[618] Gotamā bhūrimedhasāti bhūri vuccati paṭhavī. Bhagavā
imāya paṭhavīsamāya vipulāya vitthatāya paññāya samannāgato.
Medhā vuccati paññā yā paññā pajānanā .pe. Amoho
dhammavicayo sammādiṭṭhi. Bhagavā imāya medhāya paññāya upeto
samupeto upāgato samupāgato upapanno samupapanno samannāgato
tasmā buddho bhūrimedhasoti gotamā bhūrimedhasā. Tenāha piṅgiyatthero
nāhaṁ tamhā vippavasāmi muhuttamapi brāhmaṇa
gotamā bhūripaññāṇā gotamā bhūrimedhasāti.

[619] Yo me dhammamadesesi sandiṭṭhikamakālikaṁ
1 Ma. nāhaṁ. 2 Ma. nasaddo natthi.
Taṇhakkhayamanītikaṁ yassa natthi upamā kvaci.

[620] Yo me dhammamadesesīti yoti yo so bhagavā
sayambhū anācariyako pubbe ananussutesu dhammesu sāmaṁ saccāni
abhisambujjhi tattha ca sabbaññutaṁ patto balesu ca vasībhāvaṁ.
Dhammamadesesīti dhammanti ādikalyāṇaṁ majjhekalyāṇaṁ pariyosānakalyāṇaṁ
sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ
cattāro satipaṭṭhāne cattāro sammappadhāne cattāro iddhipāde
pañcindriyāni pañca balāni satta bojjhaṅge ariyaṁ aṭṭhaṅgikaṁ
maggaṁ nibbānañca nibbānagāminiñca paṭipadaṁ ācikkhi desesi
paññapesi paṭṭhapesi vivari vibhaji uttānīmakāsi pakāsesīti yo
me dhammamadesesi.

[621] Sandiṭṭhikamakālikanti sandiṭṭhikaṁ akālikaṁ ehipassikaṁ
opanayikaṁ paccattaṁ veditabbaṁ viññūhīti evaṁ sandiṭṭhikamakālikaṁ.
Athavā yo diṭṭheva dhamme ariyaṁ aṭṭhaṅgikaṁ maggaṁ bhāveti
tassa maggassa anantarā samanantarā adhigacchateva phalaṁ vindati paṭilabhatīti
evampi sandiṭṭhikamakālikaṁ. Yathā manussā kālikaṁ dhanaṁ
datvā anantarā na labhanti kālaṁ āgamenti nevāyaṁ dhammo.
Yo diṭṭheva dhamme ariyaṁ aṭṭhaṅgikaṁ maggaṁ bhāveti tassa maggassa
anantarā samanantarā adhigacchateva phalaṁ vindati paṭilabhati na parattha
na paraloke evaṁ akālikanti sandiṭṭhikamakālikaṁ.

[622] Taṇhakkhayamanītikanti taṇhāti rūpataṇhā saddataṇhā
gandhataṇhā rasataṇhā phoṭṭhabbataṇhā dhammataṇhā. Taṇhakkhayanti
taṇhakkhayaṁ rāgakkhayaṁ dosakkhayaṁ mohakkhayaṁ gatikkhayaṁ upapattikkhayaṁ
paṭisandhikkhayaṁ bhavakkhayaṁ saṁsārakkhayaṁ vaṭṭakkhayaṁ. Anītikanti
īti vuccanti kilesā ca khandhā ca abhisaṅkhārā ca. Ītippahānaṁ
ītivūpasamo ītipaṭinissaggo ītipaṭippassaddhi amataṁ nibbānanti
taṇhakkhayamanītikaṁ.

[623] Yassa natthi upamā kvacīti yassāti nibbānassa.
Natthi upamāti upamā natthi upanidhā natthi sadisaṁ natthi paṭibhāgo
natthi na saṁvijjati nupalabbhatīti natthi upamā. Kavacīti kvaci
kimhici katthaci ajjhattaṁ vā bahiddhā vā ajjhattabahiddhā vāti
yassa natthi upamā kvaci. Tenāha piṅgiyatthero
yo me dhammamadesesi sandiṭṭhikamakālikaṁ
taṇhakkhayamanītikaṁ yassa natthi upamā kvacīti.

[624] Passāmi naṁ manasā cakkhunāva
rattindivaṁ brāhmaṇa appamatto
namassamāno vivasāmi 1 rattiṁ
teneva maññāmi avippavāsaṁ.

[625] Passāmi naṁ manasā cakkhunāvāti yathā cakkhumā
puriso ālokeyya 2 rūpagatāni passeyya dakkheyya olokeyya
1 Sī. namassamānova vasemi. Ma. vivasemi. evamuparipi. 2 Ma. āloke.
Nijjhāpeyya upaparikkheyya evamevāhaṁ buddhaṁ bhagavantaṁ manasā
passāmi dakkhāmi olokemi nijjhāpayāmi upaparikkhāmīti passāmi
naṁ manasā cakkhunāva.

[626] Rattindivaṁ brāhmaṇa appamattoti rattiñca divā
ca [1]- manasā bhāvento appamattoti rattindivaṁ brāhmaṇa
appamatto.

[627] Namassamāno vivasāmi rattinti namassamānoti kāyena
vā namassamāno vācāya vā namassamāno cittena vā namassamāno
anvatthapaṭipattiyā vā namassamāno dhammānudhammapaṭipattiyā
vā namassamāno sakkāramāno garukāramāno mānayamāno pūjayamāno
rattindivaṁ vasāmi 2 vītināmemīti namassamāno vivasāmi rattiṁ.