[110] Cattārome bhikkhave āsīvisā [1]- katame cattāro
āgataviso na ghoraviso ghoraviso na āgataviso āgataviso ca
ghoraviso ca neva āgataviso na ghoraviso ime kho bhikkhave
cattāro āsīvisā. Evameva kho bhikkhave cattārome āsīvisūpamā
puggalā santo saṁvijjamānā lokasmiṁ katame cattāro āgataviso
na ghoraviso ghoraviso na āgataviso āgataviso ca ghoraviso
ca neva āgataviso na ghoraviso. Kathañca bhikkhave puggalo āgataviso
hoti na ghoraviso idha bhikkhave ekacco puggalo abhiṇhaṁ kujjhati
so ca khvassa kodho na dīgharattaṁ anuseti evaṁ kho bhikkhave
puggalo āgataviso hoti na ghoraviso seyyathāpi so bhikkhave
āsīviso āgataviso na ghoraviso tathūpamāhaṁ bhikkhave imaṁ puggalaṁ
vadāmi. Kathañca bhikkhave puggalo ghoraviso hoti na āgataviso
idha bhikkhave ekacco puggalo na heva kho abhiṇhaṁ kujjhati so
ca khvassa kodho dīgharattaṁ anuseti evaṁ kho bhikkhave puggalo
ghoraviso hoti na āgataviso seyyathāpi so bhikkhave āsīviso
ghoraviso na āgataviso tathūpamāhaṁ bhikkhave imaṁ puggalaṁ vadāmi.
Kathañca bhikkhave puggalo āgataviso ca hoti ghoraviso ca idha
bhikkhave ekacco puggalo abhiṇhaṁ kujjhati so ca khvassa kodho
dīgharattaṁ anuseti evaṁ kho bhikkhave puggalo āgataviso ca hoti
1 Po. ghoravisā.
Ghoraviso ca seyyathāpi so bhikkhave āsīviso āgataviso ca
ghoraviso ca tathūpamāhaṁ bhikkhave imaṁ puggalaṁ vadāmi. Kathañca
bhikkhave puggalo neva āgataviso hoti na ghoraviso idha bhikkhave
ekacco puggalo na heva kho abhiṇhaṁ kujjhati so ca khvassa
kodho na dīgharattaṁ anuseti evaṁ kho bhikkhave puggalo neva
āgataviso hoti na ghoraviso seyyathāpi so bhikkhave āsīviso
neva āgataviso na ghoraviso tathūpamāhaṁ bhikkhave imaṁ puggalaṁ
vadāmi. Ime kho bhikkhave cattāro āsīvisūpamā puggalā santo
saṁvijjamānā lokasminti.
Valāhakavaggo paṭhamo.
Tassuddānaṁ
dve valāhakakumbhā udakarahadā dve honti
ambāni mūsikābalibaddā rukkhāāsīvisena te dasāti.
-----------------
Kesīvaggo dutiyo

