[728] Etaṁ bhayaṁ kāmaguṇesu disvāti etaṁ bhayaṁ kāmaguṇesu
disvā passitvā tulayitvā tīrayitvā vibhāvayitvā vibhūtaṁ katvāti
etaṁ bhayaṁ kāmaguṇesu disvā. Eko care khaggavisāṇakappo.
Tenāha so paccekasambuddho
ītī ca gaṇḍo ca upaddavo ca
rogo ca sallañca bhayañca metaṁ
etaṁ bhayaṁ kāmaguṇesu disvā
eko care khaggavisāṇakappoti.

[729] Sītañca uṇhañca khudaṁ pipāsaṁ
vātātape ḍaṁsasiriṁsape 1 ca
sabbāni petāni abhisaṁbhavitvā
eko care khaggavisāṇakappo.

[730] Sītañca uṇhañca khudaṁ pipāsanti [2]- dvīhi
kāraṇehi sītaṁ hoti abbhantaradhātupakopavasena vā sītaṁ hoti
bahiddhāutuvasena vā sītaṁ hoti. Uṇhanti dvīhi kāraṇehi uṇhaṁ
hoti abbhantaradhātupakopavasena vā uṇhaṁ hoti bahiddhāutuvasena
vā uṇhaṁ hoti. Khuddā 3 vuccati chātako. Pipāsā vuccati
udakampīti 4 sītañca uṇhañca khudaṁ pipāsaṁ.

[731] Vātātape ḍaṁsasiriṁsape cāti vātāti puratthimā vātā
pacchimā vātā uttarā vātā dakkhiṇā vātā sarajā vātā [5]-
1 Ma. ḍaṁsasarīsape. evamuparipi. 2 Ma. sītanti. 3 Ma. khudā. 4 Ma. udakapipāsāti.
5 arajā vātā. evamīdisesu ṭhānesu.
Sītā vātā uṇhā vātā parittā vātā adhimattā vātā
verambhavātā [1]- supaṇṇavātā tālapaṇṇavātā vidhūpanavātā.
Ātapo vuccati suriyasantāpo. Ḍaṁsā vuccanti piṅgalamakkhikā.
Siriṁsapā vuccanti ahīti vātātape ḍaṁsasiriṁsape ca.

[732] Sabbāni petāni abhisaṁbhavitvāti abhibhavitvā ajjhottharitvā
pariyādiyitvā madditvāti sabbāni petāni abhisaṁbhavitvā.
Eko care khaggavisāṇakappo. Tenāha so paccekasambuddho
sītañca uṇhañca khudaṁ pipāsaṁ
vātātape ḍaṁsasiriṁsape ca
sabbāni petāni abhisaṁbhavitvā
eko care khaggavisāṇakappoti.

[733] Nāgova yūthāni vivajjayitvā
sañjātakhandho padumī uḷāro
yathābhirantaṁ vihare araññe
eko care khaggavisāṇakappo.

