[596] Vinicchaye ṭhatvā sayaṁ pamāyāti vinicchayā vuccanti
dvāsaṭṭhī diṭṭhigatāni vinicchitadiṭṭhiyā ṭhatvā patiṭṭhahitvā gaṇhitvā
parāmasitvā abhinivisitvāti vinicchaye ṭhatvā. Sayaṁ pamāyāti sayaṁ
pamāya paminitvā ayaṁ satthā sabbaññūti sayaṁ pamāya paminitvā
ayaṁ dhammo svākkhāto ayaṁ gaṇo supaṭipanno ayaṁ diṭṭhi
bhaddikā ayaṁ paṭipadā supaññattā ayaṁ maggo niyyānikoti
sayaṁ pamāya paminitvāti vinicchaye ṭhatvā sayaṁ pamāya.

[597] Uddhaṁ so lokasmiṁ vivādametīti uddhaṁ [3]- vuccati anāgataṁ.
Attano vādaṁ uddhaṁ ṭhapetvā sayameva kalahaṁ bhaṇḍanaṁ viggahaṁ
vivādaṁ medhagaṁ eti upeti upagacchati gaṇhāti parāmasati abhinivisatīti
evampi uddhaṁ so lokasmiṁ vivādameti. Athavā aññena uddhaṁ
vādena saddhiṁ kalahaṁ karoti bhaṇḍanaṁ karoti viggahaṁ karoti vivādaṁ
karoti medhagaṁ karoti na tvaṁ imaṁ dhammavinayaṁ ājānāsi .pe.
Nibbedhehi vā sace pahosīti evampi uddhaṁ so lokasmiṁ vivādameti.
1 sabbattha poṭṭhakesu sa iti dissati. 2 Ma. kubbati. Yu. kurute. 3 Ma. so.

[598] Hitvāna sabbāni vinicchayānīti vinicchayā vuccanti
dvāsaṭṭhī diṭṭhigatāni. Sabbā vinicchitadiṭṭhiyo 1 hitvā cajitvā
pariccajitvā jahitvā pajahitvā vinoditvā byantīkaritvā
anabhāvaṅgametvāti hitvāna sabbāni vinicchayāni.

[599] Na medhagaṁ kūrute jantu loketi na kalahaṁ karoti na
bhaṇḍanaṁ karoti na viggahaṁ karoti na vivādaṁ karoti na medhagaṁ
karoti. Vuttaṁ hetaṁ bhagavatā evaṁ vimuttacitto kho aggivessana
bhikkhu na kenaci saṁvadati na kenaci vivadati yañca loke vuttaṁ
tena ca voharati aparāmasanti. Jantūti satto naro mānavo
poso puggalo jīvo jātu 2 jantu indagū manujo. Loketi
apāyaloke manussaloke devaloke khandhaloke dhātuloke āyatanaloketi
na medhagaṁ kūrute jantu loke. Tenāha bhagavā
vinicchaye ṭhatvā sayaṁ pamāya
uddhaṁ so lokasmiṁ vivādameti
hitvāna sabbāni vinicchayāni
na medhagaṁ kūrute jantu loketi.
Dvādasamo cūḷaviyūhasuttaniddeso niṭṭhito.
-------------------
1 Ma. diṭṭhivinicchayā sabbe vinicchaye .... 2 Ma. jāgu. Yu. jagū.
Terasamo mahāviyūhasuttaniddeso

[600] Yekecime diṭṭhiparibbasānā
idameva saccanti pavādayanti 1
sabbeva te nindamanvānayanti
atho pasaṁsampi labhanti tattha.

[601] Yekecime diṭṭhiparibbasānāti yekecīti sabbena sabbaṁ
sabbathā sabbaṁ asesaṁ nissesaṁ pariyādāyavacanametaṁ yekecīti.
Diṭṭhiparibbasānāti santeke samaṇabrāhmaṇā diṭṭhigatikā te
dvāsaṭṭhiyā diṭṭhigatānaṁ aññataraññataraṁ diṭṭhigataṁ gahetvā uggahetvā
gaṇhitvā parāmasitvā abhinivisitvā sakāya sakāya diṭṭhiyā vasanti
saṁvasanti āvasanti parivasanti. Yathā āgārikā vā gharesu vasanti
sāpattikā vā āpattīsu vasanti sakilesā vā kilesesu vasanti
evameva santeke samaṇabrāhmaṇā diṭṭhigatikā te dvāsaṭṭhiyā
diṭṭhigatānaṁ aññataraññataraṁ diṭṭhigataṁ gahetvā uggahetvā gaṇhitvā
parāmasitvā abhinivisitvā sakāya sakāya diṭṭhiyā vasanti saṁvasanti
āvasanti parivasantīti yekecime diṭṭhiparibbasānā.

[602] Idameva saccanti pavādayantīti sassato loko idameva
saccaṁ moghamaññanti vadanti kathenti bhaṇanti dīpayanti voharanti
asassato loko .pe. Neva hoti na na hoti tathāgato
parammaraṇā idameva saccaṁ moghamaññanti vadanti kathenti bhaṇanti
1 Ma. ca vādayanti.
Dīpayanti voharantīti idameva saccanti pavādayanti.

[603] Sabbeva te nindamanvānayantīti sabbeva te samaṇabrāhmaṇā
nindameva anventi garahameva anventi akittimeva
anventi sabbe ninditāyeva honti garahitāyeva honti
akittitāyeva hontīti sabbeva te nindamanvānayanti.

[604] Atho pasaṁsampi labhanti tatthāti tattha sakāya diṭṭhiyā
sakāya khantiyā sakāya ruciyā sakāya laddhiyā pasaṁsaṁ thomanaṁ kittiṁ
vaṇṇahārikaṁ labhanti paṭilabhanti [1]- adhigacchanti 2 vindantīti atho
pasaṁsampi labhanti tattha. Tenāha so nimmito
yekecime diṭṭhiparibbasānā
idameva saccanti pavādayanti
sabbeva te nindamanvānayanti
atho pasaṁsampi labhanti tatthāti.

[605] Appaṁ hi etaṁ na alaṁ samāya
duve vivādassa phalāni brūmi
etampi disvā na vivādayetha 3
khemābhipassaṁ avivādabhummaṁ 4 .