[186] Kathaṁ atthanānatte paññā atthapaṭisambhide ñāṇaṁ.
Dhammānānatte paññā dhammapaṭisambhide ñāṇaṁ niruttinānatte
paññā niruttipaṭisambhide ñāṇaṁ paṭibhāṇanānatte paññā
paṭibhāṇapaṭisambhide ñāṇaṁ.
Saddhindriyaṁ dhammo viriyindriyaṁ dhammo satindriyaṁ dhammo
samādhindriyaṁ dhammo paññindriyaṁ dhammo añño saddhindriyaṁ
dhammo añño viriyindriyaṁ dhammo añño satindriyaṁ dhammo
añño samādhindriyaṁ dhammo añño paññindriyaṁ dhammo yena
ñāṇena ime nānā dhammā ñātā teneva ñāṇena ime
nānā dhammā paṭividitāti tena vuccati dhammanānatte paññā
Dhammapaṭisambhide ñāṇaṁ.

[187] Adhimokkhaṭṭho attho paggahaṭṭho attho upaṭṭhānaṭṭho
attho avikkhepaṭṭho attho dassanaṭṭho attho
añño adhimokkhaṭṭho attho añño paggahaṭṭho attho añño
upaṭṭhānaṭṭho attho añño avikkhepaṭṭho attho añño
dassanaṭṭho attho yena ñāṇena ime nānā atthā ñātā
teneva ñāṇena ime nānā atthā paṭividitāti tena vuccati
atthanānatte paññā atthapaṭisambhide ñāṇaṁ.

[188] Pañca dhamme sandassetuṁ byañjananiruttābhilāpā
pañca atthe sandassetuṁ byañjananiruttābhilāpā aññā
dhammaniruttiyo aññā atthaniruttiyo yena ñāṇena imā nānā
niruttiyo ñātā teneva ñāṇena imā nānā niruttiyo paṭividitāti
tena vuccati niruttinānatte paññā niruttipaṭisambhide
ñāṇaṁ.

[189] Pañcasu dhammesu ñāṇāni pañcasu atthesu ñāṇāni
dasasu niruttīsu ñāṇāni aññāni dhammesu ñāṇāni
aññāni atthesu ñāṇāni aññāni niruttīsu ñāṇāni yena
ñāṇena ime nānā ñāṇā ñātā teneva ñāṇena ime
nānā ñāṇā paṭividitāti tena vuccati paṭibhāṇanānatte paññā
paṭibhāṇapaṭisambhide ñāṇaṁ.

[190] Saddhābalaṁ dhammo viriyabalaṁ dhammo satibalaṁ dhammo
samādhibalaṁ dhammo paññābalaṁ dhammo añño saddhābalaṁ dhammo
añño viriyabalaṁ dhammo añño satibalaṁ dhammo añño samādhibalaṁ
dhammo añño paññābalaṁ dhammo yena ñāṇena ime
nānā dhammā ñātā teneva ñāṇena ime nānā dhammā
paṭividitāti tena vuccati dhammanānatte paññā dhammapaṭisambhide
ñāṇaṁ.

[191] Assaddhiye akampiyaṭṭho attho kosajje akampiyaṭṭho
attho pamāde akampiyaṭṭho attho uddhacce akampiyaṭṭho
attho avijjāya akampiyaṭṭho attho añño assaddhiye
akampiyaṭṭho attho añño kosajje akampiyaṭṭho attho
añño pamāde akampiyaṭṭho attho añño uddhacce
akampiyaṭṭho attho añño avijjāya akampiyaṭṭho attho
yena ñāṇena ime nānā atthā ñātā teneva ñāṇena
ime nānā atthā paṭividitāti tena vuccati atthanānatte paññā
atthapaṭisambhide ñāṇaṁ.

[192] Pañca dhamme sandassetuṁ byañjananiruttābhilāpā
pañca atthe sandassetuṁ byañjananiruttābhilāpā aññā dhammaniruttiyo
aññā atthaniruttiyo yena ñāṇena imā nānā
niruttiyo ñātā teneva ñāṇena imā nānā niruttiyo paṭividitāti
Tena vuccati niruttinānatte paññā niruttipaṭisambhide ñāṇaṁ.

[193] Pañcasu dhammesu ñāṇāni pañcasu atthesu
ñāṇāni dasasu niruttīsu ñāṇāni aññāni dhammesu ñāṇāni
aññāni atthesu ñāṇāni aññāni niruttīsu ñāṇāni yena
ñāṇena ime nānā ñāṇā ñātā teneva ñāṇena ime
nānā ñāṇā paṭividitāti tena vuccati paṭibhāṇanānatte
paññā paṭibhāṇapaṭisambhide ñāṇaṁ.

[194] Satisambojjhaṅgo dhammo dhammavicayasambojjhaṅgo
dhammo viriyasambojjhaṅgo dhammo pītisambojjhaṅgo dhammo
passaddhisambojjhaṅgo dhammo samādhisambojjhaṅgo dhammo upekkhāsambojjhaṅgo
dhammo añño satisambojjhaṅgo dhammo añño
dhammavicayasambojjhaṅgo dhammo añño viriyasambojjhaṅgo
dhammo añño pītisambojjhaṅgo dhammo añño passaddhisambojjhaṅgo
dhammo añño samādhisambojjhaṅgo dhammo añño
upekkhāsambojjhaṅgo dhammo yena ñāṇena ime nānā
dhammā ñātā teneva ñāṇena ime nānā dhammā paṭividitāti
tena vuccati dhammanānatte paññā dhammapaṭisambhide ñāṇaṁ.

[195] Upaṭṭhānaṭṭho attho pavicayaṭṭho attho paggahaṭṭho
attho pharaṇaṭṭho attho upasamaṭṭho attho avikkhepaṭṭho
attho paṭisaṅkhānaṭṭho attho añño upaṭṭhānaṭṭho attho
Añño pavicayaṭṭho attho añño paggahaṭṭho attho añño
pharaṇaṭṭho attho añño upasamaṭṭho attho añño
avikkhepaṭṭho attho añño paṭisaṅkhānaṭṭho attho yena
ñāṇena ime nānā atthā ñātā teneva ñāṇena ime
nānā atthā paṭividitāti tena vuccati atthanānatte paññā
atthapaṭisambhide ñāṇaṁ.