[111] Athakho kesī assadammasārathi yena bhagavā tenupasaṅkami
upasaṅkamitvā bhagavantaṁ abhivādetvā ekamantaṁ nisīdi. Ekamantaṁ
nisinnaṁ kho kesiṁ assadammasārathiṁ bhagavā etadavoca tvañca khvāsi
kesi saññāto 1 assadammasārathi kathañca pana tvaṁ kesi assadammaṁ
vinesīti. Ahaṁ kho bhante assadammaṁ saṇhenapi vinemi pharusenapi
1 Ma. paññāto.
Vinemi saṇhapharusenapi vinemīti. Sace te kesi assadammo saṇhena
vinayaṁ na upeti pharusena vinayaṁ na upeti saṇhapharusena vinayaṁ na
upeti kinti taṁ karosīti. Sace me bhante assadammo saṇhena
vinayaṁ na upeti pharusena vinayaṁ na upeti saṇhapharusena vinayaṁ na
upeti hanāmi naṁ bhante taṁ kissa hetu mā me ācariyakulassa
avaṇṇo ahosīti bhagavā pana bhante anuttaro purisadammasārathi
kathaṁ pana bhante bhagavā purisadammaṁ vinetīti. Ahaṁ kho kesi purisadammaṁ
saṇhenapi vinemi pharusenapi vinemi saṇhapharusenapi vinemi tatridaṁ
kesi saṇhasmiṁ iti kāyasucaritaṁ iti kāyasucaritassa vipāko iti
vacīsucaritaṁ iti vacīsucaritassa vipāko iti manosucaritaṁ iti
manosucaritassa vipāko iti devā iti manussā 1 tatridaṁ kesi
pharusasmiṁ iti kāyaduccaritaṁ iti kāyaduccaritassa vipāko iti
vacīduccaritaṁ iti vacīduccaritassa vipāko iti manoduccaritaṁ iti
manoduccaritassa vipāko iti nirayo iti tiracchānayoni iti
pittivisayo tatridaṁ kesi saṇhapharusasmiṁ iti kāyasucaritaṁ iti
kāyasucaritassa vipāko iti kāyaduccaritaṁ iti kāyaduccaritassa vipāko
iti vacīsucaritaṁ iti vacīsucaritassa vipāko iti vacīduccaritaṁ iti
vacīduccaritassa vipāko iti manosucaritaṁ iti manosucaritassa vipāko
iti manoduccaritaṁ iti manoduccaritassa vipāko iti devā iti
manussā iti nirayo iti tiracchānayoni iti pittivisayoti.
1 Ma. manussāti.
Sace te bhante purisadammo saṇhena vinayaṁ na upeti pharusena vinayaṁ
na upeti saṇhapharusena vinayaṁ na upeti kinti taṁ bhagavā karotīti.
Sace me kesi purisadammo saṇhena vinayaṁ na upeti pharusena vinayaṁ
na upeti saṇhapharusena vinayaṁ na upeti hanāmi naṁ kesīti. Na kho
no bhante bhagavato pāṇātipāto kappati atha ca pana bhagavā
evamāha hanāmi naṁ kesīti. Saccaṁ kesi na tathāgatassa pāṇātipāto
kappati apica yo purisadammo saṇhena vinayaṁ na upeti pharusena
vinayaṁ na upeti saṇhapharusena vinayaṁ na upeti na taṁ tathāgato
vattabbaṁ anusāsitabbaṁ maññati napi viññū sabrahmacārī vattabbaṁ
anusāsitabbaṁ maññanti suvadhoheso 1 kesi ariyassa vinaye yaṁ na
tathāgato vattabbaṁ anusāsitabbaṁ maññati napi viññū sabrahmacārī
vattabbaṁ anusāsitabbaṁ maññantīti. So hi nūna bhante suvadho 2 hoti
yaṁ na tathāgato vattabbaṁ anusāsitabbaṁ maññati napi viññū sabrahmacārī
vattabbaṁ anusāsitabbaṁ maññanti 3 abhikkantaṁ bhante abhikkantaṁ
bhante seyyathāpi bhante nikkujjitaṁ vā ukkujjeyya paṭicchannaṁ
vā vivareyya mūḷhassa vā maggaṁ ācikkheyya andhakāre vā
telappajjotaṁ dhāreyya cakkhumanto rūpāni dakkhantīti evamevaṁ
bhagavatā anekapariyāyena dhammo pakāsito esāhaṁ bhante bhagavantaṁ
saraṇaṁ gacchāmi dhammañca bhikkhusaṅghañca upāsakaṁ maṁ bhante bhagavā
dhāretu ajjatagge pāṇupetaṁ saraṇaṁ gatanti.
1 Ma. Yu. vadhoheso. 2 Ma. suhato. Yu. sugatahato. 3 Ma. maññantīti.

[112] Catūhi bhikkhave aṅgehi samannāgato rañño bhadro
assājāniyo rājāraho hoti rājabhoggo rañño aṅgantveva saṅkhaṁ
gacchati katamehi catūhi ājjavena 1 javena khantiyā soraccena imehi
kho bhikkhave catūhi aṅgehi samannāgato rañño bhadro assājāniyo
rājāraho hoti rājabhoggo rañño aṅgantveva saṅkhaṁ gacchati. Evameva
kho bhikkhave catūhi dhammehi samannāgato bhikkhu āhuneyyo hoti
pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassa
katamehi catūhi ājjavena javena khantiyā soraccena imehi kho
bhikkhave catūhi dhammehi samannāgato bhikkhu āhuneyyo hoti .pe.
