[5] Yo hi koci bhikkhave bhikkhu vā bhikkhunī vā sikkhaṁ
paccakkhāya hīnāyāvattati tassa diṭṭheva dhamme pañca sahadhammikā
vādānupātā 1 gārayhaṁ ṭhānaṁ āgacchanti katame pañca saddhāpi
nāma te nāhosi kusalesu dhammesu hirīpi nāma te nāhosi
kusalesu dhammesu ottappaṁpi nāma te nāhosi kusalesu dhammesu
viriyaṁpi nāma te nāhosi kusalesu dhammesu paññāpi nāma te
nāhosi kusalesu dhammesu yo hi koci bhikkhave bhikkhu vā bhikkhunī
vā sikkhaṁ paccakkhāya hīnāyāvattati tassa diṭṭheva dhamme ime
pañca sahadhammikā vādānupātā gārayhaṁ ṭhānaṁ āgacchanti. Yo hi
koci bhikkhave bhikkhu vā bhikkhunī vā sahāpi dukkhena sahāpi domanassena
assumukhopi 2 rudamāno paripuṇṇaṁ parisuddhaṁ brahmacariyaṁ carati
tassa diṭṭheva dhamme pañca sahadhammikā pāsaṁsaṁ 3 ṭhānaṁ āgacchanti
1 Po. Ma. vādānupātā gārayhā ṭhānā. Yu. vādānuvādā gārayhā ṭhānā.
2 Ma. pisaddo natthi. ito paraṁ īdisameva. 3 Po. Ma. Yu. pāsaṁsā ṭhānā.
ito paraṁ īdisameva.
Katame pañca saddhāpi nāma te ahosi kusalesu dhammesu hirīpi
nāma te ahosi kusalesu dhammesu ottappaṁpi nāma te ahosi
kusalesu dhammesu viriyaṁpi nāma te ahosi kusalesu dhammesu
paññāpi nāma te ahosi kusalesu dhammesu yo hi koci bhikkhave
bhikkhu vā bhikkhunī vā sahāpi dukkhena sahāpi domanassena assumukhopi
rudamāno paripuṇṇaṁ parisuddhaṁ brahmacariyaṁ carati tassa diṭṭheva
dhamme ime pañca sahadhammikā pāsaṁsaṁ ṭhānaṁ āgacchantīti.

[6] Na tāva bhikkhave akusalassa samāpatti hoti yāva
saddhā paccupaṭṭhitā hoti kusalesu dhammesu yato ca kho bhikkhave
saddhā antarahitā hoti assaddhiyaṁ pariyuddhāya 1 tiṭṭhati atha
akusalassa samāpatti hoti na tāva bhikkhave akusalassa samāpatti
hoti yāva hirī paccupaṭṭhitā hoti kusalesu dhammesu yato
ca kho bhikkhave hirī antarahitā hoti ahirikaṁ pariyuddhāya tiṭṭhati
atha akusalassa samāpatti hoti na tāva bhikkhave akusalassa
samāpatti hoti yāva ottappaṁ paccupaṭṭhitaṁ hoti kusalesu
dhammesu yato ca kho bhikkhave ottappaṁ antarahitaṁ hoti anottappaṁ
pariyuddhāya tiṭṭhati atha akusalassa samāpatti hoti na tāva
bhikkhave akusalassa samāpatti hoti yāva viriyaṁ paccupaṭṭhitaṁ
hoti kusalesu dhammesu yato ca kho bhikkhave viriyaṁ antarahitaṁ hoti
1 Ma. Yu. pariyuṭṭhāya. sabbattha vāresu īdisameva.
Kosajjaṁ pariyuddhāya tiṭṭhati atha akusalassa samāpatti hoti na
tāva bhikkhave akusalassa samāpatti hoti yāva paññā paccupaṭṭhitā
hoti kusalesu dhammesu yato ca kho bhikkhave paññā antarahitā
hoti duppaññā pariyuddhāya tiṭṭhati atha akusalassa samāpatti
hotīti.

