[170] Aṭṭhānametaṁ bhikkhave anavakāso yaṁ kāyasucaritassa
aniṭṭho akanto amanāpo vipāko nibbatteyya netaṁ ṭhānaṁ vijjati
Ṭhānañca kho etaṁ bhikkhave vijjati yaṁ kāyasucaritassa iṭṭho kanto
manāpo vipāko nibbatteyya ṭhānametaṁ vijjatīti.

[171] Aṭṭhānametaṁ bhikkhave anavakāso yaṁ vacīsucaritassa .pe.

[172] Aṭṭhānametaṁ bhikkhave anavakāso yaṁ manosucaritassa
aniṭṭho akanto amanāpo vipāko nibbatteyya netaṁ ṭhānaṁ vijjati
ṭhānañca kho etaṁ bhikkhave vijjati yaṁ manosucaritassa iṭṭho kanto
manāpo vipāko nibbatteyya ṭhānametaṁ vijjatīti.

[173] Aṭṭhānametaṁ bhikkhave anavakāso yaṁ kāyaduccaritasamaṅgī
tannidānā tappaccayā kāyassa bhedā parammaraṇā sugatiṁ saggaṁ lokaṁ
upapajjeyya netaṁ ṭhānaṁ vijjati ṭhānañca kho etaṁ bhikkhave
vijjati yaṁ kāyaduccaritasamaṅgī tannidānā tappaccayā kāyassa bhedā
parammaraṇā apāyaṁ duggatiṁ vinipātaṁ nirayaṁ upapajjeyya ṭhānametaṁ
vijjatīti.

[174] Aṭṭhānametaṁ bhikkhave anavakāso yaṁ vacīduccaritasamaṅgī
.pe.

[175] Aṭṭhānametaṁ bhikkhave anavakāso yaṁ manoduccaritasamaṅgī
tannidānā tappaccayā kāyassa bhedā parammaraṇā sugatiṁ saggaṁ lokaṁ
upapajjeyya netaṁ ṭhānaṁ vijjati ṭhānañca kho etaṁ bhikkhave
vijjati yaṁ manoduccaritasamaṅgī tannidānā tappaccayā kāyassa bhedā
parammaraṇā apāyaṁ duggatiṁ vinipātaṁ nirayaṁ upapajjeyya ṭhānametaṁ
Vijjatīti.

[176] Aṭṭhānametaṁ bhikkhave anavakāso yaṁ kāyasucaritasamaṅgī
tannidānā tappaccayā kāyassa bhedā parammaraṇā apāyaṁ duggatiṁ
vinipātaṁ nirayaṁ upapajjeyya netaṁ ṭhānaṁ vijjati ṭhānañca kho etaṁ
bhikkhave vijjati yaṁ kāyasucaritasamaṅgī tannidānā tappaccayā kāyassa
bhedā parammaraṇā sugatiṁ saggaṁ lokaṁ upapajjeyya ṭhānametaṁ vijjatīti.

[177] Aṭṭhānametaṁ bhikkhave anavakāso yaṁ vacīsucaritasamaṅgī
.pe.

[178] Aṭṭhānametaṁ bhikkhave anavakāso yaṁ manosucaritasamaṅgī
tannidānā tappaccayā kāyassa bhedā parammaraṇā apāyaṁ duggatiṁ
vinipātaṁ nirayaṁ upapajjeyya netaṁ ṭhānaṁ vijjati ṭhānañca kho etaṁ
bhikkhave vijjati yaṁ manosucaritasamaṅgī tannidānā tappaccayā kāyassa
bhedā parammaraṇā sugatiṁ saggaṁ lokaṁ upapajjeyya ṭhānametaṁ
vijjatīti.
Vaggo tatiyo. 1
Aparā ekadhammādipāli

[179] Ekadhammo bhikkhave bhāvito bahulīkato ekantanibbidāya
virāgāya nirodhāya upasamāya abhiññāya sambodhāya nibbānāya saṁvattati
katamo ekadhammo buddhānussati ayaṁ kho bhikkhave ekadhammo bhāvigo
bahulīkato ekantanibbidāya virāgāya nirodhāya upasamāya abhiññāya
1 Ma. aṭṭhānapāli niṭṭhitā.
Sambodhāya nibbānāya saṁvattatīti.