Anuttaraṁ puññakkhettaṁ lokassāti.

[113] Cattārome bhikkhave bhadrā assājāniyā santo
saṁvijjamānā lokasmiṁ katame cattāro idha bhikkhave ekacco bhadro
assājāniyo patodacchāyaṁ disvā saṁvijati 2 saṁvegaṁ āpajjati kinnu 3
kho maṁ ajja assadammasārathi kāraṇaṁ kāressati kimassāhaṁ
paṭikaromīti evarūpopi bhikkhave idhekacco bhadro assājāniyo hoti
ayaṁ bhikkhave paṭhamo bhadro assājāniyo santo saṁvijjamāno lokasmiṁ.
Puna caparaṁ bhikkhave idhekacco bhadro assājāniyo na heva kho
patodacchāyaṁ disvā saṁvijati saṁvegaṁ āpajjati apica kho lomavedhaviddho
saṁvijati saṁvegaṁ āpajjati kinnu kho maṁ ajja assadammasārathi kāraṇaṁ
kāressati kimassāhaṁ paṭikaromīti evarūpopi bhikkhave idhekacco
1 Ma. Yu. ajjavena. 2 Po. Ma. Yu. saṁvijjati. ito paraṁ īdisameva. 3 Yu. kathaṁnu.
Bhadro assājāniyo hoti ayaṁ bhikkhave dutiyo bhadro assājāniyo
santo saṁvijjamāno lokasmiṁ. Puna caparaṁ bhikkhave idhekacco
bhadro assājāniyo na heva kho patodacchāyaṁ disvā saṁvijati saṁvegaṁ
āpajjati napi lomavedhaviddho saṁvijati saṁvegaṁ āpajjati apica kho
cammavedhaviddho saṁvijati saṁvegaṁ āpajjati kinnu kho maṁ ajja
assadammasārathi kāraṇaṁ kāressati kimassāhaṁ paṭikaromīti evarūpopi
bhikkhave idhekacco bhadro assājāniyo hoti ayaṁ bhikkhave tatiyo
bhadro assājāniyo santo saṁvijjamāno lokasmiṁ. Puna caparaṁ bhikkhave
idhekacco bhadro assājāniyo na heva kho patodacchāyaṁ disvā saṁvijati
saṁvegaṁ āpajjati napi lomavedhaviddho saṁvijati saṁvegaṁ āpajjati napi
cammavedhaviddho saṁvijati saṁvegaṁ āpajjati apica kho aṭṭhivedhaviddho
saṁvijati saṁvegaṁ āpajjati kinnu kho maṁ ajja assadammasārathi kāraṇaṁ
kāressati kimassāhaṁ paṭikaromīti evarūpopi bhikkhave idhekacco bhadro
assājāniyo hoti ayaṁ bhikkhave catuttho bhadro assājāniyo santo
saṁvijjamāno lokasmiṁ. Ime kho bhikkhave cattāro bhadrā assājāniyā
santo saṁvijjamānā lokasmiṁ. Evameva kho bhikkhave cattārome bhadrā
purisājāniyā santo saṁvijjamānā lokasmiṁ katame cattāro idha
bhikkhave ekacco bhadro purisājāniyo suṇāti amukasmiṁ nāma gāme
vā nigame vā itthī vā puriso vā dukkhito vā kālakato vāti
so tena saṁvijati saṁvegaṁ āpajjati saṁviggo yoniso padahati pahitatto
Kāyena ceva paramasaccaṁ sacchikaroti paññāya ca ativijjha passati
seyyathāpi so bhikkhave bhadro assājāniyo patodacchāyaṁ disvā
saṁvijati saṁvegaṁ āpajjati tathūpamāhaṁ bhikkhave imaṁ bhadraṁ purisājāniyaṁ
vadāmi evarūpopi bhikkhave idhekacco bhadro purisājāniyo hoti
ayaṁ bhikkhave paṭhamo bhadro purisājāniyo santo saṁvijjamāno lokasmiṁ.