[734] Nāgova yūthāni vivajjayitvāti nāgo vuccati
hatthināgo. Paccekasambuddhopi nāgo. Kiṁkāraṇā paccekasambuddho
nāgo. Āguṁ na karotīti nāgo. Na gacchatīti nāgo. Na
āgacchatīti nāgo. Kathaṁ so paccekasambuddho āguṁ na karotīti
nāgo. Āgū vuccanti pāpakā akusalā dhammā saṅkilesikā
1 Ma. pakkhavātā. evamuparipi.
Ponobbhavikā sadarā dukkhavipākā āyatiṁ jātijarāmaraṇīyā.
Āguṁ na karotīti 1 kiñci loke
sabbasaṁyoge visajja bandhanāni
sabbattha na sajjati vippamutto
nāgo tādi pavuccate tathattā.
Evaṁ so paccekasambuddho āguṁ na karotīti nāgo. Kathaṁ so
paccekasambuddho na gacchatīti nāgo. So paccekasambuddho na
chandāgatiṁ gacchati na dosāgatiṁ gacchati na mohāgatiṁ gacchati na
bhayāgatiṁ gacchati na rāgavasena gacchati na dosavasena gacchati na
mohavasena gacchati na mānavasena gacchati na diṭṭhivasena gacchati na
uddhaccavasena gacchati na vicikicchāvasena gacchati na anusayavasena
gacchati na vaggehi dhammehi yāyati niyyati vuyhati saṁhariyati 2 evaṁ
so paccekasambuddho na gacchatīti nāgo. Kathaṁ paccekasambuddho
na āgacchatīti nāgo. Sotāpattimaggena ye kilesā pahīnā
te kilese na puneti na pacceti na paccāgacchati sakadāgāmimaggena
anāgāmimaggena arahattamaggena ye kilesā pahīnā
te kilese na puneti na pacceti na paccāgacchati evaṁ so
paccekasambuddho na āgacchatīti nāgo. Nāgova yūthāni vivajjayitvāti
yathā so hatthināgo yūthāni vivajjetvā parivajjetvā
abhinivajjetvā ekova araññe vanamajjhassa ajjhogāhetvā 3 carati
1 Ma. karoti. 2 Ma. saṁharīyati. 3 Ma. araññavanamajjhogāhetvā.
Vicarati iriyati vatteti pāleti yapeti yāpeti paccekasambuddhopi
gaṇaṁ vajjetvā 1 parivajjetvā abhivajjetvā eko care
khaggavisāṇakappo 2 araññavanapatthāni pantāni senāsanāni paṭisevati
appasaddāni appanigghosāni vijanavātāni manussarāhaseyyakāni
paṭisallānasāruppāni so eko gacchati eko tiṭṭhati eko
nisīdati eko seyyaṁ kappeti eko gāmaṁ piṇḍāya pavisati [3]- eko
paṭikkamati eko raho nisīdati eko caṅkamaṁ adhiṭṭhāti eko
carati vicarati iriyati vatteti pāleti yapeti yāpetīti nāgova
yūthāni vivajjayitvā.

[735] Sañjātakhandho padumī uḷāroti yathā so
hatthināgo sañjātakhandho sattaratano vā hoti aṭṭharatano vā
paccekasambuddhopi sañjātakhandho asekkhena sīlakkhandhena asekkhena
samādhikkhandhena asekkhena paññākkhandhena asekkhena vimuttikkhandhena
asekkhena vimuttiñāṇadassanakkhandhena. Yathā so hatthināgo
padumī paccekasambuddhopi sattahi bojjhaṅgapupphehi padumī satisambojjhaṅgapupphena
dhammavicayasambojjhaṅgapupphena viriyasambojjhaṅgapupphena
pītisambojjhaṅgapupphena passaddhisambojjhaṅgapupphena samādhisambojjhaṅgapupphena
upekkhāsambojjhaṅgapupphena. Yathā so
hatthināgo uḷāro thāmena balena javena sūrena paccekasambuddhopi
uḷāro sīlena samādhinā paññāya vimuttiyā vimuttiñāṇadassanenāti
1 Ma. vivajjetvā. 2 Ma. ime dve pāṭhā natthi. 3 sabbattha potthake
eko abhikkamatīti padena bhavitabbaṁ.
Sañjātakhandho padumī uḷāro.

[736] Yathābhirantaṁ vihare araññeti yathā so hatthināgo
yathābhirantaṁ araññe viharati paccekasambuddhopi yathābhirantaṁ araññe
viharati paṭhamenapi jhānena yathābhirantaṁ araññe viharati dutiyenapi
tatiyenapi catutthenapi jhānena yathābhirantaṁ araññe viharati
mettāyapi cetovimuttiyā yathābhirantaṁ araññe viharati karuṇāyapi
muditāyapi upekkhāyapi cetovimuttiyā yathābhirantaṁ araññe viharati
ākāsānañcāyatanasamāpattiyāpi yathābhirantaṁ araññe viharati
viññāṇañcāyatanasamāpattiyāpi ākiñcaññāyatanasamāpattiyāpi
nevasaññānāsaññāyatanasamāpattiyāpi phalasamāpattiyāpi yathābhirantaṁ
araññe viharatīti yathābhirantaṁ vihare araññe. Eko care
khaggavisāṇakappo. Tenāha so paccekasambuddho
nāgova yūthāni vivajjayitvā
sañjātakhandho padumī uḷāro
yathābhirantaṁ vihare araññe
eko care khaggavisāṇakappoti.

[737] Aṭṭhāna taṁ saṅgaṇikāratassa
yaṁ phussaye 1 sāmayikaṁ vimuttiṁ
ādiccabandhussa vaco nisamma
eko care khaggavisāṇakappo.
1 Ma. phassaye. evamuparipi.