[119] Tena kho pana samayena jāṇussoṇi brāhmaṇo tadahuposathe
sīsanhāto navaṁ khomayugaṁ nivattho allakusamuṭṭhiṁ ādāya bhagavato
avidūre ekamantaṁ ṭhito hoti. Addasā kho bhagavā jāṇussoṇiṁ
brāhmaṇaṁ tadahuposathe sīsanhātaṁ navaṁ khomayugaṁ nivatthaṁ allakusamuṭṭhiṁ
ādāya avidūre ekamantaṁ ṭhitaṁ disvāna jāṇussoṇiṁ brāhmaṇaṁ
etadavoca kiṁ nu tvaṁ brāhmaṇa tadahuposathe sīsanhāto navaṁ khomayugaṁ
nivattho allakusamuṭṭhiṁ ādāya ekamantaṁ ṭhito kiṁ nu ajja 1
brāhmaṇakulassāti. Paccorohaṇī bho gotama ajja brāhmaṇakulassāti.
Yathākathaṁ pana brāhmaṇa brāhmaṇānaṁ paccorohaṇī hotīti. Idha bho
gotama brāhmaṇā tadahuposathe sīsanhātā navaṁ khomayugaṁ nivatthā allena
gomayena paṭhaviṁ opuñjitvā 2 haritehi kusehi pattharitvā antarā ca
1 Ma. nvajja. Yu. kiṁ nu kho ajja. 2 Po. omuñjetvā.
Velaṁ antarā ca agyāgāraṁ seyyaṁ kappenti te taṁ rattiṁ tikkhattuṁ
paccuṭṭhāya pañjalikā aggiṁ namassanti paccorohāma bhavantaṁ
paccorohāma bhavantanti pahutena ca sappitelena navanītena aggiṁ
santappenti tassā ca rattiyā accayena paṇītena khādanīyena bhojanīyena
brāhmaṇe santappenti evaṁ bho gotama brāhmaṇānaṁ paccorohaṇī
hotīti. Aññathā kho brāhmaṇa brāhmaṇānaṁ paccorohaṇī [1]- aññathā
ca pana ariyassa vinaye paccorohaṇī hotīti. Yathākathaṁ pana bho
gotama ariyassa vinaye paccorohaṇī hoti sādhu me bhavaṁ gotamo
tathādhammaṁ desetu yathā ariyassa vinaye paccorohaṇī hotīti.
Tenahi brāhmaṇa suṇāhi sādhukaṁ manasikarohi bhāsissāmīti. Evaṁ bhoti
kho jāṇussoṇi brāhmaṇo bhagavato paccassosi. Bhagavā etadavoca
idha brāhmaṇa ariyasāvako iti paṭisañcikkhati micchādiṭṭhiyā kho
pāpako vipāko diṭṭheceva dhamme abhisamparāyañcāti so iti paṭisaṅkhāya
micchādiṭṭhiṁ pajahati micchādiṭṭhiyā paccorohati micchāsaṅkappassa kho
pāpako vipāko diṭṭheceva dhamme abhisamparāyañcāti so iti
paṭisaṅkhāya micchāsaṅkappaṁ pajahati micchāsaṅkappā paccorohati
micchāvācāya kho pāpako vipāko diṭṭheceva dhamme abhisamparāyañcāti
so iti paṭisaṅkhāya micchāvācaṁ pajahati micchāvācāya paccorohati
micchākammantassa kho pāpako vipāko diṭṭheceva dhamme abhisamparāyañcāti
so iti paṭisaṅkhāya micchākammantaṁ pajahati micchākammantā
1 Ma. etthantare hotīti atthi.
Paccorohati micchāājīvassa kho pāpako vipāko diṭṭheceva
dhamme abhisamparāyañcāti so iti paṭisaṅkhāya micchāājīvaṁ pajahati
micchāājīvā paccorohati micchāvāyāmassa kho pāpako vipāko diṭṭheceva
dhamme abhisamparāyañcāti so iti paṭisaṅkhāya micchāvāyāmaṁ pajahati
micchāvāyāmā paccorohati micchāsatiyā kho pāpako vipāko diṭṭheceva
dhamme abhisamparāyañcāti so iti paṭisaṅkhāya micchāsatiṁ pajahati
micchāsatiyā paccorohati micchāsamādhissa kho pāpako vipāko diṭṭheceva
dhamme abhisamparāyañcāti so iti paṭisaṅkhāya micchāsamādhiṁ pajahati
micchāsamādhimhā paccorohati micchāñāṇassa kho pāpako vipāko
diṭṭheceva dhamme abhisamparāyañcāti so iti paṭisaṅkhāya micchāñāṇaṁ
pajahati micchāñāṇā 1 paccorohati micchāvimuttiyā kho pāpako
vipāko diṭṭheceva dhamme abhisamparāyañcāti so iti paṭisaṅkhāya
micchāvimuttiṁ pajahati micchāvimuttiyā paccorohati evaṁ kho brāhmaṇa
ariyassa vinaye paccorohaṇī hotīti. Aññathā bho gotama brāhmaṇānaṁ
paccorohaṇī aññathā capana ariyassa vinaye paccorohaṇī hoti
imissā ca bho gotama ariyassa vinaye paccorohaṇiyā brāhmaṇānaṁ
paccorohaṇī kallaṁ na agghati soḷasiṁ abhikkantaṁ bho gotama .pe.
Upāsakaṁ maṁ bhavaṁ gotamo dhāretu ajjatagge pāṇupetaṁ saraṇagatanti.

