya sammappadhāne
paggahādhipateyyaṭṭhena viriyindriyassa cariyā daṭṭhabbā viriyindriyassa
vasena upaṭṭhānaṭṭhena satindriyassa cariyā daṭṭhabbā .pe.
Adhimokkhaṭṭhena saddhindriyassa cariyā daṭṭhabbā uppannānaṁ
pāpakānaṁ akusalānaṁ dhammānaṁ pahānāya sammappadhāne .pe.
Anuppannānaṁ kusalānaṁ dhammānaṁ uppādāya sammappadhāne .pe.
Uppannānaṁ kusalānaṁ dhammānaṁ ṭhitiyā asammosāya bhiyyobhāvāya
vepullāya bhāvanāya pāripūriyā sammappadhāne paggahādhipateyyaṭṭhena
viriyindriyassa cariyā daṭṭhabbā viriyindriyassa vasena upaṭṭhānaṭṭhena
satindriyassa .pe. Adhimokkhaṭṭhena saddhindriyassa cariyā
daṭṭhabbā catūsu sammappadhānesu viriyindriyassa vasena imehi
vīsatiyā ākārehi pañcannaṁ indriyānaṁ cariyā daṭṭhabbā.