[8] Sace me yācamānassa bhavaṁ nānuppadassati
sattame divase tuyhaṁ muddhā phalatu sattadhā.

[9] Abhisaṅkharitvā kuhako bheravaṁ so akittayi
tassa taṁ vacanaṁ sutvā bāvarī dukkhito ahu.

[10] Ussussati anāhāro sokasallasamappito
athopi evaṁcittassa jahāne 1 na ramatī mano.

[11] Utrastaṁ dukkhitaṁ disvā devatā atthakāminī
bāvariṁ upasaṅkamma idaṁ vacanamabravi.

[12] Na so muddhaṁ pajānāti kuhako so dhanatthiko
muddhani muddhādhipāte 2 vā ñāṇaṁ tassa na vijjati.

[13] Pahotī 3 carahi jānāti tamme akkhāhi pucchitā
muddhaṁ muddhādhipātañca taṁ suṇoma vaco tava.

[14] Ahampetaṁ na jānāmi ñāṇammettha 4 na vijjati
muddhaṁ muddhādhipāto 5 ca jinānaṁ heta dassanaṁ 6 .
1 Ma. jhāne. 2 Ma. muddhapāte. 3 Ma. Yu. bhotī. 4 Ma. ñāṇaṁ mettha.
5 Ma. muddhādhipāte ca. 6 Ma. hettha dassanaṁ.

[15] Atha ko carahi jānāti asmiṁ paṭhavimaṇḍale 1
muddhaṁ muddhādhipātañca tamme akkhāhi devate.

[16] Purā kapilavatthumhā nikkhanto lokanāyako
apacco okkākarājassa sakyaputto pabhaṅkaro.

[17] So hi brāhmaṇa sambuddho sabbadhammāna pāragū
sabbābhiññābalappatto sabbadhammesu cakkhumā
sabbadhammakkhayaṁ 2 patto vimutto upadhikkhaye.