[7] Yebhuyyena bhikkhave sattā kāmesu laḷitā 1 asitabyābhaṅgiṁ
bhikkhave kulaputto ohāya agārasmā anagāriyaṁ pabbajito hoti
saddho pabbajito 2 kulaputtoti alaṁ vacanāya taṁ kissa hetu
labbhā hi 3 bhikkhave yobbanena kāmā te ca kho yādisā vā
tādisā vā ye ca bhikkhave hīnā kāmā ye ca majjhimā
kāmā ye ca paṇītā kāmā sabbe kāmātveva saṅkhaṁ gacchanti
seyyathāpi bhikkhave kumāro mando uttānaseyyako dhātiyā
pamādamanvāya kaṭṭhaṁ vā kathalaṁ 4 vā mukhe āhareyya tamenaṁ dhātī 5
sīghaṁ sīghaṁ manasikareyya sīghaṁ sīghaṁ manasikaritvā sīghaṁ sīghaṁ āhareyya
no ce sakkuṇeyya sīghaṁ sīghaṁ āharituṁ vāmena hatthena sīghaṁ 6
pariggahetvā dakkhiṇena hatthena vaṅkaṅgulaṁ 7 karitvā salohitaṁpi āhareyya
taṁ kissa hetu atthesā bhikkhave kumārassa vihesā nesā natthīti
vadāmi karaṇīyañca kho evaṁ 8 bhikkhave dhātiyā atthakāmāya hitesiniyā
anukampikāya anukampaṁ upādāya. Yato ca kho bhikkhave so kumāro
1 Po. caḷitā. Yu. palālitā. 2 Ma. saddhāpabbajito. 3 Po. Ma. Yu.
hisaddo natthi. 4 Ma. kaṭhalaṁ. 5 Ma. Yu. dhāti. 6 Ma. Yu. sīsaṁ.
7 Ma. vaṅkaṅguliṁ. 8 Ma. etaṁ.
Vuḍḍho 1 hoti alaṁpañño anapekkhā pana 2 bhikkhave dhātī tasmiṁ
kumārasmiṁ hoti attaguttodāni kumāro nālaṁ pamādāyāti evameva
kho bhikkhave yāvakīvañca bhikkhuno saddhāya akataṁ hoti kusalesu dhammesu
hiriyā akataṁ hoti kusalesu dhammesu ottappena akataṁ hoti
kusalesu dhammesu viriyena akataṁ hoti kusalesu dhammesu paññāya
akataṁ hoti kusalesu dhammesu anurakkhitabbo tāva me so
bhikkhave bhikkhu hoti yato ca kho bhikkhave bhikkhu no saddhāya kataṁ hoti
kusalesu dhammesu hiriyā kataṁ hoti kusalesu dhammesu ottappena
kataṁ hoti kusalesu dhammesu viriyena kataṁ hoti kusalesu dhammesu
paññāya kataṁ hoti kusalesu dhammesu anapekkho panāhaṁ 3 bhikkhave
tasmiṁ bhikkhusmiṁ homi attaguttodāni bhikkhave 4 bhikkhu nālaṁ pamādāyāti.

[8] Pañcahi bhikkhave dhammehi samannāgato bhikkhu cavati
nappatiṭṭhāti saddhamme katamehi pañhi assaddho bhikkhave bhikkhu
cavati nappatiṭṭhāti saddhamme ahiriko bhikkhave bhikkhu cavati nappatiṭṭhāti
saddhamme anottappī bhikkhave bhikkhu cavati nappatiṭṭhāti
saddhamme kusīto bhikkhave bhikkhu cavati nappatiṭṭhāti saddhamme
duppañño bhikkhave bhikkhu cavati nappatiṭṭhāti saddhamme imehi kho
bhikkhave pañcahi dhammehi samannāgato bhikkhu cavati nappatiṭṭhāti
saddhamme. Pañcahi bhikkhave dhammehi samannāgato bhikkhu na cavati
patiṭṭhāti saddhamme katamehi pañcahi saddho bhikkhave bhikkhu na
1 Po. Ma. Yu. sabbattha vuddho. 2 Ma. Yu. dāni. 3 Ma. Yu. dānāhaṁ.
4 Ma. Yu. ayaṁ pāṭho natthi.
Cavati patiṭṭhāti saddhamme hirimā bhikkhave bhikkhu na cavati patiṭṭhāti
saddhamme ottappī bhikkhave bhikkhu na cavati patiṭṭhāti saddhamme
āraddhaviriyo bhikkhave bhikkhu na cavati patiṭṭhāti saddhamme
paññavā bhikkhave bhikkhu na cavati patiṭṭhāti saddhamme imehi kho
bhikkhave pañcahi dhammehi samannāgato bhikkhu na cavati patiṭṭhāti
saddhammeti.