Puna caparaṁ bhikkhave idhekacco bhadro purisājāniyo na heva kho suṇāti
amukasmiṁ nāma gāme vā nigame vā itthī vā puriso vā dukkhito
vā kālakato vāti apica kho sāmaṁ passati itthiṁ vā purisaṁ vā
dukkhitaṁ vā kālakataṁ vā so tena saṁvijati saṁvegaṁ āpajjati saṁviggo
yoniso padahati pahitatto kāyena ceva paramasaccaṁ sacchikaroti
paññāya ca ativijjha passati seyyathāpi so bhikkhave bhadro
assājāniyo lomavedhaviddho saṁvijati saṁvegaṁ āpajjati tathūpamāhaṁ
bhikkhave imaṁ bhadraṁ purisājāniyaṁ vadāmi evarūpopi bhikkhave idhekacco
bhadro purisājāniyo hoti ayaṁ bhikkhave dutiyo bhadro purisājāniyo
santo saṁvijjamāno lokasmiṁ. Puna caparaṁ bhikkhave idhekacco bhadro
purisājāniyo na heva kho suṇāti amukasmiṁ nāma gāme vā nigame
vā itthī vā puriso vā dukkhito vā kālakato vāti napi sāmaṁ
passati itthiṁ vā purisaṁ vā dukkhitaṁ vā kālakataṁ vā apica khvassa
ñāti vā sālohito vā dukkhito vā hoti kālakato vā so
tena saṁvijati saṁvegaṁ āpajjati saṁviggo yoniso padahati pahitatto
Kāyena ceva paramasaccaṁ sacchikaroti paññāya ca ativijjha passati
seyyathāpi so bhikkhave bhadro assājāniyo cammavedhaviddho saṁvijati
saṁvegaṁ āpajjati tathūpamāhaṁ bhikkhave imaṁ bhadraṁ purisājāniyaṁ vadāmi
evarūpopi bhikkhave idhekacco bhadro purisājāniyo hoti ayaṁ bhikkhave
tatiyo bhadro purisājāniyo santo saṁvijjamāno lokasmiṁ. Puna caparaṁ
bhikkhave idhekacco bhadro purisājāniyo na heva kho suṇāti amukasmiṁ
nāma gāme vā nigame vā itthī vā puriso vā dukkhito vā
kālakato vāti napi sāmaṁ passati itthiṁ vā purisaṁ vā dukkhitaṁ vā
kālakataṁ vā napissa ñāti vā sālohito vā dukkhito vā hoti
kālakato vā apica kho sāmaññeva phuṭṭho hoti sārīrikāhi
vedanāhi dukkhāhi tibbāhi kharāhi kaṭukkāhi asātāhi amanāpāhi
pāṇaharāhi so tena saṁvijati saṁvegaṁ āpajjati saṁviggo yoniso
padahati pahitatto kāyena ceva paramasaccaṁ sacchikaroti paññāya ca
ativijjha passati seyyathāpi so bhikkhave bhadro assājāniyo
aṭṭhivedhaviddho saṁvijati saṁvegaṁ āpajjati tathūpamāhaṁ bhikkhave imaṁ
bhadraṁ purisājāniyaṁ vadāmi evarūpopi bhikkhave idhekacco bhadro
purisājāniyo hoti ayaṁ bhikkhave catuttho bhadro purisājāniyo santo
saṁvijjamāno lokasmiṁ. Ime kho bhikkhave cattāro bhadrā purisājāniyā
santo saṁvijjamānā lokasminti.

