[245] Pañcime bhikkhave ādīnavā duccarite katame pañca
attāpi attānaṁ upavadati anuvicca viññū garahanti pāpako
kittisaddo abbhuggacchati saddhammā vuṭṭhāti asaddhamme patiṭṭhāti
ime kho bhikkhave pañca ādīnavā duccarite. Pañcime bhikkhave
ānisaṁsā sucarite katame pañca attāpi attānaṁ na upavadati
anuvicca viññū pasaṁsanti kalyāṇo kittisaddo abbhuggacchati
asaddhammā vuṭṭhāti saddhamme patiṭṭhāti ime kho bhikkhave
pañca ānisaṁsā sucariteti.

[246] Pañcime bhikkhave ādīnavā kāyaduccarite .pe.
Pañcime bhikkhave ānisaṁsā kāyasucarite .pe.

[247] Pañcime bhikkhave ādīnavā vacīduccarite .pe.
Pañcime bhikkhave ānisaṁsā vacīsucarite .pe.

[248] Pañcime bhikkhave ādīnavā manoduccarite katame
pañca attāpi attānaṁ upavadati anuvicca viññū garahanti
pāpako kittisaddo abbhuggacchati saddhammā vuṭṭhāti asaddhamme
patiṭṭhāti ime kho bhikkhave pañca ādīnavā manoduccarite.
Pañcime bhikkhave ānisaṁsā manosucarite katame pañca attāpi
Attānaṁ na upavadati anuvicca viññū pasaṁsanti kalyāṇo
kittisaddo abbhuggacchati asaddhammā vuṭṭhāti saddhamme patiṭṭhāti
ime kho bhikkhave pañca ānisaṁsā manosucariteti.

[249] Pañcime bhikkhave ādīnavā sīvathikāya katame pañca
asuci duggandhā sappaṭibhayā vālānaṁ amanussānaṁ āvāso
bahuno janassa ārodanā ime kho bhikkhave pañca ādīnavā sīvathikāya
evameva kho bhikkhave pañcime ādīnavā sīvathikūpame puggale
katame pañca idha bhikkhave ekacco puggalo asucinā kāyakammena
samannāgato hoti asucinā vacīkammena samannāgato hoti asucinā
manokammena samannāgato hoti idamassa asucitāya vadāmi seyyathāpi
sā bhikkhave sīvathikā asuci tathūpamāhaṁ bhikkhave imaṁ puggalaṁ
vadāmi. Tassa asucinā kāyakammena samannāgatassa asucinā vacīkammena
samannāgatassa asucinā manokammena samannāgatassa pāpako
kittisaddo abbhuggacchati idamassa duggandhatāya vadāmi seyyathāpi
sā bhikkhave sīvathikā duggandhā tathūpamāhaṁ bhikkhave imaṁ puggalaṁ
vadāmi. Tamenaṁ asucinā kāyakammena samannāgataṁ asucinā vacīkammena
samannāgataṁ asucinā manokammena samannāgataṁ pesalā sabrahmacārī
ārakā parivajjenti idamassa sappaṭibhayasmiṁ vadāmi seyyathāpi
sā bhikkhave sīvathikā sappaṭibhayā tathūpamāhaṁ bhikkhave imaṁ puggalaṁ
vadāmi. So asucinā kāyakammena samannāgato asucinā vacīkammena
Samannāgato asucinā manokammena samannāgato sabhāgehi puggalehi
saddhiṁ saṁvasati idamassa vālāvasathasmiṁ 1 vadāmi seyyathāpi sā
bhikkhave sīvathikā vālānaṁ amanussānaṁ āvāso tathūpamāhaṁ bhikkhave
imaṁ puggalaṁ vadāmi. Tamenaṁ asucinā kāyakammena samannāgataṁ asucinā
vacīkammena samannāgataṁ asucinā manokammena samannāgataṁ pesalā
sabrahmacārī disvā khiyadhammaṁ āpajjanti aho vata no dukkhaṁ ye
mayaṁ evarūpehi puggalehi saddhiṁ saṁvasāmāti idamassa ārodanāya
vadāmi seyyathāpi sā bhikkhave sīvathikā bahuno janassa ārodanā
tathūpamāhaṁ bhikkhave imaṁ puggalaṁ vadāmi. Ime kho bhikkhave pañca
ādīnavā sīvathikūpame puggaleti.