[120] Ariyaṁ vo bhikkhave paccorohaṇiṁ desissāmi taṁ suṇātha ...
Katamā ca bhikkhave ariyā paccorohaṇī idha bhikkhave ariyasāvako
1 Ma. micchāñāṇamhā.
Iti paṭisañcikkhati micchādiṭṭhiyā kho pāpako vipāko diṭṭheceva
dhamme abhisamparāyañcāti so iti paṭisaṅkhāya micchādiṭṭhiṁ pajahati
micchādiṭṭhiyā paccorohati micchāsaṅkappassa kho ... Micchāvācāya
kho ... Micchākammantassa kho ... Micchāājīvassa kho ... Micchāvāyāmassa
kho ... Micchāsatiyā kho ... Micchāsamādhissa kho ... Micchāñāṇassa
kho ... Micchāvimuttiyā kho pāpako vipāko diṭṭheceva dhamme
abhisamparāyañcāti so iti paṭisaṅkhāya micchāvimuttiṁ pajahati micchāvimuttiyā
paccorohati ayaṁ vuccati bhikkhave ariyā paccorohaṇīti.

[121] Suriyassa bhikkhave udayato etaṁ pubbaṅgamaṁ etaṁ
pubbanimittaṁ yadidaṁ aruṇuttaṁ 1 evameva kho bhikkhave kusalānaṁ dhammānaṁ
etaṁ pubbaṅgamaṁ etaṁ pubbanimittaṁ yadidaṁ sammādiṭṭhi sammādiṭṭhikassa
bhikkhave sammāsaṅkappo pahoti sammāsaṅkappassa sammāvācā pahoti
sammāvācassa sammākammanto pahoti sammākammantassa sammāājīvo
pahoti sammāājīvassa sammāvāyāmo pahoti sammāvāyāmassa
sammāsati pahoti sammāsatissa sammāsamādhi pahoti sammāsamādhissa
sammāñāṇaṁ pahoti sammāñāṇissa sammāvimutti pahoti 2 .

[122] Dasayime bhikkhave dhammā bhāvitā bahulīkatā āsavānaṁ
khayāya saṁvattanti katame dasa sammādiṭṭhi sammāsaṅkappo sammāvācā
sammākammanto sammāājīvo sammāvāyāmo sammāsati sammāsamādhi
1 Yu. aruṇaggaṁ. Po. Ma. aruṇuggaṁ. 2 Ma. Yu. pahotīti.
Sammāñāṇaṁ sammāvimutti ime kho bhikkhave dasa dhammā bhāvitā
bahulīkatā āsavānaṁ khayāya saṁvattantīti.
Paccorohaṇivaggo dutiyo.
[1]-
----------
Pārisuddhivaggo tatiyo

[123] Dasayime bhikkhave dhammā parisuddhā pariyodātā na aññatra 2
sugatavinayā katame dasa sammādiṭṭhi sammāsaṅkappo sammāvācā
sammākammanto sammāājīvo sammāvāyāmo sammāsati sammāsamādhi
sammāñāṇaṁ sammāvimutti ime kho bhikkhave dasa dhammā parisuddhā
pariyodātā na aññatra sugatavinayāti.

[124] Dasayime bhikkhave dhammā anuppannā uppajjanti na
aññatra 3 sugatavinayā katame dasa sammādiṭṭhi .pe. Sammāvimutti
ime kho bhikkhave dasa dhammā anuppannā uppajjanti na aññatra
sugatavinayāti.

[125] Dasayime bhikkhave dhammā mahapphalā mahānisaṁsā na aññatra
sugatavinayā katame dasa sammādiṭṭhi .pe. Sammāvimutti ime
1 Yu. tassuddānaṁ
tayo adhammā ajito sagāravo ca orimaṁ
dve ceva paccorohaṇi pubbaṅgamaṁ āvuso 4 cāti.
2-3 Ma. nāññatra. 4 Ma. āsavakkhayoti.
Kho bhikkhave dasa dhammā mahapphalā mahānisaṁsā na aññatra sugatavinayāti.

[126] Dasayime bhikkhave dhammā rāgavinayapariyosānā honti
dosavinayapariyosānā honti mohavinayapariyosānā honti na
aññatra sugatavinayā katame dasa sammādiṭṭhi .pe. Sammāvimutti
ime kho bhikkhave dasa dhammā rāgavinayapariyosānā honti
dosavinayapariyosānā honti mohavinayapariyosānā honti na
aññatra sugatavinayāti.

[127] Dasayime bhikkhave dhammā ekantanibbidāya virāgāya nirodhāya
upasamāya abhiññāya sambodhāya nibbānāya saṁvattanti na aññatra
sugatavinayāti katame dasa sammādiṭṭhi .pe. Sammāvimutti ime
kho bhikkhave dasa dhammā ekantanibbidāya virāgāya nirodhāya upasamāya
abhiññāya sambodhāya nibbānāya saṁvattanti na aññatra sugatavinayāti.

[128] Dasayime bhikkhave dhammā bhāvitā bahulīkatā anuppannā
uppajjanti na aññatra sugatavinayā katame dasa sammādiṭṭhi .pe.
Sammāvimutti ime kho bhikkhave dasa dhammā bhāvitā bahulīkatā
anuppannā uppajjanti na aññatra sugatavinayāti.