[114] Catūhi bhikkhave aṅgehi samannāgato rañño nāgo
Rājāraho hoti rājabhoggo rañño aṅgantveva saṅkhaṁ gacchati katamehi
catūhi idha bhikkhave rañño nāgo sotā ca hoti hantā ca
khantā ca gantā ca. Kathañca bhikkhave rañño nāgo sotā hoti
idha bhikkhave rañño nāgo yamenaṁ hatthidammasārathi kāraṇaṁ kāreti
yadi vā katapubbaṁ yadi vā akatapubbaṁ taṁ aṭṭhikatvā manasikatvā
sabbaṁ cetaso samannāharitvā ohitasoto suṇāti evaṁ kho bhikkhave
rañño nāgo sotā hoti. Kathañca bhikkhave rañño nāgo hantā
hoti idha bhikkhave rañño nāgo saṅgāmagato hatthimpi hanati
hatthārūhampi 1 hanati assampi hanati assārūhampi 2 hanati rathampi hanati
rathikampi hanati pattikampi hanati evaṁ kho bhikkhave rañño nāgo
hantā hoti. Kathañca bhikkhave rañño nāgo khantā hoti idha
bhikkhave rañño nāgo saṅgāmagato khamo hoti sattippahārānaṁ
asippahārānaṁ usuppahārānaṁ [3]- bheripaṇavasaṅkhatiṇavaninnādasaddānaṁ
evaṁ kho bhikkhave rañño nāgo khantā hoti. Kathañca bhikkhave
rañño nāgo gantā hoti idha bhikkhave rañño nāgo yamenaṁ
hatthidammasārathi disaṁ peseti yadi vā gatapubbaṁ yadi vā agatapubbaṁ
taṁ khippaññeva gantā hoti evaṁ kho bhikkhave rañño nāgo gantā
hoti. Imehi kho bhikkhave catūhi aṅgehi samannāgato rañño
nāgo rājāraho hoti rājabhoggo rañño aṅgantveva saṅkhaṁ gacchati.
Evameva kho bhikkhave catūhi dhammehi samannāgato bhikkhu āhuneyyo
1-2 Po. hatthārohaṁpi assārohaṁpi. 3 Po. Ma. Yu. pharasuppahārānaṁ.
Hoti pāhuneyyo dakkhiṇeyyo añjalikaraṇīyo anuttaraṁ puññakkhettaṁ
lokassa katamehi catūhi idha bhikkhave bhikkhu sotā ca hoti hantā
ca khantā ca gantā ca. Kathañca bhikkhave bhikkhu sotā hoti idha
bhikkhave bhikkhu tathāgatappavedite dhammavinaye desiyamāne aṭṭhikatvā
manasikatvā sabbaṁ cetaso samannāharitvā ohitasoto dhammaṁ suṇāti
evaṁ kho bhikkhave bhikkhu sotā hoti. Kathañca bhikkhave bhikkhu hantā
hoti idha bhikkhave bhikkhu uppannaṁ kāmavitakkaṁ nādhivāseti pajahati
vinodeti byantīkaroti anabhāvaṁ gameti uppannaṁ byāpādavitakkaṁ
nādhivāseti pajahati vinodeti byantīkaroti anabhāvaṁ gameti uppannaṁ
vihiṁsāvitakkaṁ nādhivāseti pajahati vinodeti byantīkaroti anabhāvaṁ gameti
uppannuppanne pāpake akusale dhamme nādhivāseti pajahati vinodeti
byantīkaroti anabhāvaṁ gameti evaṁ kho bhikkhave bhikkhu hantā
hoti. Kathañca bhikkhave bhikkhu khantā hoti idha bhikkhave bhikkhu khamo
hoti sītassa uṇhassa jighacchāya pipāsāya ḍaṁsamakasavātātapasiriṁsapasamphassānaṁ
duruttānaṁ durāgatānaṁ vacanapathānaṁ uppannānaṁ sārīrikānaṁ
vedanānaṁ dukkhānaṁ tibbānaṁ kharānaṁ kaṭukānaṁ asātānaṁ amanāpānaṁ
pāṇaharānaṁ adhivāsakajātiko hoti evaṁ kho bhikkhave bhikkhu khantā hoti.
