[272] 5 Jano janasmiṁ sambandho janamevassito jano
jano janena heṭhiyati heṭheti ca jano janaṁ.
Ko hi tassa janenattho janena janitena vā
janaṁ ohāya gaccheyya 1 heṭhayitvā bahuṁ jananti.
Sabbamitto thero.
1 Ma. Yu. gacchan-taṁ.

[273] 6 Kāḷī itthī brahatī dhaṅkarūpā
satthiñca bhetvā aparañca satthiṁ
bāhañca bhetvā aparañca bāhuṁ 1
sīsañca bhetvā dadhithālakaṁva
esā nisinnā abhisandahitvā 2 .
Yo ve avidvā upadhiṁ karoti
punappunaṁ dukkhamupeti mando
tasmā pajānaṁ upadhiṁ na kayirā
māhaṁ puna bhinnasiro sayissanti.
Mahākālo thero.

[274] 7 Bahū sapatte labhati muṇḍo saṅghāṭipāruto
lābhī annassa pānassa vatthassa sayanassa ca.
Etamādīnavaṁ ñatvā sakkāresu mahabbhayaṁ
appalābho anavassuto sato bhikkhu paribbajeti.
Tisso thero.

[275] 8 Pācīnavaṁsadāyamhi sakyaputtā sahāyakā
pahāyanappake bhoge uñchāpattāgate ratā
āraddhaviriyā pahitattā niccaṁ daḷhaparakkamā
ramanti dhammaratiyā hitvāna lokiyaṁ ratinti.
Kimbilo thero.
1 Ma. bāhaṁ. 2 Yu. abhisaddahitvā.

[276] 9 Ayonisomanasīkārā maṇḍanaṁ anuyuñjisaṁ
uddhato capalo cāsiṁ kāmarāgena aṭṭito.
Upāyakusalenāhaṁ buddhenādiccabandhunā
yoniso paṭipajjitvā bhave cittaṁ udabbahinti.
Nando thero.

[277] 10 Pare ca naṁ pasaṁsanti attā ce asamāhito
moghaṁ pare pasaṁsanti attā hi asamāhito.
Pare ca naṁ garahanti attā ce susamāhito
moghaṁ pare garahanti attā hi susamāhitoti.
Sirimā thero.
Uddānaṁ
cundo ca jotidāso ca thero heraññakāni yo 1
somamitto sabbamitto kālo tisso ca kimbilo
nando ca sirimā ceva dasa therā mahiddhikāti.
Vaggo dutiyo.
---------------
Theragāthāya dukanipātassa tatiyavaggo

[278] 1 Khandhā mayā pariññātā taṇhā me susamūhatā
bhāvitā mama bojjhaṅgā patto me āsavakkhayo.
1 Ma. ca.
Sohaṁ khandhe pariññāya abbhahitvāna 1 jāliniṁ
bhāvayitvāna bojjhaṅge nibbāyissaṁ anāsavoti.
Uttaro thero.

[279] 2 Panādo nāma so rājā yassa yūpo suvaṇṇiyo 2
tiriyaṁ soḷasubbedho 3 uccamāhu 4 sahassadhā.
Sahassakaṇḍo satageṇḍu 5 dhajālu haritāmayo
anaccuṁ tattha gandhabbā chasahassāni sattadhāti.
Bhaddaji thero.

[280] 3 Satimā paññavā bhikkhu āraddhabalavīriyo
pañca kappasatānāhaṁ ekarattiṁ anussariṁ.
Cattāro satipaṭṭhāne satta aṭṭha ca bhāvayaṁ
pañca kappasatānāhaṁ ekarattiṁ anussarinti.
Sobhito thero.

[281] 4 Yaṁ kiccaṁ daḷhaviriyena yaṁ kiccaṁ bodhumicchatā
karissaṁ nāvarajjhissaṁ passa viriyaṁ parakkamaṁ.
Tvañca me maggamakkhāhi añjasaṁ amatogadhaṁ
ahaṁ monena monissaṁ gaṅgāsotova sāgaranti.
Valliyo thero.