[250] Pañcime bhikkhave ādīnavā puggalappasāde katame
pañca yasmiṁ bhikkhave puggale puggalo abhippasanno hoti so
tathārūpaṁ āpattiṁ āpanno hoti yathārūpāya āpattiyā saṅgho
ukkhipati tassa evaṁ hoti yo kho myāyaṁ puggalo piyo manāpo
so saṅghena ukkhittoti bhikkhūsu appasādabahulo hoti bhikkhūsu
appasādabahulo samāno aññe bhikkhū na bhajati aññe bhikkhū
abhajanto saddhammaṁ na suṇāti saddhammaṁ asuṇanto saddhammā
parihāyati ayaṁ bhikkhave paṭhamo ādīnavo puggalappasāde. Puna
caparaṁ bhikkhave yasmiṁ puggale puggalo abhippasanno hoti so tathārūpaṁ
āpattiṁ āpanno hoti yathārūpāya āpattiyā saṅgho ante
1 Ma. pālāvāsasmiṁ.
Nisīdāpeti tassa evaṁ hoti yo kho myāyaṁ puggalo piyo
manāpo so saṅghena ante nisīdāpitoti bhikkhūsu appasādabahulo
hoti bhikkhūsu appasādabahulo samāno aññe bhikkhū na bhajati
aññe bhikkhū abhajanto saddhammaṁ na suṇāti saddhammaṁ asuṇanto
saddhammā parihāyati ayaṁ bhikkhave dutiyo ādīnavo puggalappasāde.
Puna caparaṁ bhikkhave yasmiṁ puggale puggalo abhippasanno hoti so
disāpakkanto hoti .pe. So vibbhanto hoti .pe. So
kālakato hoti tassa evaṁ hoti yo kho myāyaṁ puggalo piyo
manāpo so kālakatoti aññe bhikkhū na bhajati aññe bhikkhū
abhajanto saddhammaṁ na suṇāti saddhammaṁ asuṇanto saddhammā
parihāyati ayaṁ bhikkhave pañcamo ādīnavo puggalappasāde. Ime
kho bhikkhave pañca ādīnavā puggalappasādeti.
Duccaritavaggo pañcamo.
Tassuddānaṁ
duccaritaṁ kāyaduccaritaṁ vacīduccaritaṁ manoduccaritaṁ
catūhi pare 1 dve sīvathikā puggalappasādena cāti.
Pañcamo paṇṇāsako niṭṭhito.
----------
Vaggāsaṅgahitā suttantā

[251] Pañcahi bhikkhave dhammehi samannāgatena bhikkhunā
upasampādetabbaṁ katamehi pañcahi idha bhikkhave bhikkhu asekhena
sīlakkhandhena samannāgato hoti asekhena samādhikkhandhena samannāgato
hoti asekhena paññākkhandhena samannāgato hoti asekhena
vimuttikkhandhena samannāgato hoti asekhena vimuttiñāṇadassanakkhandhena
samannāgato hoti imehi kho bhikkhave pañcahi dhammehi
samannāgatena bhikkhunā upasampādetabbanti.

[252] Pañcahi bhikkhave dhammehi samannāgatena bhikkhunā nissayo
dātabbo katamehi pañcahi idha bhikkhave bhikkhu asekhena sīlakkhandhena
samannāgato hoti .pe. Asekhena vimuttiñāṇadassanakkhandhena
samannāgato hoti imehi kho .pe.

[253] Pañcahi bhikkhave dhammehi samannāgatena bhikkhunā
sāmaṇero upaṭṭhāpetabbo katamehi pañcahi idha bhikkhave bhikkhu
asekhena sīlakkhandhena samannāgato hoti .pe. Asekhena
vimuttiñāṇadassanakkhandhena samannāgato hoti imehi kho .pe.

[254] Pañcimāni bhikkhave macchariyāni katamāni pañca
āvāsamacchariyaṁ kulamacchariyaṁ lābhamacchariyaṁ vaṇṇamacchariyaṁ dhammamacchariyaṁ
Imāni kho bhikkhave pañca macchariyāni imesaṁ kho bhikkhave pañcannaṁ
macchariyānaṁ etaṁ patikkiṭṭhaṁ 1 yadidaṁ dhammamacchariyanti.