Kathañca bhikkhave bhikkhu gantā hoti idha bhikkhave bhikkhu yā [1]- disā
agatapubbā iminā dīghena addhunā yadidaṁ sabbasaṅkhārasamatho sabbūpadhipaṭinissaggo
taṇhakkhayo virāgo nirodho nibbānaṁ taṁ khippaññeva
1 Ma. yāyaṁ. Yu. yā sā.
Gantā hoti evaṁ kho bhikkhave bhikkhu gantā hoti. Imehi kho
bhikkhave catūhi dhammehi samannāgato bhikkhu āhuneyyo hoti pāhuneyyo
dakkhiṇeyyo añjalikaraṇīyo anuttaraṁ puññakkhettaṁ lokassāti.

[115] Cattārīmāni bhikkhave ṭhānāni katamāni cattāri atthi
bhikkhave ṭhānaṁ amanāpaṁ kātuṁ tañca kayiramānaṁ anatthāya saṁvattati
atthi bhikkhave ṭhānaṁ amanāpaṁ kātuṁ tañca kayiramānaṁ atthāya saṁvattati
atthi bhikkhave ṭhānaṁ manāpaṁ kātuṁ tañca kayiramānaṁ anatthāya
saṁvattati atthi bhikkhave ṭhānaṁ manāpaṁ kātuṁ tañca kayiramānaṁ atthāya
saṁvattati. Tatra bhikkhave yadidaṁ 1 ṭhānaṁ amanāpaṁ kātuṁ tañca kayiramānaṁ
anatthāya saṁvattati idaṁ bhikkhave ṭhānaṁ ubhayeneva na kattabbaṁ
maññati yampidaṁ ṭhānaṁ amanāpaṁ kātuṁ imināpi [2]- na kattabbaṁ maññati
yampidaṁ ṭhānaṁ kayiramānaṁ anatthāya saṁvattati imināpi [3]- na kattabbaṁ
maññati idaṁ bhikkhave ṭhānaṁ ubhayeneva na kattabbaṁ maññati.
Tatra bhikkhave yadidaṁ ṭhānaṁ amanāpaṁ kātuṁ tañca kayiramānaṁ
atthāya saṁvattati imasmiṁ bhikkhave ṭhāne bālo ca paṇḍito ca
veditabbo purisatthāme purisaviriye purisaparakkame na bhikkhave bālo
iti paṭisañcikkhati kiñcāpi kho idaṁ ṭhānaṁ amanāpaṁ kātuṁ athacarahīdaṁ
ṭhānaṁ kayiramānaṁ atthāya saṁvattatīti so taṁ ṭhānaṁ na karoti
tassa taṁ ṭhānaṁ akayiramānaṁ anatthāya saṁvattati paṇḍito ca kho
bhikkhave iti paṭisañcikkhati kiñcāpi kho idaṁ ṭhānaṁ amanāpaṁ kātuṁ
1 Po. Ma. yamidaṁ. 2-3 Ma. naṁ.
Athacarahīdaṁ ṭhānaṁ kayiramānaṁ atthāya saṁvattatīti so taṁ ṭhānaṁ karoti
tassa taṁ ṭhānaṁ kayiramānaṁ atthāya saṁvattati. Tatra bhikkhave yadidaṁ ṭhānaṁ
manāpaṁ kātuṁ tañca kayiramānaṁ anatthāya saṁvattati imasmiṁpi bhikkhave
ṭhāne bālo ca paṇḍito ca veditabbo purisatthāme purisaviriye
purisaparakkame na bhikkhave bālo iti paṭisañcikkhati kiñcāpi kho
idaṁ ṭhānaṁ manāpaṁ kātuṁ athacarahīdaṁ ṭhānaṁ kayiramānaṁ anatthāya saṁvattatīti
so taṁ ṭhānaṁ karoti tassa taṁ ṭhānaṁ kayiramānaṁ anatthāya saṁvattati paṇḍito
ca kho bhikkhave iti paṭisañcikkhati kiñcāpi kho idaṁ ṭhānaṁ manāpaṁ
kātuṁ athacarahīdaṁ ṭhānaṁ kayiramānaṁ anatthāya saṁvattatīti so taṁ ṭhānaṁ
na karoti tassa taṁ ṭhānaṁ akayiramānaṁ atthāya saṁvattati. Tatra
bhikkhave yadidaṁ ṭhānaṁ manāpaṁ kātuṁ tañca kayiramānaṁ atthāya saṁvattati
idaṁ bhikkhave ṭhānaṁ ubhayeneva kattabbaṁ maññati yampidaṁ ṭhānaṁ manāpaṁ
kātuṁ imināpi kattabbaṁ maññati yampidaṁ ṭhānaṁ kayiramānaṁ atthāya
saṁvattati imināpi kattabbaṁ maññati idaṁ bhikkhave ṭhānaṁ ubhayeneva
kattabbaṁ maññati. Imāni kho bhikkhave cattāri ṭhānānīti.

