[225] Pañcime bhikkhave ādīnavā kulūpake katame pañca
anāmantacāre āpajjati rahonisajjāya āpajjati paṭicchanne
āsane āpajjati mātugāmassa uttarichappañcavācāhi dhammaṁ desento
āpajjati kāmasaṅkappabahulo viharati ime kho bhikkhave pañca
ādīnavā kulūpaketi.

[226] Pañcime bhikkhave ādīnavā kulūpakassa bhikkhuno ativelaṁ
kulesu saṁsaṭṭhassa viharato katame pañca mātugāmassa abhiṇhadassanaṁ
dassane sati saṁsaggo saṁsagge sati vissāso vissāse
sati otāro otiṇṇacittassetaṁ pāṭikaṅkhaṁ anabhirato vā brahmacariyaṁ
carissati saṅkiliṭṭhaṁ 1 āpattiṁ āpajjissati sikkhaṁ vā paccakkhāya
hīnāyāvattissati ime kho bhikkhave pañca ādīnavā kulūpakassa
bhikkhuno ativelaṁ kulesu saṁsaṭṭhassa viharatoti.

[227] Pañcime bhikkhave ādīnavā bhogesu katame pañca
aggisādhāraṇā bhogā udakasādhāraṇā bhogā rājasādhāraṇā bhogā
corasādhāraṇā bhogā appiyehi dāyādehi sādhāraṇā bhogā ime
kho bhikkhave pañca ādīnavā bhogesu. Pañcime bhikkhave ānisaṁsā
bhogesu katame pañca bhoge nissāya attānaṁ sukheti pīṇeti
1 Po. Ma. Yu. aññataraṁ vā saṅkiliṭṭhaṁ.
Sammā sukhaṁ pariharati mātāpitaro sukheti pīṇeti sammā sukhaṁ pariharati
puttadāradāsakammakaraporise sukheti pīṇeti sammā sukhaṁ pariharati mittāmacce
sukheti pīṇeti sammā sukhaṁ pariharati samaṇabrāhmaṇesu
uddhaggikaṁ dakkhiṇaṁ patiṭṭhāpeti sovaggikaṁ sukhavipākaṁ saggasaṁvattanikaṁ
ime kho bhikkhave pañca ānisaṁsā bhogesūti.

[228] Pañcime bhikkhave ādīnavā ussūrabhatte kule katame
pañca ye te atithī pāhunā te na kālena paṭipūjenti yā
tā balipaṭiggāhikā devatā tā na kālena paṭipūjenti ye te
samaṇabrāhmaṇā ekabhattikā rattūparatā viratā vikālabhojanā te na
kālena paṭipūjenti dāsakammakaraporisā vimukhā kammaṁ karonti
tāvatakaññeva asamayena bhuttaṁ anojavantaṁ hoti ime kho bhikkhave
pañca ādīnavā ussūrabhatte kule. Pañcime bhikkhave ānisaṁsā
samayabhatte kule katame pañca ye te atithī pāhunā te kālena
paṭipūjenti yā tā balipaṭiggāhikā devatā tā kālena paṭipūjenti
ye te samaṇabrāhmaṇā ekabhattikā rattūparatā viratā
vikālabhojanā te kālena paṭipūjenti dāsakammakaraporisā avimukhā
kammaṁ karonti tāvatakaññeva samayena bhuttaṁ ojavantaṁ hoti ime
kho bhikkhave pañca ānisaṁsā samayabhatte kuleti.

[229] Pañcime bhikkhave ādīnavā kaṇhasappe katame pañca
asuci duggandho sabhīru sappaṭibhayo mittadubbhī ime kho
Bhikkhave pañca ādīnavā kaṇhasappe evameva kho bhikkhave pañcime
ādīnavā mātugāme katame pañca asuci duggandho sabhīru
sappaṭibhayo mittadubbhī ime kho bhikkhave pañca ādīnavā
mātugāmeti.

[230] Pañcime bhikkhave ādīnavā kaṇhasappe katame pañca
kodhano upanāhī ghoraviso dujivho mittadubbhī ime kho
bhikkhave pañca ādīnavā kaṇhasappe evameva kho bhikkhave pañcime
ādīnavā mātugāme katame pañca kodhano upanāhī ghoraviso
dujivho mittadubbhī tatridaṁ bhikkhave mātugāmassa ghoravisatā
yebhuyyena bhikkhave mātugāmo tibbarāgo tatridaṁ bhikkhave mātugāmassa
dujivhatā yebhuyyena bhikkhave mātugāmo pisuṇavāco tatridaṁ
bhikkhave mātugāmassa mittadubbhitā yebhuyyena bhikkhave mātugāmo
aticārinī ime kho bhikkhave pañca ādīnavā mātugāmeti.
Dīghacārikavaggo tatiyo.
Tassuddānaṁ
dve dīghacārikā vuttā abhinivāsamaccharaṁ 1
duve kulūpakā bhogo 2 bhattaṁ 3 sappāpare duveti.
----------
1 Ma. atinivāsamaccharī. Yu. ---macchare. 2 Po. dve kulūpakaṁ bhogā. Ma. duve
ca kulūpakā bhogā. Yu. duve ca .... 3 Po. ussurabhattaṁ kaṇhasappā apare dveti.
Āvāsikavaggo catuttho