[9] Pañcahi bhikkhave dhammehi samannāgato bhikkhu agāravo
appatisso cavati nappatiṭṭhāti saddhamme katamehi pañcahi
assaddho bhikkhave bhikkhu agāravo appatisso cavati nappatiṭṭhāti
saddhamme ahiriko bhikkhave bhikkhu agāravo appatisso cavati
nappatiṭṭhāti saddhamme anottappī bhikkhave bhikkhu agāravo
appatisso cavati nappatiṭṭhāti saddhamme kusīto bhikkhave bhikkhu
agāravo appatisso cavati nappatiṭṭhāti saddhamme duppañño
bhikkhave bhikkhu agāravo appatisso cavati nappatiṭṭhāti saddhamme
imehi kho bhikkhave pañcahi dhammehi samannāgato bhikkhu agāravo
appatisso cavati nappatiṭṭhāti saddhamme. Pañcahi bhikkhave dhammehi
samannāgato bhikkhu sagāravo sappatisso na cavati patiṭṭhāti saddhamme
katamehi pañcahi saddho bhikkhave bhikkhu sagāravo sappatisso na cavati
patiṭṭhāti saddhamme hirimā bhikkhave bhikkhu sagāravo sappatisso na
cavati patiṭṭhāti saddhamme ottappī bhikkhave bhikkhu sagāravo
Sappatisso na cavati patiṭṭhāti saddhamme āraddhaviriyo bhikkhave
bhikkhu sagāravo sappatisso na cavati patiṭṭhāti saddhamme paññavā
bhikkhave bhikkhu sagāravo sappatisso na cavati patiṭṭhāti saddhamme
imehi kho bhikkhave pañcahi dhammehi samannāgato bhikkhu sagāravo
sappatisso na cavati patiṭṭhāti saddhammeti.

[10] Pañcahi bhikkhave dhammehi samannāgato bhikkhu agāravo
appatisso abhabbo imasmiṁ dhammavinaye vuḍḍhiṁ 1 virūḷhiṁ vepullaṁ āpajjituṁ
katamehi pañcahi assaddho bhikkhave bhikkhu agāravo appatisso
abhabbo imasmiṁ dhammavinaye vuḍḍhiṁ virūḷhiṁ vepullaṁ āpajjituṁ ahiriko
bhikkhave bhikkhu ... Anottappī bhikkhave bhikkhu ... Kusīto bhikkhave bhikkhu ...
Duppañño bhikkhave bhikkhu agāravo appatisso abhabbo imasmiṁ dhammavinaye
vuḍḍhiṁ virūḷhiṁ vepullaṁ āpajjituṁ imehi kho bhikkhave pañcahi
dhammehi samannāgato bhikkhu agāravo appatisso abhabbo imasmiṁ dhammavinaye
vuḍḍhiṁ virūḷhiṁ vepullaṁ āpajjituṁ. Pañcahi bhikkhave dhammehi samannāgato
bhikkhu sagāravo sappatisso bhabbo imasmiṁ dhammavinaye vuḍḍhiṁ
virūḷhiṁ vepullaṁ āpajjituṁ katamehi pañcahi saddho bhikkhave bhikkhu
sagāravo sappatisso bhabbo imasmiṁ dhammavinaye vuḍḍhiṁ virūḷhiṁ vepullaṁ
āpajjituṁ hirimā bhikkhave bhikkhu ... Ottappī bhikkhave bhikkhu ...
Āraddhaviriyo bhikkhave bhikkhu ... Paññavā bhikkhave bhikkhu sagāravo sappatisso
bhabbo imasmiṁ dhammavinaye vuḍḍhiṁ virūḷhiṁ vepullaṁ āpajjituṁ imehi kho
1 Po. Ma. Yu. vuddhiṁ. sabbattha īdisameva.
Bhikkhave pañcahi dhammehi samannāgato bhikkhu sagāravo sappatisso bhabbo
imasmiṁ dhammavinaye vuḍḍhiṁ virūḷhiṁ vepullaṁ āpajjitunti.
Sekhabalavaggo paṭhamo.
Tassuddānaṁ
saṅkhittaṁ vitthataṁ dukkhaṁ 1 bhataṁ sikkhāya pañcamaṁ
samāpatti ca kāmesu cavanā dve agāravāti.
----------
Balavaggo dutiyo

[11] Pubbāhaṁ bhikkhave ananussutesu dhammesu abhiññāvosāna-
pāramippatto paṭijānāmi pañcimāni bhikkhave tathāgatassa tathāgatabalāni
yehi balehi samannāgato tathāgato āsabhaṇṭhānaṁ paṭijānāti
parisāsu sīhanādaṁ nadati brahmacakkaṁ pavatteti katamāni pañca
saddhābalaṁ hiribalaṁ ottappabalaṁ viriyabalaṁ paññābalaṁ imāni kho
bhikkhave pañca tathāgatassa tathāgatabalāni yehi balehi samannāgato
tathāgato āsabhaṇṭhānaṁ paṭijānāti parisāsu sīhanādaṁ nadati brahmacakkaṁ
pavattetīti.