[116] Catūhi bhikkhave ṭhānehi appamādo karaṇīyo katamehi
catūhi kāyaduccaritaṁ bhikkhave pajahatha kāyasucaritaṁ bhāvetha tattha ca mā
pamādattha vacīduccaritaṁ bhikkhave pajahatha vacīsucaritaṁ bhāvetha tattha ca
mā pamādattha manoduccaritaṁ bhikkhave pajahatha manosucaritaṁ bhāvetha
tattha ca mā pamādattha micchādiṭṭhiṁ bhikkhave pajahatha sammādiṭṭhiṁ
Bhāvetha tattha ca mā pamādattha yato kho bhikkhave bhikkhuno kāyaduccaritaṁ
pahīnaṁ hoti kāyasucaritaṁ bhāvitaṁ vacīduccaritaṁ pahīnaṁ hoti vacīsucaritaṁ
bhāvitaṁ manoduccaritaṁ pahīnaṁ hoti manosucaritaṁ bhāvitaṁ micchādiṭṭhi pahīnā
hoti sammādiṭṭhi bhāvitā so na bhāyati samparāyikassa maraṇassāti.

[117] Catūsu bhikkhave ṭhānesu attarūpena appamādo
saticetasoārakkho karaṇīyo katamesu catūsu mā me rajanīyesu dhammesu
cittaṁ rajjīti attarūpena appamādo saticetasoārakkho karaṇīyo mā
me dosanīyesu dhammesu cittaṁ dussīti attarūpena appamādo
saticetasoārakkho karaṇīyo mā me mohanīyesu dhammesu cittaṁ muyhīti
attarūpena appamādo saticetasoārakkho karaṇīyo mā me madanīyesu
dhammesu cittaṁ majjīti attarūpena appamādo saticetasoārakkho karaṇīyo
yato kho bhikkhave bhikkhuno rajanīyesu dhammesu cittaṁ na rajjati vītarāgattā
dosanīyesu dhammesu cittaṁ na dussati vītadosattā mohanīyesu
dhammesu cittaṁ na muyhati vītamohattā madanīyesu dhammesu
cittaṁ na majjati vītamadattā so nacchambhati na kampati na vedhati na
santāsaṁ āpajjati na ca pana samaṇavacanahetupi gacchatīti.

[118] Cattārīmāni bhikkhave saddhassa kulaputtassa dassanīyāni
saṁvejanīyāni ṭhānāni katamāni cattāri idha tathāgato jātoti
bhikkhave saddhassa kulaputtassa dassanīyaṁ saṁvejanīyaṁ ṭhānaṁ idha tathāgato
Anuttaraṁ sammāsambodhiṁ abhisambuddhoti bhikkhave saddhassa kulaputtassa
dassanīyaṁ saṁvejanīyaṁ ṭhānaṁ idha tathāgato anuttaraṁ dhammacakkaṁ pavattesīti
bhikkhave saddhassa kulaputtassa dassanīyaṁ saṁvejanīyaṁ ṭhānaṁ idha tathāgato
anupādisesāya nibbānadhātuyā parinibbutoti bhikkhave saddhassa kulaputtassa
dassanīyaṁ saṁvejanīyaṁ ṭhānaṁ. Imāni kho bhikkhave cattāri
saddhassa kulaputtassa dassanīyāni saṁvejanīyāni ṭhānānīti.

[119] Cattārīmāni bhikkhave bhayāni katamāni cattāri jātibhayaṁ
jarābhayaṁ byādhibhayaṁ maraṇabhayaṁ imāni kho bhikkhave cattāri
bhayānīti.