[231] Pañcahi bhikkhave dhammehi samannāgato āvāsiko bhikkhu
abhāvanīyo hoti katamehi pañcahi na ākappasampanno hoti
na vattasampanno na bahussuto hoti na sutadharo na paṭisallekhitā
hoti na paṭisallānārāmo na kalyāṇārāmo 1 na kalyāṇavāco
hoti na kalyāṇavākkaraṇo duppañño hoti jaḷo eḷamūgo imehi
kho bhikkhave pañcahi dhammehi samannāgato āvāsiko bhikkhu abhāvanīyo
hoti. Pañcahi bhikkhave dhammehi samannāgato āvāsiko bhikkhu
bhāvanīyo hoti katamehi pañcahi ākappasampanno hoti vattasampanno
bahussuto hoti sutadharo paṭisallekhitā hoti paṭisallānārāmo
kalyāṇārāmo 1 kalyāṇavāco hoti kalyāṇavākkaraṇo paññavā
hoti ajaḷo aneḷamūgo imehi kho bhikkhave pañcahi dhammehi
samannāgato āvāsiko bhikkhu bhāvanīyo hotīti.

[232] Pañcahi bhikkhave dhammehi samannāgato āvāsiko bhikkhu
sabrahmacārīnaṁ piyo ca hoti manāpo ca garu ca bhāvanīyo ca
katamehi pañcahi sīlavā hoti pātimokkhasaṁvarasaṁvuto viharati
ācāragocarasampanno aṇumattesu vajjesu bhayadassāvī samādāya sikkhati
sikkhāpadesu bahussuto hoti sutadharo sutasannicayo ye te dhammā
ādikalyāṇā majjhekalyāṇā pariyosānakalyāṇā sātthaṁ sabyañjanaṁ
1 Ma. Yu. ayaṁ pāṭho na dissati.
Kevalaparipuṇṇaṁ parisuddhaṁ brahmacariyaṁ abhivadanti tathārūpāssa dhammā
bahussutā honti dhatā vacasā paricitā manasānupekkhitā diṭṭhiyā
suppaṭividdhā kalyāṇavāco hoti kalyāṇavākkaraṇo poriyā vācāya
samannāgato vissaṭṭhāya anelagaḷāya atthassa viññāpaniyā catunnaṁ
jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti
akicchalābhī akasiralābhī āsavānaṁ khayā 1 anāsavaṁ cetovimuttiṁ
paññāvimuttiṁ diṭṭheva dhamme sayaṁ abhiññā sacchikatvā upasampajja
viharati imehi kho bhikkhave pañcahi dhammehi samannāgato āvāsiko
bhikkhu sabrahmacārīnaṁ piyo ca hoti manāpo ca garu ca bhāvanīyo cāti.

[233] Pañcahi bhikkhave dhammehi samannāgato āvāsiko bhikkhu
āvāsaṁ sobheti katamehi pañcahi sīlavā hoti .pe. Sikkhati
sikkhāpadesu bahussuto hoti .pe. Diṭṭhiyā suppaṭividdhā
kalyāṇavāco hoti kalyāṇavākkaraṇo poriyā vācāya samannāgato
vissaṭṭhāya anelagaḷāya atthassa viññāpaniyā paṭibalo hoti
upasaṅkamantaṁ 2 dhammiyā kathāya sandassetuṁ samādapetuṁ samuttejetuṁ
sampahaṁsetuṁ catunnaṁ jhānānaṁ ābhicetasikānaṁ diṭṭhadhammasukhavihārānaṁ
nikāmalābhī hoti akicchalābhī akasiralābhī imehi kho bhikkhave pañcahi
dhammehi samannāgato āvāsiko bhikkhu āvāsaṁ sobhetīti.

[234] Pañcahi bhikkhave dhammehi samannāgato āvāsiko bhikkhu
1 Po. āsavānañca. 2 Ma. Yu. upasaṅkamante.
Āvāsassa bahūpakāro hoti katamehi pañcahi sīlavā hoti .pe.
Samādāya sikkhati sikkhāpadesu bahussuto hoti .pe. Diṭṭhiyā
suppaṭividdhā khaṇḍaphullaṁ paṭisaṅkharoti mahā kho pana bhikkhusaṅgho
abhikkanto nānāverajjakā bhikkhū gihīnaṁ upasaṅkamitvā āroceti
mahā kho āvuso bhikkhusaṅgho abhikkanto nānāverajjakā bhikkhū karotha
puññāni samayo puññāni kātunti catunnaṁ jhānānaṁ ābhicetasikānaṁ
diṭṭhadhammasukhavihārānaṁ nikāmalābhī hoti akicchalābhī akasiralābhī imehi
kho bhikkhave pañcahi dhammehi samannāgato āvāsiko bhikkhu āvāsassa
bahūpakāro hotīti.