[12] Pañcimāni bhikkhave sekhabalāni katamāni pañca
saddhābalaṁ hiribalaṁ ottappabalaṁ viriyabalaṁ paññābalaṁ imāni kho
bhikkhave pañca sekhabalāni imesaṁ kho bhikkhave pañcannaṁ sekhabalānaṁ
etaṁ aggaṁ etaṁ saṅgāhikaṁ etaṁ saṅghātaniyaṁ yadidaṁ paññābalaṁ seyyathāpi
1 Ma. dukkhā.
Bhikkhave kūṭāgārassa etaṁ aggaṁ etaṁ saṅgāhikaṁ etaṁ saṅghātaniyaṁ
yadidaṁ kūṭaṁ evameva kho bhikkhave imesaṁ pañcannaṁ sekhabalānaṁ
etaṁ aggaṁ etaṁ saṅgāhikaṁ etaṁ saṅghātaniyaṁ yadidaṁ paññābalaṁ
tasmā tiha bhikkhave evaṁ sikkhitabbaṁ saddhābalena samannāgatā
bhavissāma sekhabalena hiribalena ... Ottappabalena ... Viriyabalena ...
Paññābalena samannāgatā bhavissāma sekhabalenāti evaṁ hi vo
bhikkhave sikkhitabbanti.

[13] Pañcimāni bhikkhave balāni katamāni pañca saddhābalaṁ
viriyabalaṁ satibalaṁ samādhibalaṁ paññābalaṁ imāni kho bhikkhave pañca
balānīti.

[14] Pañcimāni bhikkhave balāni katamāni pañca saddhābalaṁ
viriyabalaṁ satibalaṁ samādhibalaṁ paññābalaṁ katamañca bhikkhave saddhābalaṁ
idha bhikkhave ariyasāvako saddho hoti saddahati tathāgatassa bodhiṁ
itipi so bhagavā arahaṁ sammāsambuddho vijjācaraṇasampanno sugato
lokavidū anuttaro purisadammasārathi satthā devamanussānaṁ buddho
bhagavāti idaṁ vuccati bhikkhave saddhābalaṁ. Katamañca bhikkhave viriyabalaṁ
idha bhikkhave ariyasāvako āraddhaviriyo viharati akusalānaṁ dhammānaṁ
pahānāya kusalānaṁ dhammānaṁ upasampadāya thāmavā daḷhaparakkamo
anikkhittadhuro kusalesu dhammesu idaṁ vuccati bhikkhave viriyabalaṁ. Katamañca
Bhikkhave satibalaṁ idha bhikkhave ariyasāvako satimā hoti paramena
satinepakkena samannāgato cirakataṁpi cirabhāsitaṁpi saritā anussaritā
idaṁ vuccati bhikkhave satibalaṁ. Katamañca bhikkhave samādhibalaṁ idha
bhikkhave ariyasāvako vivicceva kāmehi vivicca akusalehi dhammehi
savitakkaṁ savicāraṁ vivekajaṁ pītisukhaṁ paṭhamaṁ jhānaṁ upasampajja viharati
vitakkavicārānaṁ vūpasamā ajjhattaṁ sampasādanaṁ cetaso ekodibhāvaṁ
avitakkaṁ avicāraṁ samādhijaṁ pītisukhaṁ dutiyaṁ jhānaṁ upasampajja viharati
pītiyā ca virāgā upekkhako ca viharati sato ca sampajāno sukhañca
kāyena paṭisaṁvedeti yantaṁ ariyā ācikkhanti upekkhako satimā
sukhavihārīti tatiyaṁ jhānaṁ upasampajja viharati sukhassa ca pahānā
dukkhassa ca pahānā pubbeva somanassadomanassānaṁ atthaṅgamā
adukkhamasukhaṁ upekkhāsatipārisuddhiṁ catutthaṁ jhānaṁ upasampajja viharati
idaṁ vuccati bhikkhave samādhibalaṁ. Katamañca bhikkhave paññābalaṁ idha
bhikkhave ariyasāvako paññavā hoti udayatthagāminiyā paññāya
samannāgato ariyāya nibbedhikāya sammādukkhakkhayagāminiyā idaṁ
vuccati bhikkhave paññābalaṁ. Imāni kho bhikkhave pañca balānīti.